Царовска: Високи 95 отсто искористеност на Оперативниот план за вработување лани


Скопје, 23 јануари, 2019 - 12:22 (META) 

Оперативниот план за активни програми и мерки за вработување и услуги на пазарот на трудот за 2018 година има високи 95 проценти реализација, информираше министерката за труд и социјална политика Мила Царовска. Со него биле опфатени вкупно 6,374 лица, од кои 3.359 или 53 проценти млади лица до 29 години.

Царовска како посебно значајна ја потенцираше вклученоста на жените во активните програми и мерки кои водат до намалување на невработеноста и зголемување на вработливоста.

„Оперативниот план за активни програми и мерки за вработување и услуги на пазарот на трудот за 2018 година претставува одличен пример за родова еднаквост, во него 54 проценти односно 3.456 лица од учесниците во активните програми и мерки за вработување беа жени, што за нас претставува посебен успех и голем придонес за поголема инкузивност на жената на пазарот на трудот“, изјави Царовска.

Директорката на Агенцијата за вработување, Билјана Јовановска информираше дека преку учество во програмата Самовработување, сопствен бизнис отвориле 1.191 лица, мерката Субвенционирање на плати овозможила да се вработат 759 лица, а преку учество во мерката Вработување и раст на правни субјекти биле вработени 347 лица.

Голем интерес имало и за обуките за стекнување на вештини кои се барани на пазарот на трудот, наменети за доквалификација на невработените лица.

Една од најбараните била програмата Практиканство и во неа се вклучиле 1.263 невработени лица до 34 годишна возраст. Одлични резултати покажала и програмата Општинско-корисна работа, во која учествувале 703 лица, кои обезбедуваат социјални услуги во 56 општини во државата, најмногу како образовни и лични асистенти.

Носител на Оперативен план за активни програми и мерки за вработување и услуги на пазарот на трудот 2018 е Министерството за труд и социјална политика, а имплементатор е Агенцијата за вработување. За негова реализација биле потрошени 975.240.683 денари.


Владата ја донесе програмата за намалување на аерозагадувањето


Скопје, 23 јануари, 2019 - 10:04 (META) 

На својата редовна седница вчера, Владата ја усвоила Програмата за реализирање на Планот за чист воздух за 2019 година. Таа се заснова на четири компоненти: мерки за директно справување со причините за загадување, градење на јавната свест од предучилишна до пензионерска возраст, регулаторни промени неопходни за транзиција кон енергетски систем со ниска емисија и воспоставување платформа за координација и следење на реализација на програмата, известија од Владата.

Со програмата усвоена вчера се дефинира како ќе се трошат предвидените два милиона евра за борбата за почист воздух. Парите ќе се наменат за замена на постојните нееколошки системи за греење во домаќинства, градинки, основни и средни училишта, здравствени објекти и административни објекти во најзагадените градови во земјата, како и за набавка на пречистувачи за воздух во внатрешни простории во градинки, основни и средни училишта, здравствени објекти и административни објекти.

Во акцискиот план за намалување на аерозагадувањето за 2019-та година се вметнати и иницијативи на три граѓански организации коишто се однесуваат на изработка на посебна веб-страница, каде што на едноставен начин ќе бидат набројани сите мерки кои треба да ги спроведат државните институции и на инсталирање на филтри во малите и средни претпријатија, особено во оние од дрвопреработувачката дејност.

Владата ја донела и Програмата за заштита на природата за 2019 година. Во рамките на неа ќе се спроведуваат активности и мерки од стратешки документи како Националната стратегија за биолошка разновидност со Акционен план (2018-2023) и Националната стратегија за заштита на природата со акциски план (2017-2027). Со Програмата за заштита на природата ќе се овозможи понатамошно хармонизирање на националното законодавство со законодавството на ЕУ за заштита на природата.

На вчерашната 116. седница на Владата е поддржана иницијативата за прогласување на Јабланица за национален парк. Иницијативата е од месните заедници на подрачјето на планината Јабланица, како и од невладиниот сектор, а претходно била прифатена и од градоначалниците на општините Струга и Вевчани. Како што соопштија од Владата, првин ќе се изготви Студија за валоризација или ревалоризација на природните вредности на Јабланица, а потоа постапката за прогласување на Јабланица за заштитено подрачје ќе ја започне Министерството за животна средина и просторно планирање.

