Изгласани сите нацрт-амандмани за промена на Уставот, следува јавна расправа


Скопје, 4 декември, 2018 - 9:47 (META) 

Пратениците во Собранието по тридневна расправа ги усвоија четирите нацрт-амандмани за промена на Уставот согласно Договорот од Преспа помеѓу Македонија и Грција.

Утре според најавите, би требало да почне јавната расправа за четирите нацрт амандмани за која се предвидени пет дена, по што Владата ќе треба да ги формулира предлозите за амандманите и да ги врати на усвојување.

На текстот на предлогот на амандманите на Уставот, предлагачот, секој пратеник, работно тело и Владата кога не е предлагач, можат да поднесат амандмани најдоцна осум дена пред седницата на Собранието на која ќе се усвојуваат амандманите на Уставот.

Премиерот Заев вчера од Загреб изрази уверување дека процесот во Парламентот ќе заврши успешно што ќе овозможи брзо членство на Македонија во НАТО и почеток на пристапните преговори со ЕУ.

– Верувам дека до крајот на јануари, Парламентот ќе даде поддршка на Договорот со Грција по што ќе следува и поддршката на Договорот и од страна на Грција, како и на Протоколот за членство на Македонија во НАТО. Веруваме дека Хрватска ќе биде една од првите земји што ќе го потпише Протоколот за членство на Македонија во НАТо и дека Македонија ќе биде 30-тата земја членка на НАТО, рекол Заев на средбата со неговиот хрватски колега Андреј Пленковиќ.


Комисиската расправа за нацрт-амандманите на Уставот почнува денеска


Скопје, 7 ноември, 2018 - 10:21 (META) 

Собраниската Комисија за уставни прашања денеска ќе ја започне расправата за четирите нацрт-амандмани на Уставот што ги достави Владата согласно Договорот од Преспа, со што започнува втората фаза од постапката за уставни измени. Расправата може максимум да трае 12 дена односно по три дена за секој амандман. Пленарната седница на која ќе се разгледуваат нацрт-амандманите, претседателот на Собранието Талат Џафери ја закажа за 1 декември.

Нацрт амандманите се утврдуваат со просто мнозинство или 61 глас, за разлика од последната фаза за усвојување на амандманите, за што повторно ќе биде потребно двотретинско мнозинство или поддршка од најмалку 80 пратеници.

Премиерот Зоран Заев во петокот на прес-конференцијата во Владата соопшти дека четирите амандмани се едноставни, немаат ништо спорно и се во согласност со меѓународните стандарди и заслужуваат поддршка од сите пратеници во име на интеграцијата во ЕУ и во НАТО.

Првиот амандман се однесува на замената на зборовите Република Македонија со Република Северна Македонија, согласно Преспанскиот договор. Вториот амандман е за преамбулата на Уставот, каде одлуките на АСНОМ се заменуваат со Прогласот од Првото заседание на АСНОМ и се додава Охридскиот рамковен договор. Во третиот амандман се додава дека „земјата го почитува суверенитетот, територијалниот интегритет и политичката независност на соседните држави“. Со четвртиот амандман се укажува на тоа дека државата ги штити правата и интересите на своите државјани кои живеат или престојуваат во странство и ги унапредува нивните врски со татковината.


На 1 декември пленарна седница за нацрт-амандманите за промена на Уставот


Скопје, 2 ноември, 2018 - 14:31 (META) 

Седницата за нацрт-амандманите за промена на Уставот согласно Договорот од Преспа, кои Владата ги објави денеска, ќе се одржи на 1 декември.

В среда, пак, на 7 ноември, нацрт-амандманите ќе се најдат пред пратениците на Комисијата за уставни прашања. Според Деловникот, претресот во матичните комисии може да трае најмногу три работни дена по текстот на нацртот на секој амандман одделно.

Собранието на пленарна седница со апсолутно мнозинство гласови од вкупниот број пратеници, односно со 61, го утврдува нацртот на секој амандман на Уставот одделно.

Потоа следува јавна дискусија за нацрт-амандманите, по што се поднесуваат амандмани на нацрт-амандманите за кои ќе се води претрес исто така во две комисии. Откако Собранието со апсолутно мнозинство од 61 пратеник ќе се изјасни за секој од амандманите на уставните амандмани, се закажува седница за измена на Уставот за која е потребно двотретинско мнозинство која е крајната фаза за изменет Устав.


