!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Светска банка препорачува Владата да ги одложи ад хок зголемувањата на пензиите


Скопје, 16 ноември, 2017 - 19:05 (META) 

Поради долготрајната политичка криза, Светската банка во редовниот есенски извештај за Западен Балкан проектира економскиот пораст на Македонија до крајот на годината да изнесува 1,5 отсто. Проекцијата за порастот за следната година е 3,2 проценти, а за 2019 година – 3,9 проценти, со очекување да закрепнат инвестициите и потрошувачката.

Светска банка наведува дека приоритет за Македонија е фискална консолидација со зголемено ниво на приходи и подобрена ефикасност на приходната и на расходната страна.

– По разрешувањето на политичката криза, главниот ризик е поврзан со фискалната страна. Битно е да се одржи макроекономската стабилност за да не се поткопаат изгледите за пораст – рече Марко Мантованели, директор на канцеларијата на Светска банка во Македонија, во обраќањето на прес-конференцијата во Приштина, која беше пренесувана во седиштето на банката во Скопје.

Главен двигател на порастот се очекува да биде приватната потрошувачка и зголемувањето на инвестициите повразни со изградбата на двата автопатишта.

Фискалниот дефицит се очекува да се намали на 2,2 проценти до 2019 година, за што Владата треба да почне реформи со зголемување на наплатата на даноците, намалување на трошењето и зголемување на ефиканоста на социјалните трошења.

Во врска со социјалните трошења, Светска банка ѝ препорачува на Македонија да ги рационализира субвенциите, особено во земјоделството и да обезбеди одржливост на пензискиот систем. Првата препорака е Владата да ги одложи ад хок зголемувањата на пензиите, што во изминатите години создало притисок на Фондот за пензиско и инвалидско осигурување.

– Моментално Фондот за пензиско и инвалидско осигурување е во добра кондиција и добива трансфери од централната власт, кои се зголемуваат со тек на годините. Целта е да се намали зависноста на пензискиот фонд од тие трансфери. Ние работиме на параметарски измени во законската регулатива кои ќе ги намалат тие притисоци – рече економистот на Светска банка, Бојан Шимбов, на прес-конференција во Скопје.

Прашан дали во измените на регулативата може да влезе и делот за зголемување на старосната граница за пензионирање, Шимбов рече оти не може да одговори на тоа прашање, дека на пензиите работи конкретен специјалист и дека анализата за измените е во тек.


Според германската војска, можно е ЕУ да се распадне до 2040 година


Хамбург, 5 ноември, 2017 - 15:28 (META) 

Европската Унија и западниот поредок би можеле да се урнат до 2040 година, се наведува во интерна студија на германската војска за развојот на настаните до 2040 година, која била чувана во строга тајност. Сепак, магазинот „Шпигл“ стасал до материјалите.

Германската војска проценува дека распаѓањето на ЕУ и на западниот поредок се можна опција во следните неколку децении, односно до 2040 година.

Во документ од 102 страници, насловен „Стратешка перспектива 2040“, кој кон крајот на февруари оваа година го усвоило Министерството за одбрана и оттогаш се чува во тајност, Бундесверот разгледува како општествените трендови и меѓународни конфликти би можеле да влијаат врз безбедносната политика на Германија во следните децении, пишува „Шпигл“.

Студијата обработува шест можни сценарија од кои најлошото е под име „ЕУ во распаѓање, а Германија во реактивен од“ и предвидува можност за „поголеми конфронтации“.

Според оваа проекција, меѓународниот поредок се урива по „децении нестабилност“, вредносните системи го губат своето влијание, а глобализацијата е запрена, пренесува германскиот весник.

Како што се наведува, „проширувањето на ЕУ во голема мера е заборавено“ како идеја, а Унијата ја напуштаат уште некои земји.

„Европа ја губи својата глобална конкурентност“, констатирале во студијата експерти на Бундесверот.

Тие сметаат дека „сè повеќе несредениот, делумно хаотичниот и конфликтен свет предизвикал драматични измени во безбедносно-политичкото опкружување на Германија и на Европа“.

Според друго сценарио, насловено „Западот против Истокот“, некои источни држави на ЕУ ги замрзнуваат евроинтеграциите, а други „се приклучуваат на источниот блок“.

Уште едно сценарио, под името „Мултиполарна конкуренција“, предвидува зајакнување на екстремизмот додека неколку партнери во ЕУ му се приближуваат на политичкиот модел на Русија.

