Макрон го отфрли барањето за признавање на корзиканскиот јазик


Ајачо, 8 февруари, 2018 - 11:06 (META) 

На својата прва посета на островот Корзика, кој во минатото беше потресуван од голем број терористички напади извршени од поборниците за независност, францускиот претседател Емануел Макрон вчера порача дека нема да го признае корзиканскиот јазик како официјален јазик.

Макрон отфрли и друго барање на корзиканските националисти за специјален резиденцијален статус за да се спречат шпекулациите со недвижен имот на островот. Сепак, францускиот претседател вети нови инвестиции и рече дека е подготвен за префрлање поголеми овластувања на локалните власти.

На локалните избори во декември, на Корзика победа остварија националистите што сакаат поголем автономија. Вчера пред посетата на Макрон, илјадници корзиканци одржаа марш со кој побараа поголема автономија од Франција.

Макрон им порача на националистичките политичари дека островот е интегрален дел од Француската Република, но понуди симболична отстапка: споменување на островот во францускиот устав.


Трамп се закани дека ќе ја прекине помошта за Палестинците


Вашингтон, 3 јануари, 2018 - 13:01 (META) 

Соединетите Американски Држави би можеле да ја прекинат помошта за Палестинците, кои, „повеќе не сакаат да разговараат за мир“ порача американскиот претседател, Доналд Трамп, пренесува „Би-би-си“.

Трамп на „Твитер“ напиша дека, „САД не добиле ниту признание, ниту почит за помошта од стотици милиони долари што годишно им ја даваат на Палестинците.“

Заканите на Трамп следуваат по острите реакции на Палестинците на неговата одлука да го признае Ерусалим за главен град на Израел.

Кратко време по објавувањето на одлуката на Вашингтон во декември, минатата година, палестинскиот претседател Махмуд Абас изјави дека нема да прифати никаков мировен план на САД за Блискиот исток.

Одлуката на Трамп, исто така, беше осудена и од Обединетите нации.

На 21 декември мнозинство од 128 земји-членки на Обединетите нации ја поддржаа резолуцијата со која се бара САД да ја повлечат одлуката за признавање на Ерусалим како главен град на Израел.


Палестинците го отповикаа својот дипломатски претставник во САД


Рамалах, 31 декември, 2017 - 19:52 (META) 

Палестинците денеска соопштија дека го отпoвикале својот дипломатски претставник во Соединетите Американски Држави за „консултации“, неколку недели откако американскиот претседател Доналд Трамп го призна Ерусалим како главен град на Израел, јавува „Би-би-си“.

Палестинскиот претседател Махмуд Абас изјави дека нема да прифати никаков мировен план од САД по одлуката на Трамп, која предизвика протести и судири во појасот Газа.

На 21 декември мнозинство од 128 земји-членки на Обединетите нации ја поддржаа резолуцијата со која се бара САД да ја повлечат одлуката за признавање на Ерусалим за главен град на Израел.


Анкара: САД ја изгубија својата објективност


Анкара, 19 декември, 2017 - 11:39 (META) 

Официјална Анкара денеска изрази жалење поради ветото на САД на вчерашната седница на Советот за безбедност на Обединетите нации (ОН) на резолуцијата со која се бара повлекување на одлуката на САД за признавање на Ерусалим за главен град на Израел.

„Тоа што Соединетите Американски Држави останаа сами во ова гласање е конкретен показател за незаконитоста на нивната одлука за Ерусалим“, се наведува во соопштението на труското министерство за надворешни работи.

Во соопштението, исто така, се наведува дека американската одлука да стави вето на оваа резолуција уште еднаш покажала дека САД ја „изгубиле својата објективност“ и оти е неприфатливо Советот за безбедност на ОН да биде ефикасен поради ваквиот потег.

Турскиот претседател Реџеп Таип Ердоган и британската премиерка Тереза Меј синоќа разговараче телефонски за блокирањето на резолуцијата и се сложиле дека треба да се избегнат новите тензии кои би можеле да го загрозат мировниот процес во регионот поради одлуката на САД за Ерусалим.


МПЦ: Решението на БПЦ дава надеж за конечно решение на нашата автокефалност


Скопје, 27 ноември, 2017 - 13:49 (META) 

Светиот архиерејски синод на Македонската православна црква – Охридска архиепископија (МПЦ-ОА) изрази благодарност до бугарскиот патријарх Неофит и до членовите на Светиот архиерејски синод на Бугарската православна црква, кои денеска донесоа решение за да прифатат да бидат мајка црква на МПЦ.

