Индустриското производство лани повисоко за 5,4 проценти од 2017 година


Скопје, 30 јануари, 2019 - 13:32 (META) 

Индустриското производство лани зголемено за 5,4 проценти во однос на 2017 година, информира Државен завод за статистика. Во декември пак, индустриското производство е зголемено за 7,9 проценти во однос на истиот месец 2017 година.

Гледано по сектори, индустриското производство во секторот Рударство и вадење на камен во декември 2018 година, во однос на декември 2017 година, бележи пораст од 4,6 проценти, во секторот Преработувачка индустрија бележи пораст од 6,1 проценти, а во секторот Снабдување со електрична енергија, гас, пареа и климатизација пораст од 20 проценти.

Според главните индустриски групи, производството во декември 2018 година, во однос на декември 2017 година, бележи пораст кај енергија за 23,9 проценти, интермедијарни производи, освен енергија за 4,6 проценти, капитални производи за 2,4 проценти и нетрајни производи за широка потрошувачка за 10,5 проценти, додека опаѓање бележи кај трајни производи за широка потрошувачка за 10,6 проценти.


МЗШВ: Земјоделците можат да поднесат барања за легализација на фармите до крајот на 2018


Скопје, 23 ноември, 2018 - 13:02 (META) 

Министерство за земјоделство, шумарство и водостопанство (МЗШВ) информираше дека до крајот на годинава, земјоделците можат да достават барања за легализација на изградените објекти, фарми на градежно земјиште.

„Барањата за легализација треба да се поднесат во општините на живеење. Продолжувањето на рокот е со цел да им се излезе во пресрет на големиот број на граѓани, вклучително и на земјоделците, кои досега не ја завршиле постапката за легализација“, се вели во соопштението на МЗШВ.

Од таму информираат дека, до сега бројот на земјоделските стопанства и чии што објекти се легализирани е исклучително мал, и поголем број од истите ја немаат искористено можноста која ја имаше понудено законот.

„Нерегулираниот статус на објектите за земјоделска намена на градежно земјиште негативно влијае на можноста за модернизација и реструктуирање на земјоделските стопанства кои се занимаваат со сточарство и ги оневозможува стопанствата во користење на државната финансиска помош за земјоделството. Можноста за легализација на фармите е од голема важност за земјоделците. Со стекнување имотни листови, самите фарми ќе добијат и финансиска вредност, која што земјоделците ќе можат да ја искористат за подигнување на кредити за реновирање и модернизација на фармите. Воедно, со легализацијата ќе можат да остварат право за аплицирање за мерките од ИПАРД-програмата и од Националните програми, што ќе влијае врз обемот и квалитетот на производството“, се додава во соопштението.


Вучиќ апелираше до Србите од Косово да избегнат конфронтација


Белград, 22 ноември, 2018 - 16:17 (META) 

Претседателот на Србија, Александар Вучиќ порача Србите на Косово да дадат се од себе, за да спречат конфронтација и сите заедно по мирен пат и со дозволени политички средства да се борат за своите интереси, јавува дописничката на „Мета“ од Белград.

Оваа изјава на Вучиќ следува откако Косово го зголеми данокот за увоз на српски производи од 10 на 100 отсто.

На состанокот со претставниците на Србите од Косово, Вучиќ рече дека „Белград ќе продолжи да ја следи ситуацијата и дека Србите треба да знаат дека нема да бидат оставени на милост и немилост, но изразил надеж дека никому нема да му падне на памет да применува насилство.“

Вучиќ изјавил дека имал информации за движење на „албански трупи“ од две бази спрема северот на Косово и претпоставува дека „или покажуваат мускули или го контролираат нелегалниот премин за да спречат влез на српска роба“.

Тој додаде дека со воведување на данокот, „косовските Срби остануваат без производи од Централна Србија, но и без медицински материјал за болниците“.

Сцените со палење на робата од Србија во Качаник, српскиот претседател ја споредил со сцени од палење на еврејски книги во нацистичка Германија.

Во однос на изјавата на косовскиот премиер Рамуш Харадинај, дека Косово нема да го укине данокот се додека Србија не ја признае независноста на Косово, Вучиќ изјавил дека „мора да се подготват за долга и тешка борба, бидејќи тие нема да ја признаат независноста“.


Вучиќ на средба со амбасадорите поради одлуката на Косово за зголемување на данокот


Белград, 21 ноември, 2018 - 17:00 (META) 

Претседателот на Србија, Александар Вучиќ оствари средба со амбасадорите на Кина, Русија, САД, Велика Британија, Франција, Германија и Италија откако владата во Приштина објави дека го зголемува данокот на производите од Србија од 10 на 100 отсто, јавува дописничката на „Мета“ од Белград.

