Коѕиас: Граѓаните на соседната земја имаат право да се нарекуваат Македонци


Атина, 23 јули, 2018 - 9:45 (META) 

Не можеме да го смениме универзалното право, соседите да се нарекуваат Македонци, на индивидуално и неофицијално ниво, но ние можеме да ги нарекуваме како сакаме, порача министерот за надворешни работи на Грција, Никос Коѕиас во интервју за грчката новинска агенција АНА-МПА и додава дека „вон институционалниот систем и вон јавниот простор, не можеш на луѓето да им наметнеш како ќе се самоопределуваат“.

– Еден жител на Скопје и вели на неговата девојка дека е Македонец. Што ќе правиме? Ќе создадеме метафизичка држава што ќе го става во затвор? Она што го кажавме е дека граѓаните на оваа земја имаат право да се самоопределуваат како сакаат. Тоа е универзално право што не можеме да го смениме. Но, во исто време, ние можеме да ги викаме како сакаме – вели Коѕиас, објаснувајќи дека кога говориме за индивидуално ниво, „само тоталитарна држава и држава со владетел, може да контролира како некој ќе се нарекува неофицијално“ и додава дека на официјално ниво за државните институции ќе се користи името Северна Македонија.

Во однос на Договорот од Преспа, шефот на грчката дипломатија, вели дека „условите беа зрели, а кога условите се зрели значи дека она што можеш да го направиш, треба да го направиш“.

Како што јави дописничката на МИА од Атина, Коѕиас, во интервјуто неколку пати споменува дека станува збор за компромис, за отстапки од двете страни, бидејќи „Грција не го освоила северниот сосед за да му ги наметне нејзините позиции“.

Прашан за трговските производи и од двете земји што ја носат придавката „македонско/и“, министерот за надворешни работи на Грција вели дека ќе биде потребен временски период за да се реши ова прашање.

– Постојат производи во Грција што со право се нарекуваат македонски производи и производи од ПЈРМ кои и таму се викаат македонски. Постојат 3.500 компании од двете страни, толку регистрираше Универзитетот во Солун, кои го имаат натписот „македонско“. Затоа рековме дека ќе формираме комисија под покровителство на Европската унија и ОН – објаснува шефот на грчката дипломатија за АНА-МПА.


Договорот со Грција ќе се потпишува утре, денеска се гласа доверба на владата на Ципрас


Скопје, 16 јуни, 2018 - 12:27 (META) 

Во текот на утрешниот ден, недела, 17 јуни, во регионот на Преспа, на територија на Грција во засега непознат термин, ќе се одржи церемонијата на која, како што соопшти македонската влада, министерот за надворешни работи на Република Македонија, Никола Димитров и министерот за надворешни работи на  Грција, Никос Коѕиас ќе го потпишат договорот за  решавање на македонско – грчкиот спор за името. По потпишувањето на документот, кој го носи името „Конечна спогодба за решавање на разликите опишани во Резолуциите 817  (1993) и 845 (1993) на Советот за безбедност на Обединетите Нации, за престанување на важноста на Привремената спогодба од 1995 г. и за воспоставување на стратешко партнерство меѓу страните“,  на македонска територија ќе се одржи средба и ручек на претставниците на двете влади.

На утрешниот настан на кој ќе се потпише Спогодбата ќе присуствуваат премиерите на двете земји, Зоран Заев и Алексис Ципрас.

Владата го усвои овој договор на попладневната седница во четвртокот, а потоа ја симна тајноста и го објави на својот веб сајт.

Во грчкиот парламент, пак, денеска  пред 10 часот по локално време почна третиот дел по поднесеното барање од Нова демократија за гласање недоверба на Владата.  Главната тема на 16-часовната дискусија на пратениците вчера беше Конечната спогодба  со Македонија. Притоа пратеникот на ултра-десничарската партија „Златна зора“ Констанинос Барбарусис ја повика армијата да изврши воен удари поради „предавничката“ политика на владата на Ципрас.
Партијата „Златна зора“ ги осуди коментарите на нивниот пратеник и го исклучи од партијата. Исто така, на Златна зора и е забрането да учествува во продолжението на собраниската дебата.

Денеска покрај дискусијата, се очекува да се обратат лидерите на политичките партии и грчкиот премиер, а седницата ќе заврши со гласање недоверба.  Како што јави МИА, според досега изнесените ставови, не се очекуваат изненадувања. Пратениците на СИРИЗА и Независни Грци ќе гласаат против предлогот на Нова демократија, а Владата ќе добие доверба да продолжи да ја води Грција.

