ВМРО-ДПМНЕ: Правдата ќе има кога судот ќе ги ослободи сите притворени за 27 април


Скопје, 22 февруари, 2018 - 11:13 (META) 

Правдата ќе биде задоволена само тогаш кога судот ќе ги ослободи и останатите неосновано притворени патриоти кои без никакви аргументи веќе трет месец се држат во затвор, велат од опозициската ВМРО-ДПМНЕ.

„Правната држава ќе почне да функционира само тогаш кога ќе бидат укинати и домашните притвори и кога ќе бидат отфрлени неоснованите обвиненија за тероризам. Судот мора да биде на висина на одговорноста што ја има и да утврди дека нема никаква правна основа да бидат задржани во истражен затвор и останатите притворени во врска со настаните од 27 април.‬ Притворените лица не се терористи, туку жртви на еден недемократски, политички монтиран случај“, стои во соопштението.

Вчера, Апелацискиот суд потврди дека ги прифатил жалбите на организаторите на протестите на „За заедничка Македонија, Борис Дамовски и Богдан Илиевски и на пратеникот Љубен Арнаудов, и дека мерката притвор во истражен затвор им ја заменил со куќен притвор и одземање на пасошите. Покрај нив тројца, Апелација им одреди куќен притвор и одземање на пасошите и на Јане Ченто, Иван Цветановски и на Оливер Радулов.

Во истовреме, Апелацискиот суд одлучила поранешниот министер за внатрешни работи, Митко Чавков да остане во притвор, пратеникот Јохан Тарчуловски во домашен притвор, а отфрлени се жалбите и на Горан Ангеловски, Илија Славевски, Сашо Марковски и Вилијам Михајловски.

Според најавите, Апелацискиот суд денеска на јавна седница треба да одлучува по жалбите за продолжените притвори на пратеникот Крсто Мукоски, актерот Владо Јовановски и на разузнавачот Мунир Пепиќ.


Мицкоски отворен за постојана комуникација со претставниците на ЕУ во Македонија


Скопје, 23 јануари, 2018 - 15:24 (META) 

Македонско-германските односи, актуелната политичка состојба и стратешките приоритети на земјава биле темите за кои на денешаната средба разговарале лидерот на ВМРО-ДПМНЕ, Христијан Мицкоски и амбасадорот на Германија во Македонија, Томас Герберих.

Двајцата соговорници констатирале дека и во иднина ќе продолжат постојаните контакти и комуникации помеѓу ВМРО-ДПМНЕ и амбасадата на Германија, како и со претставниците на Европската Унија во Македонија.

Мицкоски на средбата истакнал дека стратешка определба на е членството во ЕУ и НАТО, а заложбите на ВМРО-ДПМНЕ за остварување на овие цели „биле и ќе останат приоритет“.

Претседателот на ВМРО-ДПМНЕ го информирал Герберих и „дека неоправдано во притвор од страна на актуелната власт се држат 6 пратеници од коалицијата предводена од ВМРО-ДПМНЕ и дека и покрај забелешките на Народниот правобранител за начинот на притворање и процедурата за спроведување на народните избраници до судот, до сега нема никаква одговорност од страна на актуелната власт.

Мицкоски исто така потенцирал дека нема конкретни чекори од страна на СДСМ за подобрување на политичкиот дијалог помеѓу опозицијата и власта.


ВМРО-ДПМНЕ: Додека патриоти се во притвор, власта ослободува осудени криминалци


Скопје, 16 јануари, 2018 - 10:55 (META) 

Јавното обвинителство втор месец не презема никакви дејствија во истрагата што се води по „политички монтираниот случај за тероризам“, велат од ВМРО-ДПМНЕ и додаваат дека не се повикуваат и сослушуваат ниту сведоци, ниту притворените за насилставата во Собранието од 27 април.

„Тоа е најдобра потврда дека не станува збор за притвор изречен заради некои правно издржани причини, туку неоснована и политичка казна за изживување со луѓе кои мислат поинаку. Додека десетина патриоти се наоѓаат во притвор како резултат на монтиран прогон, власта од затвор ослободува осудени криминалци“, стои во соопштението на ВМРО-ДПМНЕ.

Од партијата велат дека вчерашното донесување на Законот за амнестија во Собранието е уште една од низата катастрофални политички на Владата на СДСМ. Тоа, додаваат од ВМРО-ДПМНЕ, е потврда дека за премиерот Зоран Заев е поважно да ги подмири „долговите од предизборната коалиција со криминалот, отколку на граѓаните да им гарантира безбедност преку санкционирање на непочитувањето на законите“.

