„Цивил“: Починати лица и фантоми и натаму фигурираат во Избирачкиот список


Скопје, 10 август, 2018 - 12:23 (META) 

Фантомски гласачи, починати лица со право на глас, лица регистрирани на погрешна адреса. Избирачкиот список е далеку од прочистен, велат од граѓанската организација „Цивил“. До нив уште во првиот ден од јавниот увид пристигнале низа пријави за недоследности. Но најголем проблем, според „Цивил“, е лавиринтот во кој ќе се заглават граѓаните доколку сакаат да го пријават случајот. Затоа организацијата повикува институциите сами да ги средат проблемите во Избирачкиот список и да не ги шетаат граѓаните од врата до врата.

„Фантомите во Избирачкиот список се вратиле и удобно се сместиле на адресите на граѓанките и граѓаните што се јавија во нашата организација. Добивме и една пријава за починато лице,што сѐ уште фигурира во Избирачкиот список. Во еден случај, граѓанин ни пишува дека веднаш се јавил во ДИК да пријави неколку „ненајавени гости“ на својата адреса. Од таму, како и на претходните изборни процеси, го упатиле да се јави во МВР. Гласачите повторно ја слушаат старата приказна: секогаш некој друг е одговорен. „Цивил“ ги повикува граѓанките и граѓаните да ја искористат можноста за увид во Избирачкиот список и да ги пријават неправилностите во ДИК, но и на ЦИВИЛ, со цел да се спроведе јавна контрола на процесот“ велат од „Цивил“.

Реакцијата на „Цивил“ следува по вчерашниот повик од Државната изборна комисија, граѓаните да извршат увид во Избирачкиот список и доколку забележат проблем самите да го пријават. ДИК, овојпат, нема да прави теренски проверки, а промена на податоци ќе се направи само по претходна пријава.


Општина Карпош ќе ги запре градежните активности и ќе субвенционира маски


Скопје, 15 декември, 2017 - 15:16 (META) 

Градоначалникот на Општина Карпош, Стефан Богоев најави дека ќе се запрат сите градежните активности кои произлегуваат од работењето на општината и се однесуваат на тековно одржување на улиците, тротоарите и слични градежни зафати кои ги реализира oпштината, поради загадениот воздух.

– Во контекст на ова, бараме сите приватни инвеститори и изведувачи да го следат примерот на Општина Карпош и да запрат со градежни активности во моментите кога загадувањето е на највисоко ниво – додаде Богоев.

Тој најави дека ќе продолжат и редовните контроли, инспекции на градилиштата, со цел, да се спречи узурпирање на јавните површини и предизвикување на дополнителна нечистотија и загадување.

Богоев најави дека општината ќе започне процедура за итна набавка на прочистувачи на воздух за сите градинки и училишта на територијата на општината. Истовреме, ги повика сите инвеститори и општествено одговорни компании да донираат прочистувачи на воздух и заштитни маски за граѓаните или, пак, да донираат финансиски средства на наменската сметка на општината.

Градоначалникот на Општина Карпош исто така најави дека следната недела ќе биде свикана вонредна седница на Советот на општина Карпош на која тој ќе предложи донесување одлука за субвенционирање на заштитни маски за целни групи на граѓани. Тој ги повика граѓаните да пријавуваат загадувачи на отворената телефонска линија.

Општина Карпош е една од најзагадените скопски општини, каде што, вредноста на ПМ-10 честичките е неколку пати над максимално дозволената граница.


Технолошки форум за чиста вода за пиење и за прочистување на отпадните води


Скопје, 23 март, 2017 - 15:27 (META) 

Под мотото „Моќта на чистите води“, Ротари клуб Скопје – Интернационал, ќе го организира вториот технолошки форум, кој ќе се одржи на утре со почеток во 18 часот, во хотелот „ТЦЦ Гранд плаза“ во Скопје.

На вториот технолошки форум ќе бидат опфатени повеќе аспекти, како што се „Одржлива вода за пиење и обезбедување услуги за почистување на отпадни води во Македонија“, „Здравстени аспекти на водата“, „Алтернативни извори за водоснабдување на Градот Скопје“ и „Управување со води во Македонија“, а ќе бидат споделени и искуства за прочистување вода во други земји.

