Познати имињата на членовите на групата за реформи во УБК


Скопје, 19 октомври, 2018 - 10:21 (META) 

Министерството за внатрешни работи формиралo работна група за реформите во Управата за безбедност и контраразузнавање, чија цел е да создаде професионални, департизирани, транспарентни агенти кои ќе ги штитат граѓаните и државата. Групата се состои од 32 лица, а во неа се вклучени претставници од државни институции и невладини организации, пишува „Порталб.мк“.

Дел од работната група за спроведување реформи во УБК се и Народниот правобранител, Иџет Мемети; претставникот на Оперативно – техничката агенција (ОТА), Зоран Ангеловски, професор на Правниот факултет „Јустинијан Први“ – Скопје; Гордан Калајџиев од Хелсиншкиот комитет за човекови права во Република Македонија; претставничката на НВО „Аналитика“, Магдалена Лембовска; како и Александар Стојановски од „Еуротинк“.

Од пратениците, ќе учествуваат тројца – Емилија Александрова од  собраниската Комисија за надзор над работењето на Управата за безбедност и контраразузнавање и Агенцијата за разузнавање, Фросина Ташевска – Ременски од собраниската Комисија за одбрана и безбедност, како и Зоран Илиоски од Комисијата за надзор на спроведувањето на посебната истражна мерка за прислушување на комуникациите од страна на МВР, Управата за финансиска полиција, Царинската Управа и Министерството за одбрана.

Од Министерството за внатрешни работи (МВР) ќе бидат вклучени 12 членови:  Силјан Аврамовски, Славјанка Петровска, Сашо Тасевски, Ариф Асани, Даниела Јаковлевски – Ѓоршоска, Сашо Трајковски, Нухи Незири, Весна Доревска, Снежана Петровиќ – Арсовска, Светлана Влаховиќ – Димановска, Тони Станковски и Виолета Влаховиќ.

Претставник на Министерството за одбрана во Работната група за реформите во Управата за безбедност и контраразузнавање е Горан Василевски, а од Министерството за финансии тројца: Благоја Крстевски од Царинската управа, Блажо Трендафилов од Управата за финансиско разузнавање и Јане Шилев од Управата за финансиска полиција.

По еден член имаат Врховниот суд на Република Македонија – Рахилка Стојковска, од Основното јавно обвинителство – Влатко Георгиевски, од Јавното обвинителство за гонење на организиран криминал и корупција – Вилма Рускоска, од Специјалното јавно обвинителство – Атанас Гинев, од Агенцијата за разузнавање – Зоран Иванов, од Управата за безбедност на класифицирани информации – Стојан Славески, од Управата за заштита на лични податоци – Валентин Ветаџокоски и Игор Кузевски, пренесува Порталб.мк.

Овие 32 членови на работната група за спроведување на реформи во УБК имаат обврска најдоцна до 15 ноември до Владата да го достават предлогот на моделот за реформи во системот за безбедност и разузнавање и планот за развој.

„Цел на оваа работна група е преку еден широк процес на консултации да и го предложи на Владата најдобриот и најсоодветниот модел за реформи“, велат од МВР.

Инаку, поради скандалот со незаконските прислушувања, што предизвика политичка криза, во текот на месец октомври до 15 ноември 2018 година, во Македонија ќе се одвива консултативниот процес за избирање на новиот функционален и реформаторски модел на УБК. Оттука, прислушувањето нема да биде под надлежност на УБК, туку истото ќе биде раководено од Оперативно – техничката агенција (ОТА).

Трите модели за кои се дискутира се дел од анализите на проектот ,,Консолидација на безбедносниот систем“, под покровителство на DCAF ( Женевски центар за демократска контрола на вооружените сили).

Целта на оваа Меѓуресорска работна група е преку широк консултативен процес на Владата да и предложи кој е најсоодветниот модел за реформа.

Засега, во опција се три модели:

1. Да остане досегашниот модел, со кој УБК ќе биде дел на МВР.
2. УБК да се одвои од МВР и да биде независен орган и инститиција.
3. Да се поврзе УБК со Агенција за разузнавање и да се формира посебен орган на државната амдинистрација.


Формирањето на ОТА се уште е финансиска енигма


Скопје, 7 септември, 2018 - 15:12 (META) 

Надлежните институции си ја префрлаат топката за одговорот на прашањето, колку ќе чини формирањето на Оперативно-техничката агенција (ОТА), новото тело кое ќе раководи со опремата за прислушување во земјава.

Собранието денеска го изгласа Зоран Ангеловски за директор на ОТА, но се чини дека никој не знае колку пари од буџетот се предвидени за имплементацијата на новиот Закон за ОТА или пак сè уште се калкулира по ова прашање.

Наместо детални податоци околу фискалните импликации во законот се вели дека финансиските средства потребни за спроведување на Законот за Оперативно-техничка агенција ќе се обезбедат од буџетот.