Владата на Косово ја усвои одлуката за зголемен данок за увоз на роба од Србија и БиХ од 10 на 100 отсто. Данокот од 10 отсто беше воведен пред две недели. Таа одлука ја осудија владите на Србија, БиХ, а ЕУ повика на почитување на Централноевропскиот договор за слободна трговија ЦЕФТА.

Вучиќ го повтори ставот дека дијалогот помеѓу Белград и Приштина нема да продолжи додека косовските власти не ја повлечат одлуката за данок.


Извозот во првите осум месеци зголемен за 24,3 проценти


Скопје, 4 октомври, 2018 - 16:25 (META) 

Извозот во првите осум месеци изнесува 4.428.642.000 долари и бележи пораст од 24,3 проценти во однос на истиот период лани. Вредноста  на увeзената стока, во истиот период, изнесува 5.885.969.000 долари што е за 21,4 проценти повеќе од лани. Трговскиот дефицит, во првите осум месеци од годината изнесува 1.457.327.000 долари.

Трговската размена по производи покажува дека во извозот најголемо е учеството на катализаторите на носачи со благородни метали или нивни соединенија, сетовите на проводници за палење и слично, за возила, авиони или  бродови и др.

Во увозот најмногу се застапени платината и легурите на платина, необработени или во прав, нафтените масла и маслата добиени од битуменозни минерали (освен сурови), плоснато-валаните производи од железо или нелегиран челик, неплатинирани или необложени и другите метали од платинската група и нивни легури, необработени или во облик на прав.

Според вкупниот обем на надворешно-трговската размена, Македонија најмногу тргувала со Германија, Грција, Велика Британија, Србија и Бугарија.


Размената со Русија падна за 13 проценти, причините не се политички туку економски


Скопје, 6 септември, 2018 - 15:11 (META) 

Трговската размена помеѓу Македонија и Руската Федерација бележи опаѓање од 12,7 отсто, што е помалку за 9,3 милиони долари во однос на истиот период од минатата година, беше истакнато на трибината на Македонско-руската стопанска комора и еднодновната обука на тема „Особености на рускиот пазар и стратегија на успех (потенцијал, можности, реализација)“.

Исто така, загрижувачки е што македонскиот извоз е намален за речиси четвртина во споредба со истиот период лани (24,36 проценти).

– Овој преоден шестмесечен намален обем на трговска размена со Руската Федерација воопшто не се должи на некои политички причини или притисоци, имајќи ја предвид чувствителната фаза на меѓусебните односи на двете земји. Единствено се работи за економски причини, македонските извозници се подложни на огромно зголемена конкуренција на рускиот пазар од производители од другите земји. Претстои макотрпно прилагодување за да се издржи и задржи позицијата кај руските трговци – увозници. На пример, добар дел од намалениот македонски извоз во овој период се должи на драстично намалениот пласман на македонската рана зелка, бидејќи рускиот пазар беше преплавен со овој зеленчук од Иран и други земји со далеку пониски цени – рече Ѓорѓи Дика, претседател на Македонско-руската стопанска комора.

Препорака е бизнисмените да настапуваат со разработена маркетинг стратегија на овој по големина петти пазар во светот.

– Во Москва се присутни производите од Македонија и проценуваме дека имаат голема шанса за пласман на рускиот пазар. Но, мора да има баланс меѓу цената и квалитетот на производите и на тоа посебно треба да се посвети внимание – истакна Виктор Алексеев, експерт за продажба во „Македонски дом“.


АХВ забрани увоз на свињи и свинско месо од Бугарија, поради африканска свинска чума


Скопје, 3 септември, 2018 - 16:09 (META) 

Агенцијата за храна и ветеринарство (АХВ) ги засили мерките за надзор и контрола на болеста африканска свинска чума, по добиената потврда на 31 август дека оваа болест е присутна во селото Тутраканци во реонот на Варна, Бугарија, информираат од АХВ.

„Агенцијата донесе решение за забрана за увоз и транзит на свињи, производи и нус-производи од свинско месо од регионот во Бугарија каде е потврдено присуство на болеста, со цел заштита од внесување на вирусот на африканска свинска чума во нашата земја. Покрај засилениот надзор и контрола на граничните премини кои го спроведуваат официјалните ветеринари, Агенцијата ја информира и Царинската управа за воведување на дополнителни, засилени контроли, особено на личниот багаж на патниците (внесување на храна од животинско потекло – месо и производи од месо), преку кои  може да се внесе болеста“, се вели во соопштението на АХВ.

Од таму апелираат до граѓаните кои патуваат во Бугарија, при враќање во земјава, во личниот багаж да не носат храна од животинско потекло, бидејќи ќе им биде одземена од страна на надлежните државни органи на граничните премини.

