Брисел ќе забрани продажба на второкласни производи во Источна Европа


Брисел, 11 април, 2018 - 16:23 (META) 

Европската комисија подготвува предлог-закон со кој ќе се регулира различниот квалитет на навидум исти производи на пазарот во Европска Унија. На овој начин, потрошувачите ќе се заштитат од продажба на производи кои се рекламираат како исти, а имаат значајни разлики во составот и карактеристиките.

– На почетокот на мандатот, од Европска комисија ми рекоа дека се додека производот е сигурен за здравјето, проблем за нив нема. Како да ние треба да бидеме благодарни што нe нè трујат. За неколку години стигнавме до предлог-закон со кој треба да се регулира целиот пазар на Европска Унија – изјави хрватската европратеничка Билјана Борзан.

Овој законски предлог е дел од големиот пакет кој Европската комисија го подготвила за потрошувачите, а тој вклучува и закон кој го регулира правото на колективна тужба.

– Скандалот со „Фолксваген“ покажа дека европските купувачи останаа незаштитени, за разлика од американските. Во случај на двоен квалитет треба да се има можност за колективна тужба. Ако законот стапи на сила, тоа ќе значи дека еднаквоста на сите граѓани ќе се почитува – додаде Борзан.

Европска комисија предвдува 800.000 евра за истражување на квалитетот на производите кои се навидум исти.


Во Скопје протеран руски дипломат, во Москва почнаа „Денови на македонската зимница“


Москва, 27 март, 2018 - 11:19 (META) 

Додека во Македонија, МНР донесе одлука за протерување на руски дипломат заради случајот „Скрипал“, во исто време во Москва почна манифестацијата „Денови на македонската зимница“ која од вчера се одржува во огромниот комплекс „Фуд сити“ во Москва.

На оваа манифестација која ќе трае до утре, настапуваат пет македонски компании.

„Најголемиот интерес се очекува да предизвика ајварот, но промоција ќе биде направена и за останати производи пиперки со урда, корнишони, гамби, лутеница, слатка и пекмези од овошја кои во Македонија ги има во изобилство. Контактите со руските увозници ќе им помогне на македонските преработувачи навремено да го испланираат претстојниот годинашен откуп на свежи земјоделски производи и преработувачките количини, но истовремено ја отвара и вратата за поголемо присаство и на останатите македонски производители“, објавено е на веб-страницата на Македонско-руската стопанска комора.

Вчера македонските бизнисмени посетија неколку големи трговски маркети во главниот град на Руската федерација со цел да се запознаат со асортиманот, начинот и основните услови кои треба да ги имаат производите за да се најдат на рака на руските потрошувачи.

Извозот на македонски земјоделски производи во Русија бележи континуиран пораст во изминатите неколку години, а носечки производи се праските, доматите, зелката, сливите, цигарите. Извозот на земјоделско-прехранбени производи од Република Македонија во Русија во 2017 година изнесува 30,2 милиони евра. Русија е заинтересирана за извоз на житарици во Македонија, а најмногу за извоз на пченица.


Половина од увезениот цемент под стандардите, градежниците бараат контрола


Скопје, 19 март, 2018 - 12:33 (META) 

Производителите на градежни материјали бараат поголема контрола на увезените цемент и арматура и заштита на домашното производство, изјави денеска претседателот на Здружението на градежништво, индустрија на градежни материјали и неметали при Стопанска комора, Андреа Серафимовски.

Тој додаде дека, неколку компании на свој трошок, го тестирале квалитетот на увезените градежни производи на случаен примерок и утврдиле дека, 50 отсто од испитаниот цемент не ги задоволува стандардите.

– Реагиравме до надлежните институции односно до Царинската управа, Пазарниот и Градежниот инспекторат и тој материјал беше тргнат од употреба. Штетата би била огромна,  имајќи го предвид обемот на работа. Најголем дел од овие цемент и арматура биле употребени во јавни институции, како училишта, каде што има голема фрекфенција на луѓе. Но, откако укажавме, мислиме дека контролата е поголема – изјави Серафимовски.

Тој додаде дека арматурата се увезува од Грција, Бугарија и Босна и Херцеговина, а цементот од Албанија и Турција. Според Серафимовски и покрај тоа што Македонија е извозник на цемент, овој материјал со помал квалитет се увезува во земјава поради пониската цена.

Серафимовски се осврна и на новиот Закон за градежни материјали и апелираше до компаниите да почнат да го имплементираат, бидејќи нема никакви финансиски импликации врз нивното работење, туку измените повеќе се однесуваат на постапката на пуштање на производите на пазар.