Грчките медиуми сензационално објавуваат дека во  текот на денешната расправа министерот за надворешни работи, Никос Коѕијас ќе презентира документи од грчкото МНР за преговорите со Македонија за името во минатото.
Договорот што ќе се потпише утре предвидува големи промени:

  • Двете страни ја потврдуваат постоечката граница меѓу нив како трајна меѓународна граница и ја потврдуваат својата желба за заемно пријателство, добрососедство и партнерство, како и решеноста да не преземаат и да не поддржуваат какви било непријателски чекори кон другата земја.
  • Официјалното име на Република Македонија ќе биде „Република Северна Македонија“, и тоа ќе се употребува ерга омнес. Скратеното име ќе биде „Северна Македонија“.
  • Државјанството ќе биде „македонско/граѓанин на Република Северна Македонија“.
  • Официјалниот јазик ќе биде „македонски јазик“, како што е признаено на Третата Конференција на ОН за стандардизација на географските имиња, одржана во Атина во 1977 година, но како јазик од групата на јужнословенските јазици и воопшто неповрзан со античката елинска цивилизација и култура.
  • Кодот за земјата на регистарските таблички на возилата на Втората страна ќе биде НМ или НМК. За сите други намени, кодот на земјата останува да биде МК и МКД, како што е официјално определено од Меѓународната организација на стандардизација (ИСО).
  • Придавката во однос на државата, нејзините службени органи и други јавни институции ќе биде „на Република Северна Македонија“ или „ на Северна Македонија“. Приватните лица и тела кои не се поврзани со државата и јавните институции и органи и не добиваат финансиска поддршка од државата за активности надвор од државата, можат да ги користат придавките изведени од зборот „Македонија“, но со јасна напомена дека тие придавки воопшто не се однесуваат на древна Македонија и на она што Грција го подразбира како македонски дел од своето историско наследство.
  • Македонија ќе го смени Уставот за да го промени името во Република Северна Македонија и да ги внесе погоре наведените промени.
  • Спогодбата подразбира македонското Собрание набргу да ја ратификува Спогодбата и за тоа да ја извести Грција, а потоа, според текстот, во Македонија може, но не мора, да се организира референдум.
  • Уставните промени преку амандмани мора да се направат до крајот на годинава. Откако тоа ќе се случи, Спогодбата треба да биде ратификувана и од грчкиот парламент.
  • Грција, откако ќе биде известена дека Македонија ја  ратификувала спогобата, ќе го извести Претседателот на Советот на Европската Унија дека дава поддршка за почеток на преговори за членство на Македонија, но под името Република Северна Македонија.
  • Истовремено, ќе го извести Генералниот секретар на НАТО дека дава поддршка НАТО да ѝ упати покана за пристапување на земјава под новото име, но конечната поддршка ќе зависи од исходот на референдумот, ако се организира, и од уставните измени, а ако референдумот го потврди новото име и амандманите на Уставот се додадени, Грција ќе го  ратификува Протоколот за пристапување на нашата држава под новото име во НАТО, а таа ратификација во грчкиот парламент ќе се направи паралелно со ратификацијата на Спогодбата што ќе се потпишува утре.

Дипломатски клуб – Скопје: Спогодбата е потврда на стратешките определби на Македонија


Скопје, 13 јуни, 2018 - 15:59 (META) 

Дипломатски клуб – Скопје ја поздрави, како што вели, спогодбата, постигната помеѓу македонскиот и грчкиот премиер Зоран Заев и Алексис Ципрас за решавање на спорот за името, нарекувајќи ја „настан без преседан во историјата на македонската дипоматија“.

„Самиот чин на потпишувањето и ратификацијата на оваа Спогодба сметаме дека ќе биде во рамките и потврда на реализацијата  на стратешките определби на Македонија за интеграција во евроатланските структури, за што во државата постои масовна подршка од самото нејзино осамостојување во 1991 година. Воедно сметаме дека оваа Спогодба го докажува и историски ќе го потврди самопрегорот и државничката храброст на актуелната генерација на граѓаните и политичарите, а со нејзиното целосно имплементирање, нашата држава како потполн суверен меѓународен субјект ќе може да ги искористува сите придобивки на современите цивилизациски вредности и достигнувања“, стои во соопштението.


Мицкоски побара средби со Иванов и Заев и оставка од Димитров


Скопје, 13 јуни, 2018 - 13:19 (META) 

Претседателот на ВМРО-ДПМНЕ, Христијан Мицкоски, на прес-конференција денеска повторувајќи голем дел од пораките од вчерашната прес-конференција во врска со постигнатиот договор на македонскиот и грчкиот премиер, Зоран Заев и Алексис Ципрас, побара да се сретне со претседателот Ѓорге Иванов за да дискутираат за ситуацијата, а побара и средба со Заев на која ќе му биде презентиран пишаниот документ за кој се согласиле Заев и Ципрас.

