Стевчо Јакимовски приведен, чека распит пред судија


Скопје, 8 август, 2018 - 9:31 (META) 

Поранешниот градоначалник на Општина Карпош, Стевчо Јакимовски, синоќа половина час пред полноќ, е приведен и се наоѓа во една од полициските станици во Скопје. До крајот на денот се очекува да биде изведен пред судија на претходна постапка.

Според Виктор Цветковски, адвокат на поранешниот градоначалник, ова е атак врз политичкиот ангажман на Стевчо Јакимовски.

Финансиската полиција вчера влезе во неколку станбени објекти на семејството Јакимовски, барајќи документи за одредени случаи. Засега од таму нема официјални информации.


Јане Ченто вратен во притвор во „Шутка“


Прилеп, 3 април, 2018 - 14:17 (META) 

Јане Ченто, еден од обвинетите за насилствата во Собранието на 27 април минатата година утрово бил спроведен повторно на издржување притвор во затворот „Скопје“ во Шуто Оризари.

Според Основниот суд Скопје 1, Јане Ченто не ја почитувал мерката куќен притвор, поради што Советот на судот ја укинал таа мерка и повторно му изрекол затворски притвор.

Тој веќе еднаш беше во Шутка, но по одлука на скопска Апелација на 21 февруари беше пуштен во домашен притвор и му беше одземен пасошот.

Полицијата го привела Јане Ченто од неговиот дом во Прилеп претпладнево нешто пред 10 часот. Бил приведен со образолжение дека не се придржувал до препораките на судот, односно на 30 март, според полицијата, го напуштил куќниот притвор во период од околу половина час.

Неговиот татко тоа го демантира и вели дека снимките од безбедносните камери што се поставени на нивната куќа ќе докажат дека Јане Ченто во ниту еден момент не го напуштил домот.


МВР: Пендрек и камења пронајдени кај демонстрант пред Собрание


Скопје, 15 март, 2018 - 11:15 (META) 

Министерството за внатрешни работи (МВР) соопшти дека вчера околу 20.45 часот пред Собранието на Република Македонија при преглед на 27-годишниот Д.Г. (27) од Скопје пронајден бил пендрек и камења.

Полицајците што го претресле, го спровеле 27-годишникот во полициска станица Центар за понатамошна постапка.


Приведен дилер на дрога во Неготино, запленети марихуана, хероин, кокаин


Неготино, 20 февруари, 2018 - 14:33 (META) 

Полициски екипи вчера извршиле претрес во домот на 41-годишниот А.Т. во Неготино каде пронашле и заплениле различни видови наркотици, соопшти денеска Министерството за внатрешни работи.

Како што информираат од Министерството, во домот на неготинецот биле пронајдени и одземени 1,5 килограми марихуана, 20 таблети екстази, 36 шишиња метадон, околу 10 грама кокаин, околу 110 грама хероин, една дигитална вага и 36.000 денари, за кои постои сомнение дека потекнуваат од продажба на дрога.

Осомничениот А.Т., како што се наведува во соопштението, дрогата ја продавал на лица од подрачјата на Неготино, Кавадарци, Демир Капија, Валандово и Струмица.

Тој е приведен и против него ќе биде поднесена кривична пријава за недозволено производство и пуштање во промет наркотични дроги и психотропни супстаници и ќе биде предаден на надлежен судија за понатамошна постапка.


Вооружен напаѓач се обидел да влезе во претседателската палата во Техеран


Техеран, 5 февруари, 2018 - 12:53 (META) 

Вооружен маж е ранет и приведен во Техеран откако се обидел да влезе во претседателската палата во главниот град на Иран, соопштил заменик-гувернерот на Техеран, Мохсен Хамедани, а пренесе новинската агенција „Фарс“.

„Се обидуваме да го идентификуваме лицето и да ги дознаеме неговите мотиви“, додал Хамедани.

Напаѓачот бил вооружен со голем нож, пренела агенцијата „Тасним“, а бил облечен во бела облека, што симболизира дека бил подготвен да го жртвува својот живот.

Тој бил застрелан во нога додека се обидувал да ја помине безбедносната контрола на влезот во зградата во центарот на Техеран.

Нема информации дали претседателот на Иран, Хасан Рохани во тоа време се наоѓал во палатата.


Рускиот опозициски лидер Алексеј Навални приведен за време на протест во Москва


Москва, 28 јануари, 2018 - 15:18 (META) 

Рускиот опозициски лидер, Алексеј Навални денеска е приведен во Москва за време на протестите на неговите приврзаници кои повикуваат на бојкот на претседателските избори во март, јавуваат светските агенции.

Навални ги повика своите приврзаници да продолжат со протестите и покрај неговото приведување.

„Ме приведоа. Тоа не значи ништо, не излеговте поради мене, туку поради својата безбедност“, напиша Навални на „Твитер“.

Инаку, денеска пријавени се повеќе протести ширум Русија на кои учествуваат од неколку десетици до неколку стотици демонстранти.

Претседателските избори се закажани за 18 март, а според анкетите, рускиот претседател Владимир Путин има поддршка од околу 80 отсто од гласачите.