„Донесеното решение на САС на БПЦ дава надеж за конечно решавање на статусот на легитимната автокефалност на Македонската православна црква во семејството на помесните православни цркви. Очекуваме, и во иднина, Бугарската православна црква на МПЦ-ОА да ѝ биде постојан сотрудник во остварувањето на потребната богоугодна цел“, се вели во соопштението од МПЦ-ОА.

Од МПЦ-ОА посочуваат дека двете цркви имаат одговорност пред своите едноверни, благочестиви и православни народи кои споделуваат мноштво заеднички христијански вредности низ вековниот опстој.

Светиот синод на Бугарската православна црква на денешната седница одлучи да се ангажира и да ја застапува МПЦ пред помесните православни цркви за востановување на канонскиот статус на Македонската православна црква.


Владиката Наум: Барањето БПЦ да биде наша мајка црква е нормално, логично и потребно


Софија, 26 ноември, 2017 - 17:48 (META) 

Барањето на Македонската православна црква – Охридска архиепископија (МПЦ-ОА) да ја прифати Бугарската православна црква (БПЦ) како мајка црква е нормално, логично и потребно, пишува струмичкиот митрополит Наум во анализата за бугарската новинска агенција БГНЕС.

Митрополитот Наум во својата кратка анализа ја објаснува врската меѓу БПЦ и МПЦ-ОА, на ден пред БПЦ да го разгледува писмото од МПЦ.

„Барањето на МПЦ да ја прифати БПЦ како мајка црква, како услов за признавање на автокефалноста на МПЦ-ОА, е барање кое со години наназад го слушаме од некои бугарски архиереи. Ова барање МПЦ го смета за нормално, логично и потребно, затоа што некоја црква и така мора да се јави како мајка црква, која ќе нè извлече од изолацијата што ни е наметната од СПЦ (Српската православна црква) и која, потоа ќе нè заштитува, застапува и ќе нè претставува пред вселенскиот патријарх и пред другите православни цркви, а најприродно тоа може да биде само БПЦ. Мајка црква не е толку заедничко за минатото, колку што е заедничко за иднината во богочовекот Христос. Мајка црква е љубов“, пишува владиката Наум.

Тој објаснува дека од моментот кога БПЦ ќе ја признае автокефалноста на МПЦ-ОА, двете цркви стануваат „сестрински цркви“, што значи дека ќе бидат рамноправни. Но, улогата на БПЦ како мајка црква, пишува митрополитот Наум, тука не престанува во однос на другите православни цркви – БПЦ и понатаму ја има честа да ја претставува пред другите православни цркви сè додека МПЦ не го добие „томосот за автокефалност“.

Според владиката, воспоставување на евхаристичката заедница меѓу БПЦ и МПЦ-ОА е природна последица дури и на Договорот за пријателство и соработка меѓу Бугарија и Македонија и е во согласност со евроатлантските интеграциски процеси кон кои се стреми Македонија со помош на Бугарија.

„Во светот на глобализацијата, повеќе е веројатно дека ќе нè молат да влеземе во единство со православните цркви или дури и ќе нè натераат сосила, отколку и понатаму да бидеме изолирани. Во случај на брзо решавање на спорот што Грција го има со нашето име, сигурно ќе се реши и статусот на МПЦ, а БПЦ дури тогаш ќе сфати што, пред Бог, пропуштила“, пишува владиката струмички Наум во анализата за БГНЕС.


Мадагаскар ја призна независноста на Косово, соопшти Пацоли на „Твитер“


Париз, 26 ноември, 2017 - 11:11 (META) 

Министерот за надворешни работи на Косово, Беџет Пацоли, изјави дека Мадагаскар ја признал независноста на Косово, на маргините на министерската конференција на Меѓународната организација на франкофонијата во Париз.

Пацоли информацијата ја објави на својот твитер-профил.

„Задоволство ми е да објавам дека Мадагаскар го призна Косово како независна и суверена држава“, напиша шефот на косовската дипломатија на „Твитер“.

Заменик-министерот за надворешни работи, Петрит Сељими, исто така „твитна“ дека Мадагаскар го признал Косово.

