ОЈО: Поблаги мерки за Пешевска и Дурловски и продолжување на притворите на сите други


Скопје, 26 јануари, 2018 - 10:10 (META) 

Основното јавно обвинителство за гонење на организиран криминал и корупција побара од Кривичниот суд да им го продолжи притворот на осомничените за насилствата во Собранието од 27 април.

Обвинителството, како што денеска соопштија оттаму, бара продолжување на притворот на поранешниот министер за внатрешни работи Митко Чавков, Богдан Илиевски – Бетмен, актерот Владо Јовановски, режисерот Борис Дамовски, пратениците Крсто Мукоски, Љубен Арнаудов, Сашо Василевски и куќните притвори на Јохан Тарчуловски и Љупчо Димовски и на уште дваесетина осомничени.

Единствено промени има кај пратеничката Жаклина Пешевска, поранешниот директор на Македонска опера и балет, Игор Дуловски и за службеничката од Собрание, Елена Доцевска-Божиновска за кои Обвинителството бара поблаги мерки.

„Надлежниот обвинител побара од судот за лицето Ж.П да биде укината мерката куќен притвор и истата да биде заменета со мерки на претпазливост, а за осомничените лица И.Д. и Е.Д.Б мерката притвор да биде заменета со мерка – куќен притвор. За останатите осомничени лица обвинителството останува на барањето за продолжување на претходно изречените мерки за обезбедување на присуство и за непречено водење на кривичната постапка“, стои во соопштението од Обвинителството за гонење на организиран криминал и корупција.

Ова е второ продолжување на притворите на осомничените за 27 април. Претходно тие беа продолжени од Кривичниот суд на 27 декември, минатата година, а беа потврдени и од Апелацискиот суд Скопје, кој ги одби жалбите на сите осомничени, заклучно со последната на Борис Дамовски, за која Апелација одлучуваше вчера.


Од утре нов круг на одлуки за притворите на осомничените за 27 април


Скопје, 25 јануари, 2018 - 16:10 (META) 

Апелацискиот суд Скопје ја отфрли жалбата и го потврди решението на Кривичниот суд со кое му беше продолжен притворот на режисерот Борис Дамовски, кој е еден од осомничените за насилствата во Собранието од 27 април, минатата година.

Со ова, Апелација ги одби жалбите и им го потврди притворот на сите осомничени на кои им беше продолжена мерката, меѓу кои, покрај Дамовски се и поранешниот министер за внатрешни работи, Митко Чавков, актерот Владо Јовановски, поранешниот директор на Македонската опера и балет, Игор Дурловски, Богдан Илиевски – Бетмен и на уште 24 лица.

Кривичниот суд им го продолжи притворот на осомничените за насилствата во Собранието на 27 декември, минатата година што значи дека утре истекуваат 30-те дена од продолжената мерка.

Од Обвинителството за гонење на организиран криминал и корупција денеска не одговорија на нашето прашање дали ќе бараат продолжување на притворите за нови 30 дена.


Апелација досега не добила ниту една жалба за продолжениот притвор на осомничените за 27 април


Скопје, 3 јануари, 2018 - 11:22 (META) 

Во Апелацискиот суд Скопје сè уште не пристигнала ниту една жалба на одбраната за продолжувањето на притворот на осомничените за насилствата во Собранието од 27 април, минатата година, велат за „Мета“ од судот.

– Досега ниту жалба не е пристигната. Кога ќе пристигнат, ќе видиме колку се и ќе ги разгледаме предметите- ни изјави судијата на Апелацискиот суд Скопје, Сафет Кадрии.

Кривичниот суд во Скопје на предлог на Јавното обвинителство за гонење на организирна криминал и корупција пред точно една недела, односно на 27 декември 2017 година им го продолжи притворот за нови триесет дена на пратениците Крсто Мукоски, Сашо Василевски и Љубен Арнаудов, на поранешниот министер за внатрешни работи и директорот на Бирото за јавна безбедност Митко Чавков, организаторите на протестите на „За заедничка Македонија“ Игор Дурловски, Борис Дамовски, Богдан Илиевски и на уште шестнаесет лица осомничени за насилствата во Собранието.