Чистата вода за пиење и прочисутвањето на отпадните води станува една од главните глобални теми кои се од стратешко значење за идниот развој.

– Оттука стратешкиот пристап и навременото зачувување на ресурсите се од клучно значење, тргнувајќи од локално, па до глобално ниво – велат организаторите.


Скопје и Тетово ќе добијат зелени билборди за прочистување на воздухот


Скопје/Тетово, 20 март, 2017 - 15:06 (META) 

Утре пред Центарот за култура во Тетово и в среда во близина на хотелот „Мериот“ во Скопје, невладината организација „Екосвест“ и Амбасадата на Германија во Македонија ќе го промовираат проектот за клима и за заштита од климатски промени „Сити три“ (City tree).

На градовите Скопје и Тетово и на нивните граѓани, како што соопштија од Амбасадата на Германија, ќе им бидат предадени зелените билборди за прочистување на воздухот.

– „Сити три“ претставува вертикална структура од специфични видови мов, васкуларни растенија кои „јадат“ ситна прашина, азотни оксиди и озон и имаат способност да неутрализираат 240 тони јаглерод диоксид годишно – стои во соопштението од амбасадата.

На свеченото отворање ќе се обратат Ана Чоловиќ-Лешоска од НВО „Екосвест“, амбасадорката на Германија во Македонија, Кристине Алтхаузер, градоначалничката на Тетово, Теута Арифи, и градоначалникот на Скопје, Коце Трајановски.

Овој проект е овозможен со помош на средства од Фондот за заштита од климатиски промени на министерството за надворешни работни на Германија, а во набаваката на билбордите учествувале компаниите „Пакомак“, „Енерџи диливери солушнс“, „Еколог“, „Везе Шари“, „Прокредит банка“, ДХЛ, „Кнауф“ и „Де мед“.


Ахмети – Нуланд: Решението на кризата се демократски избори


Скопје, 11 јули, 2016 - 13:09 (META) 

Лидерот на Демократската унија за интеграција (ДУИ), Али Ахмети, денеска ја уверил Викторија Нуланд, помошник државен секретар на САД за европски и евроазиски прашања во Стејт департментот, дека ДУИ е најконструктивна за наоѓање решение и за брзо постигнување компромис во актуелната криза во земјава, информираат од партијата.

Во соопштението на ДУИ пишува дека Ахмети и Нуланд, отворено и пријателски разговарале за начините како да се реши политичката криза во земјата и за враќање на евроатлантската агенда. Нуланд ја изразила проценката на САД за конструктивната улога на Ахмети кон постигнување решение, како и тесната соработка со американските власти.

„Овој компромис треба да резултира со сеопфатни, веродостојни и демократски избори што е можно поскоро“, рекол Ахмети.

Лидерот на ДУИ ја информирал Нуланд и за предлозите на ДУИ за прочистување на избирачкиот список и за медиумите, како и за потребата двете страни да се договорат дека се исполнети условите за избори, а потоа да се одреди датум за предвремени избори.

„Соочувајќи се со ризик од различни влијанија, Ахмети побара поддршка од Америка за следење на нашиот пат кон интеграцијата во НАТО и во ЕУ, при што Нуланд истакна дека тоа е заедничка цел“, се наведува во соопштението од партијата.


Чичаковски: Од 226.000 спорни гласачи, за 71.000 нема никаква евиденција


Скопје, 23 јуни, 2016 - 17:26 (META) 

Од 226.000 спорни гласачи во избирачкиот список, за 71.000 гласачи нема никаква евиденција, изјавил денеска претседателот на Државната изборна комисија (ДИК), Александар Чичаковски, по состанокот на работната група за избирачки список, пренесува „Утрински весник“.

Според Чичаковски, допрва ќе се преговара што ќе биде со овие 71.000 гласачи за кои вкрстената проверка покажала дека не се наоѓаат во ниту една база на податоци.

