!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Во првото тримесечје нема барања за утврдување одговорност на судија


Скопје, 6 април, 2017 - 16:09 (META) 

Советот за утврдување на факти и поведување постапка за утврдување одговорност на судија во првото тримесечје од оваа година, односно во периодот од 1 јануари до 31 март 2017 година, примил вкупно 121 иницијатива за утврдување одговорност на судија, стои во првиот квартален извештај на Советот.

Според извештајот, во вкупниот број на претставки и на поплаки, во јануари до Советот пристигнале 14, во февруари 53 и во март 54 иницијативи.

Од пристигнатите иницијативи во 2017 година, Советот отфрлил 83, од кои 69 како неосновани, пет недозволени, три застарени, две биле нецелосни, една ненавремена и три биле отфрлени со резолуција.

Во работа на Советот останале 38 претставки. За две од нив биле оформени предмети со назнака ДОВ, за седум предемети било побарано известување до претседател на суд, за девет предмети било побарано да бидат доставени списите од нив на увид и 20 предмети по кои Советот води понатамошна постапка.

Од пристигнатите иницијативи во 2016 година, на членовите на Советот за решавање во 2017 година им останале 63 претставки.

„Во периодот од 1 јануари до 31 март 2017 година не е донесена одлука за поднесување барање за поведување постапка за утврдување одговорност на судија или претседател на суд до Судскиот совет на Република Македонија“, стои во кварталниот извештај на Советот за утврдување на факти.

Инаку, на 28 март Специјалното јавно обвинителство (СЈО) до Советот за утврдување на факти поднесе претставки против судијките во Основниот суд Скопје 1, Елена Илиевска-Јосифовиќ и Татјана Михајлова, во кои бара против нив да биде поведена постапка за утврдување одговорност поради несовесно и нестручно вршење на судската функција.


Мемети: Сè уште имаме нефункционални и исполитизирани институции


Скопје, 30 март, 2017 - 14:46 (META) 

Сè уште имаме исполитизирани и нефункционални институции, кои спроведуваат и партиски агенди, истакнал денеска народниот правобранител Иџет Мемети, на презентацијата на годишниот извештај за степенот на почитување, унапредување и заштита на човековите права и слободи во 2016 година, пренесува „Нова ТВ“.

Според Мемети, во сферата на почитувањето и на заштитата на човековите права, минатата година не е забележан никаков напредок, туку, напротив, имало стагнација и назадување.

Поради попречување во работата од страна на Министерствата за труд и социјална политика, за здравство, за внатрешни работи, за правда и од Управата за јавни приходи, Омбудсманот не успеал да спроведе целосни постапки за заштита на правата на граѓаните, посочил Мемети.

Тој истакнал дека затворениците и понатаму престојуваат во крајно нехумани услови и ускратено им е правото на здравствена заштита. Тој додаде дека е констатирана прекумерна употреба на сила од страна на затворската полиција, како и од редовната полиција при приведувањето на активисти од протестите на „Шарената револуција“.

Народниот правобранител минатата година постапувал по 4.718 случаи, од кои 3.775 биле иницирани по примени претставки, а 37 биле отворени по иницијатива на самиот Омбудсман.


СЈО поднесе претставки против судијките Илиевска-Јосифовиќ и Михајлова


Скопје, 28 март, 2017 - 15:55 (META) 

Специјалното јавно обвинителство (СЈО) до Советот за утврдување факти и покренување одговорност за судија, поднесе претставки против судијките во Основниот суд Скопје 1, Елена Илиевска-Јосифовиќ и Татјана Михајлова.

– Со претставките е побарано да се испита работата на судиите од аспект на нестручно и несовесно вршење на судската функција – стои во соопштението на СЈО.

Судијката Елена Илиевска-Јосифовиќ како судија на претходна постапка одлучуваше по барања на СЈО, меѓу кои и тоа за одземање на пасошот на поранешниот директор на управата за безбедност и контраразузнавање, Сашо Мијалков, за случајот „Трезор“. Таа го одби барање на СЈО за одземање на пасошот како неосновано.

„Од начинот на кој судијата Елена Илевска-Јосифовиќ ја врши својата судиска функција по предметите што се во надлежност на Јавното обвинителство за гонење кривични дела поврзани и кои произлегуваат од содржината на незаконското следење на комуникациите, произлегува дека истата судската постапка ја водела пристрасно, со злоупотребување на положбата и со пречекорување на службените овластувања“, стои во претставката на СЈО до Советот за утврдување факти.

СЈО претходно бараше изземање на Илиевска-Јосифовиќ од случајот „Трезор“, но судот ги отфрли наводите на Специјалното јавно обвинителство како неосновани.

Судијката Татјана Мухајлова, пак, го суди случајот за насилствата пред Општина Центар од јуни 2013 година, во кој СЈО, меѓу другите, го обвинува и поранешниот премиер и актуелен лидер на ВМРО-ДПМНЕ, Никола Груевски.