Нацрт-амандманите треба да се достават денеска, Заев најави помеѓу 4 и 7 амандмани


Скопје, 2 ноември, 2018 - 9:43 (META) 

Денеска истекува рокот кога Владата треба да ги достави до Собранието нацарт-амандманите за промена на Уставот според Договорот од Преспа. Нацрт-амандманите денеска ќе се најдат на владина седница, а потоа ќе бидат доставени до Собранието. Вчера премиерот Зоран Заев имаше уште една средба со осумтемина пратеници од новата пратеничка група на ВМРО-ДПМНЕ и коалицијата „За подобра Македонија”. Тој рече дека бројот на амандмани ќе биде помеѓу четири и седум, но потенцираше дека секој пратеник може да поднесе амандмани на нацрт-амандманите.

-Остануваме отворени за се што е во духот на Договорот за да го направиме инклузивен овој процес и да обезбедиме поголема согласност во македонскиот парламент за заедно да застанеме зад заокружување на договорот од Преспа. Верувам дека имаме фер и праведен договор и времето ке потврди дека сме на вистинската страна – рече Заев.

Крсто Мукоски кој е член на новата Независна пратеничка група на ВМРО ДПМНЕ рече дека на средбата со Заев го усогласиле текстот на нацрт амандманите кои ке бидат инкорпорирани во Уставот.

-Добивме уште еднаш согласност од премиерот дека имаат разбирање за нашите амандмани и дека ќе бидат прифатени. Владата утре има состанок наутро, по што новата пратеничка група ќе излезе со текстот на амандманите – нашите нацрт амандмани што ги предложивме се однесуваат на зајакнување на македонскиот идентитет, на македонското културно и историско наследство и на македонскиот јазик, вториот амандман се однесува на обезбедување на гаранции за спроведување на целиот договор, односно нестапување на сила на уставните измени ако Грција не го ратификува Договорот во својот парламент и не го ратификува протоколот за влезот во НАТО и третиот амандман се однесуваше за внатрешната употреба на името – со нашиот предлог се предлага сукцесивна примена на новото име односно со отворање и затворање на поглавјата за кои треба да преговараме за влез во ЕУ на тој начин ќе биде и преименувано името – рече Мукоски.

Со доставувањето на Нацрт-амандманите во Собранието, почнува да тече рокот од 30 дена до одржувањето на собраниската седница. Комисиската расправа најверојатно ќе почне на 6 ноември, а пленарната на 3 декември. За гласање во оваа фаза е потребно мнозинство од пратениците, односно 61 глас.


Беса ќе поднесе четири амандмани за Уставот, очекува Владата да ги прифати


Скопје, 24 октомври, 2018 - 14:50 (META) 

Пратеникот Фадил Зендели од Беса изјави дека тие ќе поднесат четири амандмани за Уставот – концепт на граѓанска држава, албанскиот јазик да биде рамноправен со македонскиот јазик, државата да се грижи за сите нејзини граѓани во дијаспората, како и тоа претседателот на државата по второто гласање на закон или друг акт во Собранието да нема право на вето, како за Законот за јазици и Договорот од Преспа.

На прашањето дали пратениците од нивната партија ќе ја условуваат Владата со овие амандмани во следните фази од носење на уставните измени, Зендели вели дека тоа нема да се случи бидејќи условувањето не е филозофија на нивната партија.

– Тоа не е речник или филозофија на нашата политичка партија. Ние сметаме дека ова е демократско право и дека со години се наметнува и ја оптоварува политичката сцена и дека во овој момент кога се отвора Уставот би требало да се решат. Ние се уште немаме предлог од Владата за да можеме да постапиме. Ова се наши предлози – вели пратеникот кој рече дека нивното барање е нивните предлози да бидат прифатени и како предлози од Владата да бидат доставени до Собранието.

Во однос на политичкото помирување, Зендели вели дека пратениците од оваа партија сакаат да придонесат за ова прашање.

– Сметаме дека сите во македонската, па и во албанската заедница треба да најдеме помирување за да придонесеме и да имаме предуслови за нормално политичко и демократско функционирање – рече Зендели, кој нагласи дека е за помирување, но не и за амнестирање и оти сите што се огрешиле пред законот треба да одговараат.


Комисијата за уставни прашања го усвои предлогот на владата за уставни промени


Скопје, 12 октомври, 2018 - 18:03 (META) 

Со 10 гласа „за“ и 7 „против“ Комисијата за уставни прашања го усвои предлогот на Владата за пристапување кон менување на Уставот според Договорот од Преспа.

Комисијата ја задолжи Владата во рок од 15 ден да подготви и достави текст со нацрт амандмани и да ги земе предвид забелешките изнесени на седницата на Комисијата.

„За“ гласаа 10 пратеници од парламентарното мнозинство предводено од СДСМ, 7 пратеници од ВМРО-ДПМНЕ гласаа против, а воздржани немаше.

