Советот на честа реагира на барањата на ВМРО-ДПМНЕ агенцијата МИА да го открие изворот


Скопје, 19 октомври, 2018 - 12:11 (META) 

Советот за етика во медиумите на Македонија (СЕММ) остро реагира на барањата на ВМРО-ДПМНЕ, државната агенција МИА да ги открие своите извори, во однос на текстот дека Европската народна партија (ЕПП) сака да ги исклучи од своите редови.

„СЕММ потсетува дека едно од основните права, а понекогаш дури и обврска на новинарот е да го заштити својот извор. Упатуваме на Членот 4 од Кодексот на новинарите на Македонија каде што стои: „Новинарот ќе го назначи изворот на информациите, но ако изворот бара да остане анонимен, новинарот ќе го заштити.“ Македонија е потписник на сите релевантни резолуции на Советот на Европа за заштита на извори во рамките на слободата на медиумите. Улогата на политичките партии во една демократија во ниеден случај не смее да значи нивно мешање во работата на новинарите, а ваквите барања подразбираат отворен притисок и обиди за јавно дискредитирање на медиумот“, се вели во соопштенитео на СЕММ.

ВМРО-ДПМНЕ ова го побара откако претседателот на ЕПП, Жозеф Дол, на прес-конференција рече дека ЕПП размислува партијата на Виктор Орбан да ја исклучи од своите редови, а ВМРО-ДПМНЕ не ги спомна. Тој имаше „твит“ за ВМРО-ДПМНЕ, во кој повика на конструктивност, наместо бојкот.

Македонската информативна агенција (МИА) појасни дека нивната дописничка од Брисел, имала свои извори во однос на текстот, кој тие го објавија за исклучување на ВМРО-ДПМНЕ од ЕПП, по што следуваше притисокот од страна на оваа партија за откривање на изворот.

„Твитот на Жозеф Дол во ниеден случај не може да се протолкува како демант на информациите објавени на МИА пред една недела, кои впрочем се проверени и снимени. Значи, станува збор за два сосема различни настани, наменети за две различни партии – Фидес, на Виктор Орбан и ВМРО-ДПМНЕ, но за иста тема. Што значи дека едната изјава не ја демантира другата. За двата настани, МИА располага со снимени изјави“, реагираа од МИА.


Милошоски: СЈО врши притисок врз пратениците за да гласаат за уставните измени


Скопје, 16 октомври, 2018 - 12:30 (META) 

Пратеникот на ВМРО-ДПМНЕ, Антонијо Милошоски, по распитот во Специјалното јавно обвинителство (СЈО) за случајот „Моќник“ денеска обвини дека тој распит и распитите на 15 негови колеги – пратеници од ВМРО-ДПМНЕ се притисок за тие да гласаат за уставните измени.

– По неуспешниот референдум, околу 15 мои колеги пратеници, меѓу кои и јас, се повикани од страна на Специјалното јавно обвинителство за разни предмети. Со тоа се покажува дека Обвинителството има своја политичка намена, односно сите овие случаи и постапки и распити имаат за цел да принудат дел од пратениците да гласаат против волјата на народот, односно за измена на Уставот на Република Македонија. Предметите не би ги коментирал во подробности, но би кажал дека истите се неосновани и самиот тајминг на покренување на предметите после пропаднатиот референдум навестува дека СЈО има селективна правда и е политичка институција што сака да изврши притисок врз поголем дел на пратениците од опозицијата да гласаат за уставните измени- изјави Милошоски.

Тој рече дека нема да потклекне под притисоците и ќе гласа според тоа како се определил народот на референдумот, односно „против“.

Инаку, Милошоски е првообвинет во случајот на СЈО против вкупно 13 лица, меѓу кои се и неговиот татко и тогашниот градоначалник на општина Македонски Брод, како и поранешниот прв лустратор Томе Аџиев.


Трговската војна помеѓу САД и Кина се повеќе се заострува, Трамп воведува нови царини


Вашингтон, 11 јули, 2018 - 10:15 (META) 

Соединетите Американски Држави направија нов список на увозни кинески производи во вредност од 200 милијарди долари годишно на кој од септември би можела да биде воведена царина, изјави американскиот трговски претставник Роберт Лајтхајзер.

Владата на американскиот претседател Доналд Трамп го зголеми притисокот во трговската војна против Пекинг минатата недела и воведе данок на 34 милијарди долари увоз од Кина, во име на авторски права. Кина веднаш возврати со иста мера.

Лајтхајзер изјави дека даноците ќе покријат вкупно 50 милијарди долари увоз од Кина и тоа производи кои имале од бенефит од „присилен трансфер на технологија“, пракса за која американските власти ја обвинуваат Кина.

Реципрочните мерки од Кина предизвикаа нова закани од Вашингтон.

„Како последица на кинеските реципрочни мерки и нивната неспособност да го променат односот, претседателот му наложи да се почне процес со цел воведување на царина од десет отсто на дополнителни 200 милијарди долари“, рече Лајтхајзер.