Доколку не го применуваат новиот Закон, тие од следната година нема да можат да учествуваат на тендери и да се пријавуваат на проекти.

Здружението на градежништво, индустрија на градежни материјали и неметали при Стопанска комора се залага за усвојување и поддржување на сертификатите за производите за извоз во регионот, бидејќи дополнителното испитување на квалитетот на домашните градежни производи на странските пазари, ги поскапува производите и поради тоа тие стануваат неконкурентни.


Индустриското производство во ноември е зголемено за 4,1 отсто во однос на лани


Скопје, 27 декември, 2017 - 19:52 (META) 

Индустриското производство во ноември, е зголемено за 4,1 отсто во однос на истиот месец лани, објави Државниот завод за статистика.

Од јануари до ноември пак, индустриското производство е зголемено минимално, од 0,5 проценти во однос на истиот период лани.

Зголемување на производството има кај преработувачката индустрија каде што се бележи пораст од 5,7 проценти. Во овој сектор, најголемо зголемување на производството има кај прехранбените и фармацевтски производи, потоа производство на производи од гума и друго.


Германската полиција трага по маж кој става отров во храната во продавниците


Берлин, 28 септември, 2017 - 18:32 (META) 

Непознат маж ставал отровна супстанца во храна, вклучувајќи и храна за бебиња која се продава во супермаркетите во Германија, за да изнуди повеќе од еден милион евра, соопшти денеска германската полиција.

Во соопштението се наведува дека, лицето испратило електронска пошта до полицијата откако ставило голема количина на отров во производи во супермаркетите на југот на Германија. Лицето се заканувало дека тоа ќе го направи и во други супермаркети низ државата, но и низ Европа.

Полицијата изјавила дека овие закани ги сфаќа сериозно, додавајќи дека за сега не бил пријавен ниту еден случај на труење. Властите смируваат дека нема причина за паника, но ги предупредија потрошувачите да обрнат внимание на амбалажите на производите.

Полицијата пронашла храна за бебиња во која била ставен етилен гликол, безбојна течност без мирис кој се користи за производство на антифриз, кој при конзумација може да биде смртоносен.

Властите најавија зголемена контрола на храната во продавниците.


Македонија, дел од алијансата против трговијата со опрема за мачење и за смртни казни


Њујорк, 19 септември, 2017 - 14:33 (META) 

Македонија од вчеравечер е членка на меѓународната алијанса за запирање на трговијата со производи кои се користат за извршување смртни казни и за мачење.

Меѓународната група е формирана за време на 72. заседание на Генералното собрание на Обединетите нации, кое се одржува оваа недела во Њујорк, а на иницијатива на Европската Унија, Аргентина и на Монголија. Во алијансата членуваат 58 држави од светот.

Меѓународниот закон ја забранува тортурата во кои било случаи, но, и покрај тоа во светот сè уште се тргува со алатки кои се користат за смртни казни и за мачење. Тука спаѓаат палки со метални шилци, појаси за електро-шокови, хемикалии за изршување смртна казна и системи за принудно вбризгување кои одат со нив.

– Овие производи служат единстевно за предизвикување ужасна болка и за убивање луѓе. Сега, ние преземаме конкретни акции за запирање на оваа одвратна трговија. Јас сум воодушевена што толку многу земји во светот ја потпишаа оваа декларација и и се придружија на алијансата. Стоејќи заедно, ние демонстрираме решителност дека повеќе нема да ја толерираме оваа трговија – изјави еврокомесарката за трговија, Сесилија Малстром.

Со приклучивањето во алијансата, земјите се обврзуваат на четири конкретни активности: преземање мерки за контрола и за забрана на извоз на вакви производи, опремување на царинските власти за оваа потреба, обезбедување техничка помош за земјите во воспоставувањето и во спроведувањето на законите за забрана на оваа трговија и размена на практики за ефикасни системи за контрола.


Николовски со колегите од Србија и од БИХ ќе дефинира став за извозот во Хрватска


Скопје, 7 август, 2017 - 11:27 (META) 

Министерот за земјоделство, шумарство и водостопанство, Љупчо Николовски, денеска во Сараево ќе се сретне со своите колеги од БИХ и од Србија, Шемсудин Дедиќ и Бранислав Недимовиќ.

Тројцата министри на средбата се очекува да дефинират заеднички став во врска со правилникот за контрола при увозот на овошје и на зеленчук што го воведе Хрватска.

