!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

СЈО „на работна средба на повисоко ниво“ со претставници на „Македонски телеком“


Скопје, 24 април, 2017 - 15:09 (META) 

Обвинители на Специјалното јавно обвинителство денеска одржале „работна средба на повисоко ниво“ со претставници на „Македонски телеком“, во врска барањето за СЈО за претрес на компјутерските системи, а во рамките на истрагата за масовното прислушување.

„Во просториите на „Македонски телеком“ денеска е одржана работна средба на повисоко ниво со преставници на оваа компанија, за да се најде решение за предметите од интерес на ова јавно обвинителство. Очекуваме воспоставената соработка да продолжи и во претстојниот период“, стои во соопштението на СЈО.

Кривичниот суд во Скопје досега четирипати ги одби барањата на СЈО да биде издаден налог за претрес на системите во „Македонски телеком“. Поради ова, Специјалното јавно обвинителство, како што пренесоа дел од медиумите, бара начин преку претставници на компанијата, да му биде дозволен увид во системите.

Инаку, СЈО бара претрес во „Македонските телеком“ за потребите на случајот „Таргет“, чија цел е да утврди кој го вршел незаконското следење на комуникациите.


Локалните избори, СЈО и прислушувањето ги нема на агендата на Уставниот суд до 10 мај


Скопје, 22 април, 2017 - 15:01 (META) 

Уставниот суд, првата седница по велигденските празници и по Први мај ја закажа за 10 мај, а на неа, според објавената агенда, судиите ќе расправаат по само две иницијативи.

На дневен ред на седницата ги нема клучните иницијативи, за кои има најголемо интересирање во јавноста, односно оние за Законот за Специјалното јавно обвинителство, за локалните избори и за прислушувањето преку телеком-операторите.

Најсвежи од овие се двете иницијативи поднесени од Министерството за локална самоуправа и од Светскиот македонски конгрес (СМК), со кои се бара укинување на два члена од Законот за локална самоуправа и од Изборниот законик, за да се овозможи градоначалниците и советниците во општините да останат на своите функции до одржувањето на локалните избори.

Инаку, мандатите на градоначалниицте и на општинските совети истекуваат на 14 мај, бидејќи според актуелните законски решенија, нивниот мандат трае четири години, а локалните избори требаше да се одржат во првата половина на мај, т.е. или на 7 или на 14 мај. Во меѓувреме, поради блокадата на Собранието, истекоа сите рокови за распишување на локалните избори.

Според агендата, Уставните судии на 10 мај ќе ги разгледуваат иницијативите за оценка на уставноста и на законитоста на член 368-г од Законот за безбедност на сообраќајот на патиштата и на член 4 од Колективниот договор на Министерството за внатрешни работи.

Иницијативата за Законот за СЈО повеќе од една и пол година е во фиоките на Уставниот суд и досега ниту еднаш не беше ставена на дневен ред. Законот за СЈО го оспоруваат претседателот на Светскиот македонски конгрес, Тодор Петров, и Томе Тодоровски, адвокат од Свети Николе.

Онаа, пак, за оценување на уставноста и на законитоста на контроверзниот член 175 од Законот за електронски комуникации, со кој ѝ се овозможува на Управата за безбедност и контраразузнавање (УБК) да прислушува преку телеком-операторите, во март годинава беше ставена на дневен ред, но одлучувањето по неа беше одложено за некоја од наредните седници, поради, како што објаснија од судот, обемниот материјал. Инаку, иницијативата е поднесена во 2015 година, односно истата година кога СДСМ почна со објавување на разговори од незаконското следење на комуникациите, т.н. „бомби“.


Уставните судии ја одложија расправата за прислушувањето преку телеком-операторите


Скопје, 29 март, 2017 - 10:57 (META) 

Уставните судии денеска го одложија за една од наредните две седници разгледувањето на иницијативата за оценување на уставноста и на законитоста на контроверзниот член 175 од Законот за електронски комуникации.

Причина за ваквата одлука, како што беше истакнато на денешната седница, е обемниот материјал доставен во прилог на иницијативата.

Разгледувањето на оваа иницијатива требаше да биде прва точка на дневен ред на денешната седница на Уставниот суд.

Инаку, со членот 175 донесен со измените на Законот за електронски комуникации во 2014 година, на телекомуникациските оператори во земјава им се наложува „да ги обезбедат сите неопходни технички услови за да овозможат следење на комуникациите во нивните мрежи“.

Иницијативата за разгледување на уставноста и на законитоста на овој член е поднесена во 2015 година, односно истата година кога СДСМ почна со објавување на разговори од незаконското следење на комуникациите, т.н. „бомби“.

