!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Нема план Б за влез во НАТО, името мора да се реши, порача Столтенберг


Скопје, 18 јануари, 2018 - 16:57 (META) 

Мора да бидам искрен со вас и не е добро да ве лажам – нема план Б и нема влез во НАТО сè додека не се реши проблемот со името, порача Генералниот секретар на НАТО, Јенс Столтенберг во три наврати, одговарајќи на новинарски прашања дали е можен прием со привремената референца на денешната прес-конференција по средбата со премиерот Зоран Заев во Владата.

Столтенберг исто така неколкупати потенцираше дека НАТО е политички сојуз кој дефинирал одлуките да го носи со консензус.

Тој порача дека е многу важно да се забрзаат и завршат почнатите реформи.

– Не е лесно, но може да се направи. Ги повикувам сите страни конструктивно да работат во полза на сите. Ја повикувам Владата да соработува со опозицијата и обратно. Ве поттикнувам да продолжите на патот на реформите, сакаме да успеете. Сакаме да ја видиме вашата земја како срцето на еден демократски и просперитетен регион. Премиере, сакаме да ве поддржиме – рече Столтенберг.

Прашан од новинарите дали експанзионистичката политика на Москва не ги замислува земјите-членки за промена на принципот на одлучување и за прием на Македонија во Алијансата за да се спречат руските тежнеења, Столтенберг повтори дека не сака да дава лажни надежи и дека без взаемно прифатено решение за спорот со името со Грција, нема никакви шанси за влез во Северноатлантската алијанса.

Прашан зошто НАТО ја игнорира пресудата од Хаг во полза на Македонија, Столтенберг рече дека станува збор за правна пресуда, а дека НАТО е политички сојуз.

– Тоа е судска пресуда, а ова е политичка одлука. НАТО како политички сојуз се базира на консензус. Промената на одлука и донесување нова бара консензус од сите. Не би бил чесен кон вас ако ви кажам дека има услови за промена на одлуката – рече Столтенберг.


Исходот ќе зависи од подготвеноста за компромис на двете страни, вели Владата


Скопје, 18 јануари, 2018 - 11:05 (META) 

Владата на Република Македонија по преговорите во Њујорк со посредништво на Метју Нимиц порача дека посветена на решавање на спорот кој  Република Грција го има со уставното име на Република Македонија.  Во соопштението се вели дека се создаваат услови за напредок, но за да дојде до тоа мора да има подготвеност за компромис на двете страни.

„Активно се создаваат услови за придвижување на процесот напред, а исходот ќе зависи од подготвеноста за компромис на двете страни, имајќи ги предвид разликите. Остава добар впечаток обновената комуникација, која отвора простор за пријателски пристап и градење обострана доверба“, се вели во соопштението.

Владата порача дека по внимателна анализа на рамката што Нимиц ја презентирал пред преговарачите во Њујорк „согласно значењето на прашањето за државните интереси, ќе продолжи процесот за градење на што е можно поширок и поинклузивен став од страна на Република Македонија“.

Инаку, македонскиот преговарач Васко Наумовски вчера за Сител по средбата изјави дека предлозите изнесени од медијаторот Метју Нимиц се „далеку од достоинствено решение“.


За Наумовски предлозите на Нимиц се далеку од достоинствено решение


Њујорк, 17 јануари, 2018 - 22:05 (META) 

Македонскиот преговарач во разговорите за името под покровителство на ОН, Васко Наумовски, по последната рунда разговори во Њујорк изјави дека предлозите изнесени од медијаторот Метју Нимиц се „далеку од достоинствено решение“.

Според него, рамката за разговорите е дадена во Резолуцијата 817 на Советот за безбедност, а тоа е да се надмине разликата околу името.

– Нашата држава има име, тоа е Република Македонија, името што е во основата на нашиот идентитет. Исто така, денес во 2018 година никој не може да го негира постоењето на македонскиот народ и македонскиот јазик. Од страна на медијаторот денеска беа презентирани некои идеи за коишто сметам дека излегуваат од оваа рамка и дека се далеку од едно достоинствено решение, но, сепак, овие предлози ќе бидат презентирани пред државно-политичкиот врв и тој ќе може да заземе став по ова прашање – рече Наумовски во изјава за известувачот на телевизија Сител.

Наспроти оптимизот на медијаторот Нимиц по средбата, Наумовски за себе рече дека не е голем оптимист.

– Оптимизмот е секогаш корисен, но за да се биде голем оптимист треба да има основа за тоа. Имајќи предвид што се слушнавме како изјава од грчките официјални лица, се она што што беше презентирано во рамките на овие разговори, вклучително и ова денес, не ни дава простор да бидеме големи оптимисти – вели Наумовски.


