Анкета: Економската состојба е лоша, но компаниите очекуваат дека ќе се подобри


Скопје, 10 мај, 2018 - 14:48 (META) 

Сегашната економска ситуација е оценета како полоша во однос на минатата година, покажува Анкетата за деловната клима во Македонија спроведена помеѓу членките на Македонско – германското стопанско здружение.

Само 7 отсто од компаниите, моменталната економска состојба ја оцениле како добра, а 50 отсто ја оценуваат како лоша.

– Кај компаниите има позитивното расположение во однос на очекувањата дека деловната клима значително ќе се подобри оваа година и тие се многу повисоки во однос на минатогодишната анкета. Дури 45 отсто од извршните директори очекуваат подобрување, а само 12 отсто очекуваат полоши макроекономски услови – рече директорот на Делегацијата на германското стопанство во Македонија, Патрик Мартенс.

Зголемена продажба очекуваат 68 отсто од испитаните компании, а 5 отсто стравуваат од пад на продажбата. Производителите оваа година очекуваат зголемен извоз во споредба со лани.

– Годинава, некои од факторите кои минатите години беа оценети како негативни се подобрени но, повторно, испитаниците не се задоволни од сузбивањето на корупцијата и криминалот, правната сигурност и ефикасноста на јавната администрација. И покрај наведените проблеми, сепак е охрабрувачки фактот дека 72 отсто од компаниите кои работат во Македонија повторно би инвестирале во Македонија – додаде Мартенс.

Сепак, процентот на компании кои повторно би инвестирале во државата е намален за 12 отсто во однос на 2016 година.

Заменикот-амбасадор на Германија во Македонија, Марко Акватичи рече дека од денешната посета на државниот министер за европски прашања во МНР на Германија, Михаел Рот имаат информации дека ќе се реши спорот со името, а евроатлантската перспектива е позитивен знак за економијата.

„Кога ја спроведовме анкетата тогаш на власт дојде новата Влада. И од тогаш до сега се случија позитивни работи како препораката од Европска комисија за почеток на преговорите и волјата за решавање на спорот со името“, додаде Акватичи.

Во земјата работат повеќе од 200 компании со германски капитал кои вработуваат 20.000 лица. Трговската размена помеѓу Македонија и Германија, лани се зголемила за 10 отсто во однос на 2016 година.


Анѓушев: Продажбата на ЕДС беше максимално транспарентна


Скопје, 25 април, 2018 - 15:49 (META) 

Вицепремиерот за економски прашања, Кочо Анѓушев за продажбата на неговата компанија ЕДС на грчката национална компанија за производство на електрична енергија ППЦ рече дека транзицијата на сопственоста ќе трае дваесетина дена.

– По финасиската трансакцијата, согласно законите во Македонија ќе си платам персонален данок и средствата што сум ги добил од продажбата ќе ги прикажам во мојот анкетен лист. Им посакувам на сите,  политиката да не се меша во реалниот бизнис. Трансакцијата беше максимално транспарентна и евалуацијата на цената беше извршена од две меѓународни куќи што беа ангажирани од грчката компанија да направат проценка – рече Анѓушев одговарајќи на прашање пред почетокот на форумот „Инвестиции за долгорочен економски развој“.

Од продажбата, 90 отсто од средствата, или 4,8 милиони евра, ќе легнат на негова сметка, а 10 отсто на сметката на „Фероинвест“.

– Преговарањето за цената не беше лесен процес, бидејќи станува збор за интернационална компанија која е присутна во неколку држави во ЈИЕ. Компанијата сум ја развивал од нула, како старт-ап во сите држави во време кога беше стопирана либерализацијата. Доколку продолжеше либерализацијата на пазарот на електрична енергија, веројатно ќе имаше поголема вредност, – додаде Анѓушев.

Тој објасни дека грчката компанија ППЦ е гигант во енергетскиот сектор во регионот со годишен промет од пет милијарди евра и 15 милијарди евра капитал во електрани и далекуводи.

– Со таков ветер зад грбот, ЕДС ќе има прекрасна иднина, бидејќи пазарот на електрична енегија во Југоисточна Европа допрва ќе се развива. Тоа е шанса за компанијата, за сите вработени и за земјава – рече Анѓушев.

Вицепремиерот додаде дека директорот на ППЦ им дал гаранции на 40-на вработенти во ЕДС дека ќе се ги задржат работните места


Анѓушев за 4,8 милиони евра ја продаде ЕДС на грчкото Електростопанство


Скопје, 25 април, 2018 - 12:20 (META) 

Вицепремиерот Кочо Анѓушев, сопственик на компанијата за трговија со струја ЕДС, денеска го потпиша договорот со Грчката национална компанија за производство на струја ППЦ, со кој ЕДС станува целосно во сопственост на грчкото електростопанство.

Како што соопштија компаниите, ЕДС, која преку своите подружници работи во Словачка, Унгарија, Романија, Хрватска, Србија, Црна Гора, Косово, Македонија, Грција и Бугарија, е продадена за 4,8 милиони евра.