Куќниот притвор им е продолжен на пратениците Љупчо Димовски, Јохан Тарчуловски, Жаклина Пешевска и на уште еден осомничен, додека за С.М. и М.М. судот го прифати предлогот на обвинителството за укинување на мерката притвор и определување мерка куќен притвор.

Рокот за жалба на одлуките беше 48 часа од приемот на решенијата.


ОЈО побарало продолжување на притворот на Чавков, Илиевски, Дамовски, Дурловски


Скопје, 26 декември, 2017 - 14:35 (META) 

Основното јавно обвинителство за гонење на организиран криминал и корупција побарало од Кривичниот суд да им ја продолжи мерката притвор на осомничените за насилствата во Собранието од 27 април.

„Основното јавно обвинителство за гонење на организиран криминал и корупција достави во надлежниот Основен суд Скопје 1 Скопје предлог за продолжување на изречената мерка притвор за лицата осомничени во предметот за кој прашувате“, се вели во одговорот од Обвинителството на прашањето на „Мета“ дали ОЈО за гонење на организиран криминал и корупција ќе бара или веќе побарало продолжување на марките притвор и куќен притвор што им беа одредени на осомничените за настаните во Собранието од 27 април 2017 година.

Обвинителството на 28 ноември соопшти дека отворило истрага против 36 лица за насилствата во Собранието, кои ги товари за терористичко загрозување на уставниот поредок и безбедноста на државата.

Според официјалните соопштенија на судот, на барање на обвинителството притвор им беше одреден на 28 осомничени, а четворица добија куќен притвор. За четворица од вкупниот број на осомничени нема официјални податоци.

Меѓу притворените се и поранешниот министер за внатрешни работи и директорот на Бирото за јавна безбедност, Митко Чавков, водачите на протестите на „За заедничка Македонија“, Богдан Илиевски, Игор Дурловски и Борис Дамовски, како и актерот Владо Јовановски на кои притворот им истекува на 28 декември.

Инаку на 28 декември им истекува притворот на 19 осомничени, на 29 декември на двајца, а на 30 декември на едно лице.

На шестмината пратеници во Собранието од редовите на ВМРО-ДПМНЕ, Крсто Мукоски, Љубен Арнаудов, Сашо Василевски – кои добија притвор и Јохан Тарчуловски, Жаклина Пешевска и Љупчо Димовски – на кои судот им одреди домашен притвор, мерките им истекуваат на 5 јануари, бидејќи за нив судот одлучуваше подоцна оти се чекаше од Собранието да им го одземе пратеничкиот имунитет.

Кривичниот суд најдоцна од овие датуми, односно до истекот на првичната мерка треба да донесе одлука дали ќе го прифати барањето на Обвинителството за продолжување на притворите.


Јанева очекува СЈО да продолжи да работи и по 2020 година како дел од ОЈО


Скопје, 19 декември, 2017 - 15:18 (META) 

Специјалната јавна обвинителка на денешната прес-конференција соопшти оти очекува реформите во правосудниот сектор да овозможат СЈО и по 2020 година да продолжи да работи како дел од Јавното обвинителство на Република Македонија.

– Се надеваме дека ќе бидат донесени соодветни законски решенија во 2020 година ова јавно обвинителство да се трансформира и да се припои кон Јавното обвинителство на Република Македонија како самостојна институција во постапување на делата од негова надлежност и гонење на кривични дела од корупција од висок профил – рече Јанева на прес-конференцијата на која СЈО информираше за седум нови истраги.

Таа додаде СЈО ќе поднесе и други обвинија за време на актуелниот петгодишен мандат, доколку надлежните институции изнајдат решенија што ќе го овозможат тоа.

Јанева информираше дека СЈО подготвува правилник и други акти за формирање на истражителски центар кој, како што рече, во изминатиот период веќе неформално постои и успешно функционира во рамките на ова обвинителство, а се подготвувал и правилник за примена на законот за заштита на сведоци кој е во собраниска процедура.