„Овој закон беше донесен на дрзок и шверцерски начин без присуство на ВМРО-ДПМНЕ во Собранието. Додека Заев враќа долгови со ослободување на осудени криминалци, Дурловски, Јовановски, Дамовски, Илиевски, Божиновска, Чавков, Мукоски и другите неправедно обвинети, на кои единствен грев им беше тоа што ја сакаат државата, се товарат за тероризам“, стои во соопштението на опозициската партија.


ВМРО-ДПМНЕ: Судот беше соучесник во уништувањето на правната држава


Скопје, 12 јануари, 2018 - 18:13 (META) 

За ВМРО-ДПМНЕ одлуките на Апелациски суд Скопје да ги отфрли жалбите на единаесеттемина притворени за насилствата во Собранието на Република Македонија на 27 април лани се уништување на правната држава и гола политичка конструкција.

Судот денес беше соучесник во уништувањето на правната држава. Судиите не собраа сили да се кренат над притисокот и политичките конструкции. Одлуката на Апелациониот суд за продолжување на притворите на лицата од настаните од 27 април е скандалозна и не се темели на факти и докази, туку на гола политичка конструкција. Институциите денес паднаа на тестот за владеење на правото“, се вели во реакцијата од партијата.


ВМРО-ДПМЕ: Судот има единствена шанса да одолее на притисоците


Скопје, 9 јануари, 2018 - 9:38 (META) 

Судот има единствена шанса да застане на страна на правдата и законот и да им сврти грб на притисокот и политички конструираните обвиненија. Судот има можност водејќи се по словото на законот да стави крај на оваа конструкција со која недолжни граѓани се обвинуваат за тероризам и да застане на страната на правдата, порача ВМРО-ДПМНЕ во соопштение во врска со притворените пратеници и граѓани поради насилствата во Собранието на 27 април минатата година.

„Апелациониот суд мора да се издигне над дневната политика и притисокот. Судот не смее да биде соучесник во конструиран случај. Случај во кој се кршат законите и правата на човекот. Незаконитоста ја предочи и Народниот правобранител. Прекршени се правата на граѓаните при нивното приведување, нивните права се кршат во истражниот затвор, а целата постапка е една огромна конструкција која служи само за втерување страв. Овие факти судот не смее да ги занемари“, вели најголемата опозициска партија.


Мицкоски: Подготвуваме закон за амнестија за притворените за 27 април


Скопје, 4 јануари, 2018 - 21:35 (META) 

Новиот лидер на опозициската ВМРО-ДПМНЕ во интервју за јавниот сервис – МТВ – најави дека партијата подготвува закон за амнестија за притворените за насилствата во Собранието од 27 април минатата година, кој ќе го поднесе во Собранието.

– Во моментов има една сериозна дебата во партијата како да дејствуваме како пратеничка група, институционално и вониституционално. Пратеничката група предвидува неколку чекори и постапки, а едно од сценаријата што се разгледува е поднесување на закон за амнестија на притворените – изјави Мицкоски.

Прашан дали било можно да се избегне насилството на 27 април, претседателот на ВМРО-ДПМНЕ рече дека целиот револт кај народот бил предизвикан од „недемократкиот и насилнички чин за избор на Талат Џафери за претседател на Собранието“.

– Ако имаше разум кај пратениците на СДСМ и на ДУИ и на сите кои го поддржаа тој насилнички гест кога Талат Џафери беше избран за т.н. претседател на Собранието немаше да се случи тоа што следуваше – рече Мицкоски.

Тој посочи дека конструктивноста на ВМРО-ДПМНЕ во наредниот период не треба да биде доведена во прашање, но, како што додаде, таа конструктивност треба да биде двонасочна, односно треба да дојде и од владејачкото мнозинство, кое, како што рече ја има најголемата одговорност.

Прашан дали пратениците ќе се вратат во собраниските клупи, Мицкоски рече дека „во периодот што следи јавноста ќе биде известена за следни чекори на партијата“.


ВМРО-ДПМНЕ бара судот да ги ослободи притворените за 27 април


Скопје, 2 јануари, 2018 - 11:04 (META) 

Десетици неосновано притворени граѓани наместо со своите семејства новата година ја поминаа во ладни ќелии, велат од опозициската ВМРО-ДПМНЕ и реагираат на продолжениот притвор на осомничени за насилствата во Собранието од 27 април.

Од партијата велат дека притворените се „жртви на политички прогон, кои ја чувствуваат инквизицијата на 21 век на сопствена кожа“.

„Притворените граѓани се лишени од загарантираните човекови права, а постапката против нив е противзаконска и неоснована уште од самиот почеток. Непочитувањето на законите при нивното притворање, го потврди и Народниот правобранител. Факт кој остана премолчен од ОЈО и судот“, стои во соопштението од ВМРО-ДПМНЕ.

