!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Формирана работна група за реформи во следењето на комуникациите


Скопје, 31 октомври, 2017 - 21:17 (META) 

Владата на денешната 34. седница, донесе одлука за формирање работна група што ќе ја следи имплементацијата на планот за реализација на препораките на група високи експерти за системски прашања од владеење на правото во врска со следењето на комуникациите, од 2015 година, соопшти владината прес-служба.

Претставникот од Министерство за внатрешни работи, Силјан Аврамовски, е назначен за претседател на работната група која е составена од 29 членови, вклучувајќи претставници на министерства, на Собранието, на правосудството, на Народниот правобранител, како и повеќе претставници на научно-академската бранша.

Аврамовски бил министер за внатрешни работи во владата на Владо Бучковски и директор на УБК за време на истата влада.


На Грујовски и на Бошковски во Солун ќе им се суди за лажните пасоши


Солун, 24 октомври, 2017 - 9:44 (META) 

Во Првостепениот суд во Солун би требало денеска да почне судењето за поседување лажни пасоши против поранешниот началник на петтата управа во МВР, Горан Грујовски, и вработениот во УБК, Никола Бошкоски. По нив македонските власти имаат распишано меѓународни потерници, по обвинението од  Специјалното јавно обвинителство за нелегално прислушување и за уништување на системите за прислушување, случаи познати под името „Тврдина“, „Таргет“ и „Тврдина 2“. Беа уапсени минатата седмица на аеродромот во Солун, кога со лажни бугарски пасоши се обиделе да се качат на авион за Будимпешта.

Судењето во Солун требаше да почне во петокот, но беше одложено поради тоа што немало преведувачи, а денеска би требало да бидат обезбедени преведувачи од грчки на српски јазик.

На лажните пасоши, Грујовски и Бошковски имаа лажни идентитети, односно Христо Атанасов и Неџби Хасан.

Македонското Министерство за правда во петокот му наложило на Основен суд Скопје 1 да ја подготвува документацијата за барањето за екстрадиција на Грујовски и Бошковски.


МВР демантира дека прислушува политички партии


Скопје, 23 октомври, 2017 - 17:47 (META) 

Министерството за внатрешни работи денеска ги демантираше тврдењата на Оливер Андонов од ВМРО-ДПМНЕ дека МВР прислушува членови на раководство на некоја опозициската политичка партија.

„Тоа не е точно. МВР ги отфрла како целосна невистина наводите изнесени во јавноста од една политичка партија. Времето на злоупотреби на МВР за партиски цели заврши со промената на власта. Во Министерството за внатрешни работи следењето на комуникациите се одвива исклучиво во согласност со процедурата пропишана во постојните законски и подзаконски акти“, наведува МВР во демантот.

Од МВР истакнуваат дека во Собранието на Република Македонија постојат две надзорни комисии чија функција е вршење надзор над работата на Управата за безбедност и контраразузнавање и на Агенцијата за разузнавање и над примената на ПИ-мерките и дека комисиите во секој момент можат да извршат надзор и контрола над примената на овие мерки.


Прислушувањето се врши легално со наредби од судот, велат од МВР


Скопје, 22 октомври, 2017 - 13:14 (META) 

Следењето на комуникациите во Министерството за внатрешни работи се врши во согласност со законските процедури – со наредба од суд преку Јавното обвинителство, велат од МВР за „Нова ТВ“ во врска со обвинувањата на лидерот на ВМРО-ДПМНЕ, Никола Груевски, изнесени во интервјуто во емисијата „Седмица“ на телевизијата „Алфа“, дека стотина членови на раководството на партијата се прислушувани од МВР.