– Со овој договор зад ЕДС имаме гигант во производство на струја што се очекува дека ќе ја направи ЕДС поконкурентна на пазарот. Тоа значи дека клиентите ќе имаат добри услови и  уште поголема сигурност – изјави Анѓушев.

На сличен став е и главниот извршен директор на ППЦ, Емануел М. Панајотакис.

– Со купувањето на ЕДС, исклучителна компанија која за неколку години се разви и стана значајна компанија за трговија со електрична енергија, ППЦ влегува на пазарот за електрична енергија на нашата соседна земја  на најдобар можен начин. ЕДС во сопственост на ППЦ ќе стане уште помоќна компанија, со оглед на портфолиото што го имаме и развојните планови дефинирани за време на купувањето – рече Панајотакис.

ППЦ е една од најголемите компании во Југоисточна Европа од областа на енергетиката, со вкупна актива од повеќе од 15 милијарди евра и годишни приходи од над 5 милијарди евра. Нејзината основа дејност е  производство, дистрибуција и снабдување со електрична енергија во Грција за 7,3 милиони потрошувачи и има пазарен удел од околу 85 проценти.

ППЦ е исто така сопственик на електродистрибутивната мрежа на Грција којашто стопроцентно ја води филијалата „ХЕДНО”, како и на ППЦ Обновливи извори – една од пионерските компании во Европа за производство на електрична енергија од обновливи извори.

ППЦ има подружници во Бугарија, Турција и Албанија.


Недоследности и популизам околу „Мерцедесот“


Скопје, 9 март, 2018 - 9:13 (META) 

Одлуката која што ја донесе Владата на својата 57 седница во врска со стопирањето на продажбата на „Мерцедесот на Груевски“, е недоследна и е последна епизода во сторијата која се повеќе се користат и популистички манири, пишува „Вистиномер.мк“.

Приказната за „Мерцедесот“ започна уште со емитувањето на снимките од прислушуваните телефонски разговори до кои дојде СДСМ во 2015 година. Потоа, на сите митинзи актуелниот премиер Зоран Заев, како лидер на најголемата опозициска партија ветуваше дека ќе го продаде „Мерцедесот“ и за тие пари ќе купи амбулантни возила. Тоа беше ветувано и во изборните кампањи за предвремените избори, а можеби и во кампањите за локлните избори, во општиот дел на говорите.

Повеќе на оваа тема прочитајте на „Вистиномер.мк“.


Бошњаковски: Ја стопиравме продажбата на „мерцедесот“, иако за СЈО не е спорна


Скопје, 7 март, 2018 - 12:34 (META) 

Продажбата на блиндираниот „мерцедес“, кој во дел од „бомбите“ беше споменуван како „она на М“, е стопирана за да се избегне каква било опасност тоа да попречи на судскиот процес што се води за неговата набавка, рече портпаролот на Владата, Миле Бошњаковски на денешната редовна конференција за медиумите.

– Иако Специјалното јавно обвинителство рече дека нема никакви пречки тој да се продава, сепак Владата сака да ја исклучи секоја можна опасност да се појават проблеми во судскиот процес и така ќе биде сè додека судскиот процес не заврши – рече Бошњаковски.

„Мерцедесот“ сега е конзервиран и се наоѓа во депото на Службата за општи и заеднички работи на Владата, појасни тој.

Бошњаковски дополни дека иако нема правна пречка за продажбата, одлуката на Владата е постапката да се стопира за да се оневозможи какво било попречување на судската постапка.

– Идејата е да се оневозможи каква било форма на изговор на обвинетите за непостоење на докази – рече владиниот портпарол, кој одговарајќи на дополнително новинарско прашање рече дека актуелната влада никогаш не го користела за своите потреби, туку само за превоз на високи странски гости.


Заинтересираните за купување на „мерцедесот“ од „бомбите“, може да го разгледаат на 7 март


Скопје, 28 февруари, 2018 - 14:37 (META) 

Сите кои се заинтересирани да го купат „мерцедесот“ С600 кој е во сопственост на државата, можат да го разгледаат на 7 март (среда) од 10 до 15 часот во гаражата на Македонска радио-телевизија, информираа денеска од Службата за општи и заеднички работи на Владата.

Почетната проценета вредност на овој автомобил, попознат како „она на М“ од прислушуваните разговори, согласно проценката на  Бирото за судски вештачења, изнесува 230.000 евра. Јавното наддавање ќе се изврши електронски на интернет страницата www.e-aukcii.finance.gov.mk“, а заинтересираните треба да се регистрираат најдоцна до 12 март.

– Банкарската гаранција за сериозност на понудата треба да биде во висина од два проценти од вкупната проценета вредност со времетраење од 30 дена од денот кога е крајниот рок за поднесување на пријави, 12 март. Право на учество на електронското наддавање имаат сите домашни, странски физички и правни лица. Потребно е во последните пет години да не им е изречена правосилна пресуда за учество во злосторничка организација, корупција, измама или перење пари. Физичките и правни лица да немаат неплатени даноци, придонеси или други јавни давачки, на правните лица да не им е изречена прекршочна санкција – појасни Пеце Мирчевски од Службата за општи и заеднички работи на Владата.

