!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

УЈП ќе го поедноставува поднесувањето годишни даночни пријави


Скопје, 3 август, 2017 - 14:04 (META) 

Управата за јавни приходи (УЈП) најавува дека ќе го поедностави системот за поднесување годишни даночни пријави и понатаму оваа инстутуција тоа ќе го прави електронски.

Од УЈП неодамна информираа дека работат на даночните реформи во делот на персоналниот данок на доход, што значи поедноставување на процедурите за пријавување и за плаќање на данокот.

– Земајќи предвид дека новините и даночните реформи во голема мера ќе го изменат и досегашниот начин на пресметка, пријавување и на плаќање на персоналниот данок од страна на фирмите, граѓаните и на сметководствените бироа, Управата, од август 2017 година, ќе почне активности за вклучување на сите засегнати страни (фокус-групи) во процесот на креирање и на тестирање на даночните услуги од новиот систем е-персонален данок – пишува на веб-страницата на УЈП.

Од УЈП сметаат дека на овој начин ќе се овозможи намалување на административните трошоци и поедноставување на постапките за пријавување, поднесување пресметки и плаќање на персоналниот данок од страна на граѓаните и на правните лица.

Проектот за поедноставување на процедурите за пријавување и за плаќање на персоналниот данок е финансиран од ИПА-фондовите во вредност од 93.730 евра и од буџетот во вредност од 574.800 евра.


Битолчанец, кој бил пријавен за исчезнат, пронајден мртов


Битола, 19 март, 2017 - 12:36 (META) 

Вчера во 12.35 часот во Секторот за внатрешни работи Битола било пријавено дека на улицата Партизанска бил пронајден починат 68-годишниот М.Ј. од Битола, соопшти МВР.

Како што информираат од полицијата, М.Ј. на 12 март оваа година бил пријавен за исчезнат.

По наредба на надлежен јавен обвинител, телото на починатиот било предадено за обдукција, која треба да ги утврди причините за смртта.


Уште 40.000 граѓани се очекуваат да пријават данок – рокот истекува утре


Скопје, 14 март, 2017 - 14:34 (META) 

Утре истекува рокот за поднесување на годишната даночна пријава за утврдување на персоналниот данок на доход, за приходите кои граѓаните ги оствариле во изминатата 2016 година, соопштуваат од Управата за јавни приходи (УЈП).

– Во текот на вторник и на среда се очекува околу 40.000 граѓани да ја исполнат својата обврска. Според последните податоци, најмногу пријави се доставени во Скопје (144.066), а 1.728 граѓани ја искористиле можноста за достава на пријавата преку е-даночни услуги – информираат од УЈП.

Досега, околу 360.000 граѓани пријавиле данок.

Од УЈП потсетуваат дека нивните даночните канцеларии работат од 8.30 до 20 часот, а граѓаните можат да ја достават годишната даночната пријава и преку пошта.

Заради избегнување на метежот, отворени се дополнителни шалтери во Скопје за поднесување годишна даночна пријава, лоцирани на приземјето на Дирекцијата за големи даночни обврзници (зграда на ССМ).


Починато лице пронајдено на булеварот Св. Климент Охридски во Скопје


Скопје, 26 февруари, 2017 - 13:37 (META) 

С.П. пријавил дека на булеварот Св. Климент Охридски, го пронашол починат В.М. (1947) од Скопје.

По наредба на јавен обвинител, телото на починатиот е пренесено во Институтот за судска медицина за обдукција.

Увид на местото каде што е пронајден починатиот извршила екипа од СВР-Скопје.


Полицијата го пронајде исчезнатото девојче од Гази Баба


Скопје, 29 јануари, 2017 - 17:13 (META) 

Петнаесетгодишното девојче од Скопје кое било пријавено за исчезнато, било пронајдено и предадено на родителите, информираат од МВР.

Во вчерашниот билтен на полицијата пишуваше дека исчезнувањето на девојчето во полициската станица Гази Баба било пријавено од страна на нејзината сестра, според која, девојчето отишло на училиште и не се вратило дома.


Петнаесетгодишно девојче од Гази Баба заминало на училиште и не се вратило


Скопје, 28 јануари, 2017 - 13:45 (META) 

Во полициската станица во Гази Баба, М.Н. (20) од Скопје пријавила дека на 27 јануари, во 6 часот, од дома во непознат правец се оддалечила нејзината петнаесетгодишна сестра.

Таа, според пријавителката, отишла на училиште и не се вратила дома. Се преземаат мерки за пронаоѓање на лицето.


Цимерот на бездомникот од Битола е осомничен за неговото убиство


Битола, 28 јануари, 2017 - 13:31 (META) 

СВР Битола поднесе кривична пријава против П.А. (53) од Битола, поради постоење основан сомнеж дека извршил убиство.