Новиот предлог на Нимиц е комбинација на старите идеи


Њујорк, 17 јануари, 2018 - 19:52 (META) 

Посредникот на ОН во разговорите за името, Метју Нимиц, денеска во седиштето на ОН, по средбата со македонскиот и грчкиот преговарач, Васко Наумовски и Адамантиос Василакис, најави дека на повидок е решение за спорот за името, со што ќе се стави крај на 27 годишниот спор меѓу Грција и Македонија.

– Имам големи надежи дека овој процес се движи во позитивна насока – рече Нимиц по завршувањето на разговорите со Наумовски и Василакис.

Посредникот на ОН во разговорите за името Метју Нимиц изјави дека на преговарачите им дал нов предлог, кој е всушност нова комбинација од неговите стари идеи и дека очекува тие со нивните влади да го разгледаат.

– Ова е процес што се одвива 25 години и тешко е да измислите нешто ново – рече посредникот.

Тој одби да ја коментира содржината на предлогот и рече дека во следните седмици ќе ги посети Скопје и Атина. Изрази надеж дека лидерите на опозициските партии во Грција и Македонија ќе бидат конструктивни.


ВМРО-ДПМНЕ: Дали Грција го награди Анѓушев за лицитирањето со ново име?


Скопје, 17 јануари, 2018 - 14:20 (META) 

Мошне симптоматично е што истовремено додека засилено се одвиваат преговори помеѓу Грција и Република Македонија, во услови кога Заев е убеден дека ќе го реши името, вицепремиерот Кочо Анѓушев лицитира со имиња на државата а потоа ја продава неговата фирма на грчкото електростопанство, порача  Христијан Делев на прес-конференција во седиштето на ВМРО-ДПМНЕ.

– Целата јавност беше сведок дека Анѓушев од позицијата вицепремиер срамно лицитираше со имиња за Република Македонија и кажа дека за него е прифатливо промена на името на државата. Тој дури и нафрлаше и имиња Горна, Северна и Нова Македонија, кои како што кажа за него се прифатливи. Набргу по ваквата изјава на вицепремиерот Анѓушев следеше информација дека грчката државна компанија за производство на електрична енергија ќе ја купува ЕДС на Кочо Анѓушев, информација која ја потврдија и од фирмата на вицепремиерот – рече Делев.

Тој побара вицепремиерот да ја открие сумата што ќе ја добие за фирмата.

– Кочо Анѓушев мора да ги отстрани сите сомнежи дека продажбата на неговата фирма би се користела за евентуална награда за решавање на спорот за името по волја на Грција. Тој треба да каже на јавноста која е реалната вредност на неговата фирма? Постои сериозна загриженост во јавноста дека разликата од реалната и продажната вредност би можела да биде надомест за промената на името на Македонија? – рече Делев, порачувајќи дека ВМРО-ДПМНЕ нема да се согласи на промена на Уставот со цел промена на уставното име, ниту на решенија кои задираат во македонскиот идентитет и го негираат постоењето на македонскиот јазик и народ.


Димитров: Го охрабривме Нимиц в среда да излезе со првичен предлог за името


Скопје, 13 јануари, 2018 - 16:03 (META) 

Министерот за надворешни работи Никола Димитров велии дека се уште нема предлог за решавање на спорот со името, но медијаторот Метју Нимиц бил поттикнат од македонската страна да излезе со првична рамка уште следната недела.

– Сè уште немаме предлог на масата за решавање на спорот со името. Одлучивме да го охрабриме медијаторот Метју Нимиц да излезе што е можно побрзо, дури и идната среда, со една првична рамка што ќе послужи или што ќе даде насоки за суштински напредок и најавивме подготвеност да се вклучиме како шефови на дипломатии директно, нешто што досега не се случило – изјави шефот на македонската дипломатија Никола Димитров во синоќешното интервју за ТВ 21.

Според него, не може Македонија да биде само грчка, бидејќи географскиот регион е голем и има три држави.


Димитров: Македонија и Грција ќе формираат работни групи за преговори за името


Скопје, 12 јануари, 2018 - 17:22 (META) 

Македонија и Грција се согласија да формираат работни групи предводени од министрите за надворешни работи, кои ќе водат преговори за решавање на 25-годишниот спор за името, изјавил министерот за надворешни работи, Никола Димитров за агенцијата „Ројтерс“.

Тој очекува првата средба на новите групи да се одржи во февруари, при што директно ќе се преговара за можни решенија за спорот.

– Се разделивме убедени во тоа дека има волја на двете страни да се оди напред – вели шефот на македонската дипломатија за вчерашната средба во Солун со неговиот грчки колега Никос Коѕиас.