В понеделник предлогот на Владата ќе се најде на дневен ред на пленарна седница во Собранието каде после расправата од максимум десет дена треба да биде изгласан од двотретинско мнозинство од вкупниот број на пратеници.


Вељаноски: Немате двотретинско мнозинство за промена на Уставот


Скопје, 10 октомври, 2018 - 13:22 (META) 

Собранието е институција, а пратениците се народни претставници кои ќе ја донесат одлуката и ќе ја спроведат волјата на граѓаните и порачувам да не потклекнат на каков било притисок, затоа што решаваме децениски спор за да ja извлечеме земјата од изолација, рече премиерот Зоран Заев за време на обраќањето на Комисијата за уставни прашања, каде што го образложува предлогот за уставни измени.

– Време е сите заедно да ја однесеме Македонија напред, пратениците имаат историска должност да го обезбедат патот на граѓаните кон стабилност, безбедност, економски развој, односно кон ЕУ и НАТО. Повикувам на обединување кон важните државни приоритети – рече Заев.

Поранешниот претседател на Собранието, Трајко Вељаноски рече дека ниту една пратеничка група и опозициска партија не биле поканети да дадат придонес во преговорите за решавање на спорот за името.

– Јас како пратеник изјавувам дека немам намера да гласам против волјата на мнозинството на граѓани кои одлучија да се спротивстават на овој Договор со бојкотирање на референдумот. Немате двотретинско мнозинство за промена на Уставот. Тесен круг на политичари реши дека имаат мандат, визија и знаење дека може да го решат ова национално прашање и со тоа да ги извисат граѓаните. Се создава чувство дека решението е туѓо и наметнато и дека не извира од македонските инетереси, а Собранието и пратениците се доведени пред свршен чин  – рече Вељаноски.


Трнлив и долг е патот до промени на Уставот (инфографик)


Скопје, 8 октомври, 2018 - 16:41 (META) 

Промената на Уставот со уставни амандмани не е ни малку лесна и едноставна процедура. На предлагачот на измените, во овој случај на Владата, во два наврати и е потребно двотретинско мнозинство. Еднаш за да го отвори и еднаш за да го затвори Уставот, процедура која трае неколку месеци.

Според Уставот, одлука за пристапување кон измена на Уставот донесува Собранието со двотретинско мнозинство гласови од вкупниот број пратеници. Нацртот за измената на Уставот го утврдува Собранието со мнозинство гласови од вкупниот број пратеници и го става на јавна дискусија. Одлука за измена на Уставот донесува Собранието со двотретинско мнозинство гласови од вкупниот број пратеници. Измената на Уставот ја прогласува Собранието.

Деловникот на Собранието е поконкретен и детално во 10 членови ја објаснува процедурата и чекорите кои треба да се поминат за да се измени Уставот со амандмани:

  • Предлог за пристапување кон измена на Уставот на Република Македонија можат да поднесат претседателот на Републиката, Владата, најмалку 30 пратеници или 150.000 граѓани.
  • Предлогот за пристапување кон измена на Уставот, претседателот на Собранието го доставува до пратениците и до претседателот на Републиката и до Владата, кога тие не се подносители на предлогот.
  • По предлогот за пристапување кон измена на Уставот на седницата на Собранието се води претрес во целина кој може да трае најмногу десет работни дена.
  • Претресот по предлогот за пристапување кон измена на Уставот во Комисијата за уставни прашања може да трае најмногу десет работни дена.
  • Одлуката за пристапување кон измена на Уставот, Собранието ја донесува со двотретинско мнозинство гласови од вкупниот број пратеници.
  • По донесувањето на одлука за пристапување кон измена на Уставот, Собранието со заклучок утврдува рок во кој подносителот на предлогот за пристапување кон измена на Уставот изготвува текст на нацртот на амандманите на Уставот.
  • Текстот на нацртот на амандманите на Уставот со образложение, предлагачот го доставува до претседателот на Собранието кој го доставува до пратениците и до претседателот на Републиката и до Владата, кога не се предлагачи, најдоцна 30 дена пред одржувањето на седницата на Собранието.
  • Претресот во Собранието се води по текстот на нацртот на секој амандман одделно и може да се дадат мислења и предлози. Претресот може да трае најмногу три работни дена по текстот на нацртот на секој амандман одделно.
  • Претресот во Комисијата за уставни прашања и во Законодавноправната комисија може да трае најмногу три работни дена по текстот на нацртот на секој амандман одделно.
  • Собранието со мнозинство гласови од вкупниот број пратеници, го утврдува нацртот на секој амандман на Уставот одделно.
  • Нацртот на амандманите Собранието го става на јавна дискусија.
  • Собранието определува рок за спроведување на јавната дискусија, начинот на објавувањето на нацртот на амандманите и рок во кој предлагачот како носител на јавната дискусија до Собранието поднесува извештај за резултатите од јавната дискусија и текст на предлогот на амандманите на Уставот.
  • На текстот на предлогот на амандманите на Уставот, предлагачот, секој пратеник, работно тело и Владата кога не е предлагач, можат да поднесат амандмани најдоцна осум дена пред седницата на Собранието на која ќе се усвојуваат амандманите на Уставот.
  • Комисијата за уставни прашања и Законодавно-правната комисија по текстот на предлогот на секој амандман на Уставот водат општ претрес и претрес по текстот, кој може да трае најмногу три работни дена.
  • По текстот на предлогот на секој амандман на Уставот се води општ претрес и претрес по текстот кој може да трае најмногу три работни дена.
  • Собранието се изјаснува одделно за секој амандман на текстот на предлогот на амандманите на Уставот, со мнозинство гласови од вкупниот број пратеници.
  • Амандманите за измена на Уставот се донесуваат со двотретинско мнозинство гласови од вкупниот број пратеници.

