!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Охрид е на листата на градови што годинава треба да се посетат, според „Лонли планет“


Охрид, 25 февруари, 2017 - 17:22 (META) 

Една од најголемите туристички компании „Лонли планет“ (Lonely Planet) објави листа на 10 градови во светот, кои треба да се посетат оваа година, а меѓу нив, на петто место е и Охрид.

Според оваа листа, Бордо во Франција е прогласен за најдобар град на светот за патување за оваа година, на второто место е Кејптаун, додека третата позиција е за Лос Анџелес.

Во пресрет на туристичката сезона, Охрид се промовира на бројни саеми за туризам низ Европа, а постојано од странските интернет-агенции се објавуваат и промотивни текстови, во кои се опишуваат убавините и културните богатства на градот.

Оваа листа ја објави и британскиот медиум „Индепендент“.


Офицерите и подофицерите на АРМ со нови униформи


Скопје, 24 февруари, 2017 - 17:55 (META) 

Со церемонија во Домот на АРМ во Скопје, денеска Министерството за одбрана ги промовираше новите службени униформи за офицерите и за подофицерите на АРМ, кои од денеска ќе бидат во употреба.

Униформите ги претстави министерот за одбрана, Зоран Јолевски, кој посочи дека службените униформи се македонски производ – производството на ткаенината и шиењето е извршено во Македонија. Набавката е реализирана во 2015 година, во 2016 се вршело шиењето, а како што рече Јолевски, од 20 елементи за секоја униформа, 19 се веќе предадени на АРМ и се во нејзините магацини.

Одговарајќи на новинарски прашања, министерот Јолевски посочи дека се планира и набавка на нови 7.000 парчиња од воено-теренската униформа.


СДСМ: Македонија е трета во Европа по најлоши резултати на преживување од рак


Скопје, 16 февруари, 2017 - 12:54 (META) 

Европскиот здравствен индекс (ЕХЦИ), едно од најрелевантните истражувања за Европската комисија, за 2016 година покажа дека Македонија е трета во Европа по најлоши резултати на преживување на болни од малигни заболувања, се вели во соопштението на СДСМ.

Во него се додава дека, „10 години граѓаните болни од рак немаат достапни современи терапии.“

– За Никола Тодоров и за Никола Груевски беа поважни гипс картоните од 630 милиони евра за „Скопје 2014“, грамадното здание за нивното партиско седиште ВМРО-ДПМНЕ, тешко, според некои проценки до 30 милиони евра. Па и милионските тендери за наводна медицинска опрема од коишто корист има само во џебовите на криминалната власт – се додава во соопштението.

Од СДСМ велат дека новите лекови кои се промовираа се стари и повеќе од 10 години.

-Лекот „сорафениб“ за карционом на црн дроб е во употреба веќе 10 години, „оксалиплатин“ е 21 година во употреба, „бевацизумаб“ е лек со лиценца од пред 11 години. Да мислеа тие на граѓаните болни од рак, ќе им ги донесеа лековите на луѓето пред 10 години – велат од СДСМ и препорачуваат да престанат манипулациите со оваа ранлива категорија на граѓани.

 


Промоција на книгата „Македонскиот народ во Албанија“ од Спасе Мазенковски


Прилеп, 4 февруари, 2017 - 11:19 (META) 

Во организација на Иницијативата за семакедонско обединување од Прилеп, ќе се одржи промоција на книгата „Македонскиот народ во Албанија“, чиј автор е Спасе Мазенковски, интелектуалец, новинар од селото Леска во Мала Преспа, Албанија.

Настанот е закажан за 18 часот, во градската библиотека „Борка Талески“, додека промотор е професор д-р Виолета Ачкоска.

Книгата содржи повеќе податоци за етничките Македонци во Република Албанија, нивниот живот и културната афирмација.
Промоцијата на книгата е по повод одбележувањето на 145-годишнината од раѓањето на великанот на македонското револуционерно движење Гоце Делчев, извести електронскиот весник на македонски јазик „Илинден“.


Промоција на проектот за граѓанско учество на УСАИД во Струга


Струга, 17 јануари, 2017 - 11:28 (META) 

Денеска, во хотел „Дрим“ во Струга, на јавна презентација ќе биде промовиран проектот за граѓанско учество на УСАИД.

Целта на презентациите е да се информира граѓанското општество, јавниот и приватниот сектор, медиумите и општата јавност за целите на проектот и за можностите за грантови.

Проектот за граѓанско учество е имплементиран од страна на „Ист вест менаџмент институт“ (East West Management Institute-ЕWMI), во партнерство со четири граѓански организации: Фондацијата за интернет и општество „Метаморфозис“, Асоцијацијата за демократски иницијативи (АДИ), Фондацијата „Отворено општество“ – Македонија (ФООМ) и Националниот младински совет на Македонија (НМСМ).


Вечерва промоција на документарниот филм „Танцот со пастрмките“


Охрид, 17 јануари, 2017 - 10:23 (META) 

Вечерва, од 19 часот, во Центарот за култура „Григор Прличев“, ќе биде промовиран документарниот филм „Танцот со пастрмките“, на кој во изминативе неколку години работеа членови на Нуркачкиот центар „Амфора“, од Охрид.

– Филмот е сниман пет години во водите на Охридско Езеро, за време на мрестот на пастрмката. По промоцијата на филмот, ќе следи и изложба на подводни фотографии. Собраните средства од продажбата на фотографиите ќе бидат наменети за социјално загрозените граѓани – вели Милутин Секулоски од „Амфора“.