На новинарско прашање, со што ќе се возат странските делегации кои ќе бидат во посета на Македонија, од владата одговорија дека има уште два блиндирани автомобили, но и дека МВР ќе се грижи за нивната безбеднсот како и до сега.

Јавноста за луксузниот „мерцедес“ разбра од „бомбите“, а Специјалното јавно обвинителство води постапката под кодно име „Тенк“ против поранешниот премиер Никола Груевски, поранешната министерка за внатрешни, Гордана Јанкулоска и нејзиниот помошник за јавни набавки, Ѓоко Поповски, дека луксузното возило било нарачано во време на ослабена економска моќ на министерството за внатрешни работи.


ВМРО-ДПМНЕ: Дали Грција го награди Анѓушев за лицитирањето со ново име?


Скопје, 17 јануари, 2018 - 14:20 (META) 

Мошне симптоматично е што истовремено додека засилено се одвиваат преговори помеѓу Грција и Република Македонија, во услови кога Заев е убеден дека ќе го реши името, вицепремиерот Кочо Анѓушев лицитира со имиња на државата а потоа ја продава неговата фирма на грчкото електростопанство, порача  Христијан Делев на прес-конференција во седиштето на ВМРО-ДПМНЕ.

– Целата јавност беше сведок дека Анѓушев од позицијата вицепремиер срамно лицитираше со имиња за Република Македонија и кажа дека за него е прифатливо промена на името на државата. Тој дури и нафрлаше и имиња Горна, Северна и Нова Македонија, кои како што кажа за него се прифатливи. Набргу по ваквата изјава на вицепремиерот Анѓушев следеше информација дека грчката државна компанија за производство на електрична енергија ќе ја купува ЕДС на Кочо Анѓушев, информација која ја потврдија и од фирмата на вицепремиерот – рече Делев.

Тој побара вицепремиерот да ја открие сумата што ќе ја добие за фирмата.

– Кочо Анѓушев мора да ги отстрани сите сомнежи дека продажбата на неговата фирма би се користела за евентуална награда за решавање на спорот за името по волја на Грција. Тој треба да каже на јавноста која е реалната вредност на неговата фирма? Постои сериозна загриженост во јавноста дека разликата од реалната и продажната вредност би можела да биде надомест за промената на името на Македонија? – рече Делев, порачувајќи дека ВМРО-ДПМНЕ нема да се согласи на промена на Уставот со цел промена на уставното име, ниту на решенија кои задираат во македонскиот идентитет и го негираат постоењето на македонскиот јазик и народ.


САД забранија „Манигрем“ да се продаде на „Алибаба“


Вашингтон, 3 јануари, 2018 - 14:24 (META) 

Регулаторите во САД го забранија продавањето на гигантската фирма за трансфер на пари „Манигрем“ (Moneygram) на кинеската „Ент Фајненшел“, компанија за дигитални плаќања на корпорацијата „Алибаба“. Продажбата беше најавена пред една година, а сумата што беше понудена изнесуваше 1,2 милијарди долари.

Тоа е најголемата кинеска зделка досега, блокирана од администрацијата на Доналд Трамп.

Комисијата за странски инвестиции вели дека геополитичките прилики се „значително сменети“ откако зделката беше најавена минатата година.

Блокирањето е сериозен удар за амбициите на извршниот претседател на „Алибаба“, Џек Ма, кој му вети на претседателот Трамп дека ќе отвори милион работни места во САД.


Ќе се укинува временското ограничување на продажбата на алкохол


Скопје, 5 декември, 2017 - 20:46 (META) 

Министерството за економија на денешната владината седница ја презентираше информацијата за изменување на Законот за трговија во согласност со иницијативата на посетените компании во рамки на проектот „Учиме од бизнис-заедницата“.

„Со информацијата, Министерството за економија во рок од два месеци треба да достави предлог за изменување на Законот за трговија за укинување на времето за продажба на алкохол и за укинување на ограничувањето, односно забраната на продажба на алкохол во киосци, за кои ќе се издава лиценца“, стои во соопштението од владината седница.


Телеком Словенија се повлече од „ВИП“


Скопје, 10 ноември, 2017 - 19:35 (META) 

Телеком Словенија ја прифати понудата на Телеком Австрија и го отстапи својот удел во македонскиот телекомуникациски оператор „ВИП“ за сума од 120 милиони евра, објави словенечката берза.

Со купувањето на преостанатите 45 отсто од досега заедничката компанија „Оне.ВИП“, австрискиот телеком станува стопроцентен сопственик на операторот.

Компанијата беше формирана на 1 октомври 2015 година, кога беше напоменато дека останува можност Телеком Словенија да се повлече од заедничката зделка.

Доминантен сопственик на Телеком Австрија е Америка Мовил, компанија на Мексиканецот Карлос Слим, еден од најбогатите луѓе на светот.