Патрониот празник на Прилеп „Свети Никола“ од годинава ден на хуманост на градот


Прилеп, 19 декември, 2018 - 15:57 (META) 

Градоначалникот на Прилеп, Илија Јованоски, на денешното одбележување на Свети Никола, патрониот празник на градот, повика од годинава тоа да биде ден на хуманост на градот.

– Секој кога може и колку може да подари, да подели храна, облека, потребна помош за нашите сограѓани.  Сите заедно да ја прегрнеме со хуманост, љубов и почит нашата заедница. Да покажеме искрена грижа, топлина и разбирање за сите наши граѓани. Да го зачуваме нивното достоинство. Тивко, нечујно, помошта да стигне на потребните адреси. Да не дозволуваме стравот и предрасудите да нè делат. Давајќи го најдоброто од себе, да градиме заедница со капацитети за брзи и квалитативни промени. Со почит, искрени и добри намери, пријателство, меѓусебна љубов и емпатија, да градиме заедница со вистински вредности. А овој ден, од оваа година да биде Ден на хуманоста за Прилеп! – порача градоначалникот Јованоски, на денешното чествување на градската слава во центарот на Прилеп.

Општина Прилеп годинава организираше два хуманитарни настана. Во рамките на хуманитарната акција „Подај рака – биди човек“, реализирана во соработка со здружението „Епилепсија Македонија“ и Општинската организација на Црвен крст, во неколку маркети во градот, донациите на граѓаните спакувани од волонтерите на овие асоцијации, преку екипите од центарот за социјална работа, се веќе дистрибуирани до 11 прилепски семејства.

Како второ, парите што ќе бидат собрани на традиционалниот Светониколски турнир во мал фудбал, ќе бидат наменети за децата со ретки болести, меѓу нив и оние со цистична фиброза.

Домаќин на годинашниот празник беше семејството на  градоначалникот Јованоски, кое за бројните посетители подготви посна трпеза, со традиционалните светиниколски сарми, грав, посни специјалитети и пијалоци. Во нејзино име, порака среќа, радост, здравје и благосостојба на сите граѓани упати сопругата на градоначалникот, Виолета Јованоска.

– Нашата фамилија е почитувач на традицијата што се негува во нашиот град, и се пренесува од колено на колено. Со радост го организиравме годинешното чествување, упатувајќи им честитки на сите граѓани кои што денеска чествуваат со семејствата – рече Јованоска.

Кум на идната градската слава е семејството Небрежанец.

-Чест ми е што моето семејство ќе го преземе кумството за следната година. Најубави желби за сите граѓани на Прилеп – порача Кирил Небрежанец, иден кум на градската слава.

Свети Никола е прогласен за патрон на Прилеп пред 13 години.


Со „Љубовни пози на историјата“, прилепскиот театар освои три награди во Никшиќ


Прилеп, 5 декември, 2018 - 11:17 (META) 

Народен театар „Војдан Чернодрински“ од Прилеп, се закити со три награди на Меѓународниот фестивал на актерот што се одржа во Никшиќ, Црна Гора.

Актерката Ангела Наумоска освои Гран при за епизодна женска улога, а Гран при за епизодна машка улога освои актерот Зоран Иваноски.

И наградата за колективна игра отиде во рацете на прилепскиот театар „Војдан Чернодрински“, кој се натпреваруваше со претставата „Љубовни пози на историјата“, работенa по текст на неодамна починатиот Горан Стефановски, а во режија на Наташа Поплавска.

Наградените актери овие награди му ги посветуваат на авторот на драмскиот текст.

– Овие награди треба да бидат посветени на Горан Стефановски. Тој беше дојден за време на фестивалот во Прилеп, каде прв пат ја изведовме претставата. Стефановски ја гледаше изведбата, а потоа ги сподели впечатоците со нас. Тоа што тој го сподели тогаш со мене, беше најголемата награда за оваа претстава – изјави актерот Иваноски.