Владата исто така го прифатила и текстот на Програмата на економски реформи 2019-2021 година.

„Програмата е петти документ изработен согласно насоките од Европската комисија, каде освен среднорочна макроекономска и фискална рамка се вклучени и 18 клучни секторски структурни реформи за зголемување на конкурентноста и растот на економијата. Програмата е изработена во согласност со Програмата за работа на Владата на Република Македонија 2017-2020 година, Ревидираната Фискална стратегија за периодот 2019-2021 и Буџетот на Република Македонија за 2019 година, како и останатите национални стратешки документи. Исто така, програмата е во согласност со Стратегијата на ЕУ за брз, одржлив и сеопфатен економски развој „Европа 2020“, соопштува Владата.


Тевдовски: Значаен прогрес во реформата на јавните финансии


Скопје, 20 декември, 2018 - 12:31 (META) 

Направен е значаен прогрес во реформата на јавните финансии. Законските решенија предвидени со Програмата за реформи во управувањето со јавните финансии (ПФМ) се или подготвени или во финална фаза на подготовка, додека истовремено се работи на оперативата и јакнење на капацитетите на институциите.

Ова беше истакнато денеска на третиот ПФМ дијалог кој се одржа во Министерство за финансии, на кој присуствуваа министерот за финансии Драган Тевдовски, амбасадорот на ЕУ во Македонија Самуел Жбогар, министерот за информатичко општество и администрација Дамјан Манчевески, претставници од институциите, од невладиниот сектор и експертската јавност.

-Во 2018 година бевме фокусирани на подобрување на легислативата во повеќе клучни области, како планирање и буџетирање, јавни набавки јавна внатрешна финансиска контрола, управување со јавен долг и финансиска контрола во јавниот сектор – рече министерот за финансии Тевдовски.

Министерот посочи дека за новиот Закон за буџети има подготвено работна верзија и дека во текот на следната година истиот ќе се најде во собраниска процедура. Со тоа ќе се направат значајни измени во носењето на буџетот, односно ќе се воведе среднорочно буџетирање.

Тој посочи и дека во тек е подготовката на новиот Закон за јавна внатрешна финансиска контрола, кој исто така се очекува да влезе во собраниска процедура следната година. Новите закони за јавни набавки и јавен долг се веќе подготвени. Првиот е веќе во собраниска процедура, додека вториот закон е објавен на ЕНЕР. Министерот Тевдовски истакна дека како дел од сеопфатната реформа на јавните финансии се и континуираните мерки за зголемување на транспарентноста.

-Направена е веб-платформа за „Граѓански буџет“ на која беа поставени ребалансот на буџетот за 2018 и предлог-буџетот за 2019 година. Исто така во процес е и креирањето на платформата „Open finance” со која јавноста ќе има увид во исплатите од Трезорот во реално време – рече Тевдовски.

Амбасадорот на ЕУ во земјава Самуел Жбогар истакна дека спроведувањето на Програмата за управување со јавните финансии е од исклучително значење. Тој посочи дека има напредок, особено во делот на фискалната транспарентност.

ПФМ е прва сеопфатна програма за реформи во јавните финансии.  Таа има за цел да го зајакне системот на јавни финансии и да ја подобри ефикасноста и ефективноста на јавните трошења. Оваа Програма е подготвена врз основа на интензивна соработка на релевантните национални институции, со поддршка од Делегацијата на ЕУ и експертска помош од СИГМА, при што земени се предвид препораките од извештаи за оценка на состојбите во областа на управување со јавни финансии: PEFA, WB PFM Review, SIGMA Baseline Assessment.


Градот Охрид се откажува од новогодишната програма, поради смртта на Стојаноски


Охрид, 20 декември, 2018 - 9:42 (META) 

Градот Охрид информира дека се откажува од реализација на новогодишната програма, освен за најмладите кои ќе настапат на градскиот плоштад.

„По повод ненадејната смрт на градоначалникот на Охрид, Јован Стојаноски, ве информираме дека се отажува годинешното издание на проектот кој стартуваше минатата година „Од 20-ти до 20-ти – сите во Охрид“ кој требаше да трае од 20 декември 2018 до 20 јануари 2019 година. И покрај тоа што програмата беше потврдена и артистите беа букирани, сепак е донесена одлука оваа година да не се одржи главната програма и истата да се пренесе за следната година“, информираат од Општина Охрид.