ВМРО-ДПМНЕ: СДСМ ги правда криминалот и промената на името, со лажни заложби за ЕУ


Скопје, 24 септември, 2018 - 10:04 (META) 

На власт се политичари и нивни ученици, кои во 90 -те не убедуваа дека само да ја  прифатиме привремената референца ФИРОМ и државата ќе тргне на подобро, па да го смениме знамето, па Уставот, па да го прифатиме Рамковниот, па територијалната поделба, се прифативме и не само што не тргна на подобро, туку е полошо, се вели во соопштението на ВМРО-ДПМНЕ.

Во него се додава дека „животите на генерации Mакедонци од 91 – та до денес поминаа во тага, безнадежност и безперспективност.“

„И додека штетните политики ги правдаат со декларативните заложби за ЕУ и НАТО интеграцијата на  земјата, во  реалноста прават невиден криминал, се делат  милионски тендери на партиски луѓе, ќерка директор дава тендер на татко бизнисмен и што ли уште не. Народот пати и не гледа како со ваков криминал државата може воопшто да функционира, а не пак да влезе во ЕУ“, се додава во соопштението.


Груевски: Власта води политичка хајка, нема да се појавам во суд


Скопје, 4 септември, 2018 - 15:45 (META) 

Поранешниот премиер и лидер на ВМРО-ДПМНЕ, Никола Груевски денеска на прес-конференција во Собранието најави дека утре нема да се појави во Апелацискиот суд, а на седницата за „Тенк“ нема да присуствуваат ниту неговите адвокати зашто, како што рече, и онака одлуката е политички веќе донесена.

Груевски обвини дека власта води политичка хајка против него, а судиите се професионални, но работат под притисок.

– Ниту јас, ниту моите адвокти нема да се појавиме утре на седница. И нивното присуството во Апелација не може ништо да промени. Никакви правни аргументи не се доволни на однапред политички договорена пресуда и однапред донесена политичка одлука. Ако судиите се толку исплашени и подлегнале на политичка нарачка, ете им можност без мене да донесат каква сакаат пресуда. Ниту едно незаконско ставање во затвор нема да ги избрише од меморијата на граѓаните делата кои сум ги направил за оваа држава и овој народ, за бранењето на државните интереси – рече Груевски.

Тој додаде дека нему не му суди судот, туку политиката.

– Судството ме товари зашто бев водач на ВМРО-ДПМНЕ и зашто на некого му пречам. Судиите се професионални и стручни, но работат под голем притисок, а некои се блиски и до Зоран Заев – додаде Груевски и се пожали и дека во петокот му бил закажан термин за седница кога сите негови адвокати учествувале на рочиште за настаните во Собранието на 27 април, а тој сам во Апелација поминал 11 часа.

Во однос на документите објавени од „Викиликс“ во кои се тврди дека тој се согласил за промена на името во Република Северна Македонија, Груевски ги оцени како „јалови обиди на власта“ и „глупости“.

– Ова се јалови обиди на власта, и веројатно ќе има уште многу вакви. Тие се сега во кампања и ќе се изнаслушаме разни глупости. Јасно е зошто сум во суд и зошто ми се случува овој класичен политички прогон и тортура. Ако се согласев со Грците друга ќе беше песната, ја сум човек со принципи и достоинство – додаде Груевски.