– Работата е пресериозна, и сите ние имаме одговорност кон нашата држава и граѓани. Затоа денес побарав итна средба со претседателот на државата, господинот Ѓорге Иванов кој предводи една од институциите која е дел од државноста и интегритетот на државата и каде што ќе разговарам за ова суштинско прашање. Воедно ја користам и оваа прилика да побарам и средба со премиерот, господинот Зоран Заев на кој очекувам да ми биде доставен пишаниот документ односно она за што се согласил со неговиот грчки колега Алексис Ципрас – порача Мицкоски.

Нарекувајќи го договорот апсолутен пораз на македонската дипломатија и капитулација, претседателот на ВМРО-ДПМНЕ рече дека дека лагата, измамата и манипулацијата се примарно делување на Зоран Заев, како и дека македонскиот премиер за само неколку месеци драстично ги сменил ставовите и и прави непоправлива и неповратна штета на Република Македонија.

За соучесник во „капитулацијата“ Мицкоски го прогласи министерот Димитров.

– Имаме министер за надворешни работи, името му е Никола Димитров, кој е учесник во оваа капитулација, и кој најави дека ако тоа помогне ќе си поднесе оставка. Еве го тој момент господине Димитров. Првиот почетен чекор е Вие да си дадете неотповиклива оставка поради капитулацијата која што ќе се обидете да им ја прикажете на граѓаните како победа – рече претседателот на ВМРО-ДПМНЕ.


Рама: Двајца прогресивни лидери испишаа историја, Балканот сега е подобро место


Тирана, 13 јуни, 2018 - 12:37 (META) 

Двајца прогресивни лидери на соседните земји денеска испишаа историја и им покажаа на ЕУ и на светот како волјата и подготвеноста да се надмине минатото може да пронајде простор за иднината кога изгледа дека таков простор нема, напиша албанскиот премиер Еди Рама вчера на својот Твитер-профил, честитајќи им на македонскиот и на грчкиот премиер Зоран Заев и Алексис Ципрас за постигнатиот договор за спорот за името.

„Честитки, Балканот денеска е подобро место благодарение на двајцата вас“, напиша Рама на англиски јазик. Договорот преку својот Твитер-профил го поздрави и албанскиот министер за надворешни работи, Дитмир Бушати, честитајќи им на македонскиот и на грчкиот колега, но и на македонскиот вицепремиер за евроинтеграции, Бујар Османи.  

„Честитки за нашите соседи и пријатели за постигнување решавачки договор за спорот за името. Тоа отвора пат не само за едно земја, туку за целиот регион, кон Евро-атлантското семејство. И покрај сите пречки, дипломатијата дејствува“, напиша Бушати.


Реформаторите на ВМРО-ДПМНЕ: Со договорот Македонија и Македонците клекнати на колена


Скопје, 13 јуни, 2018 - 10:15 (META) 

Со објавениот финален документ од преговорите за името, Република Македонија и Македонците се клекнати на колена, порача Демократската фракција на ВМРО-ДПМНЕ, реагирајќи на вчерашната објава од премиерот Зоран Заев дека е постигнат договор со Грција за спорот за името.

Фракционерите од најголемата опозициска партија вели дека Зоран Заев нема мандат, легалитет ниту легитимитет во име на целата нација да договара промена на нашето вековно име и дека премиерот поради личната каприциозност ја довел Македонија во ситуација „земи или остави”.

„Договорот е историски само во поглед на целосното исполнување на грчките предусловите и срамната отстапка на македонските преговарачи. Република Македонија не доби ништо туку го задржаа она кое го имаше и досега. Република Македонија и Македонците го изгубија Уставот, добивме ново име, ги поделија Македонците од Грција на грчки Македонци и словенски Македонци и со тоа ги прекинаа нивните крвни врски и потекло. Едноставно Република Македонија доби нов кум во ликот и делото на Зоран Заев. Прифаќањето на ерга омнес и уставната ревизија е голем дипломатски успех за Грција и пораз на Македонија“, се вели во реакцијата.


Германскиот министер за надворешни работи: Скопје и Атина напишаа историја


Берлин, 13 јуни, 2018 - 9:40 (META) 

Германскиот министер за надворешни работи, Хејко Мас им честиташе на владите на Македонија и Грција за постигнувањето договор за решавање на спорот за името и рече дека решителноста и визијата на двајцата премиери и на двајцата министри за надворешни работи донеле успех.

