Груби на конференција во Софија за бугарското претседавање со ЕУ


Скопје, 19 јануари, 2018 - 10:06 (META) 

Претседателот на собраниската Комисија за европски прашања, Артан Груби, од 20 до 22 јануари 2018 година, ќе учествува на конференција на претседателите на комисиите за европски прашања на земјите-членки и на земјите-кандидати за членство во Европската Унија – КОСАК, во Софија, Бугарија.

На конференцијата, како што информираат кабинетот на Груби, ќе стане збор за програмата и приоритетите на бугарското претседателство со Европската Унија во првата половина од 2018 година, за што свое обраќање ќе има министерката за бугарското претседателство со Советот на ЕУ, Лилјана Павлова. Во рамките на конференцијата е предвидена и сесија на која ќе се расправа за иднината на Европската Унија од аспект на глобалната улога на ЕУ.

„На конференцијата, Груби ќе има свое обраќање пред високиот форум на претставници од сите национални парламенти на Европската Унија каде што ќе говори за високиот приоритет на бугарското претседателство, посветен на европската перспектива на Западниот Балкан во ЕУ. За време на конференцијата, Груби ќе оствари средби со своите колеги од парламентите на земјите кои се членки на Унијата, а ќе се сретне и со колегите од регионот“, стои во соопштението.


Трамп: Американскиот судски систем е неправеден


Вашингтон, 11 јануари, 2018 - 11:51 (META) 

Претседателот на САД, Доналд Трамп го критикуваше американскиот судски систем велејќи дека тој е неправеден. Трамп ова го изјави по одлуката на судот во Сан Франциско привремено да го блокира неговиот план за укинување на програмата која ги штити младите имигранти од депортација.

„Тоа само покажува колку нашиот судски систем e скршен и нефер“, напиша Трамп на „Твитер“.

Американскиот окружен судија за северниот округ Калифорнија, Вилијам Олсуп, во вторник го одобри барањето на Калифорнија и другите подносители на жалби да го спречи Трамп да ја укине програмата за младите мигранти.

Програмата штити околу 800.000 лица кои во САД влегле нелегално како деца или влегле со членови на нивните семејства на кои им истекла визата.


Блокирана одлуката на Трамп за укинување на програмата за помош на младите имигранти


Вашингтон, 10 јануари, 2018 - 10:34 (META) 

Американскиот судија Вилијам Алсап синоќа привремено ја блокирал одлуката на администрацијата на претседателот на САД, Доналд Трамп за укинување на програмата која ги штити младите имигранти од депортација.

Како што пренесуваат светските агенции, Алсап го одборил барањето на сојузната држава Калифорнија и на другите тужители да се спречи укинувањето на програмата која ги штити децата кои со родителите илегално дошле во САД, се додека не бидат завршени судските постапки по тужбите на засегнатите.

Алсап рекол дека адвокатите кои ја поддржуваат програмата јасно покажале дека младите имигранти можат да сносат озбилна и неповратна штета доколку судот би донел поинаква одлука. Судијата, исто така, рекол дека адвокатите имаат големи шанси да успеат во тие судски постапки.

Инаку, програмата заштитува околу 800.000 лица кои се доведени во САД илегално како деца или дошле со своите семејства кои останале во САД и по истекот на визите. Програмата вклучува стотици илјади млади на факултетска возраст, кои медиумите во САД ги нарекуваат „Сонувачи“ (Dreamers).

Програмата ја иницираше поранешниот американски претседател, Барак Обама во 2012 година.

Американскиот министер за правда, Џеф Сешонс во септември, минатата година објави дека програмата ќе биде постепено укината, наведувајќи дека поранешниот претседател Обама ги пречекорил своите овластувања кога го применил во 2012 година, заобиколувајќи го Конгресот.


Бугарскиот амбасадор на 15 јануари во Собранието ќе ја презентира програмата за ЕУ


Скопје, 2 јануари, 2018 - 14:37 (META) 

Амбасадорот на Бугарија во Македонија, Иван Великов Петков, на седница закажана за 15 јануари пред собраниската Комисија за европска прашања ќе ги презентира програмата и приоритетите на бугарското претседателство со Советот на Европската Унија.