Настанот се случил во текот на ноќта помеѓу 24 и 25 јануари, во неутврдено време, при што пријавениот со употреба на физичка сила и тврди предмети, на свиреп и подмолен начин, му нанел повеќе повреди по целото тело и на тој начин го лишил од живот С.Д. (48) од Битола, со кого заедно живеел во иста куќа на улицата 4 Ноември во Битола.

Пријавениот, со намера да го прикрие ова свирепо убиство, во времето околу 5.50 часот на 25 јануари, се упатил во соседната куќа, барајќи помош, кажувајќи дека непознати лица ги нападнале додека спиеле, по што истиот е хоспитализиран во Клиничка болница во Битола, поради укажување медицинска помош, заради повредите за кои изјавил дека настанале при тој напад.

На местото на настанот увид извршил јавен обвинител од Битола, како и увидна екипа од СВР Битола. Од увидот, од извршените вештачења, како и од разговорите со повеќе лица, вклучително и со пријавениот, констатирано е основано сомневање дека П.А. е сторител на кривичното дело.


УЈП ги продолжи роковите за поднесување даночни пријави и извештаи


Скопје, 26 јануари, 2017 - 12:24 (META) 

Роковите за поднесување на даночните пријави и на годишните даночни извештаи се продолжуваат за пет работни дена, информираат од УЈП.

Оттаму велат дека роковите се продолжени во согласност со Законот за даночна постапка, во услови на масовно, а отежнато поднесување даночни пријави и извештаи преку системот „е-даноци“.

За ДДВ-04 пријава, крајниот рок за поднесување, 25 јануари, се продолжува за пет работни дена, односно до 1 февруари.

За годишните извештаи (обрасци ПДД-ГИ/ОЗП, ПДД-ГИ/ОЦО, ПДД/ГИ-ЗП, ПДД-ГИ), крајниот рок за поднесување, 31 јануари, исто така се продолжува за пет работни дена, односно за краен рок ќе се смета 7 февруари.

Системот на Управата за јавни приходи (УЈП) за поднесување годишни даночни пријави, но и системот преку кој се врши прием на декларации за плати не функционираат неколку дена, алармираа сметководителите.


„Бомбите“ на СДСМ ги отстранил корисникот што ги блокирал и видеата од „Шарената револуција“


Скопје, 25 јануари, 2017 - 17:41 (META) 

Седумнаесетте „бомби“ избришани од официјалниот канал на СДСМ на „Јутјуб“ биле отстранети по пријава од „ОМД Нетворк“, истиот корисник што претходно бараше да се отстранат видеозаписи и снимки на „Нова ТВ“ од „Шарената револуција“ и од студентските протести објавени на „Јутјуб“, пишува  „Нова ТВ“. Сепак, како што нагласува, по аргументација испратена до „Јутјуб“, видеоснимките биле вратени.

„ОМД Нетворк“ е истиот корисник што досега редовно ги пријавува и видеата на „Нова“. Досега оваа мрежа успеа да блокира неколку видеа на Нова од студентските протести и од „Шарената револуција“, како и прес-конференции на Специјалното јавно обвинителство. По аргументациите, „Јутјуб“ ги враќаше видеата назад“, пишува порталот.

Од каналот на СДСМ се отстранети „бомбите“ за смртта на Никола Младенов, разговорот во кој, според СДСМ, се слуша дека Сашо Мијалков стои зад фирмата СГС, „бомбата“ во која, според СДСМ, се слушаат Груевски и Али Ахмети како договараат закон за бранители, за што подоцна „Викиликс“ објави документ, потоа за плацевите кои, според СДСМ, Груевски си ги купил на Водно, разговори за кои СДСМ обвини дека се слуша како ВМРО-ДПМНЕ мести избори, прислушува новинари и уште многу други.

На „Јутјуб“ сè уште се наоѓаат видеоснимките од  Заев и Груевски во кабинетот на премиерот, тајно сниманите видеозаписи на кои, наводно, Заев бара поткуп од бизнисмен, како и снимките од Љубе Бошкоски.


Повредата на избирачкото право граѓаните да ја пријават кај Народниот правобранител


Скопје, 10 декември, 2016 - 15:49 (META) 

Граѓаните утре, на денот на изборите, ќе можат да пријават повреда на избирачкото право во седумте канцеларии на Народниот правобранител во Скопје, Битола, Кичево, Куманово, Струмица, Тетово и во Штип, информираат од кабинетот на Народниот правобранител.

– Народниот правобранител истакнува дека избирачкото право е уставно загарантирано како еднакво, општо и непосредно и се остварува на слободни избори со тајно гласање и дека никој не смее да биде повикан на одговорност заради остварување на ова право. Поради тоа, повредата на слободата на определувањето на избирачите, како и други повреди на избирачкото право се казниви дела – информираат од кабинетот на Народниот правобранител.

Граѓаните, повредата на избирачкото право можат да ја пријават или во канцелариите или на бесплатната телефонска линија 0800-54321.