Како што вели, за него е особено значајно што во жири комисијата на фестивалот во Никшиќ, немало ниту еден Македонец.

-И покрај тоа се закитивме со три награди.Така што утре, задутре никој не може да рече ,тој им ја нареди ним наградата…’ Ова ми е прва награда освоена во театарот. Сакам да ја споделам со сите колеги, зашто без колегите нема награда. Криво ми е затоа што оваа претстава беше изведена на театарските игри овде во Прилеп минатата година и тоа е една чудна работа, нашите генијалци не успеаја да ја видат оваа претстава, нејзините вредности – вели актерот Иваноски.

За Иваноски и неговата колешка, актерката Ангела Наумоска, чудно е што, прилепскиот театар наградите во Македонија ги добива откако ќе се освојат награди на фестивали во странство.

-Веројатно ова е традицијата која што ни се повторува. Првин ги добиваме наградите надвор од Македонија, па потоа се враќаме овде, ги играме претставите на МТФ „Војдан Чернодрински“ па дури тогаш не наградуваат. Веројатно правило треба да биде кога ќе ја дадеме премиерата, да излеземе од Македонија, да земеме награди, за стручното гледачко око да знае дека ние нешто правиме, а не дека се шетаме и дека не ги само кршиме штиците што се поставени таму – додава Наумоска.

За aктерите, но и за директорката на Центарот за култура „Марко Цепенков“ во Прилеп, во чии рамки функционира театарот, оваа награда е признание за посветената, професионална работа на целиот ансамбл.

-Претставата се изведе по веста за смртта на Горан Стефановски. Во моменти кога на сите ни беа измешани емоциите, по трагичната вест за загубата, актерската екипа со една неверојатна енергија, маестрално ја одиграа оваа претстава, сакајќи да му оддадат почит на Стефановски. Публиката ракоплескаше долго и громогласно – вели директорката Менче Караџоска.


Бранителите од Прилеп бараат нивните семејства да имаат приоритет при вработување


Прилеп, 3 декември, 2018 - 12:21 (META) 

Во чест на 16-годишнината од формирањето на Здружението на резервни воени обврзници, учесници во настаните од 2001 и 2002 година од Прилеп, како и во знак на почит кон своите загинати соборци, но и 30-ина бранители коишто поради пост-трауматски шок починаа подоцна, тие посадија зимзелени дрвја во Меморијалниот комплекс во селото Лениште –Прилепско.  Притоа ја искажаа својата загриженост, поради неповолната позиција во која се наоѓаат.

-Социјалните прашања, невработеноста и правото на адекватно здравствено згрижување се прашања коишто нè тиштат. Веруваме дека со оваа влада конечно ќе ги оствариме своите барања – велат дел од членовите на ова Здружение.

Бранителите побараа и нивните деца да имаат приоритет при вработување.

-Кога се објавуваат конкурси за вработување, доколку децата на бранителите ги исполнуваат условите, сметаме дека треба да имаат приоритет пред друтите кандидати. Ова особено во случаи, кога семејствата на бранителите се социјално загрозени – порачуваат бранителите.

Во прилепското здружение на бранители членуваат околу 1.000 луѓе.


На пролет ќе заврши изградбата на конаците на манастирот Трескавец


Прилеп, 20 ноември, 2018 - 10:43 (META) 

Најдоцна вo март следната година ќе заврши изградбата на конаците на манастирот Трескавец кај Прилеп, коишто изгореа во пожар на 4 фебруари 2013 година.

Според директорот на Завод и Музеј- Прилеп, Благоја Атанасоски, годинава интензивно се работело на реконструкција на конаците, според проект којшто го враќа нивниот автентичен изглед од 19. век, кога прв пат биле изградени.

– Освен градежните работи за финиширање на изградбата на конаците, работат паралелно два тима стручњаци со цел да се изготви проeкт за конзервација и реставрација на архитектурата и живописот на црквата, магерницата и трпезаријата. Рокот е до крајот на годинава, така што на пролет овие проекти ќе бидат готови и ќе може непречно да се реализираат и овие активности – истакнува Атанасоски.