Инаку, Бугарија претседавањето со ЕУ во следните шест месеци ќе го посвети на четири приоритети – иднината на Европа и младите луѓе, Западен Балкан, безбедноста и стабилноста на ЕУ и на дигиталната економија.

Во програмата во делот за Западен Балкан, се наведува дека целта на Бугарија е, врз основа на своите искуства, без да создава лажни очекувања, да ги поддржи реформите во земјите од Западен Балкан (Македонија, Србија, Албанија, Црна Гора, Косово и Босна и Херцеговина) поврзани со интегративните процеси и да ги стави на преден план на агендата на ЕУ.

„Амбицијата на Бугарското претседателство е да биде Балканско претседателство. Бугарското претседателство дава особена важност на продлабочувањето регионалната соработка и на развојот на добрососедските односи. Од особена важност е темата за поврзување на земјите од Западен Балкан (транспортно, комуникациски, енергетски, образвно, дигитално), чија цел е поврзување со единствениот пазар на ЕУ“, стои во програмата, во делот посветен на Западен Балкан.


Германската влада со финансиска поддршка за Македонија во висина од 9 милиони евра


Скопје, 20 декември, 2017 - 15:19 (META) 

Aмбасадорот на Сојузна Република Германија, Томас Герберих и министерот за финансии, Драган Тевдовски ја потпишаа спогодбата помеѓу владата на Македонија и владата на СР Германија, за финансиска соработка во висина од девет милиони евра.

Спогодбата опфаќа реализација на два клучни проекти, Програма за наводнување на јужната долина на реката Вардар фаза 2 и Програмата за водовод и канализација фаза 2, чии договори за финансирање исто така беа потпишани денеска од страна на корисниците на грант-средствата.

– Германската влада преку КФВ банката доделува 9 милиони евра неповратни финансиски средства за реализација на две значајни развојни програми за Македонија. Тоа се програмата за водовод и канализација и програмата за наводнување на јужната долина на реката Вардар – истакна министерот Тевдовски.

Амбасадорот Герберих, рече дека Германија е најзначајниот трговски партнер на Македонија со годишна билатерална трговска размена од речиси три милијарди евра, која е во постојан пораст.

– Досега Германија стави на располагање 320 милиони евра за Македонија, главно за инвестиции во јавната инфраструктура, како санација и проширување на системите за водоснабдување и канализација, како и модернизација на земјоделските системи за наводнување – додаде Герберих.


Царовска: Направени се законски измени за поголеми права на лицата со попреченост


Скопје, 3 декември, 2017 - 17:17 (META) 

На одбележувањето на Меѓународниот ден на лицата со попреченост, министерката за труд и социјална политика, Мила Царовска, рече дека се направени законски измени за поголеми права на лицата со попреченост, како што е персоналната асистенција.

– Долги години сме сведоци дека нашите сограѓани кои се соочуваат со попреченост беа дискриминирани, немаа пристап до соодветни здравствени и образовни услуги и немаа пристап до вработување, а сето тоа поради негрижата на државата. Но, тоа се менува бидејќи оваа влада е иклузивна и секојдневно дискутира за проблемите на овие лица – порача Царовска.

Таа додаде дека за овие лица се подготвува програма која треба да се реализира во 2018 година. Годинава, Меѓународниот ден на лицата со попреченост се одбележува под мотото „Транасформација кон одржливо и прилагодливо општество за сите“.


СДСМ со митинзи во Тиквешијата, ВМРО-ДПМНЕ и ДУИ во Полог


Скопје, 30 септември, 2017 - 10:56 (META) 

Во рамките на шестиот ден од предизборната кампања за локалните избори, денеска Коалицијата „Живот во Македонија“ предводена од СДСМ ќе одржи средба со граѓани во Прилеп и во Росоман и митинзи во Демир Капија, Неготино и Кавадарци.

Карванот на коалицијата „За подобра Македонија“ предводена од ВМРО-ДПМНЕ, ќе биде во Гостивар и Тетово.

Демократската унија за интеграција (ДУИ) ќе има предизборни активности во Брвеница и Теарце.