Документот не наведува стриктно некаква прогноза, но сите сценарија, според авторите, „се можни до 2040 година“, наведува „Шпигл“.


НБРМ: Проекцијата за домашниот бруто-производ ќе биде помалa од 2,5 проценти


Скопје, 12 октомври, 2017 - 14:29 (META) 

По падот на економската активност на домашниот бруто-производ (БДП) во второто тримесечје, показателите за третиот квартал даваат различни сигнали, се вели во заклучокот по одржување на редовната седница на Комитетот за оперативна монетарна политика на Народна банка.

– Поволни движења се забележуваат во градежниот сектор и во трговијата, а воедно поволни се и сигналите што ги даваат и анкетните истражувања за економската доверба. Од друга страна, движењата во индустрискиот сектор се понеповолни во однос на вториот квартал. Сепак, расположливите податоци за третото тримесечје се ограничени, поради што тешко може да се формира прецизна оцена во поглед на динамиката на активноста во овој квартал – се вели во извештајот на НБРМ.

Во него се додава дека пониските остварувања во првата половина од годината создаваат надолни ризици за проекцијата на БДП од 2,5 проценти за цела 2017 година.


Фестивал на новиот германски филм во Прилеп


Прилеп, 10 октомври, 2017 - 10:09 (META) 

Од 12 до 14 октомври во киното „Мис Стон“ во Прилеп ќе се одржи Фестивал на новиот германски филм, во соорганизација на Центарот за култура „Марко Цепенков“ и на Амбасадата на Германија.

Свеченото отворање е в четврток, во 20 часот, а на него ќе присуствуваат и претставници на Амбасадата на Германија. Ќе се прикажува филмот „Чик“, кој е од жанрот драма и комедија, а е снимен во режија на Фатих Акан. Филмот е за публика над 12 години.

В петок, со почеток во 18 часот, ќе се проектира трагикомедијата „Тони Ердман“ на режисерот Марен Аде, кој исто така е за публика над 12 години. Од 20 часот ќе почне проекцијата на „Херберт“, во режија на Томас Штубер.

В сабота од 16 часот ќе се проектира детскиот филм „Авантурата на Нели“, во режија на Доминик Весели. Од 18 часот ќе се проектира филмот за младинци „На иста висина“, во режија на Јоаким Долхопф, а од 20 часот ќе биде прикажан филмот „24 недели“, драма наменета за публика над 12 години, во режија на Ане Зохра Берахед.


Трет ден ќе се расправа за ребалансот на буџетот, седницата закажана во 11 часот


Скопје, 4 август, 2017 - 9:46 (META) 

Денеска пратениците во Собранието трет ден ќе расправаат за ребалансот на буџетот, а пленарната седница ќе почне во 11 часот.

Опозицијата ја обвинува власта дека со ребалансот на буџетот прави најголеми кратења во образованието и во здравството, дека се кратат капитални инвестиции и дека до крајот на годината не е предвидена реализација на ниту еден проект.

Министерот за финансии, Драган Тевдовски, пак, вели дека ребалансот на буџетот е реален бидејќи секој буџет досега бил лажно проектиран за да се „продава приказната дека има развој“.

Пленарната расправа за буџетот треба да трае пет дена. „Мета“ од извори од партиите дознава дека гласањето за ребалансот на буџетот ќе биде в понеделник. Во текот на викендот, само в сабота се очекува да има собраниска расправа.


ММФ ја намали прогнозата за пораст на економијата од 3,5 на 3,2 отсто


Вашингтон, 19 април, 2017 - 13:53 (META) 

Меѓународниот монетарен фонд ги намали проекциите за пораст на македонската економија за 2017 година.

Во најновата пролетна прогноза се предвидува пораст од 3,2 проценти, за разлика од есенската прогноза на ММФ која предвидуваше 3,5 отсто пораст.

За следната година, ММФ предвидува пораст на економијата од 3,4 проценти, а во 2021 година – 3,8 проценти.

Најновите економски прогнози за цел свет се објавени во документот „Светските економски перспективи“, кој содржи проекции на ММФ и на Светска банка, кои го одржаа традиционалното пролетно заседание.


ЕБРД ја намали проекцијата за порастот на домашниот БДП од 3,2 на 2,1 отсто


Лондон, 4 ноември, 2016 - 9:53 (META) 

Европската банка за реконструкција и за развој (ЕБРД) ја намали прогнозата за Македонија за порастот на домашниот бруто-производ (БДП) на 2,1 отсто од 3,2 проценти проектирани во мај, што е резултат на влијанието на политичката криза во државата.

