ВМРО-ДПМНЕ: Стојановски треба да се товари за сериозно кривично дело


Скопје, 10 септември, 2018 - 15:07 (META) 

Шерифлукот на СДСМ е многу посериозен од обична расправија, како што тврди МВР кое што се обидува да го релативизира случајот со градоначалникот на Општина Демир Хисар, Марјанче Стојановски, изјави на прес-конференција портпаролот на ВМРО-ДПМНЕ, Димче Арсовски.

Арсовски прашува „како стасале материјалите од нелегалното прислушкување до лик како што е Марјанче Стојановски од Демир Хисар?“

– Дали за овие материјали за кои градоначалникот на Демир Хисар зборува знаaт органите на прогонот? На крајот на краиштата, дали некојси Марјанче Стојановски е дел од една партиска структура на СДСМ која вршела прислушкување на граѓаните и истите материјали ги злоупотребувала во изборни цели, уцени на граѓаните и притисоци на администрацијата во пресрет на политичките случувања како што е претстојниот референдум, а можеби тоа било дел од стратегијата да стане градоначалник? – изјави Арсовски на прес-конференција.

Тој додаде дека се очекува „овој скандал да биде разјаснет во целост, а не да заврши со информативен разговор во полиција, онаму каде што работел Стојановски и од каде имал пристап да ги прислушкува сите граѓани, а сега веќе и да им се заканува.“

– Обвинителството треба да излезе со сериозно кривично дело, а не со минорни обвинувања. Оставката на градоначалникот Стојановски е нешто што јавноста најмалку го очекува во моментов – додаде Арсовски.


Градоначалникот на Демир Хисар пуштен од притвор, но истрагата за заканите продолжува


Демир Хисар, 10 септември, 2018 - 9:47 (META) 

Градоначалникот на Демир Хисар, Марјанче Стојановски беше приведен во полициска станица на информативен разговор, бидејќи им се заканувал на вработените во училиштата дека ги прислушува нивните телефонски разговори.

Тој изјавил дека снимката која се појавила на интернет е од протест во ОУ „Гоце Делчев“ во Демир Хисар кој се случил во средината на месец јануари 2018 година. Протестот се одржал поради промена на две учителки во други подрачни училишта.

„По насока на Јавно обвинителство во Битола, Стојановски по разговорот е пуштен од полициската станица, а во врска со овој случај ќе се повикуваат повеќе лица на службен разговор со цел негово целосно расчистување“, додаваат од МВР.


Приведен Васе Доневски, поранешниот директор на СОЗР


Скопје, 16 март, 2018 - 9:15 (META) 

Финансиската полицијата го привела Васе Доневски поранешен директор на Службата за општи и заеднички работи на Владата на РМ (СОЗР.

Повикувајќи се на извори од Управата за финансиска полиција дел од медиумите наведуваат дека Доневски е приведен и е на распит поради сомнежи за злоупотреба на службената положба за времето додека бил директор на службата.

Од Управата за финансиска полиција за МИА потврдија дека е приведен Васе Доневски поранешен директор на Службата за општи и заеднички работи на Владата на РМ (СОЗР).

Од таму за утре најавуваат прес-конференција на директорот Арафат Муареми, на која тој ќе информира за предмет кој се однесува на злоупотреба на службена положба и овластување од страна на поранешен функционер.

Новата влада го разреши Доневски во јули мината година и на негово место го назначи Пеце Мирчески од СДСМ.


Хелсиншки: Не се прекршени законите при притворањето на пратениците


Скопје, 6 февруари, 2018 - 10:46 (META) 

Хелсиншкиот комитет за човекови права не констатирал кршење на процедурите, пропишани со Уставот и законите, во врска со приведувањето и притворањето на шестмината пратеници осомничени за насилствата во Собранието од 27 април, минатата година.

Ова, како што информираа денеска од Хелсиншки, било утврдено по спроведената постапка по претставка поднесена од пратеници на опозициската ВМРО-ДПМНЕ за приведувањето и притворањето на нивните колеги.

„Согласно надлежностите, Хелсиншкиот комитет се обрати до Министерството за внатрешни работи, Основното јавно обвинителство за гонење на организиран криминал и корупција и Основниот суд Скопје 1 Скопје. Во врска со самата постапка за определување на мерката притвор за групата партеници – подносители на претставката, Комитетот утврди дека постапката пропишана според Уставот на РМ, Деловникот на Собраниете на РМ и Законот за кривична постапка во врска со определување на мерката притвор и одземањето на имунитетот на пратениците е испочитувана од страна на надлежните институции“, стои во соопштението.