Оттаму бараат од судот да ги „согледа правните аргументи и фактичката состојба“ и да ги укине притворите.

„Судот како гарант на законитоста во постапката е должен да се издигне над притисокот. Судот има шанса да му стави крај на политичкиот прогон и да ја одбрани демократијата. Судиите треба да знаат дека ваква политичка конструкција ќе биде осудена од сите меѓународни фактори и Европскиот суд за човекови права (ЕСЧП)“, порачуваат од ВМРО-ДПМНЕ.


„Тврдокорни“ ќе ја дочекаат Новата година пред затворот во Шуто Оризари


Скопје, 31 декември, 2017 - 19:01 (META) 

Македонското патриотско здружение „Тврдокорни“ соопшти дека вечерва ќе организира дочек на Новата година пред истражниот затвор „Скопје“ во Шуто Оризари, како поддршка за притворените за насилствата во Собранието од 27 април.

„Новогодишната ноќ пред истражниот затвор ‘Шутка’ ќе биде во знак на поддршка на притворените уставобранители“, се вели во соопштеноето од здружението „Тврдокорни“.

Кривичниот суд во Скопје на 27 декември им го продолжи притворот за нови триесет дена на пратениците Крсто Мукоски, Сашо Василевски и Љубен Арнаудов, на поранешниот министер за внатрешни работи и директорот на Бирото за јавна безбедност Митко Чавков, организаторите на протестите на „За заедничка Македонија“ Игор Дурловски, Борис Дамовски, Богдан Илиевски и на уште шестнаесет лица осомничени за насилствата во Собранието од 27 април, оваа година.


ВМРО-ДПМНЕ: Политичкиот прогон мора да престане


Скопје, 30 декември, 2017 - 10:14 (META) 

Во Македонија нема да има атмосфера за конструктивна дискусија се додека пратеници, уметници, доктори, архитекти, актери, оперски пејачи и полициски службеници се прогласуваат за терористи, се вели во денешното соопштението на ВМРО-ДПМНЕ, во кое опозициската партија повторно реагира на притворањето на лицата осомничени за насилствата во Собранието од 27 април, оваа година.

„Судот наместо да одлучува врз основа на фактите, реши да ги задоволи неаргументираните барања за продолжување на притворот од страна на Јавното обвинителство кое конструира политички мотивирани истраги“, велат од партијата.

Оттаму наведуваат дека правото во Република Македонија е сериозно девалвирано, а институциите се претвораат во алатка за пресметка со сите кои не мислат исто како власта.

„Неосновано притворените за настаните од 27 април се лишени од основните права во постапката. Презумпцијата на невиност како основен принцип на кривичната постапка е прекршена. Тоа го потврди и Народниот правобранител. Полицијата ги пречекори овластувањата, судовите одлучуваат по конструирани обвиненија, а кршењето на законите продолжува и во притворските установи. Оваа злоупотреба на институциите не смее да продолжи. Правото мора да важи подеднакво за сите. Граѓаните на Република Македонија тоа го заслужуваат. Политичкиот прогон мора да престане“, стои во соопштението на ВМРО-ДПМНЕ.


ВМРО-ДПМНЕ: Институциите не смеат да бидат алатка за политички прогон


Скопје, 29 декември, 2017 - 9:51 (META) 

Не постои никаква правна аргументација уметници, оперски пејачи, актери, режисери, архитекти, доктори, полициски службеници, пратеници и останатите неправедно обвинети за тероризам да се држат во притвор, се вели во денешното соопштение на опозициската ВМРО-ДПМНЕ, која реагира на продолжувањето на притворот на осомничените за насилствата во Собранието од 27 април.

„Тие се целосно невини и секоја поинаква одлука од страна на органите на прогонот е само ширење на страв и обид за сузбивање на секоја критичка мисла. Нивното притворање е притисок врз нив и нивните семејства, но и порака до сите оние кои би се обиделе да кренат глас против деструктивните и антидржавни политики на власта. Притворените не се терористи, туку жртви на политички прогон“, стои во соопштението.

Од партијата нагласуваат дека „кршењето на законите и процедурите од страна на правосудните органи при апсењето на лицата од 27 април го потврди и Народниот правобранител“, односно дека полицијата при апсењето на тројцата пратеници го повредила правото на пратенички имунитет и начелото на презумпција на невиност.

„Кршењето на законите е видливо во сите нивоа од кривичната постапка. Законите се кршат од ОЈО, судот, но и од одговорните во истражниот затвор. Институциите не смеат да бидат злоупотребувани и користени како алатка за политички прогон. Граѓаните заслужуваат општество во кое законите важат за сите, а институциите мора да бидат гарант на демократијата и владеењето на правото“, велат од ВМРО-ДПМНЕ.