На прашањето до Министерството за финансии, кое е надлежно за државниот буџет колку пари во буџетот се предвидени за формирање на ОТА, оттаму упатија одговорот да се бара во Министерството за внатрешни работи.

Од МВР, пак, советуваа одговорот да се бара во Собранието, од каде што упатија на надлежната собраниска Комисија за одбрана и безбедност. Оттаму не ни одговорија на прашањето поставено на официјална мејл-адреса.

ОТА треба да започне со работа од ноември, а формирањето на оваа Агенција беше една од клучните препораки на експертската група на Прибе, со што се бараше да се спречи злоупотребата со прислушувањето.


Зоран Ангеловски едногласно предложен за директор на ОТА


Скопје, 4 септември, 2018 - 16:32 (META) 

Собраниската Комисија за избори и именување го избра поранешниот разузнавач Зоран Ангеловски за директор на Оперативно техничката агенција (ОТА) во која треба да се пресели опремата за следење на комуникациите, која досега беше во Петтата управа во Управата за безбедност и контраразузнавање (УБК).

По изборот во Комисијата, следува гласање на пленарна седница во Собранието.

Законот за ОТА (Оперативно техничка агенција) беше донесен на 12 април и е дел од реформските закони од планот „3-6-9“. ОТА треба да почне со работа во ноември годинава и со нејзината работа треба да се гарантира дека нема да има незаконско прислушување.


Ристовска: Мијалков бил организатор на прислушувањето, имаме и докази и сведоци


Скопје, 31 август, 2018 - 13:49 (META) 

Сашо Мијалков, тогашен директор на Управата за безбедност и разузнавање (УБК) во МВР, е креатор на идејата за масовно прислушување, воден од политички и бизнис интереси. СЈО за да ја докаже неговата вина, има обезбедено многу докази, но и сведоци, кои помогнаа во обелоденувањето на аферата и расветлувањето на мотивите, порача специјалната обвинителка Ленче Ристовска на денешното рочиште за случајот „Таргет – Тврдина“.

– Ќе докажеме дека Сашо Мијалков, Горан Грујевски и Надица Николиќ, раководени од желбата за сеопфатна контрола на протекот на информациите, за да стекнат предност во политичка и бизнис сфера, формирале злосторничко здружување, кое преку континуирана злоупотреба на системите за следење на комуикациите, во УБК, вршеле масовно незаконско прислушување – рече Ристовска.

Во тој круг, според обвинителката, се вклучиле и обвинетите Владимир Варелов, Васил Исаковски, Маријан Шумуликовски и сведоците, Маријан Јанкуловски и Звонко Костовски. Тие биле под директна контрола на Мијалков, кој и самиот прислушувал, рече Ристовска

– Обвинетиот Мијалков како директор на УБК бил организатор на групата и ги држел под контрола и надзор сите учесници, а воедно и самиот незаконски ги следел комуникациите на дел од граѓаните, а имал и преглед на сите броеви кои биле следени. Грујевски како негов најблизок соработник ги проследил барањата и намерите на Мијалков до Николиќ, која ги распоредувала улогите на другите учесници. Таа давала и задачи кои телефонски вроеви треба да бидат таргетирани и транскрибирани – објасни специјалната обвинителка.

Инаку, беше одбиено барањето на обвинтите Сашо Мијалков и  Валентина Симоновска да не им се суди за делото за кое се товарат. Тоа го побараа адвокатите на обвинетите кои се повикаа на амнестијата што претседателот на државата, Ѓорге Иванов, во 2015 ја издејствува за педесетина лица, тогаш под лупа на СЈО во врска со аферата.

Судијката Џанета Беговиќ, пак, образложи дека барањето е одбиено бидејќи при оцена на обвинителниот акт веќе било одлучено за оваа околност, односно дека обвинетите не се амнестирани.


Лазаревски и Костовски номинирани за наградата на ЕП за свиркачи на годината


Скопје, 21 мај, 2018 - 10:56 (META) 

Во Европскиот парламент во Стразбур на 29 мај ќе бидат соопштени имињата на добитниците на наградата „Новинари, укажување и бранители на правото на информирање“, која годинава се доделува во чест Дафне Каруана Галиција, малтешката новинарка, која беше убиена со бомба поставена во нејзиниот автомобил во октомври лани.

Меѓу номинираните се и Ѓорѓи Лазаревски и Звонко Костовски,  вработените во МВР кои го открија скандалот со масовното прислушување и придонесоа за промена на власта во Македонија.

Номинирани се и Јан Куцијак, словачки истражувачки новинар, кој истражуваше даночни измами меѓу бизнисмени и словачки политичари, потоа Џулијан Асанж, основачот на „Викиликс“, Марија Ефимова, укажувач, која откри корупција поврзана со малтешките политичари и Рафаел Халет, укажувачот за даночна евазвија во Луксембург, поврзан со „Луксембург Ликс“.


