Доцнат реформите во безбедносните служби, велат експертите


Скопје, 24 јануари, 2019 - 20:29 (META) 

Реформите во безбедносните служби во Македонија доцнат, потребно е ревидирање на постојните и нови закони кои го дефинираат објективниот надзор над работата на ОТА, формирањето на Граѓанскиот совет и комплетирање со експерти на собраниската комисија за спроведување на надзор врз ОТА. Овие критики денес беа упатени во работната средба на експертите на Европската Унија, Маурицио Варенезе и Клое Лаурен со членовите на Собраниската комисија за надзор за примена на посебната истражна мерка и следење на комуникациите, пренесува Порталб.мк.

Претседателот на собраниската комисија, Емил Димитриев, по состанокот изјави дека заеднички заклучок на експертите на ЕУ и пратениците бил дека Македонија доцни во реализацијата на реформите во безбедносните служби.

Според него, проблемот е во двата закони кои сега веќе се во завршна фаза на подготовка, како и во самиот Закон за следење на комуникации.

– Донесувањето на тие закони значително ќе влијае на намалувањето на квалитетот на контролата на службите. Нелогично е ние од една страна да градиме квалитетна контрола, а од другата страна да носиме закони со кои таквата контрола се уништува  – рече Димитриев.

Во Граѓанскиот совет се избрани само половина од членовите.

Поентата на експертите е ставена во доцнењето со формирањето на Граѓанскиот совет што треба да врши надзор на работата на ОТА. Во понеделникот (21.01.19) во Комисијата за избори и именувања, се избраа 3 членови и претседателот на Советот за граѓански надзор Маргарита Цаца Николовска, а за членови, Ице Илјевски, Гордан Калајџиев и Филип Стојановски.

За другите членови коккурсот ќе се објави повторно.

Се очекува двајца членови да бидат предложени од ДУИ, со цел да се исполни и условот за правична застапеност на етничките заедници, а еден ќе биде предложен од страна на ВМРО-ДПМНЕ. На првиот конкурс се бараа 7 членови а пријавени беа само 8, од кои еден не ги исполнуваше условите. На овој начин, членовите на Комисијата за избори и именувања немаа опции за избор.

На средбата, како што извести во продолжение Димитриев, е побарано и ангажирање на експерти кои ќе бидат дел од собраниската Комисија за вршење надзор над ОТА.

Бидејќи пратениците немаат знаење да го вршат надзорот, Комисијата има потреба за двајца експерти. Тие треба да се од областа на дигиталното вештачење, за обработка на податоци, телекомуникации и од правото. Меѓутоа се прават обиди да се подготви листа на стручњаци кои би можеле да се ангажираат ад хок (ad hoc) според потребите.

– Во текот на ноември и во писмена форма се обратив до претседателот Џафери, за тоа дека Собранието мора да помогне во делот на обезбедување на стручњаци, бидејќи Комисијата нема ресурси да го направи тоа. Досега немам одговор – рече Димитриев.


„Свиркачите“ Лазаревски и Костовски се враќаат во МВР


Скопје, 20 декември, 2018 - 11:50 (META) 

Ѓорѓи Лазаревски и Звонко Костовски, „свиркачите“ што ја обелоденија аферата со прислушувањето на претходниот режим, од денеска повторно се враќаат на своите работни позиции во МВР.

Ова на својот Фејсбук профил го објави министерот за внатрешни работи Оливер Спасовски, каде објави и фотографија од средбата.

Лазаревски е сведок во предметот на СЈО за прислушувањето „Таргет – Тврдина“. Тој и во сведочењата, но и претходно,  откри детали за тоа колку време му било потребно да открие што се случува зад ѕидовите на УБК, со какви закани се соочувал и кој се бил прислушкуван од блиското опкружување на обвинетите за аферата.

Заедно со Костовски ја открија аферата за најмасовно прислушување во Македонија.

Лазаревски 11 месеци беше во притвор.


СДСМ: Мицкоски ја потврдува поврзаноста на ВМРО-ДПМНЕ со насилството од 27 април


Скопје, 10 декември, 2018 - 10:36 (META) 

За владејачката СДСМ е неприфатливо барање на Христијан Мицкоски да се формира независно тело кое ќе ги преслуша снимките на судиите и обвинителите во изминатите две години.

„Мицкоски ги потврдува сведоштвата за сериозна поврзаност на насилниците со ВМРО-ДПМНЕ во организацијата и координацијата на насилството од 27 април. Преку нелогични, несериозни и неосновани барања, интерпелации, измислици, Мицкоски се обидува да ги закочи реформите, да ги блокира процесите за интеграција на Македонија во НАТО и ЕУ. Не му беа доволни 11 години прислушување на Мицкоски па бара нови снимки да преслушувале „експертите“ од ВМРО-ДПМНЕ, одговори вчера СДСМ.

