Просечната нето-плата во мај изнесувала 24.509 денари


Скопје, 20 јули, 2018 - 13:23 (META) 

Просечната месечна исплатена нето-плата по вработен во мај изнесувала 24.509 денари и во однос на истиот месец лани има зголемување од 7,1 проценти, објави Државниот завод за статистика (ДЗС). Бруто-платата изнесувала 35.983 денари.

„Ваквото зголемување се должи, пред се на зголемувањето на просечната месечна исплатена нето-плата по вработен во секторите објекти за сместување и сервисни дејности со храна (23,1 проценти), финансиски дејности и дејности на осигурување (17,4  проценти) и информации и комуникации (15,3 проценти)“, се вели во соопштението на ДЗС.


Просечната нето-плата во април изнесувала 23.942 денари


Скопје, 22 јуни, 2018 - 15:41 (META) 

Просечната месечна исплатена нето-плата по вработен, во април изнесувала 23.942 денари и е зголемена за 5,6 проценти во однос на истиот месец лани, објави Државниот завод за статистика. Бруто-платата за април изнесувала 35.117 денари.

Ваквото зголемување се должи, пред се на зголемувањето на просечната месечна исплатена нето-плата по вработен во секторите рударство и вадење на камен (32,2 отсто), преработувачка индустрија (13 отсто) и објекти за сместување и сервисни дејности со храна (11,4 отсто).

Зголемување на просечната месечна исплатена нето-плата по вработен, во однос на претходниот месец, е забележано и во секторите административни и помошни услужни дејности (4 отсто) и трговија на големо и трговија на мало, поправка на моторни возила и мотоцикли (3,7 отсто).


Македонија се оддалечува од просекот на ЕУ по бројот на загинати во сообраќајки


Скопје, 31 мај, 2018 - 13:39 (META) 

Наместо да се приближиме до просекот на Европската Унија по бројот на загинати во сообраќајни несреќи, како што е предвидено со Националната стратегија, ние се оддалечуваме, покажува најновата анализа на „ДАТА“.

Според анализата, во 2005 година, како што се гледа од визуелизацијата подолу, Македонија била далеку подобра од просекот во ЕУ. Тогаш бројот на загинати во сообраќајни несреќи на 100.000 жители бил 7, а во ЕУ бил 9,3.

Во 2013 година македонскиот просек се зголемил на 9,5 а европскиот паднал на 5,1.

Во 2017 година, вкупниот број на загинати лица во сообраќајни несреќи е 155, а 24 проценти од нив се на територија на СВР Скопје. Сообраќајните незгоди со смртоносни последици во 2017 година најчесто се случувале во месец јули, во сабота, помеѓу 12 часот на пладне и 20 часот навечер.

Така, 19 проценти од сите несреќи со трагични последици во 2017 година се случиле во месец јули, 18 проценти се случиле во сабота, а дури 43 проценти се случиле во попладневните часови, од 12 до 20 часот.

Објавените визуелизации се дел од проектот D.A.T.A. – Data Analytics for Transparency and Accountability имплементиран од Фондацијата за интернет и општество „Метаморфозис“.

Овој проект е делумно поддржан од Амбасадата на САД. Мислењата, откритијата и заклучоците или препораките изнесени овде се на имплементаторите/авторите, и не ги одразуваат оние на Владaта на САД.


ВМРО-ДПМНЕ: Секое домаќинство во просек плаќа 12.000 денари повеќе за дизел од лани


Скопје, 29 мај, 2018 - 9:30 (META) 

СДСМ удри по најсиромашните, секое домаќинство во просек плаќа 12.000 денари повеќе за дизел од лани, се вели во соопштението на ВМРО-ДПМНЕ.

Во него се додава дека „СДСМ не работи за граѓаните, затоа и ја покачи акцизата за 3,5 денари.“

„Тоа предизвика директен трошок од над 40 милиони евра за граѓаните и за стопанството, а во исто време ја поттикна спиралата на раст на цените, со што трошокот за граѓаните е неколкукратно поголем. Фрапантни се бројките кои покажуваат дека со една просечна плата во јуни 2017 година се купувале 487 литри дизел, а сега да можат да се купат само 364 литри, односно 123 литри помалку“, се додава во соопштението.