„Во 2016 година голема е веројатноста да има значителен пад на БДП на 2,1 отсто, но веројатно ќе се врати на 3 проценти во 2017 година кога ќе се продолжи со инвестициите и со стабилната потрошувачка“, се вели во последниот регионален извештајот на ЕБРД за економски просперитет на државите.

Во мај банката прогнозираше дека порастот на БДП на земјава ќе се движи од 3,2 до 3,5 процнети.

Во извештајот, исто така, се вели дека на 11 декември ќе се одржат избори кои ќе влијаат на завршување на политичката криза, која, како што се наведува, трае од јануари 2015 година.

Вчера и Народната банка во своите октомвриски макроекономски проекции излезе со предвидување за пораст на БДП на 2,3 проценти.


Економскиот пораст е понизок во однос на априлската проекција на НБРМ


Скопје, 26 септември, 2016 - 9:51 (META) 

Економскиот пораст во првата половина од годината е понизок во однос на априлската проекција на Народна банка, што исто така укажува и на „потенцијално надолно отстапување од проектираниот економски пораст за целата 2016 година“, се вели во најновиот извештај за макроекономски показатели на НБРМ.

– Домашните неекономски фактори поврзани со политичките случувања во земјата и понатаму ја зголемуваат неизвесноста околу остварувањата и оцените за економската активност – се вели во извештајот на банката.

Во однос на надворешното опкружување на македонската економија, од Народната банка очекуваат одлуката за излез на Велика Британија од Европската Унија да не се одрази врз странската ефективна побарувачка годинава, меѓутоа негативните ефекти се очекуваат во 2017 година.


Послаби остварувања кај вкупните депозити


Скопје, 10 ноември, 2015 - 11:33 (META) 

Во третото тримесечје од 2015 година, девизните резерви бележат пад, но показателите за адекватноста и понатаму се во сигурната зона, се вели во извештајот на НБРМ.

– Првичните податоци, заклучно со септември, покажуваат послаби остварувања кај вкупните депозити и кај вкупните кредити во однос на проекцијата за третиот квартал, што во еден дел, можеби, е одраз на неизвесниот домашен и глобален амбиент, како фактори што влијаат врз очекувањата на приватниот сектор. Ваквите поместувања упатуваат на зголемени надолни ризици врз проекцијата на кредитниот и на депозитниот пораст до крајот на годината. Ова особено е изразено кај депозитите, кај кои отстапувањето е позначително и упатува на можно потфрлување кај проектираниот пораст – се вели во извештајот на НБРМ.

Неизвесноста поврзана со домашните политички случувања и со глобалното опкружување е присутна и упатува на зголемени ризици поврзани со динамиката на девизните резерви во следниот период, во споредба со априлските проекции.

– Порастот на депозитите во целост произлегува од депозитите на населението, додека депозитите на претпријатијата забележаа пад на месечна основа. На годишна основа, вкупните депозити во септември се повисоки за 5,7 проценти и се под проекцијата за третиот квартал од 9,5 проценти – се вели во извештајот.

 


Вечерва во Тетово почнува фестивалот на новиот германски филм


Тетово, 20 октомври, 2015 - 15:26 (META) 

Со трилерот „Роден во болка“, кој вечерва во 20 часот ќе биде прикажан во Центарот за култура во Тетово, почнува 11. издание на фестивалот на новиот германски филм.

Фестивалот, кој е во организација на Центарот за балканска соработка „Лоја“ и на Амбасадата на Германија во Скопје, ќе трае три дена.

Ќе бидат прикажани вкупно шест филма, со превод на македонски и на албански јазик.

Утре и задутре проекциите на филмовите ќе бидат во Центарот за балканска соработка „Лоја“. Утре во 18 часот, ќе биде прикажана драмата „Феникс“, а за во 20 часот е закажана проекција на трилерот „Хакери“.

В четврток ќе бидат прикажани два детски филма. Во 16 часот младата публика ќе има можност да го гледа филмот „Лола на грашакот“, а во 20 часот ќе се емитува детскиот филм „Спасете го Рафи“.

Фестивалот ќе заврши со филмската комедија „Триста збора германски“, кој ќе биде премиерно прикажан во 20 часот.

Сите филмски проекции се од новата германска продукција и ќе се емитуваат бесплатно.