Мицкоски своите вкупно шест барања ги упати вчера од Кочани, каде ВМРО-ДПМНЕ одржа протест.

„Веднаш да се формира независно тело предводено човек предложен од опозицијата, коешто ќе ги преслуша, анализира, систематизира сите материјали коишто се собрани  изминативе две години како резултат на црниот Вотергејт на Заев, односно прислушувањето на сите судии и обвинители. Да ги видиме нарачаните пресуди  за поткуп, да ја видиме нарачаната пресуда за „Глобал“ , да видиме како нарачувате обвиненија за луѓето од 27 Април, да видиме како нарачувате обвиненија за ВМРО-ДПМНЕ, побара претседателот на ВМРО-ДПМНЕ од Кочани.

Тој рече дека после секој протест ќе има нови барања и побара оставки од министрите Спасовски и Димитров.

– Итна и неотповиклива оставка на министерот којшто својата нација ја нарече искомплексирана нација. Министерот кој благодарение на ова нација која го полни буџетот зема плата, ужива во привилегиите да се школува неговото семејство надвор од Република Македонија со стипендиите кој овој народ ги обезбедил. Итна и неотповиклива оставка на министерот за терор и прогон т.е. полиција, Оливер Спасовски затоа што откако е министер само порази шпиунски акции, претреси и омаловажувања на нашите браќа и сестри, граѓани на Република Македонија – рече Мицкоски.

Тој побара веднаш да сопре иницијативата од Владата за покачување на даноците „и да престане осиромашувањето на бизнисот и на граѓаните.“ Побара и соодветни мерки за решавање на проблемот со загадувањето на воздухот.

– Ги лажевте граѓаните испентарени на падините на преубавото Водно и велевте само да падне режимот и ќе започне да дува алпски воздух. Овде во Кочани им велевте на луѓето најзагаден град сте, многу скара вртите па затоа ви е загаден градот – рече Мицкоски, кој исто така побара „почитувања на јасно изразената волја на народот на референдум“.


Владата бара да биде утврдена одговорноста за двегодишното прислушување на ОЈО


Скопје, 30 ноември, 2018 - 15:50 (META) 

Владата остро го осудува случајот со снимените телефонски разговори во Основното јавно обвинителство. Сметаме дека ваквите појави се рецидив од минатото и пракса на минатите владејачки недемократски структури, порача владиниот портпарол Миле Бошњаковски, реагирајќи по денешната информација од Јавното обвинителство дека во објектот во кој се наоѓа главното обвинителство и други обвинителства, е пронајдена опрема со која се прислушувало од крајот на септември 2016 година до вчера.

– Владата очекува дека институциите ќе посветат максимални капацитети во истрагата, дека ќе се расчисти настанот и дека јавноста ќе биде веднаш и целосно информирана. Тоа што можеме во моментов да го кажеме е дека Министерството за внатрешни работи целосно е вклучено во предистражната постапка. Одговорноста мора да биде идентификувана, утврдена и целиот случај да има ефикасна судска разрешница – рече Бошњаковски.


Јовески: Биле прислушувани фиксните телефони на Обвинителството


Скопје, 30 ноември, 2018 - 13:40 (META) 

Јавното обвинителство отворило предистражна постапка за сторителот на незаконско прислушување на фиксните телефоните во Обвинителство од 30 септември 2016 година до вчера.

Телефонските разговори биле снимени на два хард диска соопшти на брифинг со новинарите Јавниот обвинител Љубомир Јовески.

Ќе се прави вештачење за да се утврди кој снимал, со која цел и дали прислушуваните разговори биле изнесувани надвор и дали е нешто бришено во нив.

Телефонската централа била набавена преку тендер и била сместена во посебна просторија во Јавното обвинителство. Централата за фиксна телефонија била инсталирана во 2013 година.

Јовески, во интерес на истрагата, не сакаше да открие повеќе детали за овој случај.


Најголем дел од буџетските пари за ОТА ќе се потрошат за плати и надоместоци


Скопје, 2 ноември, 2018 - 11:00 (META) 

Од почетокот на месецов и официјално почна со работа Оперативно-техничката агенција (ОТА), која ќе функционира како самостоен независен државен орган и ќе го надгледува следењето на комуникациите од страна на надлежните државни органи односно ќе обезбедува техничка поврзаност помеѓу операторите и овластените органи, без можности за активирање или спроведување на снимањето на следените комуникации.