Хелсиншкиот комитет констатирал и дека судијата правилно постапил кога првин издал наредба за приведување на пратениците за да ги испита и за да може да одлучи за „основаноста и неопходноста на предложените мерки кои зафаќаат во личните права и слободи“.

„Ваквото толкување и примена на уставните и законските одредби според Комитетот е сосема исправно бидејќи нема логика прописите да се толкуваат на начин како што тоа се сугерира во поднесокот од група пратеници од ВМРО-ДПМНЕ, дека наводно прашањето за имунитетот требало да се постави уште во порана фаза, пред пратениците воопшто да се приведат“, велат од Хелсиншки.

Оттаму наведуваат дека Комитетот не можел „со сигурност да утврди дали на пратениците неосновано им се ставени лисици само со цел тие да се омаловажат и понижат“.

„Доколку тоа се утврди, истото ќе претставува повреда на домашните полициски процедури, како и повреда на членот 3 од Европската конвенција за човековите права. Фактот, пак, дека на приведувањето сведочеле членови на нивните семејства бездруго е несакана последица, но истата е своевидна колатерална штета на овие мерки кои треба да се користат во исклучителни случаи, па во таа смисла не наоѓаме дека во конкретниот случај осомничените се дискриминирани во однос на другите граѓани“, се вели во соопштението на Хелсиншкиот комитет за човекови права.


Џолев смета дека приведувањето на пратениците било согласно закон


Скопје, 26 јануари, 2018 - 15:47 (META) 

Приведувањето и притворањето на шестмината пратеници, осомничени за насилствата во Собранието од 27 април, минатата година е извршено законски и не е прекршено правото на пратенички имунитет, смета претседателот на Кривичниот суд во Скопје, Иван Џолев, потенцирајќи дека тоа е негов личен став.

Џолев на денешниот брифинг со новинарите рече дека треба да се прави терминолошка разлика и дека правото на имунитет се однесува на притворањето, но, не и на приведувањето.

Судиите, рече Џолев, најверојатно имале дилеми дали пратениците да бидат привилигирани околу приведувањето во однос на другите осомничени, но, одлучиле тие да бидат приведени како и останатите.

Пратениците беа притворени дури откако им беше симнат имунитетот, рече Џолев, додавајќи дека околу ова прашање не го дели ставот со некои од правните експерти и Народниот правобранител дека во случајот биле прекршени процедурите.

Народниот правобранител кон крајот на декември, минатата година соопшти оти констатирал дека полицијата го повредила правото на пратeнички имунитет и начелото на презумпција на невиност при приведувањето на тројца пратеници на 28 ноември, лани, кога Обвинителството за гонење на организиран криминал и корупција ја отвори истражната постапка против 36 осомничени за насилствата во Собранието од 27 април.

На ваквата констатација постојано се повикува опозициската ВМРО-ДПМНЕ од чии редови се притворените пратеници, кои се товарат за терористичко загрозување на уставниот поредок и безбедноста.

 


Мемети: Полицијата го прекршила правото на имунитет при приведувањето на пратениците


Скопје, 28 декември, 2017 - 15:42 (META) 

Полицијата го повредила правото на пратeнички имунитет и начелото на презумпција на невиност при приведувањето на тројцата пратеници на 28 ноември, годинава, како дел од 36-мината осомничени за насилствата во Собранието од 27 април, констатирал Народниот правобранител.

Според Омбудсманот, полицијата во случајов не го почитувала Правилникот за начин и вршење на полициски работи.

На денешниот брифинг со новинарите, народниот правобранител Иџет Мемети информираше дека ваквата состојба е констатирана по добиена претставка од пратеничката група на ВМРО-ДПМНЕ и коалицијата „За подобра Македонија“.

За Народниот правобранител е неспорно дека во случајот било постапено спротивно на член 19 од Правилникот за начинот и вршење на полициски работи, според кој, доколку лицето кое се приведува се повика на статусот имунитет полицискиот службеник по проверка на веродостојноста на таквиот статус ќе го прекине приведувањето и за тоа веднаш
ќе го извести непосредниот раководен полициски службеник.

