Ал Ди Меола и Продиџи во Охрид


Охрид, 13 август, 2016 - 11:14 (META) 

Викендов Охрид ќе биде центар на музичките збиднувања во земјава. Концертите на еден од најдобрите гитаристи во светот Ал Ди Меола и групата Продиџи, во рамки на фестивалот „Охрид колинг“, се очекува да донесат гости од целиот Балкан, но и од Англија и Холандија.

– По концертот на светски познатите диџеи Ники Ромеро и Лост Фрекуенцис на 1 август, покажавме дека Охрид е подготвен за организација на фестивал кој од година во година ќе прерасне во еден познат бренд на Балканот, но и пошироко. Покажавме дека заедно во Охрид можеме да имаме настани кои ќе го сместат градот на туристичката мапа на концертни градови многу пошироко од балкански рамки и очекувам дека овој викенд ќе биде врвот на првото издание на фестивалот – вели Ѓоко Апостолов од општина Охрид, која заедно со „Авалон продукција“ го организира фестивалот.

Организаторите информираат дека интересот за двата концерта е огромен, а особено радува тоа што освен од балканските земји, голем интерес има и од Англија и Холандија.

– Кон ова голем придонес имаат и директните авиолинии кои на вљубениците во музиката од овие земји им овозможуваат за малку пари да дојдат и слушаат музички ѕвезди од светски калибар – потенцира Апостолов.

Од „Авалон продукција“ најавуваат незаборавни музички доживувања со светските музички ѕвезди кои викендов ќе настапат во Охрид.

– Ал Ди Меола кој е еден од најдобрите гитаристи во светот на сите времиња, екслузивно го имаме на сцената на Антички театар, едно преубаво место, спој на светски уметник и прекрасен простор. Се надевам дека сите кои ќе дојдат ќе уживаат. Финалето е со светската атракција, групата Продиџи. Подготовките течат одлично, имаме беспрекорна соработка со локалната самоуправа. Ова е фестивал со кој може да се гордеат и Охрид и Македонија – вели Денис Илиоски од „Авалон продукција“.

Од таму предупредуваат дека има појава на продавање на фалсификувани билети за концертите, па затоа со совет до заинтересираните да бидат внимателни и да купуваат билети само на назначените официјални места за продажба.


Од вечерва „Охрид колинг“ во СРЦ „Билјанини извори“


Охрид, 1 август, 2016 - 12:47 (META) 

Охрид од вечерва е домаќин на големиот музички настан „Охрид колинг“ (Ohrid calling), на кој ќе настапат светски познатите диџеи Ники Ромеро и Лост Фриквенсес.

На 13 август е закажан настапот на легендарниот гитарист Ал Ди Меола, а еден ден потоа на СРЦ „Билјанини извори“ е настапот на светската атракција, групата „Продиџи“. На годинешниот „Охрид колинг“ ќе настапат и познати македонски групи и диџеи.

Организатори се Општината Охрид и „Авалон продукција“.

– Намерата е во листата учесници на настанот да се вклучуваат многу познати светски музички имиња, кои ќе бидат причина Охрид да се етаблира во еден регионален центар кој ќе се развива од година во година и ќе претставува не само туристичка атракција туку и музичка дестинација, што значително ќе ја зголеми атрактивноста на градот Охрид – вели градоначалникот Никола Бакрачески.
Денис Илиоски од „Авалон продукција“ додава дека Охрид ги има сите услови да покаже во светски рамки дека заслужува еден ваков голем фестивал.

Билетите за „Охрид колинг“ веќе се распродадени во Бугарија, Албанија, Косово, Грција, цел Балкан, додека за концертот на „Продиџи“ има најавено тури директно од Велика Британија.