Со ребалансот на буџетот, кој е во собраниска процедура за новата агенција се одвоени 3,26 милиони денари (околу 53.000 евра).

Од оваа сума, за плати и надоместоци се предвидени 2,2 милиони денари (35.700 евра), а останатата сума од околу милион денари (17.000 евра) се предвидени за набавка на стоки и услуги односно за патни и дневни расходи, комунални услуги, греење, комуникација и транспорт, материјали и ситен инвентар, поправки и тековно одржување, договорни услуги и други тековни расходи.


Директорот на ОТА: „Бомбите“ никогаш нема да се повторат


Скопје, 1 ноември, 2018 - 14:44 (META) 

Директорот на новата Оперативна техничка агенција (ОТА) Зоран Ангеловски, соопшти дека Агенцијата, која ја презема опремата за прислушување од УБК и која ќе ја има контролата врз следењето на комуникациите, денеска официјално почнува со работа во полн капацитет.

На заедничката прес-конференција во Владата со министерот за внатрешни работи Оливер Спасовски, Ангеловски рече дека контролата врз работата на ОТА ќе биде повеќестепена, од собраниска комисија, од граѓански организации и експерти, со една цел – да не се дозволи никогаш повеќе да се врши незаконско прислушување.

– Ве уверувам дека „бомбите“ никогаш веќе нема да ни се повторат – изјави Ангеловски на прес конференцијата, додавајќи дека во Македонија сега нема незаконско прислушување.

Тој објасни дека ОТА е професионална агенција и целосно независно тело. Сега располага со технички кадар преземени од  МВР односно четири лица од Бирото за јавна безбедност и тројца од Управата за безбедност и контраразузнавање.  Најави дека останатите вработени ќе се изберат преку конкурс. За досега вработените, Ангеловски рече  дека поминале низ проверки дека не биле дел од аферата со прислушувањето, за што било консултирано и СЈО.


Директорот на ОТА на средба со собраниската комисија за надзор на прислушувањето


Скопје, 29 октомври, 2018 - 9:55 (META) 

Директорот на новоформираната Оперативно-техничка агенција (ОТА), Зоран Ангеловски, денеска ќе има средба со членовите на собраниската Комисија за надзор над спроведување на посебната истражна мерка следење на комуникациите од страна на Министерството за внатрешни работи, Управата за финансиска полиција, Царинската управа и Министерството за одбрана.

Средбата се случува пред најавеното почнување со работа на ОТА, на 1 ноември, како што е предвидено со Законот за формирање на оваа агенција, која треба да биде медијатор во процесот на прислушувањето.

ОТА треба да биде независна во делот на техничката улога во следењето. Со формирање на новата агенција, наредбата за прислушување од обвинителството ќе оди до ОТА. Нејзината улога ќе биде само техничка, по добивањето на наредбата таа ја вклучува мерката, што подразбира дека го пренасочува сигналот кон корисникот односно барателот на услугите. Вработените во ОТА нема да можат да собират податоци, да слушаат, само можат да го вклучат сигналот. Корисникот, односно барателот може само да слуша, да собира податоци, нема да може да приклучува.

Целта на оваа реформа, која произлезе од забелешките на Прибе, е да се воспостави реална контролна моќ врз прислушувањето.

На почетокот на минатиот месец Зоран Ангеловски во Собранието беше избран за прв човек на ОТА со 83 гласа „за“. Ангеловски беше избран без расправа, бидејќи политичките партии во Собранието постигнаа консензус тој да биде избран меѓу 14 кандидати за оваа функција.


Познати имињата на членовите на групата за реформи во УБК


Скопје, 19 октомври, 2018 - 10:21 (META) 

Министерството за внатрешни работи формиралo работна група за реформите во Управата за безбедност и контраразузнавање, чија цел е да создаде професионални, департизирани, транспарентни агенти кои ќе ги штитат граѓаните и државата. Групата се состои од 32 лица, а во неа се вклучени претставници од државни институции и невладини организации, пишува „Порталб.мк“.

Дел од работната група за спроведување реформи во УБК се и Народниот правобранител, Иџет Мемети; претставникот на Оперативно – техничката агенција (ОТА), Зоран Ангеловски, професор на Правниот факултет „Јустинијан Први“ – Скопје; Гордан Калајџиев од Хелсиншкиот комитет за човекови права во Република Македонија; претставничката на НВО „Аналитика“, Магдалена Лембовска; како и Александар Стојановски од „Еуротинк“.