„Тие не се евидентирани дека некогаш користеле здравствена услуга, социјална заштита, немале трансфер на пари преку трансакциска сметка ниту, пак, се евидентирани во пензискиот систем. Тоа се 71.000 лице, кои најверојатно се дијаспора, постари лица кои не се вклучени во системот на социјална и здравствена заштита, меѓутоа можеби се наоѓаат и лица чие избирачко право е спорно“, изјавил Чичаковски.

Покрај овие, во избрирачкиот список, според претседателот на ДИК, има уште две категории спорни гласачи.

Станува збор за, како што пишува „Утрински“, 116.000 гласачи за кои има некој историски податок во базите на податоци на релевантните институции, но, од пред една година или повеќе, веќе не постои податок дека овие луѓе биле вклучени и користеле некоја услуга од системот на социјална и здравствена заштита на државата.

Спорни се и уште 39.000 гласачи кои при теренските проверки не се пронајдени и за кои постои сомнеж околу вистинитоста на адресите кои стојат во евиденцијата за живеалиште на МВР и во личните карти и пасошите.

На денешниот состанок, на кој партиските претставници се обиделе да направат пробив во преговорите за прочистување на избирачкиот список, присуствувале и претставници на министерствата за правда, за внатрешни и за надворешни работи, од Државниот завод за статистика, Управата за водење матични книги, Секретаријатот за европски прашања и од Дирекцијата за заштита на лични податоци, како и од амбасадите на САД, на Европската Унија, Мисијата на ОБСЕ, ИФЕС, како и невладините „Мост“ и „Цивил“.

Од политичките партии присуствувале Никола Тодоров од ВМРО-ДПМНЕ, Артан Груби од ДУИ, Дамјан Манчевски и Цветанка Иванова од СДСМ и Беким Фазлиу од ДПА.


ДИК побара од МВР повторно да провери повеќе од 160.000 гласачи


Скопје, 13 април, 2016 - 13:55 (META) 

Државната изборна комисија им наложи на Министерството за внатрешни работи (МВР) и на Управата за водење матични книги (УВМ) да проверат повеќе од 40.000 гласачи кои не биле дома за време на теренската проверка. Исто така, тие треба да ги проверат и околу 124.000 граѓани кои првично системот на ДИК ги исфрли како неконзистентни, но подоцна членовите одлучија да не ги проверуваат затоа што се работи на лица кои се иселени или се на привремена работа во странство. Од овие лица МВР досега проверило само 16.000, кои на избирачкиот список ќе бидат означени со „Д“ или „И“ (дијаспора или иселени).

Од ДИК има најави дека денеска ќе се одржи нова јавна седница, но досега нема официјална потврда за тоа.

Несoгласувањето помеѓу членовите на ВМРО-ДПМНЕ и на СДСМ во ДИК се виде и на вчерашната седница преку различното толкување на претставените бројки.

За членот од СДСМ, Игор Милев, бројката од повеќе од 53.000 гласачи кои за МВР имаат основано живеалиште и со тоа можат да бидат гласачи, е спорна.

– Извештајот прво е спорен поради тоа што не е потпишан од техничкиот министер за внатрешни работи, Оливер Спасовски, туку од дополнителникот заменик-министер Митко Чавков. Понатаму, во извештајот никаде не пишува дека тие гласачи имаат валиден документ за потврда на живеалиштата, туку МВР нè известува дека такви лица во системот постојат – изјави Милев.

Претседателот на ДИК, Александар Чичаковски, му реплицираше на Милев и објасни дека Комисијата на некоја наредна седница ќе ги разгледува и овие податоци добиени од МВР.

Потпретседателот на ДИК, Реџеп Прекопуца, предложи комисијата да разговара и за гласачите од Пустец, како и за повеќе од 124.000 лица кои се водат за неконзинстентни поради тоа што не се знае дали живеат во странство или се на привремена работа во друга држава.

За членот на ДПА во ДИК, Бенредин Ибраими, по овие две основи има најмалку спорни гласачи.