Груевски им го цитираше Ганди на кандидатите за градоначалници на ВМРО-ДПМНЕ


Скопје, 16 септември, 2017 - 17:33 (META) 

„Бидете промената која сакате да ја видите“. Со овој цитат на Ганди, лидерот на ВМРО-ДПМНЕ им се обрати на кандидатите за градоначалници на опозициската партија на денешната политичка акадамија во хотелот „Мериот“, на тема „Јакнење на демократијата на локално ниво“, во организација на Фондацијата „Конрад Аденауер“ од Германија и на Институтот „Павел Шатев“.

Инаку, Мохандас Махатма Ганди, водачот на индиското движење за независнот, го промовираше принципот на ненасилната граѓанска непослушност и стана симбол за ненасилна борба за граѓански права и слободи во светот.

– Најголемите резултати во животот најчесто се постигнуваат со едноставни средства и искажување на вообичаени одлики. Имајте доверба во себе, затоа што ќе ја имате довербата од народот, ветувајте го она што сте сигурни дека ќе го направите, така ќе ја имате самодовербата и довербата од народот подоцна. Како што Ганди велеше „Бидете промента која сакате да ја видите“. Ние, никогаш не ветуваме дека ќе решиме сè, свесни сме дека има уште многу работа и ние знаеме како понатаму, граѓаните со нас се на сигурно – порача Груевски.

Тој истакна дека нивните противници ќе ветуваат чуда и волшебни решенија, бидејќи немаат друг избор и дека во последните три месеци триесет пати го смениле зборот, го погазиле кажаното и се демантирале.

– Народот е мудар и знае да разликува што е реално и остварливо, а што не е, и, уште поважно, народот знае кој држи до зборот, а кој не, кога ќе ветиме остваруваме. Ние оставаме за нас да говорат делата, кои се гледаат, чувствуваат, посетуваат, користат, кои помагаат – изјави Груевски.

Лидерот на ВМРО-ДПМНЕ рече дека за секој град и за секоја општина ќе има конкретна програма, а економијата ќе биде приоритет.

– Ќе се инвестира и во градба на водоводи и на канализациони системи. Поудобниот живот на граѓаните и решавањето на проблемите во секојдневието ќе биде задача на секој градоначалник – рече Гуревски.


Милошоски: На локалните избори очекуваме најмногу гласови, советници и градоначалници


Скопје, 6 август, 2017 - 14:40 (META) 

Пратеникот Антонио Милошоски денеска на прес-конференција во партиското седиште соопшти дека ВМРО-ДПМНЕ и Коалицијата за подобра Македонија се целосно подготвени за настап на локалните избори.

Милошоски истакна дека очекуваат со нивната програма и кадровска понуда да освојат најголем број гласови на локалните избори, најголем број советници во споредба со другите политички партии и најголем број градоначалници споредбено со другите политички коалиции.

– Локалните избори на 15 октомври нема да бидат обични локални избори. Многу прашања не добија одговор од актуелната власт на Заев, Ахмети и на Села. Прашањето за двојазична Македонија не беше ветено пред изборите, а денес е товар на незадоволството и достоинството на македонските граѓани. За тоа прашање граѓаните ќе можат да го дадат своето мислење на 15 октомври – вели Милошоски.

Тој додаде дека граѓаните на 15 октомври треба да го дадат своето мислење и за, како што рече, македонско-бугарскиот договор, неспособноста да се излезе во пресрет на потребата за гаснење пожари и депонии и недавањето одговори на прашањето зошто е направена стратегија Македонија да стане земја на бегалци и на мигранти за кои ќе се плаќа од буџетот.


Иселеничкиот Форум за демократска Македонија ја објави програмата


Скопје, 19 јуни, 2017 - 10:53 (META) 

Форумот за демократска Македонија на група на иселеници од Република Македонија и нивните потомци од целиот свет ја објави програмата, на својата фејсбук-страница.

„Форумот сака да ја види земјата како прогресивна, демократска, граѓанска, европска, просперитетна држава, која ќе создава подобар живот за сите свои граѓани. Држава што ќе биде пример за мултиетничко општество, засновано на заемна почит, толеранција и на разбирање, каде владата ќе работи за доброто на сите граѓани, а не за лични интереси“, се вели во описот.