„До одгледувачите во селските домаќинства, особено до оние фармери кои свињите ги пуштаат на паша, апелираме, животните да ги држат затворени, во соодветни објекти, со цел намалување на ризикот истите да дојдат во контакт со дивите свињи кои може да ја пренесат оваа болест. Ветеринарните друштва се задолжени да при вршење на секојдневните активности на терен да ја следат здравствената состојба на свињите и до официјалните ветеринари да го пријават секој сомнеж на појава на оваа болест“, се додава во соопштението.

Африканската свинска чума не е болест која е опасна за луѓето, но е високо заразна вирусна болест кај дивите и домашните свињи, која експлозивно брзо се шири и предизвикува големи економски штети и загуби во свињарството. Африканската чума кај свињите е болест која не се лекува, односно за неа не постои вакцина.


МЗШВ: Штетата од царината на Косово за земјоделските производи е околу 180.000 евра


Скопје, 7 август, 2018 - 11:42 (META) 

Одлуката на Косово, со која царините за овошјето и зеленчукот од Македонија беа зголемени за 30 отсто, предизвика штета од околу 180.000 евра или 2.000 тони нереализиран извоз, одговори денеска на новинарско прашање, шефот на кабинетот во Министерството за земјоделство, Трајан Димковски.

Тој додаде дека штетите се пресметани врз основа на извозот реализиран лани од 18 до 31 јули, период во кој годинава важеше одлуката на Владата на Косово.

– Косово ја воведе одлуката со која ги зголеми царините на 18 јули годинава, по што донесе делумно укинување, а потоа одлуката беше и целосно повлечена. Лани во овој период, од 18 до 31 јули Македонија на Косово извезла околу 2.000 тони земјоделски производи во вредност од 180.000 евра – рече Димковски.


Бектеши: За најскоро време очекуваме взаемно прифатливо решение со Косово


Приштина, 27 јули, 2018 - 16:42 (META) 

По средбата помеѓу министерот за економија Крешник Бектеши и косовскиот министер за трговија и индустрија Бајрам Хасани, забелешките за комплетно отстранување на заштитната мерка за повисока царина на одредени земјоделски производи, треба да се најдат пред косовската Влада.

Иако мерката е делумно повлечена за поголем број производи, односно од 21, остана на сила за само седум сезонски производи за доматите, пиперките, грозјето, сливите, јаболката, крушите и малините, на нив отпаѓа најголем дел од македонскиот извоз на косовскиот пазар.

„Токму тоа му го предочив на министерот Хасани, истакнувајќи ги загубите на бизнис-заедницата, кои на двете страни се огромни. Добив уверување од косовската страна дека овие наши забелешки ќе бидат земени предвид. Имајќи предвид дека станува збор за владина одлука, на првата наредна седница, аргументите кои ги дадовме од наша страна ќе бидат изнесени пред членовите на Владата на Косово за да се изнајде решение кое ќе биде взаемно прифатливо. Лично верувам дека во најсокоро време ќе ја продолжиме досегашната одлична трговска соработка, во корист на земјоделските производители и бизнис заедницата од двете страни“, изјави Бектеши по средбата.

Средбата уследи по официјалното писмо што Бектеши го упати до косовскиот колега пред една недела и по состанокот на ЦЕФТА земјите во Белград, на кој беше поздравена одлуката на косовската Влада за делумно укинување на трговските бариери и Приштина беше повикана во целост да ги укине царините за останатите производи опфатени со одлуката.


Бектеши од Хасани денеска ќе бара целосно укинување на царината од Косово


Приштина, 27 јули, 2018 - 11:43 (META) 

Mинистерот за економија Крешник Бектеши денеска ќе се сретна со косовскиот колега Бајрам Хасани за повлекување на царините за земјоделските производи кои останаа неопфатени со одлуката на косовската Влада.

„Во име на досегашната успешна трговска и, воопшто, економска соработка со Република Косово се надевам дека ќе најдеме заеднички јазик со мојот косовски колега, а дека средбата ќе резултира со решение кое ќе биде од взаемен интерес. Уверен сум дека имаме заедничка цел, а тоа е олеснување на трговијата на Западен Балкан, согласно правилата на договорот ЦЕФТА и принципите на слободна трговија“, вели Бектеши.

Царина од Косово се уште важи за доматите, пиперките, јаболката, крушите, сливите, малините и грозјето.Владата се уште дава можност за преговорите да успеат и не воведува контрамерки за косовските производи.

Министрите од регионот денеска во Белград на заеднички состанок ја повикаа косовската Влада целосно да ги укине зголемените царини за извоз на земјоделски производи во Косово.