Прајваси интернешенел: Недоволен е надзорот врз тајните светски разузнавачки мрежи


Скопје, 25 април, 2018 - 17:21 (META) 

Во својот нов извештај, меѓународната мрежа составена од 40 невладини организации „Прајваси интернешенел“ алармира за загрижувачки број пропусти во инструментите за надзор што треба да го контролираат разменувањето податоци и информации помеѓу државните разузнавачки служби и нарушувањето на приватноста.

Истрагата што ја спровеле организации, преточена во извештајот „Тајните глобални мрежи за надгледување: Споделување на разузнавачки информации помеѓу владите и потребата од заштита“ посочува дека во време кога се врши масовно надгледување и владите се повеќе собираат огромни количества на дигитални информации за многу луѓе, не може повеќе да се користат само инструментите за надзор предвидени за времето кога постоело само прислушување телефони.

Според извештајот, најголемиот број земји во светот немаат законодавство што би го регулирало споделувањето разузнавачки информации. Во други земји пак станува збор за недоволно јасно дефинирани законски обврски.

Сето тоа е огромна закана за човековите права, се вели во извештајот.


Ако не се екстрадираат Грујевски и Бошкоски, одвоено ќе им се суди на Мијaлков и Јанкулоска


Скопјњ, 27 март, 2018 - 11:44 (META) 

Доколку до 15 мај обвинетите Горан Грујевски и Никола Бошкоски во предметот на СЈО „Тврдина – Таргет“ за масовното прислушување не бидат екстрадирани од Грција, Основниот суд Скопје 1 ќе одлучува за раздвојување на постапката по однос на овие двајца обвинети. Судското рочиште денеска беше одложено за 15 мај бидејќи обвинетите Грујевски, екс-началник на Петтата управа во МВР, и Бошкоски, вработен во УБК, сè уште не се екстрадирани.

Судијката Џенета Бектовиќ го праша адвокатот Петар Василев, кој е дел од одбраната на обвинетите, дали има информации до каде е судската постапката во Грција и дали може да каже кога ќе бидат екстрадирани.

– Не би сакал да шпекулирам со датуми. Но, очекувам дека во брзо време ќе биде завршена постапката. На 26 април е закажано рочиште во Врховниот суд на Грција по однос на нашата жалба за екстрадиција – рече Василев.

Судијката Бектовиќ му кажа на Василев во рок од 15 дена да обезбеди полномошно дека ги застапува обвинетите Грујевски и Бошкоски, во спротивно судот ќе им одреди адвокат по службена должност. На рочиштето денеска беа присутни другите обвинетите: поранешниот директор на УБК Сашо Мијалков, бившата министерка за внатрешни работи Гордана Јанкулоска и поранешниот шеф на кабинетот на Мијалков, Тони Јакимовски.

По бегството од Македонија, Грујевски и Бошкоски беа фатени со фалсификувани бугарски пасоши на аеродромот во Солун на 18 октомври при обид да заминат за Унгарија. Апелацискиот суд во Солун го прифати барањето на македонските власти за нивна екстрадиција, по што двајцата поднесоа жалба до Врховниот суд во Атина.


Спасовски: Владата ќе го прифати секој предлог што ќе го подобри законот за ОТА


Охрид, 3 февруари, 2018 - 16:20 (META) 

Министерот за внатрешни работи, Оливер Спасовски изјави дека Владата ќе го прифати секој предлог што ќе придонесе во подобрување на законите за новата Оперативно-техничка агенција (ОТА) и за следење на комуникациите, како дел од реформскиот процес во безбедносните служби и системот за следење на комуникациите.

– Ние сме подготвени на амандмани по предложеното решение, тоа е демократија за која сите се боревме. Како МВР со внимание ќе пристапиме кон секој од нив и доколку не претставува нарушување на предвидениот концепт за јакнење на реформскиот процес, секој таков амандман може да биде дел од законските решенија – одговори Спасовски на новинарско прашање, по денешното потпишување на протокол за соработка со министерството за внатрешни работи на Албанија.

Тој потенцираше дека постоењето добра волја, само може да придонесе за добар текст на законот, во интерес на граѓаните и општеството.

– Кога постои добра волја, нема скриени намери, кога сакате да градите систем што ќе биде во интерес на граѓаните, ништо не е невозможно. За се може да се дебатира, се што е добро да се прифати, но за тоа се потребни искрени и чесни намери, што е принцип за кој се залага оваа власт- додаде тој.


Собранието ги усвои во прво читање законите за ОТА и за следење на комуникациите


Скопје, 18 јануари, 2018 - 18:29 (META) 

Собранието попладнево ги усвои во прво читање законите за новата Оперативно-техничка агенција (ОТА) и за следење на комуникациите, како дел од реформскиот процес во безбедносните служби и системот за следење на комуникациите.