ВМРО-ДПМНЕ ги повикува сите граѓани кои не се сложуваат со, како што велат, економската катастрофа која и се случува на државата на 2 јуни во 20 часот пред Владата, да излезат и да кажат „НЕ за економскиот колапс, за распродажбата на националните интереси, за заробената држава и партизираното судство.“


Административците со плати од 300 до 1.500 евра – далеку над македонскиот просек


Скопје, 16 мај, 2018 - 12:12 (META) 

Просечната месечна нето-плата во администрацијата се движи од 18.174 денари до 90.215 денари, покажува анализата направена од Фондацијата за демократија на „Вестминстер“ во рамките на проектот „Поддршка на македонската парламентарна реформа “.

Анализата покажува дека најголеми средства за бруто и нето плати по вработен на месечно ниво во 2016 година се издвоени за Агенцијата за странски инвестиции и промоција на извозот, и тоа по 96.071 денар просечна бруто, осносно 63.854 денари просечна нето-плата по вработен.

А најниски месечни расходи за бруто и нето плати во 2016 година биле реализирани во Секретаријатот за спроведување на Рамковниот договор со најниска месечна бруто-плата од 26.542 денари, или 18.174 денари месечна нето-плата по вработен.

„Од 2010 година до денес, може да се забележи тренд на зголемување на просечната месечна бруто плата во секторот јавна управа и одбрана и задолжително социјално осигурување и тоа од 36.800 во 2010 на 41.300 на крајот на 2017. Ваквиот тренд на зголемување е поголем од зголемувањето на просечната месена бруто-плата која од 30.225 денари во 2010 година се искачи на 34.079 денари. Исто така, значајно е да се напомене дека бројот на вработени во секторот јавна управа и одбрана и задолжително социјално осигурување е во постојан пораст и од 42.474 во 2010, се искачил на 47.364 во 2016, што претставува околу 15 отсто од вкупно вработените во Република Македонија за време на анализираниот период“, се вели во анализата.

Извештајот исто така покажува дека, според податоците во буџетот за 2016 година, просечниот износ за плати и надоместоци по вработен кај сите буџетските корисници на централниот буџет изнесува 42.563 денари, што е за скоро 10.000 денари поголем износ во однос на просечната бруто-плата во  Македонија за 2016 година. Или просечната месечна нето-плата по вработен кај сите буџетски кориници за 2016 година изнесува 28.700 денари, што пак е поголема за 6.360 денари од просечната месечна нето-плата во државата.

„Што се однесува пак до платите во регулаторните тела, може да се забележи дека просечните бруто и нето плати на сите 10 институции се поголеми од просечната бруто и нето-плата во државата. Тие се движат од 58.291 денар месечна бруто, односно 39.033 просечна месечна нето-плата по вработен, во Комисијата за аудио и аудиовизуелни медиумски услуги, до 136.194 денари просечна месечна бруто или 90.215 денари просечна месечна нето плата по вработен, во Регулаторната комисија за домување“, се додава во извештајот.

Оваа анализа е првично изработена за потребите на пратениците во Собранието на Република Македонија, со цел да им даде дополнителни информации кои би ги користеле во рамките на собраниската дебата, како и да им помогне во вршење на поквалитетен финансиски надзор врз работата на извршната власт.


Исплатата на субвенциите за тутунот ќе почне в четврток


Скопје, 15 мај, 2018 - 14:26 (META) 

Исплатата на субвенциите за тутунот од реколтата 2017, ќе почне в четврток информираат од Министерство за земјоделство, шумарство и водостопанство (МЗШВ).

Според податоците од Агенцијата за финансиска поддршка, во земјоделството и руралниот развој зголемени субвенции ќе добијат над 23.400 тутунари, по просечна цена од 217,6 денари за килограм.