Од пратениците, ќе учествуваат тројца – Емилија Александрова од  собраниската Комисија за надзор над работењето на Управата за безбедност и контраразузнавање и Агенцијата за разузнавање, Фросина Ташевска – Ременски од собраниската Комисија за одбрана и безбедност, како и Зоран Илиоски од Комисијата за надзор на спроведувањето на посебната истражна мерка за прислушување на комуникациите од страна на МВР, Управата за финансиска полиција, Царинската Управа и Министерството за одбрана.

Од Министерството за внатрешни работи (МВР) ќе бидат вклучени 12 членови:  Силјан Аврамовски, Славјанка Петровска, Сашо Тасевски, Ариф Асани, Даниела Јаковлевски – Ѓоршоска, Сашо Трајковски, Нухи Незири, Весна Доревска, Снежана Петровиќ – Арсовска, Светлана Влаховиќ – Димановска, Тони Станковски и Виолета Влаховиќ.

Претставник на Министерството за одбрана во Работната група за реформите во Управата за безбедност и контраразузнавање е Горан Василевски, а од Министерството за финансии тројца: Благоја Крстевски од Царинската управа, Блажо Трендафилов од Управата за финансиско разузнавање и Јане Шилев од Управата за финансиска полиција.

По еден член имаат Врховниот суд на Република Македонија – Рахилка Стојковска, од Основното јавно обвинителство – Влатко Георгиевски, од Јавното обвинителство за гонење на организиран криминал и корупција – Вилма Рускоска, од Специјалното јавно обвинителство – Атанас Гинев, од Агенцијата за разузнавање – Зоран Иванов, од Управата за безбедност на класифицирани информации – Стојан Славески, од Управата за заштита на лични податоци – Валентин Ветаџокоски и Игор Кузевски, пренесува Порталб.мк.

Овие 32 членови на работната група за спроведување на реформи во УБК имаат обврска најдоцна до 15 ноември до Владата да го достават предлогот на моделот за реформи во системот за безбедност и разузнавање и планот за развој.

„Цел на оваа работна група е преку еден широк процес на консултации да и го предложи на Владата најдобриот и најсоодветниот модел за реформи“, велат од МВР.

Инаку, поради скандалот со незаконските прислушувања, што предизвика политичка криза, во текот на месец октомври до 15 ноември 2018 година, во Македонија ќе се одвива консултативниот процес за избирање на новиот функционален и реформаторски модел на УБК. Оттука, прислушувањето нема да биде под надлежност на УБК, туку истото ќе биде раководено од Оперативно – техничката агенција (ОТА).

Трите модели за кои се дискутира се дел од анализите на проектот ,,Консолидација на безбедносниот систем“, под покровителство на DCAF ( Женевски центар за демократска контрола на вооружените сили).

Целта на оваа Меѓуресорска работна група е преку широк консултативен процес на Владата да и предложи кој е најсоодветниот модел за реформа.

Засега, во опција се три модели:

1. Да остане досегашниот модел, со кој УБК ќе биде дел на МВР.
2. УБК да се одвои од МВР и да биде независен орган и инститиција.
3. Да се поврзе УБК со Агенција за разузнавање и да се формира посебен орган на државната амдинистрација.


Формирањето на ОТА се уште е финансиска енигма


Скопје, 7 септември, 2018 - 15:12 (META) 

Надлежните институции си ја префрлаат топката за одговорот на прашањето, колку ќе чини формирањето на Оперативно-техничката агенција (ОТА), новото тело кое ќе раководи со опремата за прислушување во земјава.

Собранието денеска го изгласа Зоран Ангеловски за директор на ОТА, но се чини дека никој не знае колку пари од буџетот се предвидени за имплементацијата на новиот Закон за ОТА или пак сè уште се калкулира по ова прашање.

Наместо детални податоци околу фискалните импликации во законот се вели дека финансиските средства потребни за спроведување на Законот за Оперативно-техничка агенција ќе се обезбедат од буџетот.

На прашањето до Министерството за финансии, кое е надлежно за државниот буџет колку пари во буџетот се предвидени за формирање на ОТА, оттаму упатија одговорот да се бара во Министерството за внатрешни работи.

Од МВР, пак, советуваа одговорот да се бара во Собранието, од каде што упатија на надлежната собраниска Комисија за одбрана и безбедност. Оттаму не ни одговорија на прашањето поставено на официјална мејл-адреса.

ОТА треба да започне со работа од ноември, а формирањето на оваа Агенција беше една од клучните препораки на експертската група на Прибе, со што се бараше да се спречи злоупотребата со прислушувањето.