„Тоа што го прави МВР е легално и со наредба од суд преку Јавното обвинителство, а токму обвинителството е тоа што ги води истрагите. Нелегалното масовно прислушување, главната одлика на владеењето на Никола Груевски, е предмет на истрага на Специјалното јавно обвинителство. Управата за безбедност и контраразузнавање (УБК) и Бирото за јавна безбедност (БЈБ) постапуваат во согласност со своите надлежности и нивните активности во форма на оперативни акции и обработки во борбата против организираниот криминал, тероризмот, насилниот екстремизам и другите облици на противзаконско однесување, се од доверлива природа и не се коментираат јавно. Работата на овие служби е насочена кон штитење на интересите и на безбедноста на граѓаните и не се под контрола на ниту една политичка партија“, велат од МВР.

Од Министерството додаваат дека УБК во своето работење е фокусирано на лев и на десен екстремизам и радикализам, а тероризмот е посебен глобален феномен за кој и не треба посебно објаснување.

Оттаму потсетуваат дека во Собранието постојат две комисии чија функција е да вршат надзор над работата на УБК и на Агенцијата за разузнавање (АР) и над примената на посебните истражни мерки (ПИМ).

„Тие комисии се добредојдени во секој момент да извршат надзор и контрола над примената на овие мерки“, велат од МВР.

Лидерот на ВМРО-ДПМНЕ, Никола Груевски, вчера, во специјалното издание на магазинот „Седмица“ на „Алфа“, обвини дека членови на партијата се прислушувани во изминатиот период и дека во УБК е отворено досие под името „Македонски екстремизам и тероризам“.

– Такви досиеја се воделе во комунизмот и во 1990-тите против ВМРО-ДПМНЕ, како случаите „Темел“ и „Сина птица“. Така и сега, против ВМРО-ДПМНЕ се водат истраги за да се урниса партијата – рече Груевски.


Новиот закон за следење на комуникациите ќе биде готов до Нова година, вели Спасовски


Скопје, 21 октомври, 2017 - 12:33 (META) 

Укинувањето на членот 175 од Законот за електронски комуникации од страна на Уставниот суд во овој момент ќе доведе до вакуум-ситуација, во која целосно ќе биде ускратена можноста да има какво било законско следење на комуникациите што би било во рамките на заштита на уставниот поредок на Македонија и борбата против организираниот криминал и корупција, вели министерот за внатрешни работи, Оливер Спасовски во интервјуто во емисијата „360“ на „Алсат-М“.

Спасовски вели дека тоа е првата причина, а втората е што надлежните органи длабоко се навлезени во подготовката на ново законско решение во рамките на системот на следењето на комуникациите, кое, според него, треба да биде готово до крајот на оваа година.

– Тие реформи се делат во два сегменти. Едни се дел од реформите во системот на следење на комуникациите, а другите ќе бидат во системот на безбедносните служби. Ние почнавме еден национален проект кој што го нарековме „Интелигенција“. Направени се сите можни анализи и подготвени се четири модели на реформи. Ние одбравме еден од тие модели, се подготвуваат законските текстови и во овој момент се формира една меѓуресорска работна група. Ние очекуваме до крајот на годината да имаме еден законски текст, кој ќе биде анализиран од политичките субјекти, од граѓанскиот сектор, од научната и стручната јавност, за на крајот да влезе во собраниска процедура – вели министерот за внатрешни работи.

Спасовски истакна дека актуелната власт останува на ставот дека членот 175 од Законот за електронски комуникации е проблематичен во системот на следење на комуникациите и дека овозможил масовно прислушување изминативе години, но додека да се направат реформите, вели министерот, државата мора да функционира и да се справува со организираниот криминал и со корупцијата.

Прашан како граѓаните да бидат убедени дека нема злоупотреби со прислушувањето и сега, Спасовски тврди дека МВР спроведува сериозна контрола која оневозможува каква било злоупотреба на системот за следење на комуникациите.

– Денес нелегално прислушување од страна на МВР во Македонија нема. Со новиот систем можноста од злоупореби ќе биде доведена на минимално ниво – тврди Спасовски.

Владата на својата 31. седница донесе мислење со кое му предложи на Уставниот суд да донесе решение за запирање на постапката за оценување на уставноста на членот 175 од Законот за електронски телекомуникации, усвоена на 21 јуни 2017 година.