„Со новиот начин на зголемено субвенционирање во три нивоа кој започнува со реколтата 2017, субвенцијата за прва класа тутун е 80 денари субвенција, за втора класа 70 денари и 60 денари е третото ниво за трета и четврта класа како и за дополнителни класи. Целта на новиот модел на субвенционирање е да се поттикнат тутунарите да произведуваат поквалитетен тутун за да добијат повисока субвенција“, се вели во соопштението на МЗШВ.


„Фајненс тинк“: Просечната нето-плата годинава ќе се движи околу 24.000 денари


Скопје, 24 април, 2018 - 12:15 (META) 

Просечната нето плата за 2018 година ќе се движи околу 24.000 денари, предвидува Институтот за економски и политички истражувања „Фајненс тинк“.

Порастот на просечната плата во јануари, според нив, не може да се толкува дека е резултат на порастот на минималната плата.

„Уште при објавувањето на јануарскиот податок за нето платата, „Фајненс тинк“ укажа дека се работи главно за сезонски ефект, кој што се јавува вообичаено поради исплаќањето годишни додатоци на плата, а не се должи на порастот на минималната плата. Доколку се набљудува долгорочен тренд на платите тогаш тој е недвосмислено растечки, што делумно се должи и на порастот на минималната плата од октомври 2017“, велат од „Фајненс тинк“.

Од таму додаваат дека значителниот пад на платата во февруари 2018, на месечно ниво од 3,6 проценти е сезонски ефект, главно поради пократок месец, и не се должи на потенцијално лоши економски фундаменти.


Просечната нето-плата во јануари изнесувала 24.025 денари


Скопје, 23 март, 2018 - 14:53 (META) 

Просечната месечна нето-плата исплатена во јануари изнесува 24.025 денари и е зголемена за 5,5 отсто во однос на истиот месец лани, објави Државниот завод за статистика (ДЗС).

Ваквото зголемување се должи на зголемувањето на просечната нето-плата по вработен во секторите уметност, забава и рекреација (37,3 проценти), рударство и вадење на камен (20.3 проценти) и земјоделство, шумарство и рибарство (12,5 проценти).

Од ДЗС исто така известија дека го промениле досегашниот начин на прибирање на податоците за плати, односно од хартиени обрасци чиј извор биле деловните субјекти, преминале кон користење податоци од Управата за јавни приходи.

„Промената е направена со цел да се намали оптовареноста на извештајните единици и да се подобри квалитетот на податоците“, информираат од ДЗС.


Просечната нето-плата во декември изнесувала 23.850 денари


Скопје, 22 февруари, 2018 - 14:31 (META) 

Просечната месечна исплатена нето-плата по вработен, во декември 2017 година изнесувала 23.850 денари и е повисока за 1,7 отсто од декември 2016 година, соопшти Државниот завод за статистика.

Зголемување се должи, пред сè, на повисоката исплатена нето-плата во секторите други услужни дејности (9,8 отсто), преработувачка индустрија (9,3 отсто) и објекти за сместување и сервисни дејности со храна (8,9 отсто).

Просечната бруто-плата пак изнесувала 35.017 денари. Во декември 2017 година, 1,2 отсто од вработените во Република Македонија не зеле плата.


Просечната нето-плата изнесува 23.196 денари


Скопје, 23 јануари, 2018 - 13:25 (META) 

Просечната месечна исплатена нето-плата по вработен во ноември лани, изнесувала 23.196 денари и во однос на истиот месец во 2016 година е зголемена за 3.6 проценти, објави Државниот завод за статистика. Просечната месечна исплатена бруто-плата изнесува 34. 079 денари.

Ваквото зголемување се должи, пред сé на зголемувањето на просечната месечна исплатена нето-плата по вработен во секторите преработувачка индустрија (8,9 проценти), објекти за сместување и сервисни дејности со храна (8,7 проценти) и земјоделство, шумарство и рибарство (7,6 проценти).

Во ноември лани, 1,1 процент од вработените во Македонија не зеле плата.