– Жителите од Пустец имаат лична карта и тие треба да постојат во избирачкиот список. Тука нема ништо спорно. Исто така, не треба да се прави фама и од тие повеќе од 120.000 гласачи затоа што тоа се луѓе кои се државјани на Македонија, но моментално живеат и работат во странство. Да не се пумпаат работите и потоа во јавноста да излегуваат информации кои се невистинити – рече Ибраими.


ДИК продолжува со прочистување на избирачкиот список


Скопје, 7 април, 2016 - 10:06 (META) 

Државната изборна комисија (ДИК) денеска во 11 часот ќе одржи редовна работна средба за прочистување на избирачкиот список. Како што информираат за „Мета“ членови од ДИК, тие продолжуваат со редовна работа за целосна проверка на спорните гласачи.

Синоќа лидерот на СДСМ, Зоран Заев, најави дека денеска ќе има средба со членовите на ДИК од таа партија и дека ќе донесат одлука дали и тие, како техничките министри и дополнителните заменици министри, ќе се повлечат од комисијата.

– Една од поизвесните одлуки е дека и тие ќе бидат повлечени – рече Заев.

Вчера со осум гласа „за“ и ниту еден „против“, ДИК го изгласа извештајот за досегашната обработка на спорните гласачи опфатени со вкрстена и со теренска проверка.

Како што соопштија оттаму, од 87.128 лица кои теренски беа проверувани, 37.435 лица не биле пронајдени дома.

ДИК побарала од избирачкиот список да се избришат околу 4.000 лица, за кои според евиденцијата на МВР и матичната евиденција е потврдено дека се починати.

Од МВР сè уште не се докрај обработени податоците на повеќе од 100.000 лица кои се појавија како спорни по вкрстената проверка.

Членовите на ДИК од СДСМ сметаат дека избирачкиот список не е прочистен, додека за членовите од ВМРО-ДПМНЕ останува само уште малку работа.


Оер: Сега на ДИК ѝ претстои суштинска работа


Струмица, 24 март, 2016 - 19:23 (META) 

Сега ѝ претстои суштинска работа на Државната изборна комисија (ДИК), затоа што кај нив треба да се спроведе најголемата работа, односно за еден месец пред одржувањето на изборите да се добие избирачки список што ќе биде стабилен и прочистен и во кој сите гласачи ќе имаат доверба, истакнала француската амбасадорка Лоренс Оер на отворениот ден со граѓаните на Струмица, каде што се дискутирало на тема „Права и политички слободи на граѓанинот“.

Оер изразила задоволство од започнувањето на теренската проверка на податоците и надеж дека проверката ќе ги даде очекуваните резултати.

– Инаку, станува збор за процес кој ние одблиску го следиме и поддржуваме и кој што ќе придонесе за зголемување на довербата кај граѓаните, за изборите на крај да бидат оценети како фер и демократски. Слободата на слободен избор е нешто што е од суштинско значење, но тоа не е единствениот услов. Постојат и други услови, како, на пример, независноста на медиумите, поделеноста на средствата од државата и политичките партии и низа предизвици за кои денеска сосема отворено говоревме и кои ќе нè однесат до изборите на 5 јуни – изјавила амбасадорката Оер.


ДИК во застој, теренската проверка никако да почне


Скопје, 19 март, 2016 - 9:13 (META) 

Поради потреба од дополнителни консултации околу тоа како и во колкав обем да се извршат теренските проверки на сомнителните гласачи во избирачкиот список, седницата на Државната изборна комисија, синоќа, повторно беше одложена.

– На Државната изборна комисија ѝ е потребно дополнително време за консултации во врска со усвојувањето на Извештајот од вкрстените проверки – изјави советничката во комисијата, Љупка Гугучевска.

Таа не кажа дали има закажано нов термин за седница.

Од СДСМ и од ВМРО-ДПМНЕ спорат околу бројката на сомнителни гласачи за кои треба да се изврши теренска проверка.

Според СДСМ, треба да се проверат повеќе од 200.000 гласачи, додека за ВМРО-ДПМНЕ спорни се 75.000 имиња во избирачкиот список.