Членот 175 ѝ овозможува на Управата за безбедност и контраразунавање (УБК) директно да прислушува преку телекомуникациските оператори.

Укинување или измена на членот 175 од Законот за електронски комуникации е и една од препораките во извештаите на германскиот експерт, Рајнхард Прибе, оној од 2015 година и последниот од годинава.


Владата вели дека нема незаконско прислушување во тековниот мандат


Скопје, 12 октомври, 2017 - 12:22 (META) 

Владата му предлага, а не му налага на Уставниот суд да ја запре постапката за оценување на уставноста на членот 175 од Законот за електронски комуникации, кој ѝ овозможува на Управата за безбедност и контраразунавање (УБК) директно да прислушува преку телекомуникациските оператори, објаснува владиниот портпарол, Миле Бошњаковски.

Според него, ваквиот предлог до Уставниот суд е поради тоа што веќе се работи на систематско решение за проблемите на следењето на комуникациите, односно се изготвуваат предлог-закони што ќе ја опфатат проблематиката.

– Уставниот суд, се разбира, не мора да го послуша мислењето на Владата – вели тој.

Прашан од новинарите зошто Владата настапува со таков став кој може да остави простор и понатаму УБК незаконски да прислушува, тој вели дека незаконско прислушување нема во тековниот владин мандат, а ако сепак некој се осмели да ги злоупотреби капацитетите на управата, за тоа ќе поднесе одговорност.

Според владината служба за информирање, на новите законски решенија работат и домашни и меѓународни експерти, а во расправата за предложените измени ќе биде вклучено и граѓанското општество и други експерти, а и граѓаните.

– Постапката ќе биде спроведена крајно транспарентно, а новите предлози за законски решенија многу наскоро ќе бидат презентирани пред јавноста – вели Бошњаковски.

Образлагајќи го мислењето на Владата за членот 175, тој нагласува дека расправата во Уставен би била излишна, оти новите законски решенија предвидени со планот за реформи „3-6-9“ ќе го решат целосно проблемот, елиминирајќи можност да се прислушува без судски налог и надвор од опсегот.


Реформите во УБК биле причината Владата да бара да запре постапката за членот 175 во Уставен


Скопје, 11 октомври, 2017 - 15:01 (META) 

Владата бара Уставниот суд да ја запре постапката за оценување на уставноста на членот 175 од Законот за електронски комуникации, бидејќи веќе работи на реформите во безбедносниот систем, а оваа „иницијатива е парцијална и не ѝ приоаѓа на оваа тема сеопфатно, и пресретнува еден процес кој е веќе во одмината постапка“.

„Во врска со одлуката на Владата на Република Македонија, на Уставниот суд, на негово барање да му достави мислење за прекинување на постапката за преиспитување на уставноста на членот 175 од Законот за електронски комуникации, информираме дека Владата веќе работи на реформите на безбедносниот систем, вклучувајки ја и Управата за безбедност и контраразузнавање и на Законот за следење на комуникациите. Затоа Владата, на 31. седница на 10 октомври оваа година, донесе мислење Уставниот суд да ја запре постапката за преиспитување на уставноста на членот 175 од Законот за електронски комуникации, зашто оваа иницијатива е парцијална и не ѝ приоаѓа на оваа тема сеопфатно, и пресретнува еден процес кој е веќе во одмината постапка“, стои во соопштението на Владата во врска со барањето кое предизвикува голем интерес во јавноста.

Во соопштението се додава дека предлозите на законските решенија на работната група, направени согласно препораките на меѓународните и на домашните експерти, се во завршна фаза и наскоро ќе бидат објавени.

„Тоа е и во приоритетите на планот „3-6-9“, и тоа во овој, тековен временски интервал од планот. Во подготовката на овие промени, Владата се раководи од идејата реформата во оваа област да биде транспарентна, темелна и сеопфатна и да биде под целосна контрола на институциите“, стои во соопштението од Владата.

Оттаму нагласуваат дека ова мислење на Владата е донесено „врз основа на барањето на Уставниот суд, Владата да даде мислење за оваа иницијатива и е редовна практика во комуникацијата меѓу Владата и Уставниот суд“.