„Судијата Михајлова постапувала несовесно, ненавремено и немарно, што предизвикало одолжување на судската постапка без постоење на законска основа, спротивно на начелото за судење во разумен рок. Со целокупното постапување, судијата Михајлова сторила повреда на прописите, односно нарушување на независноста на судиите при судење, но и грубо повредување на Кодексот на судиите, со што се нарушува угледот на судиската функција“, стои во претставката на СЈО за судијката Михајлова.

На рочиштето за насилствата пред Општина Центар, одржано на 22 февруари годинава, Михајлова ги казни по 2.000 евра специјалната јавна обвинителка Катица Јанева и обвинителката на СЈО, Фатиме Фетаи, бидејќи ја обвинија дека го фалсификувала записникот од претходното рочиште.


Кривичен суд: СЈО продолжува со притисоците и со заканите кон судиите


Скопје, 27 февруари, 2017 - 19:32 (META) 

Претставките што Специјалното јавно обвинителство (СЈО) ги поднесе до Советот за утврдување на факти против судии од Основниот суд Скопје 1 се уште еден од низата притисоци и закани кон судиите да одлучуваат како што очекуваат и посакуваат од СЈО, независно од законските норми, стои во реакцијата на Кривичниот суд.

Од судот велат дека јавноста имала можност да се запознае со односот и со стручноста на обвинителите на СЈО кон судот „кое го покажаа на последната главна расправа во предметот поврзан со настаните пред Општина Центар“, од јуни 2013 година.

Специјалната јавна обвинителка Катица Јанева и обвинителката на СЈО Фатиме Фетаи денеска до Кривичниот суд поднесоа жалби против одлуката на судијката Татјана Михајлова да ги казни по 2.000 евра, поради „непочитување на судот“. СЈО поднесе и претставки против судијките Александра Поп-Стефанија и Лидија Петровска заради утврдување на нестручно и несовесно вршење на судската функција.

Во врска со укинатото решение на судијката Александра Поп-Стефанија, според кое претресот на СЈО во домот на поранешениот началник на Петтата управа, Горан Грујовски, беше оценет како незаконски, од Основниот суд Скопје 1 велат дека тоа не значи дека Кривичниот совет донел конечна одлука доказите да можат да се користат во судска постапка, туку дека по предметот повторно треба да одлучува судија на претходна постапка.

„Ги демантираме наводите објавени на одредени медиуми дека со оваа одлука на Советот, не постои пречка прибавените докази од претресот да се користат во постапка, со оглед дека Кривичниот совет има донесено решение за враќање на предметот кај судија на претходна постапка на повторно одлучување“, стои во соопштението од Кривичниот суд.


СЈО ги обжали паричните казни и бара одговорност од Поп-Стефанија и од Петровска


Скопје, 27 февруари, 2017 - 15:58 (META) 

Специјалното јавно обвинителство денеска до Основниот суд Скопје 1 поднело жалби на одлуката на судијката Татјана Михајова да ги казни по 2.000 евра специјалните обвинителки Катица Јанева и Фатиме Фетаи, што таа ја донесе на последното рочиште за насилствата пред Општина Центар од јуни 2013 г., случај познат во јавноста како „Шамари“.

– Сметаме дека одлуката е незаконска поради што го искористивме правото на жалба – вели специјалната јавна обвинителка Катица Јанева.

Денеска, информираат од СЈО, до Советот за утврфдување на факти биле поднесени и претставки против судијките Александра Поп-Стефанија и Лидија Петровска  заради утврдување на нестручно и несовесно вршење на судската функција.

Од кабинетот на Јанева укажуваат и на несоодветната соработка на Здружението на јавните обвинители на Република Македонија со СЈО.

– Имено, од страна на Здружението на јавни обвинители оневозможено е на годишното собрание на Здружението да присуствуваат тројца претставници на ова јавно обвинителство (СЈО, н.з). Така, дописот со кој се известуваме за одржување на собранието е од 13 февруари 2017 година, а е испратен преку препорачана пратка во пошта на 24 февруари 2017 година во 12.13 часот, иако самата седница на годишното собрание е закажана токму за 24 февруари 2017 година, со почеток во 12.30 часот – стои во соопштението на СЈО.

Записникот на судот од рочиштето за случајот „Шамари“, одржано на 22 февруари 2017 г., можете да го видите овде.


Јанева: Доста беше, судиите не може веќе да се кријат зад функциите


Скопје, 22 февруари, 2017 - 16:59 (META) 

Досега ги игнориравме, но веќе е време јавноста да знае дека судиите не може да се кријат зад своите функции, повикувајќи се на имунитетот и на слободното и независно судиско искажување, бидејќи овде се работи за повреда на кривичната постапка, вели специјалната јавна обвинителка Катица Јанева за „Дојче веле“, а во врска со случувањата на денешното рочиште за насилствата пред Општина Центар, во јавноста познат како случај „Шамари“.