– Би сакала да ја информирам јавноста дека во изминатиот период се превземени предистражните предмети од Основното јавно обвинителство Скопје и од Основното јавно обвинителство за гонење на организиран криминал и корупција Скопје за „Скопје 2014“, „Актор“ и за незаконска дивоградба за објектот „Космос“ и за се донесени решенија за воспоставување на наша надлежност и истите се припоени или се отворени нови предистражни постапки кои се водат во ова Јавно обвинителство – рече Јанева.

Таа нагласи дека во овој период додека не биде донесено соодветно решение за членот 22 од Законот за СЈО, со кој е регулиран рокот за поднесување на обвиненија, законска обврска на СЈО е да продолжи со работа и да отвора нови предистраги и истраги.


ВМРО-ДПМНЕ ќе протестира пред Владата против притворот на Едмонд Темелко


Скопје, 26 ноември, 2017 - 12:41 (META) 

ВМРО-ДПМНЕ вечерва ќе организира протест против продолжувањето на притворот на градоначалникот на општина Пустец во Албанија, Едмонд Темелко, потврди за „Мета“ директорот на центарот за комуникации на ВМРО-ДПМНЕ, Иво Котевски.

Протестот треба да почне во 19 часот пред Владата, а потоа присутните граѓани, според информациите во медиумите, ќе се упатат пред судот.

Опозициската партија деновиве реагираше на притоворот на Темелко, меѓу другото и поради тоа што тој бил во многу лоша здравствеа состојба.

Вчера медиумите пренесоа дека Кривичниот суд му го продолжил притворот на Темелко за нови 30 дена.

Според ВМРО-ДПМНЕ, одлуката за притвор е резултат на политичките притисоци и нема никаква основа за негово продолжување. Притворот на Темелко, според партијата, преминува во казна наместо мерка за обезбедување на присуство на осомничениот.

Инаку, градоначалникот на општина Пустец е еден од обвинетите за изборни нерегуларности, во случајот „Титаник“ на Специјалното јавно обвинителство.

Тој беше уапсен во Скопје на 26 септември.


Поднесено обвинение за дедото на Тамара кој пукаше во Никола Тодоров


Скопје, 28 септември, 2017 - 17:24 (META) 

Обвинение за убиство во обид и за недозволено изработување, држење и тргување со оружје или распрскувачки материи е поднесено против Љупчо Стојановски, дедото на малата Тамара, кој пукаше во поранешниот министер за здравство Никола Тодоров на 1 јуни годинава, пред примопредавањето на министерската функција.

Како што соопшти Основното јавно обвинителство – Скопје, истрагата против Љ.С. е завршена, обвинението е поднесено, а за него е побарано продолжување на притворот.

Дедото на Тамара е речиси четири месеци во притвор. Неговата 9-годишна внука Тамара Димовска почина на 9 февруари 2015 година, додека чекаше да биде одобрено да и се изврши операција на ‘рбетот во странство. Нејзиниот дедо рече дека пукал во министерот бидејќи го смета за виновен за смртта на неговата внука.


Собранието ја продолжи кризната состојба до крајот на годинава


Скопје, 29 јуни, 2017 - 14:37 (META) 

Собранието на Република Македонија денеска го изгласа предлогот на Владата за продолжување на кризната состојба, која беше воведена во август 2015 година, поради мигрантската криза и големиот транзит на мигранти и на бегалци низ земјава.

На седницата за продолжување на кризната состојба до 31 декември, односно до крајот на оваа година, „за“ гласаа 94 пратеници, а „против“ и воздржани немаше.

Кризната состојба поради мигрантската криза беше воведена кон крајот на август 2015 година, кога десетици илјади мигранти од подрачјата зафатени со војни на Блискиот Исток и во Северна Африка транзитираа низ територијата на земјава на пат кон западноевропските земји.


Владата бара продолжување на кризната состојба до крајот на годината


Скопје, 28 јуни, 2017 - 13:39 (META) 

Собранието утре на пленарна седница треба да гласа за предлогот на Владата за продолжување на кризната состојба, која беше воведена во август 2015 година поради мигрантската криза и големиот транзит на мигранти и на бегалци низ територијата на државата.