Со новиот правилник за увоз на овошје и на зеленчук што Хрватска го донесе на 15 јули, значително се зголемуваат трошоците при извоз на македонското свежо овошје и зеленчук, што ќе влијае врз зголемување на крајната цена на производите.

– Со овој правилник трошоците за контрола на квалитет на овошјето и на зеленчукот се зголемуваат од досегашните 90 куни (12 евра) по производ, на 2.000 куни (274 евра) по производ. Со такви зголемени цени, македонското овошје и зеленчук ќе бидат неконкурентни на пазарот. Сметаме дека со носењето на овој правилник се воведува нетарифна бариера од страна на Република Хрватска за заштита на хрватскиот пазар од увоз на свежо овошје и зеленчук – информираше Николовски.


Постојат двојни аршини за стоката за западот и за истокот на Европа, призна Јункер


Брисел, 27 јули, 2017 - 16:21 (META) 

Претседателот на Европската комисија, Жан Клод-Јункер, по средбата со словачкиот премиер Роберт Фицо во Брисел, призна дека навистина постои проблем со двојните аршини за продуктите и стоките наменети за Западот и за посткомунистиките земји кои се членки на ЕУ.

Јункер оцени дека проблемот не е безначаен и дека практиката на различен состав е неприфатлива, но рече дека за тоа веројтано нема да биде потребно воведување нови европски закони.

– ЕК смета дека проблемот со различен производ со исто име не е безначаен. Ќе му посветам внимание на проблемот – рече Јункер на заедничката прес-конференција со Фицо.

За Европската комисија е неприфатлива практиката, на пример, во сувомесните производи за новите Европејци да има помалку месо и повеќе адитиви иако цената е речиси иста, а некогаш е и помала на Запад, или прашокот за перење подобро да пере на западот на Европа, отколку на истокот. Јункер рече дека засега не се потребни нови прописи, но не го исклучи нивното носење доколку не се реши проблемот.

Словачкиот премиер Фицо на состанокот со Јункер, еврокомесарката за правда и за потрошувачки права, Вера Јоуров, и со претседателот на Европскиот совет, Доналд Туск, дојде како емисар на Вишеградската четворка, која во последните неколку години е сè погласна во барањата овие земји да престанат да бидат „канта за отпад“ на Европа и оти Чесите, Полјаците, Словаците и Унгарците имаат полно право под исто име да добиваат стока со ист состав и квалитет.

– За мене е најважно дека ЕК го призна проблемот и дека ќе дејствува да се реши. Не е важно како ќе го реши. Сеедно е дали мачката е црна или бела, важно е да лови глувци – рече Фицо и изрази надеж дека постепено ќе исчезне практиката што ги претвора Словаците во Европејци од понизок ред.

Чешката еврокомесарка Јоурова, која исто така активно води борба сите производите во Европа да бидат со ист квалитет, претходно изјавуваше дека сега секоја земја членка има национални контролни механизми кои би можеле да ги искористат за сузбување на практиката на двојни аршини.


СДСМ: Покрај субвенции, договорен е и поголем откуп на лубеници


Скопје, 19 јули, 2017 - 17:56 (META) 

Владата предводена од СДСМ активно работи на надминување на проблемите, преку мерки што ќе ја стабилизираат цената на лубениците и ќе ги санираат штетите на производителите на бостан, се вели во реакцијата на СДСМ, на прес-конференцијата на Ванчо Костадиновски од ВМРО-ДПМНЕ.

Во соопштението се додава дека ВМРО-ДПМНЕ 11 години манипулирала со земјоделците, а субвенциите и другите мерки за помош ги злоупотребувала за да врши притисок, поткуп и уцени врз вистинските земјоделци.

„Проблемот со откупот на лубеници, како и другите напластени проблеми, се решава интензивно и во содејство со земјоделците и со откупувачите. Покрај дополнителните субвенции од два денари за секој продаден килограм, договорен е и поголем откуп на лубеници, кој веќе се остварува“, велат од СДСМ.


Македонски прехранбени производи изложени на саем во Мостар


Мостар, 7 април, 2017 - 13:09 (META) 

Македонски прехранбени производи се изложени на Саемот за храна во Мостар, кој се одржува од 4 до 8 април. На промотивен штанд на саемот, изложени се македонско вино, јагнешко месо, традиционално овчо сирење, домашен ајвар, лутеница, малиџано.

Од Министерство за земјоделство, шумарство и водостопанство информираат дека на саемот се претставуваат повеќе од 800 изложувачи од 30 земји.

На отворањето на манифестацијата присуствувале голем број државници од регионот и од светот.