Силна поддршка за малите и средни фирми со Програмата за економски реформи 2019-2021


Скопје, 3 декември, 2018 - 14:40 (META) 

Подобрување на деловното окружување, зголемување на конкурентноста, намалување на невработеноста и создавање инклузивно општество, предвидува Програмата за економски реформи 2019-2021.

Во Министерството за финансии беше одржан работен состанок помеѓу институциите кои ги спроведуваат реформите, невладиниот сектор и експертската јавност. Финалниот документ Владата има обврска да го достави до Европската комисија до 31 јануари 2019 година.

Според последниот Извештај, Македонија има постигнато најголем успех во имплементацијата на препораките дадени претходната година во мај. Исто така, нотирано е дека земјата сериозно ја подобрила својата оценка во споредба со минатата година.

„Целосно се исполнети препораките кои се однесуваат на усвојување на Програмата за реформи во управувањето со јавните финансии и поставеноста на монетарната политика. Значително исполнување е нотирано кај препораките кои се однесуваат на зголемена фискална транспарентност, користење на ЕНЕР, унапредување на стручното образование преку воведување на модел на дуално образование. Сепак, се уште имаме предизвици кои треба да ги надминеме, не само за да ја подобриме оценката, туку за да ја подобриме економијата и животниот стандард на населението“, соопштуваат од Министерство за финансии.

Во новата Програма од особено значење се меркитте за малите и средни компании. Тие се насочени кон зголемување на конкурентноста, поддршка на иновациите, усвојување на повисоки стандарди за квалитет, производство со поголема додадена вредност и поврзување на домашните со странските компании.

Во тек се и измени на Законот за јавни набавки кои ќе обезбедат примена на принципот „најдобра вредност за парите“ и ќе овозможат почитување на принципите на ЕУ за транспарентност и конкурентност.

По доставување на Програмата до Европската комисија следи оценска мисија. Во мај во Брисел се организира економско-финансиски дијалог на кој се усвојуваат заеднички препораки за подобрување на економското управување на земјата. Подготовката на Програмата е дел од претпристапниот процес на Македонија во Европската Унија.


Општина Прилеп ќе формира претпријатие за гасификација


Прилеп, 1 ноември, 2018 - 10:22 (META) 

Општина Прилеп ги интензивира активностите за гасификација на градот. На последната 20 седница на Советот е донесена одлука, Општината да биде основач на Jавно претпријатие за енергетски дејности „Енерго Прилеп“. Ова јавно претпријатие ќе се грижи за реализација на проектот за гасификација на градот.

„Постапката за формирање на јавно претпријатие е подолга, во периодот кој претстои ќе имаме обврска да го подготвиме Статутот, да ја утврдиме неговата точна дејност, да се изберат органите на управување, кои ќе раководат со јавното претпријатие, со цел спремни да ја дочекаме гасификацијата“, вели Миле Талевски, претседател на Совет на Општина Прилеп.

Како што истакнува градоначалникот на Прилеп, Илија Јованоски, до крајот на својот мандат, ќе се заложи за што поквалитетна и поцелосна реализација на сложениот и обемен проект за гасификација на градот.

„Гасификацијата на Прилеп е проект и од мојата изборна програма, затоа инсистирам ветеното да биде реализирано. Одделот за ЛЕР спроведува анкета со стопанските субјекти, која што е неопходна за утврдување на капацитетот на секундарната гасоводна мрежа. Изготвена е и Програма за енергетски развој на Општина Прилеп за следните две години, така што до крајот на мојот мандат, ќе бидат реализирани сите активности кои што ги дозволува овој долг и сложен процес за поголема енергетска ефикасност на градот“, истакна за „Мета“ градоначалникот Јованоски.


МЗШВ работи на интервентна мерка за откуп на јаболката


Скопје, 3 октомври, 2018 - 13:27 (META) 

Поради временските непогоди, оваа година забележана е поголема количина на индустриско јаболко, кое не може целосно да биде преработено во преработувачките капацитети, информираат од Министерство за земјоделство, шумарство и водостопанство.

Затоа, како што велат од МЗШВ, за регулирање на оваа состојба и постигнување рамнотежа на пазарот, била подготвена интервентна мерка која ќе биде дискутирана на следната владина седница и финализирана до крајот на оваа недела.