– Скопје и Атина денеска напишаа историја. 25 години спорот за името на Поранешната југословенска Република Македонија стоеше меѓу Македонците и Грците. Одлична вест е дека двете страни сега најдоа решение и се согласија за името Република Северна Македонија.

Тоа исто така покажува што може да се постигне ако меѓународно се однесуваме со трпение, разум и почит едни кон други. Вредеше што никогаш не се откажавме од надежта, што бевме во постојана блиска размена и што двете страни и во тешки фази секогаш одново наоѓаа компромиси. Преговорите беа долги и макотрпни. Но, на крајот решителноста и визијата на двајцата премиери и нивните министри за надворешни работи доведоа до успех. На двете Влади им честитам од срце за овој историски договор – порача Мас.

Германскиот министер за надворешни работи ги повика сите политички чинители во двете земји да придонесат за спроведувањето на договореното, кое ја отстранува клучната пречка за приближувањето на земјава кон ЕУ и НАТО.

– Ги повикувам сите политички сили во Скопје и во Атина да придонесат за спроведување на овој историски договор. Бидејќи тој ги јакне добрососедските односи меѓу двете земји и придонесува за стабилноста на Западен Балкан. Освен тоа, сега е отстранета клучна пречка за приближувањето на Скопје на ЕУ и на НАТО – вели Мас.


Стејт Департмент: Историскиот договор ќе донесе придобивки за двете земји


Вашингтон, 13 јуни, 2018 - 9:22 (META) 

Стејт Департментот денеска им честиташе на премиерите на Грција и на Македонија за договорот за разрешување на спорот за името, порачувајќи дека искажале визија и храброст.

„САД им честитаат на премиерите Алексис Ципрас и Зоран Заев и го поздравуваат историскиот договор за решавање на спорот за името. Оваа разрешница ќе донесе придобивки за двете земји и ќе ја засили регионалната безбедност и просперитет. Премиерите Заев и Ципрас искажаа визија, храброст и истрајност во своите напори за взаемно прифатливо решение. Исто така ја поздравуваме посветеноста на посредникот од ОН, Метју Нимиц за неговите истрајни напори во текот на повеќе од две децении за да се разреши овој спор“, порача Стејт Департментот.

Потпишувањето на договорот вчера исто така го поздравија посредникот во преговорите Метју Нимиц, високата претставничка на Европската унија за надворешни работи и безбедносна политика и потпретседателката на Европската комисија, Федерика Могерини, претседателот на Европскиот Совет, Доналд Туск, генералниот секретар на НАТО, Јенс Столтенберг.


Република Северна Македонија со македонски јазик и идентитет, велат грчките медиуми


Атина, 12 јуни, 2018 - 13:55 (META) 

Грчките медиуми, веќе објавуваат точки од наводниот договор за името што го постигнале македонскиот и грчкиот премиер, Зоран Заев и Алексис Ципрас.

Како што тврдат медиумите, договорено е името Република Северна Македонија (на англиски Republic of North Macedonia) за севкупна употреба.

Употребата на придавките македонски пред државјанството и јазикот се задржува и гарантира.

Посебна комисија ќе го договора користењето на трговските заштитни марки од страна на двете држави.

– Се признава македонскиот јазик (со фуснота дека се работи за словенски јазик).

– Во однос на државјанството ќе се користи терминот „македонско/граѓанин на Република Северна Македонија“, со, според грчките медиуми, експлицитно наведување дека граѓаните на таа држава не се поврзани со античката грчка цивилизација.

Според грчки извори, очекуваниот втор телефонски разговор меѓу македонскиот и грчкиот премиер Зоран Заев и Алексис Ципрас веројатно ќе се случи подоцна попладнево, бидејќи се очекува во него да се вклучи и медијаторот Метју Нимиц.

По разговорот со Заев и Нимиц, Ципрас ќе ги информира лидерите на политичките партии во земјата и претседателот Прокопис Павлопулос.


МНР предупредува да не се патува во грчките градови во кои утре се протестира


Скопје, 5 јуни, 2018 - 16:27 (META) 

Министерството за надворешни работи ги предупредува граѓаните кои утре ќе бидат или планираат да патуваат во Грција, дека грчката организација „Комитет за борба за грчкиот карактер на Македонија“, најавува протести за утре во четиринаесет поголеми градови во Северна Грција против употребата на зборот „Македонија“. Протестите ќе почнат 19.30 часот.

Од МНР велат дека поради можност за ескалација на протестите или инциденти, да ги избегнуваат градовите каде што ќе се протестира, како и да се воздржат од какви било реакции кон демонстрантите.