Инаку, спорниот член 175 ѝ овозможува на Управата за безбедност и контраразунавање (УБК) директно да прислушува преку телекомуникациските оператори.

Уставниот суд во јуни донесе одлука да поведе постапка за утврдување на уставноста на овој член, откако мнозинството судии на седницата изразија сомнеж дека како што е уреден Законот, преку членовите 168 и оспорениот 175, на УБК и на МВР им се овозможува произволно и неконтролирано следење на комуникациите преку телекомуникациските оператори.

Судот требаше да донесе конечна одлука на седницата на 27 септември, но одлучувањето беше одложено бидејќи судот работи во скратен состав и нема мнозинство за донесување конечна одлука.

Укинувањето или измена на членот 175 од Законот за електронски комуникации е и една од препораките во извештаите на германскиот експерт, Рајнхард Прибе, оној од 2015 година и последниот од годинава.


Владата ќе побара да не се оценува уставноста на членот 175 од Законот за телекомуникации


Скопје, 10 октомври, 2017 - 21:21 (META) 

Владата на денешната 31. седница, врз основа на заедничкото мислење на Министерство за информатичко општество и администрација подготвено во соработка со Министерството за финансии и Секретаријатот за законодавство, донесе предлог Уставниот суд да донесе решение за запирање на постапката за оценување на уставноста на членот 175 од Законот за електронски телекомуникации, усвоена на 21 јуни 2017 година.

„Согласно ова мислење, членот 175 од Законот за електронски комуникации воопшто не навлегува во постапката за следење на комуникациите, затоа што според амандманот 19 од Уставот, само врз основа на одлука на суд, под услови и во постапка утврдена со закон, може да се отстапи од правото на неповредливост на комуникациите. Оттука, според ова мислење усвоено од Владата на РМ, Законот за следење на комуникациите може да биде предмет на оценка во однос на неговата уставност, но не и членот 175 од законот одделно“, стои во соопштението од Владата.

Членот 175 ѝ овозможува на Управата за безбедност и контраразунавање (УБК) директно да прислушува преку телекомуникациските оператори.

Уставниот суд во јуни донесе одлука да поведе постапка за утврдување на уставноста овој член, откако мнозинството судии на седницата изразија сомнеж дека како што е уреден Законот, преку членовите 168 и оспорениот 175, на УБК и на МВР им се овозможува произволно и неконтролирано следење на комуникациите преку телекомуникациските оператори.

Судот требаше да донесе конечна одлука на седницата на 27 септември, но одлучувањето беше одложено бидејќи судот работи во скратен состав и нема мнозинство за донесување конечна одлука, откако на 31 јули на судијата Исмаил Дарлишта му истече деветгодишниот мандат, а на 7 октомври мандатот им истече и на судијките Наташа Габер-Дамјановска и Гзиме Старова.

Инаку, укинување или измена на членот 175 од Законот за електронски комуникации е и една од препораките во извештаите на германскиот експерт, Рајнхард Прибе, оној од 2015 година и последниот од годинава.


Владата ќе го разгледува решението на Уставен за прислушувањето преку телеком-операторите


Скопје, 10 октомври, 2017 - 10:49 (META) 

Владата на денешната 31. седница, меѓу другите точки од дневниот ред, ќе го разгледува и решението на Уставниот суд за поведување постапка за оценување на уставноста на членот 175 од Законот за електронски комуникации, донесено на седницата на судот на 21 јуни годинава.

Инаку, членот 175 ѝ овозможува на Управата за безбедност и контраразунавање (УБК) директно да прислушува преку телекомуникациските оператори.

Уставниот суд во јуни донесе одлука да поведе постапка за утврдување на уставноста овој член, откако мнозинството судии на седницата изразија сомнеж дека како што е уреден Законот, преку членовите 168 и оспорениот 175, на УБК и на МВР им се овозможува произволно и неконтролирано следење на комуникациите преку телекомуникациските оператори.