И Халили утре ќе поднесе оставка, не можел да го трпи притисокот врз Антикорупциска


Скопје, 6 март, 2018 - 16:06 (META) 

Членот на Државната комисија за спречување на корупција, Сејди Халили за порталот „Порталб“ изјави дека утре ќе поднесе оставка, бидејќи не може да го трпи притисокот од јавноста.

Тој вели дека сака да отвори пат за реализација на новите политики во борбата против корупцијата.

„До вечер сум член на Комисијата, утре планирам да поднесам оставка. Не можам повеќе да го трпам овој притисок што се прави од медиумите и од јавноста. Оставката не доаѓа само од притисокот, туку поради тоа што сакаме да отвориме пат за новите сили, луѓе и политки. Според Законот, Антикорупциската комисија се избира како колективно тело, и ако си одиме сите, ќе дојдат нови луѓе. Инаку мандатот го имаме уште една година, не верувам дека овој состав ќе функционира дотогаш“, истакна Халили.

Тој додаде дека и другите членови треба да си поднесат оставка.

„Според мое мислење, сите би требало да си дадеме оставка, да се објави конкурс или тоа да го реши новата влада. Треба да се избере нов состав, за да борат против корупција на свој начин“, додава Халили.

Денеска, оставка од Антикорупциска комисија поднесе претседателот, Игор Тантуровски, а вчера Горан Миленков.


Спасовски: Сите истраги против граѓанските организации официјално се затворени


Скопје, 1 март, 2018 - 14:46 (META) 

Сите истраги против граѓанските организации и фондации што почнаа во 2016 година, а се одвиваа и во голем дел од 2017 година се официјално затворени, соопшти министерот за внатрешни работи Оливер Спасовски, на денешната средба со претставници на дваесетината организации.

На средбата на која присуствуваа и директорот на Бирото за јавна безбедност Лазо Велковски, директорот на Управата за финансиско разузнавање Блажо Трендафилов и директорот на Управата за финансиска полиција Арафат Муареми, тој ги увери учесниците дека не се потврдени сомнежите, односно „не се обезбедени докази за субјектите кои се предмет на криминалистичката обработка“.

МВР по завршување на проверките по барањата од Основното јавно обвинителство за гонење организиран криминал и корупција, доставило известувања до обвинителството дека „сомнежите се неосновани, а врз основа на прибавените информации е констатирано дека нема основи за понатамошна истрага“.

„Врз основа на тоа, истражните органи до јавното обвинителство доставија предлог за затворање на истрагата“, известија подоцна од МВР.

На средбата било истакнато и дека во тек е истрага против тие што го иницирале политичкиот прогон преку злоупотреба на институциите на системот, но детали не се соопштуваат.

Големите контроли во организации што беа критички кон власта во 2016 и 2017 година од граѓанската јавност беа оквалификувани како огромен притисок и заплашување од тогаш владејачката ВМРО-ДПМНЕ врз критичарите на власта.

Со месеци во истрагите беа вклучени и МВР и УЈП, но беа пронајдени никакви докази за сомнително работење или направени прекршоци.


ВМРО-ДПМНЕ: Со одложувањето на рочиштето за „Поткуп“, судството го допре дното


Скопје, 27 ноември, 2017 - 17:31 (META) 

Одложувањето на рочиштето за предметот „Поткуп“ на неопределено време е уште еден доказ дека судството под притисок на СДС го допре дното, реагира опозициската ВМРО-ДПМНЕ.

Правдата и законите во оваа држава важат за сите освен за Зоран Заев и за криминалното партиско раководство околу него, велат од партијата.

– Нема кривично дело за кое судењето не можело да почне повеќе од две години. Нема обвинет кој бил соочен со докази за кривичното дело и успеал повеќе од две години да го одложува почнувањето на предметот. Целата јавност виде како во функција на градоначалник на Струмица, Зоран Заев бара поткуп од 200.000 евра по принцип „едно евро за Вицето, едно за црквата“, а судот трета година не може да створи услови за да почне да му се суди – изјави на прес-конференција Невенка Стаменковска, пратеничка во Собранието од ВМРО-ДПМНЕ.

Таа додаде дека досега беа измислувани десетици апсурдни причини за да се одолговлекува правдата.

– Судот му прогледуваше низ прсти и кога велеше дека не го признава и нема да ги почитува неговите одлуки, а го толерираше и кога одложуваше рочишта заради наводни средби со портири или други вработени по амбасади. Судиите не реагираа ниту кога им се закануваше со реизбор, а премолчуваа и кога во нивно име најавуваше процеси и притвори – рече Стаменковска.