На истата конференција во Париз учествува и шефот на српската дипломатија, Ивица Дачиќ, кој изразил очекување дека „ќе продолжи процесот на повлекување на признавањата“, соопштило Министерството за надворешни работи на Србија, пренесува балканскиот сервис на „Радио Слободна Европа“.


Национална петиција во Бугарија за поддршка на БПЦ да ѝ биде мајка црква на МПЦ-ОА


Скопје, 22 ноември, 2017 - 21:29 (META) 

Во Бугарија почнала национална петиција за јавна поддршка на Бугарската православна црква да прифати да ѝ биде мајка -црква на Македонската православна црква – Охридска архиепископија (МПЦ-ОА), јавува бугарската новинска агенција БГНЕС.

Петицијата почнала неколку часа откако десетици истакнати јавни личности, научници, новинари и потомци на видни семејства од Македонија ја повикале Бугарската патријаршија „да ја прифати подадената рака на Македонската архиепископија“.

Според агенцијата, петицијата е поддршка на писмото, кое било упатено до бугарскиот патријарх Неофит и до Светиот синод, а текстот е отворен за поддршка од сите што сакаат.

„Како луѓе кои одамна ги следиме развојот на проблемот со македонската црковна независност, исто така сме свесни дека Бугарската патријаршија има свои основи, категорично да ја нагласи историската вистина за потеклото на Македонската православна црква – Охридска архиепископија, како и за нејзиното егзархиско наследство. Без подвигот на нашите предци, вклучувајќи ги од Вардарска и Беломорска Македонија, кои постигнаа црковна независност за поголемиот дел од православните Бугари на Балканот во 19 век, денес не би постоеле ниту Бугарската патријаршија, ниту Македонската архиепископија, која се јавува како наследник на македонските епархии на Бугарската егзархија. Добро е да потсетиме на општо познатиот факт дека Охридската архиепископија е создадена во 1018 година од царот Василиј Втори Бугароубиец на местото на Бугарската патријаршија, која тој ја уништил, а титулата на нејзиниот владика била архиепископ на Охрид и на цела Бугарија“, пишува во обраќањето до бугарскиот патријах Неофит и до Светиот синод.

Писмото на Светиот синод на Македонската православна црква беше испратено на 9 ноември 2017 година и во него се изразува подготвеност Бугарската патријаршија да биде признаена како нејзина мајка црква.


БИХ немаат намера да го признаат Косово


Сараево, 29 септември, 2017 - 15:01 (META) 

БИХ нема да ја признаат независноста на Косово ниту, пак, ќе го разгледуваат ова прашање до крајот на мандатот на актуелниот Совет на министри, односно владата, порача денеска босанскиот министер за надворешни работи, Игор Црнадак, откако косовскиот премиер Рамуш Харадинај повика БИХ да го признаат Косово.

Причината е несогласувањето на Република Српска, која е еден од двата федеративни дела на БИХ.

– Босна и Херцеговина нема да го признаат Косово, не поради ставот на Босанците или Хрватите, туку поради ставот на претставници на Република Српска, како од власта така и од опозицијата. Во врска со ова прашање, ние сите сме единствени и нема никакви шанси оваа состојба да се смени – изјави Црнадак, кој е еден од српските претставници во босанската влада.


Вучиќ нема намера да го демантира Дачиќ за изјавите за Македонија


Солун, 13 јули, 2017 - 16:55 (META) 

Српскиот претседател Александар Вучиќ денеска во Солун изјави дека нема да ги демантира неодамнешните изјави на шефот на српската дипломатија, Ивица Дачиќ, дека Србија направила грешка што ја признала Македонија под уставното име.

– Да сакав да го критикувам или демантирам Дачиќ, тоа со леснотија ќе го направев. Но, очигледно е дека тоа не го направив – рече Вучиќ, по средбата со грчкиот премиер Алексис Ципрас во Солун, каде денеска се одржува трилатералниот самит меѓу Грција, Србија и Бугарија.

Тој истакна дека во иднина Србија ќе се води само од своите интереси и дека пријателски ќе им помага на тие што се на нејзина страна и кои помагале во зачувувањето на принципите на меѓународното право, додавајќи дека во таа смисла „грчките пријатели може да сметаат на поддршката од Србија“.

Грчкиот премиер Алексис Ципрас ги повторил ставовите на Атина дека спорот за името меѓу Грција и Македонија мора да се реши пред „малиот балкански сосед да се приклучи кон Европската Унија и кон НАТО“, пренесе грчкиот весник „Катимерини“.