Црквата Успение на Пресвета Богородицa, во рамките на манастирот, датира од 14. век и со својот богат живопис е значаен споменик на културата, заштитен со закон.

Манастирот Трескавец, чии што конаци досега три пати изгореле во пожар, е на листата незаштитени споменици на културата од УНЕСКО.

– Со сите овие активности што ги преземаме, со реализација на проектите, манастирот Трескавец и црквата ќе бидат целосно заштитени од забот на времето.Тие се заштитени споменици на културата со закон, но досега не биле преземани други активности за заштита на нивната архитектура и живопис – директорот на Завод и Музеј – Прилеп.

Инаку проектот за конаците е вреден 2,2 милиона евра и е целосно финансиран од Министерството за култура. Доколку во иднина се обезбедат средства во манастирот да се изгради и водовод, а имајќи предвид дека до манастирот води и асфалтиран пат во должина од седум километри, овој споменик на културата ќе биде лесно достапен и ќе ги исполнува сите услови за да биде дел од туристичката мапа на Македонија.


Борисов ја стави под мраз „Џи-Пи Груп“, која градеше во Прилеп и се спомнуваше со убиената новинарка од Русе


Софија, 12 октомври, 2018 - 17:56 (META) 

Бугарскиот премиер Бојко Борисов попладнево соопшти дека наложил големата бугарска компанија „Џи-Пи Груп“, која работела или уште работи на многу инфраструктурни проекти во Бугарија, да биде отстранета од државните проекти и проектите финансирани со европски пари, јави бугарскиот „Медиапул“.

„Џи-Пи Груп“, како што наведе бугарски „Банкер“, исто така ја заврши и пречистителната станица за отпадни води во Прилеп, која беше пуштена во употреба на почетокот на јули годинава.

„Џи-Пи Груп“ беше темата на последната телевизиска емисија на убиената ТВ водителка Викторија Маринова, во која таа разговараше со новинари што истражувале злоупотреби поврзани со оваа групација која во последните години зеде многу големи проекти. Иако првично се сметаше дека станува збор за ликвидација на новинар, потоа се покажа дека убиството го извршил млад маж во пијана состојба, кој по убиството избегал во Германија.

„Џи-Пи Груп“ во последните неколку месеци е во центарот на „Џи-Пи-гејт“, поради лоша изведба на капитални проекти.

– Му наложив на претседателот на агенцијата „Патна инфраструктура“, Светослав Глосов, почитувајќи го законот, да најде начин уште денеска за „Џи-Пи Груп“ да се отстрани од проектите финансирани од државата и од ЕУ – рече Борисов денеска во Асеновград.

Големата градежна група во моментот ја следат два големи скандали. Едната е за ремонтот на улицата Граф Игнатиев во строгиот центар на Софија, а вториот поради истражувањето на сајтот „Бивол“ за махинации за победување на тендери за проекти со европски пари.

Поради истражување за уништување документација за овој случај беа уапсени новинарите Димитар Стојанов и неговиот колега од Романија, Атила Биро, кои по реакција на европската јавност беа ослободени. Стојанов и Биро беа последните гости во емисија на убиената водителка Маринова.

По случајот со Стојанов и Биро, бугарското Јавно обвинителство отвори истрага и нареди запирање на исплатата на 14 милиони евра на „Џи-Пи Груп“, компанија која се поврзува со Валентин Златев, директорот на „Лукоил Бугарија“. Тој го негира тоа, а Џи-Пи Груп, инаку, изградила повеќе од 100 објекти на „Лукоил“ во Бугарија и врши нивно одржување, меѓу кои и новото седиште во центарот на Софија.

„Џи-Пи Груп“ го доби и тендерот за изградба на најдолгиот тунел во Бугарија, „Железница“ на новиот автопат „Струма“ во близина на Симитли, за сума од 185 милиони лева, односно 92,5 милиони евра.