Приведен еден од осомничените за 27 април кој се бараше со меѓународна потерница


Скопје, 12 јануари, 2018 - 11:05 (META) 

Полицијата синоќа во Скопје го привела Младен Додевски, еден од осомничените за насилствата во Собранието од 27 април, кој се бараше со меѓународна потерница.

Од МВР засега нема официјална потврда за приведувањето на Додевски.

Тој, како што пренесува „Телма“ повикувајќи се на полициски извори, се криел во внатрешноста од државата, а наводно бил приведен пред ресторан во Скопје.

Министерството за внатрешни работи преку канцеларијата на Интерпол во земјава, на 4 јануари распиша меѓународна потерница за петмина осомничени за насилствата во Собранието.

Покрај Додевски со меѓународна потерница се бараат и Никола Митревски – Кољо, Александар Василевски – Нинџа, Дејан Давидовски и Митре Питроповски.

Сите петмина, Основното јавно обвинителство за гонење на организиран криминал и корупција ги товари за кривичното дело терористичко загрозување на уставниот поредок и безбедноста.

Кривичниот суд во Скопје кон средината на декември, минатата година на петмината во отсуство им одреди мерка притвор од 30 дена, со што веднаш штом ќе станат достапни за органите на прогонот ќе бидат спроведени во истражен затвор.

Тие се дел од 36-те осомничени за кои ОЈО за гонење на организиран криминал и корупција на 28 ноември, минатата година отвори истрага за насилствата во Собранието.


Едно лице приведено на протестот на преминот Табановце


Скопје, 19 декември, 2017 - 19:38 (META) 

Едно лице е приведено за време на протестот на симпатизерите и поддржувачите на ВМРО-ДПМНЕ на граничниот премин Табановце.

Како што соопшти полицијата, приведениот нападнал полициски службеник, поради што е приведен и против него ќе биде покрената соодветна пријава.

Дел од медиумите претходно објавија снимки од протестот на Табановце, каде се гледа туркање меѓу демонстрантите и полицијата.

Опозициската ВМРО-ДПМНЕ веќе трета недела протестира и блокира крстосници во Скопје поради притворањето на нивни приврзаници и пратеници поради насилствата во Собранието од 27 април годинава, а денеска за прв пат организираше и блокада на граничен премин.


Војската ја презеде контролата во Зимбабве, Мугабе и семејството во притвор


Хараре, 15 ноември, 2017 - 10:51 (META) 

Владејачката партија во Зимбабве – Зану ПФ преку „Твитер“ соопшти дека Емерсон Мнангагва е именуван за привремен претседател на оваа африканска држава и дека досегашниот претседател Роберт Мугабе и членови на неговото семејство се приведени, јавуваат светските медиуми.

Мнангагва претходно беше сменет од функцијата потпретседател на земјата поради „нелојалност“. Медиумите потсетуваат дека тој тогаш бил сменет на иницијатива на сопругата на Мугабе, Грејс Мугабе, пренесува „Би-би-си“.

Војската на Зимбабве, пред објавата на владејачката партија, го зазеде седиштето на државната телевизија, а силни експлозии и пукотници одекнувале ноќеска во главниот град на земјата, Хараре.

Офицери на војската на Зимбабве соопштија дека ноќеска интервенирале за да ги елиминираат „криминалците“ од опкружувањето на претседателот Мугабе, но демантирале дека се обиделе да извршат воен удар против шефот на државата, кој владее со Зимбабве 37 години.

Интервенцијата на војската доаѓа по отворените несогласувања помеѓу Мугабе и начачникот на генералштабот на војската по смената на Мнангагва од функцијата потпретседател. Мнангагва важеше за можен наследник на Мугабе.

Мугабе, кој е роден во 1924 година и беше дел од ослободувањето на Зимбабве од колонијалното владеење, стана премиер во 1980 година, функција која ја извршуваше до 1987 година од кога е претседател на државата.

Поради авторитарниот начин на владеење и одговорноста за состојбите во Зимбабве, Мугабе од 2002 година беше цел на санкции од Европската Унија и од САД.


Косовец приведен во кругот на касарната Илинден


Скопје, 14 ноември, 2017 - 17:15 (META) 

Педесет и осумгодишен косовски државјанин со иницијали Х.Р. вчера бил приведен во полициската станица Карпош, откако бил затекнат во кругот на касарната „Илинден“ во Скопје.

Косовецот, како што информираат од МВР, бил приведен под сомнение за „неовластено влегување во воени објекти и правење скици или цртежи на воени објекти и борбени средства“.

Од МВР додаваат дека по „целосно расветлување и документирање на случајот против лицето ќе биде поднесена соодветна пријава и ќе се преземат понатамошни дејствија“.

Инаку, на почетокот на октомври годинава, во кругот на касарната „Илинден“ беше уапсен 30-годишен британски дражјанин, исто така, поради сомневање за сторено кривично дело „неовластено влегување во воени објекти и правење скици или цртежи на воени објекти и борбени средства“.