Во иницијативата, како што се гледа од објавата на Уставниот суд, оспорен е целиот член 175, односно сите 10 става од него.


ФБИ и НСА го негираат тврдењето на Трамп за прислушување


Вашингтон, 20 март, 2017 - 18:47 (META) 

Директорите на американските водечки безбедносни и разузнавачки агенции изјавија дека немаат информации што би ги потврдиле тврдењата на претседателот на САД, Доналд Трамп, дека неговиот претходник Барак Обама прислушувал пред изборите.

– Со почитување на претседателските твитови за тоа дека претходната администрација го прислушувала, јас немам информации што би ги поддржале тие твитови – изјави директорот на ФБИ, Џејмс Коми, за време на неговото сведочење во Конгресот на САД.

Според неговите зборови, ист став има и министерството за правда, кое ја надгледува работата на ФБИ и на другите агенции.

Коми додаде дека ниту еден поединец не може да нареди прислушување на некој граѓанин на Америка, туку дека дозвола за тоа даваат судовите по ригорозен процес на одлучување.

Пред Конгресот сведочеше и директорот на НСА, Мајк Роџерс, кој ги отфрли сугестиите на Трамповата администрација дека Националната безбедносна агенција барала од британските разузнавачки служби да го шпионираат претседателот на САД.


Комитетот за разузнавање на Сенатот ги отфрли тврдењата на Трамп дека бил прислушуван


Вашингтон, 16 март, 2017 - 21:49 (META) 

Не постојат никакви индиции дека кулата „Трамп“ била надгледувана и дека комуникациите биле следени од владата на САД, пред или по претседателските избори минатата година, соопштил денеска Комитетот за разузнавање на американскиот Сенат, јавува „Би-би-си“.

Во заедничка изјава, претседателот на комитетот, републиканскиот сенатор Ричард Бур, и неговиот заменик, сенаторот Марк Ворнер, ги отфрлиле тврдењата на американскиот претседател Доналд Трамп дека тој бил прислушуван.

„Врз основа на информациите кои ни се достапни, нема никакви индиции дека кулата „Трамп“ била предмет на надзор од кој било елемент на владата на САД, пред или по изборите“, било наведено во заедничката изјава на сенаторите Бур и Ворнер.

Портпаролот на Белата куќа, Шон Спајсер, како што пренесува „Би-би-си“, денеска изјавил дека Трамп останува на своите тврдења дека му биле прислушуваните телефоните во кулата „Трамп“ по наредба на неговиот претходник Барак Обама.

Спајсер, исто така, одбил да го прифати извештајот на Комитетот за разузнавање на Сенатот и изјавил дека „во него нема никакви наоди“.


ФБИ: Да се отфрлат обвинувањата на Трамп за прислушување


Вашингтон, 6 март, 2017 - 10:05 (META) 

Американското Федерално биро за истраги (ФБИ) побара од Министерството за правда да ги оспори наводите на претседателот Доналд Трамп дека неговиот претходник, Барак Обама, го прислушувал пред претседателските избори.

Трамп на „Твитер“ го обвини поранешниот претседател Обама дека го прислушувал пред претседателските избори, одржани на 8 ноември минатата година, и побара од Конгресот да истражи дали администрацијата на неговиот претходник ги „злоупотребила своите овластувања“ за време на кампањата во 2016 година, соопштено е синоќа од Белата куќа.

Директорот ФБИ, Џејмс Коми, рече дека обвинувањата се лажни и мора да се исправат, објави вчера весникот „Њујорк тајмс“.

Во изјава дадена вчера, портпаролот на Белата куќа, Шон Спајсер ги оцени како многу загрижувачки непрецизните наводи за потенцијални, политички мотивирани истраги во пресрет на изборите во 2016 година.

Спајсер рече дека „истрагата за мешањето на Русија во изборите, исто така треба да ја опфати и можната злоупотреба на позицијата на поранешниот претседател Обама“. Тој додаде дека ниту Белата куќа, ниту претседателот Трамп нема да даваат понатаму изјави на оваа тема.


Обама никогаш не наредил прислушување на Трамп, вели портпаролот на експретседателот


Вашингтон, 4 март, 2017 - 20:03 (META) 

Портпаролот на поранешниот американски претседател, Барак Обама, денеска ги негираше и ги отфрли тврдењата на претседателот Доналд Трамп дека Обама, наводно, наредил прислушување на неговите телефоните во октомври минатата година, пред претседателските избори, јавуваат светските агенции.

„Главно правило на администрацијата на Обама беше дека ниту еден службеник на Белата куќа нема да се меша во каква било истрага што ја спроведува министерството за правда“, рекол портпаролот на Обама, Кевин Луис.