Според бугарски „Банкер“ сегашниот гигант „Џи-Пи Груп“ полека стана најчестиот победник на државните и општинските тендери за изградба на патишта, инфраструктура, пречистителни станици“, а работи и на третата линија на софиското метро.

Во 2017 година имала  приходи од 185 милиони лева,3,6 отсто повеќе од годината претходно, а профитот изнесувал 27 милиони лева, што е 45 отсто повеќе од профитот во 2016 година.

„Џи-Пи Груп“ на почетокот на август годинава победи на тендерот за најдолгиот тунел во Бугарија, по што две странски компании – грчката „Актор“ и италијанската „Тодини“ поднесоа жалби. „Актор“ го градеше новиот автопат Демир Капија – Смоквица.

За реконструкцијата на централната софиска улица Граф Игнатиев, Џи-Пи Груп победи со понуда од 24 милиони лева (околу 12 милиони евра).

Компанијата со други компании ќе дели и  92 милиони лева (околу 46 милиони евра) за изградба на шест метро станици и 4,3 километри тунел на новата, трета линија на софиското метро. За изградба на две станици и тунел од 2,3 километри Џи-Пи Груп е во конзорциум со уште три компании, а за два километри тунел и четири метро станици направила конзорциум со друга компанија.

„Џи-Пи Груп“ стои и зад голем број други објекти изградени во последната деценија, меѓу кои и луксузни хотели и спортски сали, како и новото седиште на „Лукоил“ во Софија. Формирана е во 2004 година.


Викендов Прилеп ќе биде домаќин на авто слалом „Прилеп-11 Октомври“


Прилеп, 12 октомври, 2018 - 13:17 (META) 

Во недела во Прилеп со почеток во 12 часот ќе се одржи авто слалом „Прилеп – 11 Октомври“, во организација на Авто картинг клуб „Скопје“, а со поддршка на Општина Прилеп.

Најдобрите учесници на ова државното првенство ќе се бодираат за шампионатот во 2018 година. Досега се пријавени 50-ина учесници од повеќе градови во Македонија. Според информациите од организаторот, доколку ги исполнуваат критериумите, возачите може да се пријават и утре сабота, 13.10.2018 година. Трката ќе се одржи во должина од 1.200 метри во центарот на градот по булеварот „Гоце Делчев“, од раскрсницата со улицата „Кузман Јосифоски-Питу“ до раскрсницата со улица „Димо Наредникот“.

„Секој возач што ги исполнува условите може да учествува во авто слаломот, што ќе се одржи во пет класи. Класа 1 е за возила до 1.600 сантиметри, класа 2 за возила над 1.600 сантиметри, класа 3 за спортски возила до 1.600 сантиметри, класа 4 за спортски возила над 1.600 сантиметри и класа возила со турбо. Со овој авто слалом Прилеп го враќа спортскиот дух на автомобилизмот во Македонија. А, ќе даде и значаен придонес во развојот на овој спорт и зголемување на вештините на возачите за авто слалом“, вели Менде Младеноски, директор на трката.

Според пропозициите за учество, возачите треба да поседуваат важечка возачка дозвола, сообраќајна книшка за возилото, животно осигурување за авто натпревар, лиценца за слалом или натпреварувачка лиценца издадена од Авто мото сојузот на Македонија (АМСМ).

„Овој авто слалом се одржува по 7 годинешна апстиненција од авто трки во Македонија, на иницијатива на неколку спортски авто клубови и Автомобилска Федерација на Македонија. Така што сега се создаде можност за враќање на календарот на трките. Досега се одржани 3-4 трки во Македонија, на Водно, Крушево, Струмица…“, истакнува Младеноски.

Авто слаломот ќе го отвори градоначалникот Илија Јованоски.