Судот требаше да донесе конечна одлука на седницата на 27 октомври, но одлучувањето беше одложено бидејќи судот работи во скратен состав и нема мнозинство за донесување конечна одлука, откако на 31 јули на судијата Исмаил Дарлишта му истече деветгодишниот мандат, а на 7 октомври мандатот им истече и на судијките Наташа Габер-Дамјановска и Гзиме Старова.

Инаку, укинување или измена на членот 175 од Законот за електронски комуникации е и една од препораките во извештаите на германскиот експерт, Рајнхард Прибе, оној од 2015 година и последниот од годинава.

На дневен ред на денешната седница Владата ќе ја разгледува и потребата од потпишување анекс за изградба на нова автопатска делница Демир Капија – Смоквица, како дел од Паневропскиот коридор 10, како и анекс кон договорот за надзор на изведбата на овој автопат.

На седницата ќе бидат донесени заклучоци во врска со информацијата за степенот на имплементација на реформските мерки во областа на енергетиката, а Министерството за образование ќа ја презентира предлог-програмата за изградба и за реконструкција на средни училишта за 2017 година. На деневен ред ќе биде и предлог-одлуката за прогласување на Спомен-куќата на Лазар Личеновски во Скопје за културно наследство од особено значење.


Аселборн: Јас не сум Орбан, јас поддржувам нормално функционирање на државата


Скопје, 4 октомври, 2017 - 12:07 (META) 

Не можам да кажам кога ќе бидат почнати преговорите за членство на Македонија во Европската Унија, бидејќи ЕУ е покомплексна и од Балканот, изјави министерот за надворешни работи на Луксембург, Жан Аселборн, по денешната средба со неговиот македонски колега, Никола Димитров, во македонското Министерство за надворешни работи.

Аселборн појасни дека Европската комисија може да предложи почеток на преговори со Македонија, но за тоа да се оствари, Советот на ЕУ мора едногласно да ја донесе одлуката.

– Во 2005 година бев сигурен дека во 2015 година ќе ги видиме Македонија и сите земји од регионот во ЕУ. Но, грешката не е само на Брисел, туку и на земјите што ги немаат исполнето копенхагенските критериуми – рече Аселборн.

Шефот на луксембуршката дипломатија рече дека доколку се исполнат сите услови, преговорите би можеле да почнат две-три недели по нивното исполнување. Тој изрази надеж дека новата влада и Грција со помош на посредникот Нимиц ќе најдат решение за спорот за името.

На прашањето за поделеноста во ЕУ во однос на поддршката на Никола Груевски, Аселборн рече дека тој не е Виктор Орбан, иако и двајцата се функционери од земји – членки на Европската Унија.

– Јас не се викам Орбан, туку Жан Аселборн, и има разлика. Јас ги поддржувам тие што сакаат да создадат услови за нормално функционирање на државата, исто како и повеќето политичари од ЕУ, кои сакаат да донесат стабилност на Балканот – рече Аселборн, истакнувајќи дека клучно е функционирањето на правото.

Шефот на македонската дипломатија, Никола Димитров, истакна дека посетата на Аселборн доаѓа во важен момент и за Македонија и за регионот.

Прашан за спорот за името дали има конкретни насоки како ќе се решава, Димитров изјави дека засега не се знае како конкретно ќе изгледаат процесот и решението и повторно изрази надеж дека Атина ќе го препознае моментот и дека е добро и за Грција да има демократски сосед.

Во однос на изјавата на заменик-помошникот државен секретар на САД, Хојт Ји, дека за евроатлантската интеграција клучно е да има одговорност за прислушувањето, Димитров рече дека извршната власт не е таа што може да одреди одговорност.

– Кризата завршува со одговорност, но извршната власт не е таа која ја одредува. Извршната власт и Собранието можат да создадат услови за судството, но не можат да донесат пресуда, бидејќи против тоа се боревме – рече Димитров, истакнувајќи дека се работи на изработка на нов модел кој ќе спречи повторно злоупотребување на техниката за прислушување.