Полицијата спречила криумчарење на 143 килограми марихуана


Скопје, 28 февруари, 2018 - 16:49 (META) 

Во две одвоени акции, Министерството за внатрешни работи (МВР) вчера спречила криумчарење на околу 143 килограми марихуана, при што приведени се осум лица. Шестмина се македонски државјани, а другите двајца албански државјани, соопшти директорот на Бирото за јавна безбедност (БЈБМ), Лазо Велковски на денешната прес конференција во МВР.

Во првиот случај, од Албанија преку Македонија во Грција требало да бидат пренесени 55 килограми марихуана со вредност на нарко пазарот од околу 150.000 евра. Во оваа акција се уапсени шест македонски и еден албански државјанин.

Во близина на браната на Мавровско Езеро вчера биле уапсени четири жители на скопско Студеничани, кои со автомобили „бмв“ и „ауди“ ја презеле марихуаната од Дебар и требало да ја транспортираат до Солун, за надомест од 9.000 евра.

По ова апсење, набргу во Дебар бил уапсен 49-годишен маж од албанското село Блата, Република Албанија, кој ја прокриумчарил дрогата во Македонија илегално премиинувајќи ја границата.

Набргу се уапсени и двајца роднини од Дебар, кои биле на 26 и 27 годишна возраст. Тие ја презеле дрогата од Албанецот и ја предале на жителите на Студеничани.

Во вториот случај вчера околу 18 часот на граничниот премин „Деве Баир“ од слобода е лишен 47-годишен државјанин на Албанија. Тој управувал со камион во чија приколка биле пронајдени 88 килограми марихуана. Дел од дрогата била скриена во штици од приколката на камионот.


Откриени 18 илегални мигранти во товарен воз


Гевгелија, 8 јуни, 2015 - 13:21 (META) 

Патролен тим од полициската станица за гранично надгледување и граничниот премин Богородица, во саботата викендов, откриле 18 илегални мигранти, сокриени во камионска приколка, товарена на еден од вагоните на товарниот воз, кој сообраќал на линијата од Солун до Ламбах, Република Австрија, соопшти МВР.

Mигрaнтите, како што стои во соопштението на МВР, биле откриени „при извршување на зајакнато обезбедување на државната граница од напливот на илегални мигранти од африканските и од азиските земји“.

„При прегледот извршен на два пломбирани вагони, а во присуство на полициски службеници од полициската станица за граничен надзор на железничкиот премин кај Богородица, цариник и на работници од „Македонски железници“, во еден од вагоните се откриени илегални мигранти, од кои 16 авганистански државјани на возраст од 15 до 36 години, едно седумгодишно дете, како и еден државјанин на Ирак на возраст од 33 години“, стои во соопштението.

Со мигрантите бил извршен разговор и според она што дел од нив го кажале на полицијата, тие немале организатор и во приколката се качиле незабележано додека таа сè уште се товарала и вратите биле отворени.

Илегалните мигранти со протокорален лист ќе бидат предадени на полициската станица Евзони во Грција.