ВМРО-ДПМНЕ: СДС му правеше притисок на Управниот суд да не дозволи прегласување


Скопје, 25 октомври, 2017 - 11:54 (META) 

СДС со притисокот врз Управниот суд и врз ДИК, за тие да одлучат во негова полза, мисли дека го прикрил поткупот на гласачи, заканите и уцените врз граѓаните, кои ги вршеа неговите активисти, велат од ВМРО-ДПМНЕ преку соопштение до јавноста.

„Завчера, поради политичкиот притисок што во изминатиот период го вршеа СЈО, СДС и медиумите блиски до нив, Управниот суд подлегна на притисокот, реши да ги заобиколи законите и да не дозволи прегласување во ниту едно избирачко место каде што ВМРО-ДПМНЕ имаше поднесено тужби за еклатантни изборни нерегуларности. Полнење на кутиите со однапред заокружени ливчиња за СДС, со методот на т.н. бугарски воз, гласачки ливчиња од Карпош најдени во Велес, најдени и во Струмица, најдени ливчиња од Врапчиште во Гостивар, гласачки ливчиња со ист сериски број во Ресен, поткуп и агитација пред избирачки места, само го потврдуваат фактот дека во Република Македонија се случи изборен фалсификат од невиден размери“, велат од партијата.

Според ВМРО-ДПМНЕ, изборниот криминал што СДСМ го направил на овие локални избори ќе биде казнет. Од опозициската партија порачуваат дека со враќање на правната држава и на демократијата, ќе има индивидуална одговорност за секој што го прекршил законот.


Полицијата расчистува два случаи на притисок поврзани со локалните избори


Штип, 24 октомври, 2017 - 15:42 (META) 

Министерството за внатрешни работи работи на два случаи со притисоци во врска со локалните избори.

Првиот случај е во Центар Жупа, каде претседателот и четири членови на општинската изборна комисија на Општина Центар Жупа пријавиле неовластено снимање. Имено, на фејсбук-профилот на Р.И. биле објавени фотографии од денот на примањето на изборниот материјал на општинската изборна комисија во Центар Жупа од избирачките одбори, како и текст со кој, според пријавата, се нарушувал угледот на општинската изборна комисија.

Полицијата од Дебар почнала постапка.

Вториот случај бил пријавен вчера во полициската станица во Штип. Штипјанка кажала дека претходниот ден по телефон ѝ се јавил Ј.С. од Штип и ѝ кажал дека таа и нејзиното семејство на вториот круг од локалните избори в недела треба да гласаат за кандидатот за градоначалник на Штип од неговата политичка партија. За овој случај бил известен и јавен обвинител.


Британската премиерка Меј под притисок за ублажување на мерките за штедење


Лондон, 2 јули, 2017 - 18:32 (META) 

Водечки британски министри вршат притисок на премиерката Тереза Меј да ги ублажи мерките за штедење и да ги укине органичувањата за платите на вработените во државните служби, пишуваат британските медиуми.

Весникот „Обсервер“ денеска пишува дека министерот за здравство, Џереми Хант, лобира да се укине ограничувањето за зголемување на платата од еден отсто за вработените во националната здравствена служба. „Телеграф“, пак, наведува дека министерот за образование, Џастин Грининг, бара од владата да се откаже од плановите за намалување на трошоците по ученик.

Заменикот на Меј, Демијан Грин, како што пренесуваат медиумите, изјавил дека владата можеби би требало да ги преиспита универзитетските стипендии, за да биде попривлечна за младите гласачи.

Притисокот врз британската премиерка се јавува по катастрофалните изборни резултати минатиот месец, на кои конзервативците предводени од Меј го изгубија апсолутното мнозинство во парламентот.

Неколку илјади граѓани вчера протестираа низ улиците на Лондон против мерките за штедење на британската влада, со оценка дека премиерката Тереза Меј го изгубила легитимитетот по парламентарните избори одржани на 8 јуни.


Италија бара од европските партнери да ги отворат своите пристаништа за мигрантите


Париз, 2 јули, 2017 - 16:01 (META) 

Италијанското министерство за внатрешни работи денеска побара од европските земји да ги отворат своите пристаништа за прием на бродови со мигранти, со што би се ублажил притисокот што го трпи Италија.

Денеска во Париз се состанаа министрите за внатрешни работи на Италија, Франција и на Германија, Марко Минити, Жерар Коломб и Томас де Мезијер, кои ќе разговараат за приливот на мигранти и за начините за помош на Италија која е соочена со овој бегалски бран.

„Италија е под голем притисок“, изјавил Минити во пресрет на состанокот, додавајќи дека Италија би можела да го блокира влезот на странски бродови со мигранти спасени во Средоземното Море.

Италија повеќепати се жалеше дека сама се соочува со мигрантската криза и ги повика европските земји да покажат поголема солидарност и да ѝ помогнат.

Во Италија, од почетокот на оваа година пристигнале 83.000 мигранти, што е за 19 отсто повеќе во споредба со истиот период од минатата година.

На состанокот во Париз ќе присуствува и еврокомесарот за миграција, Димитрис Аврамопулос.