Како дел од таа практика, додал Луси, ниту претседателот Обама, ниту кој било друг службеник на Белата куќа никогаш не наредил надгледување на кој било американски граѓанин.

„Кое било друго тврдење е едноставно лажно“, нагласил Луис.

Претседателот на САД, Доналд Трамп, денеска го обвини својот претходник, Барак Обама, дека го прислушувал пред претседателските избори, кои се одржаа на 8 ноември минатата година.

Трамп своите обвинувања ги изнесе во неколку пораки на својот твитер-профил, без да наведе детали или докази.


Трамп го обвини Обама дека го прислушувал пред изборите


Вашингтон, 4 март, 2017 - 15:49 (META) 

Претседателот на САД, Доналд Трамп, денеска го обвини својот претходник, Барак Обама, дека го прислушувал пред претседателските избори, кои се одржаа на 8 ноември минатата година.

Трамп обвинувањата за прислушување ги изнесе во неколку пораки на својот твитер-профил, не наведувајќи детали или докази.

„Страшно. Штотуку дознав дека Обама ме прислушувал во Кулата Трамп непосредно пред мојата победа“, напиша Трамп на „Твитер“.

Тој додава дека се работи за „макартизам“, алудирајќи на потрагата по симпатизери на комунизмот во САД во 50-тите години од минатиот век.

Трамп, во друга порака го обвинува Обама дека „отишол многу ниско“ со прислушувањето за време на изборната кампања и наведува дека „ова е нов Вотергејт“.


СДСМ: Груевски е фатен во скандалозното прислушување и одговорност мора да има


Скопје, 20 јануари, 2017 - 13:46 (META) 

Криминалното раководство на ВМРО-ДПМНЕ мора да се помири со фактот дека правдата доаѓа по своето и дека одговорност за сите злодела врз граѓаните и врз државата ќе има, се вели во реакцијата на СДСМ, на соопштението на ВМРО-ДПМНЕ дека „ќе има правда и мир кога Заев ќе одговара на суд, а Јанева нема да го спасува.“

– Никола Груевски од позиција на поранешен премиер е фатен во безобразно измислување жолти комбиња, тактички опреми, клонирани станици, странски служби, само за да се обиде да се спаси себеси и својот братучед Сашо Мијалков за скандалот со нелегалното прислушување. Затоа на Груевски и на соработниците им пречи СЈО, формирано со потпис од Груевски на Договорот од Пржино и со гласови на пратениците на ВМРО-ДПМНЕ во парламентот – се вели во реакцијата на СДСМ.


УБК одбила да ги декласифицира тајните податоци во „Тврдина 2“


Скопје, 17 јануари, 2017 - 15:17 (META) 

Управата за безбедност и контраразузнавање (УБК) одбила да ги декласифицира класифицираните информации што Специјалното јавно обвинителство ги предлага како докази во судскиот процес за случајот „Тврдина 2“.

На барањето на СЈО, кое беше задолжено од судот да побара декласифицирање на информациите, од УБК образложиле дека декласификацијата на податоците би имала последици по безбедноста на државата и дека тие се од особено значење за оперативните работи на УБК.

Обвинителката од СЈО, Ленче Ристовска, на денешното рочиште, кое беше подготвително, а не главна расправа од судскиот процес, рече дека тие се согласуваат со ставот на УБК и дека Законот за кривична постапка и Законот за класифицирани информации дозволуваат тајни податоци да бидат употребени во судската постапка со тоа што ќе биде исклучена јавноста кога ќе се презентираат доказите.

Ристовска наведе дека ЗКП во ниту еден член не предвидува одбивање на докази затоа што тие се класифицирани.

На ова реагираше адвокатот на дел од обвинетите, Никола Додевски, кој истакна дека СЈО не постапило по задолженијата од судот за декласификација на податоците и наведе дека нивната употреба во судскиот процес би била незаконска. Тој наведе дека класифицираните податоци за да бидат употребени во постапката, претходно мора да бидат декласифицирани, бидејќи во спротивно судењето би се претворило во „приватен собир на иматели на безбедносни сертификати.

Додевски рече дека СЈО требало претходно да ги декласифицира информациите, а не избрзано да поднесува обвинителен предлог.

Тој побара од судот да ги одбие доказите на СЈО, односно тие да не се користат во текот на судењето.

Судијката Лидија Петровска по четиричасовна расправа донесе одлука СЈО уште еднаш да се обрати до Министерството за внатрешни работи и до Дирекцијата за безбедност на класифицирани информации и да побара мислење дали класифицираните информации можат да се користат како докази во судската постапка.

Претходно од МВР и од УБК, СЈО не добило дециден одговор за тоа дали може да ги користи тајните податоци во судска постапка.

Следното рочиште е закажано за 13 март, во 10 часот.