Реконструкцијата на градскиот стадион во Прилеп ќе почне одново


Прилеп, 13 септември, 2018 - 15:09 (META) 

Иако претходната локална власт одвоила 28 милиони денари (455.000 евра) пред две години и дури потпишала договор со Фудбалската федерација на Македонија (ФФМ) за реконструкцијата на Градскиот стадион „Гоце Делчев“ во Прилеп, стадионот е запуштен, за покривната конструкција не е изработена статика, а најголемиот дел од работите се многу далеку од конечна реализација, иако роковите се истечени. Се прави нов проект, а ќе се распише и нов тендер.

Веќе е формирана нова општинска комисија која што треба да ги доутврди пропустите во проектот, а одговорност ќе мора да се понесе, рече прилепскиот градоначалник Илија Јованоски презентирајќи ги денеска на прес-конференција проблемите во реконструкцијата.

– Прво, градежната фирма „Нискоградба“ којашто требаше изградбата стоотстотно да ја заврши во февруари, и со пролонгираниот рок, не ги финишира градежните работи ниту 7-8 отсто. Челичната покривна конструкција на северната трибина нема статика, така што постои опасност да падне покривот и целата трибина, што би можело да предизвика катастрофални последици. За изградба на рефлекторите за стадионот со височина од 40 метри и тежина од преку 10 тони, било издадено решение за канделабри, наместо дозвола за градба согласно со закон. А, агрегатот за рефлекторите со стариот проект бил сместен во една соблекувална. Со една реченица, проектот за градски стадион што го изработила претходната власт е противзаконски и штетен – истакна Јованоски на денешната прес конференција.

Фудбалскиот клуб „Победа“ и граѓаните на Прилеп воопшто, се без градски стадион повеќе од две години. Стадионот е запуштен, трибините не се градат, нема никакви услови за да се одржи каков било натпревар.

Прилепскиот градоначалник најави нов проект за реконструкцијата на стадионот и нов тендер.
– Институтот за земјотресно инженерство ИЗИИС, треба да изработи нова статика за покривната челична конструкција на северната трибина, а Општината ќе распише нов тендер за изградба, откако ќе заврши изработката на новиот проект согласно со законските регулативи и прописи. Но, виновниците за сето ова треба да понесат одговорност – рече Јованоски.

Иако во минатото во неделите реки народ се слеваа кон градскиот стадион и дури се вршеше и пренасочување на сообраќајот, веќе една деценија улицата на која се наоѓа градскиот стадион во недела е речиси пуста, а стадионот со години се распаѓа.


Исчезнало 11-годишно дете во Прилеп


Прилеп, 13 август, 2018 - 11:10 (META) 

Прилепската полиција бара 11 годишно дете, кое, како што пријавил неговиот татко, А.С. (55) од Прилеп, излегло од дома околу 15 часот од саботата и потоа не се вратило дома.

Потрагата е во тек.


Унгарска вечер во Прилеп


Прилеп, 6 август, 2018 - 10:34 (META) 

Со почеток во 20.30 часот на просторот околу Градскиот Саат во Прилеп, денеска ќе се одржи Унгарска вечер, на која ќе настапат оркестарот „Фокош“ и ФГ „Селенце“. Овој културен настан е организира од Центарот за култура „Марко Цепенков“ од Прилеп, во соработка со Здружението на Унгарци „Телехаз“ и Амбасадата на Унгарија.

Интересно е што Фолклорната група „Селенце“ доаѓа од Бечеј, Војводина, односно Србија. Од истиот град доаѓа и оркестарот „Фокош“.


Ансамблот „Танец“ в четврток ќе одржи концерт во Прилеп


Прилеп, 19 јуни, 2018 - 14:33 (META) 

Ансамблот за народни песни и игри „Танец“ ќе се претстави со целовечерен концерт на 21 јуни, четврток од 20 часот во големата сала на Центарот за култура „Марко Цепенков“ во Прилеп.

Ансамблот „Танец“, амбасадор на македонскиот фолклор е формиран во мај 1949 година со указ од тогашната влада, а досега учествувал во над 4.500 концерти и подиуми во земјата и во светот, пред околу осум милиони гледачи.