На 30 јуни истекува важноста на одлуката за продолжување на кризната состојба, што беше донесена во октомври минатата година, а со новиот предлог Владата бара нејзино продолжување до 31 декември 2017 година.

„За да се обезбеди континуитет во вршењето на активностите од страна на силите на Армијата на Република Македонија и на безбедносните сили на Министерството за внатрешни работи, во функција на обезбедување, заштита и на чување на државната граница, Владата на Република Македонија ќе побара од Собранието на Република Македонија да ја донесе предлог-одлуката за изменување на одлуката за одобрување на продолжување на рокот за постоење на кризна состојба поради зголемен обем на влез и на транзитирање на мигранти низ територијата на Република Македонија и да го одобри продолжувањето на рокот за справување со кризната состојба, во времетраење до 31 декември 2017 година“, стои во предлогот.

Кризната состојба поради мигрантската криза беше воведена кон крајот на август минатата година, кога десетици илјади мигранти од подрачјата зафатени со војни на Блискиот Исток и во Северна Африка транзитираа низ територијата на земјава на пат кон западноевропските земји.

Собранието на барање на Владата неколкупати го продолжуваше траењето на кризната состојба.


Јанева очекува продолжување на рокот и најави истраги за разговори на „разни јазици“


Охрид, 23 јуни, 2017 - 11:17 (META) 

Специјалната јавна обвинителка Катица Јанева очекува за кратко време да се најде решение за продолжување на рокот за поднесување обвиненија и најави дека во периодот што следи СЈО ќе продолжи со отворање истраги за други прислушувани разговори од кои произлегуваат кривични дела.

Ова Јанева го изјави од Охрид, каде учествува на првото издание на Охридската школа на природното право, на тема „Демократија и владеење на правото“, која се одржува оваа недела во научниот и уметнички центар „Уранија“ во Охрид, а е во организација на МАНУ и на Амбасадата на САД во Македонија.

– Мандатот на СЈО е пет години, односно четири години со право за продолжување за уште една година. Ние имаме мандат да работиме и ќе продолжиме да работиме на нашата мисија, односно да ги обработиме сите разговори. Што се однесува до рокот за поднесување обвиненија, тоа е дискутабилно, се разговара на таа тема и се надевам дека ќе се најде решение во најкус можен рок, а очекувајте дека и во периодот што следи исто така ќе отвораме истраги за други прислушувани разговори од кои произлегуваат кривични дела – рече Јанева.

Таа рече дека следната недела СЈО ќе донесе јавнообвинителски одлуки за повеќето од истрагите што досега ги отвори и дека за некои предмети ќе биде запрена истрагата, а за некои ќе бидат поднесени обвиненија.

– Повеќето од истрагите што се веќе спроведени од СЈО очекувам да завршат со обвиненија, за кои лица тоа е мошне важно прашање. За некои ќе има запирање на истрагата и отфрлање на обвиненијата, за некои ќе се поднесе обинителен акт. Но, во секој случај наредната седмица ќе бидат донесени јавнообвинителски одлуки – рече Јанева.

Прашана колку од прислушуваните материјали се обработени досега, специјалната обвинителка рече дека за работа остануваат повеќе од половина материјали, односно 55 отсто, а меѓу нив има многу разговори на новинари и на „разни јазици“.

– Процентулано, 12 отсто се само напишани, 45 отсто се во обработка, вклучително и тие 12 проценти, а 55 отсто се необработени. Но, тука мора да разберете дека има многу новинари, има прислушувани разговори на разни јазици. Тоа е еден дел кој сè уште не сме го почнале, а тоа ќе биде по 15 септември – изјави Јанева.

Инаку, за неколку дена, односно на 30 јуни, истекува рокот од 18 месеци во кој СЈО треба да поднесе обвиненија за случаите што ги отвори, а кои произлегуваат од прислушуваните разговори, кои СДСМ му ги предаде на СЈО на 30 декември 2015 година.

Координаторот на пратеничката група на СДСМ, Томислав Тунтев, вчера информираше дека парламентарното мнозинство следната недела ќе ги поднесе предлог-измените на Законот за заштитени сведоци и на Законот за СЈО, за продолжување на рокот за обвиненија.