„Преку Програмата за рурален развој МЗШВ предвидува поддршка и за преработувачките капацитети, со цел да овозможи поголем простор за откуп на призводите и извоз од државата“, се вели во соопштението на МЗШВ.


Започна исплатата на првите договори од европската ИПАРД 2 програма


Скопје, 21 септември, 2018 - 14:37 (META) 

Од денска Агенцијата за финансиска поддршка во земјоделството и руралниот развој започна со првите исплати за финансиските средства од договорите склучени со последниот повик за програмата ИПАРД 2.

Преку ИПАРД 2 до денеска се склучени рекордни 898 договори во вкупна вредност на побарувани средства од 15,6 милиони евра, од кои 11,7 милиони евра се од европските фондови. Се очекува вкупната бројка на склучени договори да биде над 900 договори.

„Земјоделството е клучниот секотр на кој што се потпира Европската унија, затоа и 40 отсто од буџетот на ЕУ оди за земјоделство. Ако направиме споредби со земјите од регионот кои го поминаа патот кон кој ние сега силно чекориме, ќе видиме дека оваа поддршка за 10 пати ќе биде зголемена, пари кои ќе се искористат за модернизирање на земјоделството“, изјави министерот за земјоделство, шумарство и водостопанство Љупчо Николовски.

Преку програмата ИПАРД 2 Македонија од Европската Унија доби 60 милиони евра за инвестиции за модернизирање на земјоделството. За следната 2019 година е договорена поддршка од ЕУ во износ од 15 милиони евра.

Николовски посочи дека членството во НАТО и влезот во ЕУ ќе значи повеќе европски средства за субвенции, за механизација, за повисок приход, зголемување на средствата за поддршка на земјоделство.


Бесплатно лекување и за лица до 18 години од семејства корисници на социјална помош


Скопје, 15 мај, 2018 - 16:25 (META) 

На денешната 68. седница на Владата, е донесена програмата за измени и дополнувања на Програмата за обезбедување средства за болничко лекување без наплата на учество (партиципација) која што покрај пензионерите ќе ги опфати и лица до 18 годишна возраст на семејства корисници на социјална парична помош за 2018 година.

Исто така, на денешната седница на предлог на Министерството за транспорт и врски, владата ја разгледа и ја усвои Информацијата за потребата од подобрување на состојбата на општинската патна мрежа. По добивањето на анализите од страна на задолжените институции, Министерството за транспорт и врски ќе достави акциски план за подобрување на состојбата на општинската патна мрежа.

Владата на донесе Решение за формирање на Комисија за спроведување на реформи во пензискиот систем која што ќе биде должна да информира за текот на спроведување на активностите за имплементација на истите.


Промовирана програмата за одбележување на 1.000 години Охридска архиепископија


Охрид, 14 мај, 2018 - 15:20 (META) 

Низа културни и спортски настани ќе се случуваат во периодот од мај до декември во чест на одбележувањето на милениумскиот јубилеј „1.000 години од формирањето на Охридската архиепископија“, беше истакнато на денешната презентација на програмата во Охрид.

„Во програмата има културни, научни, уметнички како и спортски настани, издавање на публикации кои ќе наидат на голем интерес кај граѓаните, настани кои сметаме дека ќе го приближат значењето на Охридската архиепископија до граѓаните. Ги покануваме граѓаните од целата држава да го посетат Охрид за време на централната свеченост и да бидат дел од одбележувањето на милениумскиот јубилеј“, велат од Комисијата за односи со верските заедници и религиозни групи.

На 27 мај во Катедралниот храм на охридските архиепископи Св. Софија ќе се одржи свечена академија, под покровителство на претседателот Ѓорге Иванов, а пригодни обраќања ќе има државниот и црковниот врв. Вечерта ќе се одржи и свечен концерт на камерниот оркестар на Македонската филхармонија.

На 28 мај во храмот Св. Софија со почеток во 9 часот ќе започне литургиското чествување, чиноначалствувано од архиепископот охридски и македонски г.г Стефан, во сослужение на членовите на САС на МПЦ-ОА, свештенството и монаштвото.

Градот Охрид програмата ја надополнува и со културни настани кои ќе се случуваат во периодот од 24 мај до 28 мај во центарот на Охрид.