Мемети информира дека е доставена препорака до министерот за внатрешни работи, Оливер Спасовски со која се бара да се спроведе целосна постапка за испитување на начинот на постапувањето на полициските службеници на 28 ноември 2017 година, да утврди одговорност и да се санкционираат прекршителите на правата на пратениците.

Омбудсманот дополнително смета дека е потребно да се постави и прашањето зошто судот издал наредба за приведување и претрес на лица кои уживаат имунитет, без претходно да им биде одземен.


МВР пронајде 26 мигранти во две возила на патот Гевгелија – Скопје


Скопје, 3 декември, 2017 - 13:11 (META) 

Вчера, во 12 часот, мешовит патролен тим од полициска станица за граничен премин и граничен надзор Богородица, на автопатот Гевгелија – Скопје, забележал автомобил „рено еспејс“ со велешки регистарски ознаки, при што на даден знак возачот да го запрел возилото, тој ја зголемил брзината и се упатил кон село Миравци, каде се обидел да побегне.

Полицијата го привела лицето С.М. (35) од село Бузалково, Велешко, а при контрола, во неговиот автомобил пронашла 12 мигранти. Возачот е предаден во полициска станица Гевгелија за понатамошна постапка.

Утрово на граничен премин Богородица за влез во Македонија во товарно моторно возило „волво“ со скопски регистарски ознаки управувано од Р.Т. (63) од Србија, со место на живеење во Скопје, откриени се 14 илегални мигранти. Се преземаат мерки за расчистување на случајот.


ВМРО-ДПМНЕ повикува на протест против приведувањата, во 13.30 часот пред Кривичен суд


Скопје, 28 ноември, 2017 - 10:37 (META) 

ВМРО-ДПМНЕ ги повика сите членови и симпатизери на партијата и сите граѓани што не се согласуваат со, како што велат од партијата, „антидржавната политика на владејачката хунта“, да излезат на протест пред Основниот суд Скопје во 13.30 часот.

„ВМРО-ДПМНЕ денеска е на удар на антидржавната хунта на Зоран Заев. Полицијата упадна во домовите на пратеници на ВМРО-ДПМНЕ, членови на извршниот комитет, поранешни функционери на партијата и на други јавни личности. Полицијата по наредба на Зоран Заев не го почитува пратеничкиот имунитет, туку единствено политичките наредби за пресметка со неистомислениците“, се вели во партиското соопштение.

Од опозициската партија додаваат дека приведувањето на функционери на ВМРО-ДПМНЕ е обид да биде замолкната опозицијата и да се скрши отпорот на партијата против сите антидржавни политики што владата ги реализира периодов.


Полицијата во Берлин изврши рација на повеќе локации и пронајде оружје и муниција


Берлин, 25 октомври, 2017 - 12:14 (META) 

Полицијата во Берлин извршила рација на повеќе места во градот и запленила оружје и поголемо количество муниција, а едно лице е приведено, пишуваат германските медиуми.

Рацијата била спроведена на четири локации во рамките на потрагата по маж за кој постои сомневање дека е поврзан со исламските екстремисти.

При акцијата бил приведен 40-годишен Германец, кој во текот на денот треба да се појави пред судот.

Властите наведуваат дека рацијата била спроведена по повеќемесечна истрага и дека одлучиле да дејствуваат поради страв дека оружјето може да биде искористено за напад.


Полицијата привела 19 лица за време на изборите


Скопје, 16 октомври, 2017 - 18:15 (META) 

Во текот на вчерашниот ден, за време на изборниот процес, од седум до 19 часот, приведени се вкупно 19 лица, соопшти МВР.

Десет лица се приведени поради фотографирање гласачко ливче. Од МВР посочуваат дека сите овие случаи се расчистени и против лицата ќе бидат поднесени прекршочни пријави.

Во Битола приведени се три лица поради сомнеж дека давале поткуп при гласање. За нарушување на јавниот ред и мир, МВР поднела четири прекршочни пријави за три лица.

Од МВР истакнуваат се поднесени и три кривични пријави, една за напад на службено лице при вршење работи на безбедноста и две за злоупотреба на избирачко право.

Министерството за внатрешни работи истакна дека презема мерки и активности за расчистување и на другите случаи кои беа пријавени во текот на вчерашниот ден и дека по расчистувањето, соодветно ќе ја информира јавноста.