Димитров во интервјуто вели оти е јасно дека идентитетот е многу важен за македонската страна и мора да се најде начин да се убедат грчките колеги дека постои јасна раздвоеност на Македонија од регионот во северна Грција.


Бутарис: Прашањето за името е „надувано“ поради глупавоста на политичарите


Солун, 3 јануари, 2018 - 14:10 (META) 

Мора да имате добри односи со соседите. Прашањето за името е надувано пред се поради глупавоста на политичарите. Луѓето сакаат да си најдат идентитет. Со отстапки од двете страни, но и од опозицијата, подготвени се за компромис. Господинот Заев рече дека ќе го смени името на аеродромот, ќе ги смени таблите на улиците, вели солунскиот градоначалник Јанис Бутарис во интервју за радиото „Практорио ФМ“ на грчката новинска агенција АНА-МПА, одговарајќи на прашање за саботната неформална средба во Солун со македонскиот премиер Зоран Заев.

Истовремено, Бутарис во интервјуто вели дека е најголем Македонец, најверојатно посочувајќи со тоа на неговото раѓање во грчката област Македонија.

– Поголем Македонец од мене не постои, поради потеклото. Моето потекло и моето воспитување кажуваат сѐ, вели градоначалникот на Солун и објаснува дека „во Скопје првпат отишол во 1991 година, со Комората за трговија и индустрија“.

За саботната средба која се одржа по негова покана до Заев, Бутарис вели дека се разговарало за соработка.

– Имавме планирано приватна вечера. Го поканив да ја пречека Новата година во Солун. Неговиот брат и неговите пријатели секоја седмица се во Солун. Она што го финализиравме е да организираме спуштање со кајаци по Вардар, некаде во април. Можеби ќе имаме и мешан екипаж. Второ, се договоривме да правиме културни размени што ќе вклучуваат танц, музика и предавања. Еднаш во Скопје, еднаш во Солун. Разговаравме и за една стипендија што ќе ја даде општина Солун – објаснува солунскиот градоначалник во интервјуто за радиото на новинската агенција АНА-МПА.


Иванов: Грција да не ја држи Македонија во заложништво за приемот во НАТО


Скопје, 1 јануари, 2018 - 15:26 (META) 

Претседателот на Република Македонија, Ѓорге Иванов порача оти очекува на претстојниот самит на НАТО конечно Македонија да стане членка на Алијансата, а Грција „да покаже свест за она што се случува во регионот и своите себични интереси да не и бидат основа за да не држи во заложништво“. При денешната посета на војниците во касарната Чојлија, тој рече и дека за спорот со името Македонија направила многу во процесот во рамките на ОН, но Грција не ги исполнува своите обврски.

– Се надевам дека овој нареден период структурите на НАТО нема да бидат заложници на една нејзина членка која поаѓа пред се од своите интереси, а не од интересите на НАТО и од состојбата во целиот регион. Очекуваме на претстојниот Самит на НАТО тоа да биде изложено и Македонија конечно да стане членка на НАТО. Тоа што Грција го бара е во рамки на Обединетите нации и таму се води спорот за името. Таму ние активно учествуваме сите овие години, но се соочуваме со барања кои не се во согласност со Повелбата на ОН и резолуциите на ОН кои не соодејствујваат со билатералната спогодба, која доброволно Грција ја прифатила, а не ја исполнила – рече Иванов.

Во однос на бугарското претседавање со ЕУ, македонскиот претседател вели дека Македонија јасно ги истакнала своите очекувања- конечно да добие датум за почеток на преговорите.

– Тоа е долг и мачен процес, но ние сме подготвени и нашата администрација е подготвена. Сите прашања кои произлегуваат од нашето прилагодување со ЕУ, се исполнети во текот на преговорите. Таа блокада скапо не чини, но досега не видовме дека на некој на било кој начин и укажал на Грција за штетата што и ја прави на Македонија и на целиот регион – вели Иванов.


Бошњаковски: Ако се постигне договор за името, ќе се организира референдум


Скопје, 20 декември, 2017 - 13:23 (META) 

Течат преговорите за спорот со името под закрила на Обединетите нации, но во моментов нема видливо решение, но секако кога ќе биде постигнат договор, ќе се организира референдум, рече портпаролот на Владата, Миле Бошњаковски на новинарско прашање на денешната прес-конференција дали има некаков исчекор во долгиот спор.

Прашан дали премиерот Заев ја прифатил поканата на солунскиот градоначалник Јанис Бутарис да ја дочека новата година во Солун, Бошњаковски рече дека нема дефинитивна одлука и дека во моментот се утврдуваат детали.