Пратениците со 64 гласа „за“ ги усвоија предложените закони, по што претседателот на Собранието, Талат Џафери ги даде на натамошна работа во надлежните собраниски комисии.

Со новите закони, следењето на комуникациите ќе се врши преку новата независна институција ОТА, а не како што беше досега, преку Управата за безбедност и контраразузнавање. ОТА ќе го активира сигналот и „ќе им овозможува на органите овластени за следење на комуникациите пристап до податоците од комуникациско-информациските системи на операторите“. Агенцијата нема да може да прибира податоци и да прислушува, туку само ќе го активира сигналот до УБК, Министерството за одбрана, МВР, Јавното обвинителство, Царинската управа, Финансиската полиција.

Министерот за внатрешни работи Оливер Спасовски нагласи дека како Влада се решени да се направат сериозни и ефикасни реформи кои ќе придонесат за зајакната контрола на системот на следење на комуникациите.

– Целта е да создадеме систем со кој ќе ја намалиме моќта на поединци и институции и ќе се јакне системот на контрола на следење на комуникациите – рече Спасовски.

На седницата беа усвои и дадени во натамошна процедура и измените на Законот за полиција, со кој се предвидуваат ограничување на мерките на присилба што може да ги употребат припадниците на полицијата, како и уште еден предлог-закон за полицијата и предлог-законот за изменување и дополнување на Законот за внатрешни работи, кои предвидуваат надворешни механизми за контрола на работата на полицијата.

Пратениците на ВМРО-ДПМНЕ не присуствуваа на седницата.


Прекинувачите нема да бидат во телекомите затоа што се странски компании


Скопје, 27 декември, 2017 - 15:50 (META) 

Законот за формирање на новата Оперативно-техничка агенција (ОТА) и новиот закон за следење на комуникациите кои вчера беа утврдени на владина седница се очекува по новогодишните празници да влезат во собраниска процедура за нивно донесување, брифираат од Министерството за внатрешни работи.

Двата системски закони се изготвени во рамките на реформскиот процес и препораките на експертската група на Европската Унија предводена од Рајнхард Прибе чија главна цел е да обезбедат поголема контрола врз работата на безбедносните служби и системот за следење на комуникациите и спречување на нивна злоупотреба.

Во работните групи за изготвување на законските решенија, како што брифираат од МВР, учествувала и опозицијата, а предлог-текстовите биле доставени до сите пратенички групи – од мнозинството и опозицијата во Собранието од каде немало никакви забелешки за предлог-законите.

ОТА ќе биде новата институција која ќе биде медијатор меѓу операторите и службите надлежни за следење на комуникациите (УБК, БЈБ, Јавното обвинителство, Царинската управа, Финансиската полиција и Министерството за одбрана односно военото разузнавање). ВО ОТА ќе бидат префрлени медијациските уреди за отсликување на сигналот од операторите кои досега беа во УБК. Таа ќе го активира сигналот и ќе им овозможува на органите овластени за следење на комуникациите пристап до податоците од комуникациско-информациските системи на операторите, но самата нема да може да го слуша разговорот кој се следи.

Решението медијациските уреди да бидат во посебна агенција, а не во самите телекомуникациски оператори, што беше предлог на Прибе, како што брифираат од МВР, било избрано поради тоа што операторите во земјава се со странски капитал и требало да се избегне опасноста податоците да се одлеваат на друга страна. Ова им било образложено и на експертите на Европската Унија.

Директорот на ОТА ќе го избира Собранието со двотретинско мнозинство и ќе има мандат од пет години без право на повторен избор. Според информациите од МВР, министерот за внатрешни работи Оливер Спасовски на вчерашната седница на Влада се согласил агенцијата да има и заменик-директор, кој како и директорот треба да биде експерт во областа, а не политички кадар.

Бројот на вработени, каде ќе биде сместена новата агениција и колкава ќе биде нејзиниот буџет засега не е утвредено. Тоа ќе биде познато откако ќе биде донесен законот и ќе бидат донесени подзаконските акти и систематизацијата, врз основа на претходна анализа.

Според предлог-законот ОТА е предвидено да почне да работи од 1 ноември 2018 година, а дотогаш следењето на комуникациите ќе се врши според актуелните законски решенија.

Кој дотогаш ќе гарантира дека во меѓувреме нема злоупотреба на системите за следење на комуникациите од МВР брифираат дека од 1 јуни годинава, по изборот на новата Влада и доаѓањето на новото раковдство во Министерството била формирана комисија и назначен безбедносен офицер чија единствена задача е да ги анализираат сите наредби за следење на комуникациите – превентивни и репресивни и да изготвуваат извештаи.