Освен филм, ќе се одржи и изложба на атрактивни досега неприкажани подводни фотографии, која е од продажен и хуманитарен карактер.

Со овој настан почнуваат активностите за одбележување на големиот верски празник Богојавление – Водици, во четврток на 19 јануари, кога во Охрид се очекуваат и голем број гости од земјава и од странство.

Од 7 часот почнува богослужба во сите парохиски храмови, а во 8.30 часот ќе почне светата божествена литургија, по што во 9.45 часот ќе следи поаѓање на литијата кон градското пристаниште, каде во 10 часот ќе се фрла крстот во осветените езерски води.


Промоција на романот „Ние сме лудаци“ од Сашо Кокаланов


Скопје, 7 декември, 2016 - 11:13 (META) 

Романот „Ние сме лудаци“ од Сашо Кокаланов ќе биде промовиран вечерва во клуб-ресторанот МКЦ во 20 часот.

Промотори се Оливера Ќорвезироска, Сашко Насев и Ѕвездан Георгиевски, кои за романот ќе кажат дека е политичко-сатиричен, исконструиран и нестварен речиси колку и животот.

Сашо Кокаланов (38) е новинар, драматург и романсиер. Пишува сатира и колумни за повеќе медиуми.

Автор е на три романи: „Самецот“ (2003), „Ноќ на железничката станица во Розендал“ (2004) и „Изабела, Исмаела и јас“ (2004).

 


Промоција на „Трофеј“ на Весна Петрушевска во Штип


Штип, 11 ноември, 2016 - 10:16 (META) 

Денеска напладне во спомен-собата на поетот Ацо Шопов во Дом на културата во Штип, ќе се одржи промоција на автобиографската книга на Весна Петреушевска – Бејби, насловена „Трофеј“.

Издавачката куќа „Три“, делото на популарната актерка и водителка го најавува како неверојатно искрена и трогателна исповед, преку која Весна ќе ја запознаеме од различни аспекти на нејзината личност од минатото и сегашноста. „Пред сè, како „машкуданесто“ девојче, како актерка која никогаш нема да се пензионира, како ТВ-водителка, стендап-комичарка, ќерка и сестра, дваесет и четиричасовна мајка и пријателка, домаќинка… Но, пред сè, како човек со големо срце“, велат од издавачката куќа.


Во Идризово промовирани 654 кандидати за полициски службеници


Скопје, 8 октомври, 2016 - 15:00 (META) 

Во Центарот за обука во Идризово, денеска беа промовирани 654 кандидати за полициски службеници. Министерот за внатрешни работи, Оливер Спасовски, истакна дека овие вработени треба да се раководат од фундаменталните принцип на професијата, легализмот и од владеењето на правото.

– Принципи, без чие што целосно почитување не е можно да се служат и да се заштитуваат граѓаните, оние заради кои воопшто и постојат институциите, вклучително и полицијата – рече министерот Спасовски.

Тој додаде дека едно неодамнешно истражување посветено на корупцијата за 2016 година, покажува дека во однос на перцепцијата на нашите граѓани за распространетоста на корупцијата во институциите, само девет проценти од анкетираните граѓани имаат целосна доверба во МВР, наспроти 29 проценти кои имаат целосна недоверба, додека остатокот речиси 60 проценти анкетирани граѓани имаат само делумна доверба или делумна недоверба во полицијата.

Како што посочи Спасовски, 63 проценти од нашите граѓани се уверени дека корупцијата не може значително да се намали.


Трајанов: Даштевски халуцинира, ако имаше следења кога бев министер, ќе ме лустрираа


Скопје, 3 октомври, 2016 - 16:41 (META) 

На денешната промоција на едицијата на „Црните страници на УДБА – Историја што чека да биде откриена“, Александар Даштевски, еден од промоторите, говорејќи за следењата по осамостојувањето на Македонија во 1991 година, посочи дека овие активности продолжиле и во првите две години од доаѓањето на власт на ВМРО-ДПМНЕ во 1998 година, кога министер за внатрешни работи беше Павле Трајанов, актуелен претседател на Демократскиот сојуз и пратеник во Собранието.

На нашето прашање за коментар, Трајанов ги негира ваквите тврдења и вели дека станува збор за „халуцинации“ на Даштевски, кој заедно со директорот на Државниот архив на Република Македонија, Филип Петровски, и со актерот и уметнички директор на Македонскито народен театар (МНТ), Тони Михајловски, денеска ја промовираше едицијата во Музејот на ВМРО.

– Тоа се халуцинации на лицето што го спомнавте. Кога јас станав министер за внатрешни работи, веднаш издадов наредба да прекинат сите вакви активности и следење лица од политички или идеолошки причини. Во тоа време, 99 осто на раководни позиции на службите во МВР беа луѓе на ВМРО-ДПМНЕ. Што се случувало по 2000 година не знам. Инаку, да имаше нешто такво, веднаш ќе ме лустрираа – ни изјави Трајанов.

Според Даштевски, следењата од страна на тајната полиција продолжиле од осамостојувањето до февруари 2000 година, кога за министерка за внатрешни работи беше именува Доста Димовска.

Во своето обраќање на промоцијата, Даштевски реторички праша дали за овие случаи не треба Јавното обвинителство да поведе постапка против тие што давале наредби и ги спроведувале следењата.