Јанева потсетува дека голем број одлуки на Европскиот суд за човекови права во Стразбур се однесуваат токму на повредата на таа процедурална рамка и најавува повеќе жалби до Советот за утврдување факти, како и кривична пријава.

– Веќе се подготвени жалби до Советот за утврдување факти, за судии кои ја повредуваат кривичната постапка во делот на предистражната и на истражната постапка, но и во делот на закажаните рочишта по предмети. Таква претставка ќе има и за судијката Татјана Михајлова, а против неа ќе поведеме и постапка по членот 361 од Кривичниот законик, за фалсификување на службена исправа – вели Јанева.

Како причина за претставката и за пријавата, специјалната обвинителка ги наведува постапките на судијката Михалјова на денешното рочиште.

– Сакавме да прашаме зошто не ни е доставена аудио-визуелната снимка од претходното рочиште, што ја имавме побрано, а не ја добивме. На тоа судијката констираше дека обвинителката Фатиме Фетаи се однесува недолично, бидејќи зела збор без да ѝ го даде судијата, што не беше точно. Зборот „недолично“ судијката го издиктира и во записникот, на што реагирав јас и побарав да го избрише, бидејќи не беше соодветен. Но, таа продолжи, а притоа и погрешно го цитираше името на нашата институција, на што исто така реагиравме – објаснува Јанева.

Поради овие реакции Јанева и Фетаи се казнети од судијката Михајлова по 2.000 евра.


Антикорупциска отвори четири случаи за вработувања пред изборите


Скопје, 7 декември, 2016 - 13:40 (META) 

Државната комисија за спречување корупција (ДКСК) денеска на јавна седница отвори постапки за четири случаи на противзаконски вработувања во јавни институции и претпријатија во предизборниот период.

Претставките до антикорупциска ги поднесе Социјалдемократскиот сојуз на Македонија, а од вкупно пет, ДКСК не ја прифати претставката што се однесуваше за вработувањето на информатички администратор во самата комисија.

Антикорупциска отвори постапки во врска со огласи за вработувања, распишани во предизборниот период, на 6 нотари во Министерството за правда, двајца актери во Театарот за деца и младинци, еден наставник по турски јазик во Основното училиште „Страшо Пинџур“ во Карбинци и еден шалтерски работник во „Македонски пошти“.

Комисијата од овие институции побара дополнителни информации и образложенија за огласите и за вработувањата, односно дали тие биле итни и неодложни и дали институциите за овие работни места добиле мислење од Министерството за финансии.

Во врска со вработувањето на ИТ-администратор во ДКСК, од комисијата наведоа дека ја отфрлаат оваа претставка бидејќи имале потреба итно и неодложно да ангажираат лице на ова место, откако единствениот вработен администратор си дал отказ пред изборите, поради што било неопходно да се вработи ново лице за да може компјутерскиот систем и одржувањето на интернет-страницата на Комисијата да функционира непречено.


Министерот за правда Џафери мртов ладен додека ресорот му го тресат скандали


Скопје, 17 ноември, 2016 - 16:20 (META) 

Иако во најголемиот кривичен суд во земјава, Основниот суд Скопје 1, се случува циркус, а Извештајот на Европската комисија за напредокот на Македонија нотира сериозни недостатоци во правосудниот систем и опструкции врз работата на Специјалното јавно обвинителство, најодговорниот за правосудниот систем во земјава, министерот за правда, е целосно отсутен од случувањата во неговиот ресор – го нема во јавноста и не се изјаснува за ништо.

Дали во земјава има министер за правда и што тој прави деновиве?

Младиот кадар на ДУИ, 26-годишниот министер за правда, Валдет Џафери, досега не излезе со никаков коментар и со став околу извештајот на ЕК, а молчи и за случувањата во Кривичниот суд, каде судии преку писма и претставки се бунтуваат против претседателот на судот, Владимир Панчевски, а вработени меѓусебната нетрпеливост ја решаваат со навреди, закани и со физички пресметки.

Последната активност на министерот Џафери објавена на официјалната интернет-страница на Министерството за правда е неговото учество на традиционалната манифестација „Нотарски денови“ од 31 октомври годинава. На страницата, во категоријата каде треба да биде биографијата на Џафери, кој на функцијата беше назначен во април годинава, не само што нема никакви податоци, туку го нема ниту неговото име. Стои само слика.

Од манифестацијата „Нотарски денови“ досега во Кривичниот суд и во сферата на правосудството се случија следните настани, кои како да не го интересираат младиот министер Џафери:

  • Судијата Иван Џолев поднесе кривична пријава против претседателот на Кривичниот суд, Владимир Панчевски, за примање награда за противзаконско влијание;
  • Европската комисија во годинешниот Извештај за напредокот на земјава во евроинтеграциите, во делот за судството нотира назадување, политичкото влијание, опструкции, недостиг од независност и недостигот од спречување на селективна правда;
  • 13 судии испратија писмо и претставка до Судскиот совет од кого бараат да го санкционира Панчевски, поради злоупотреби и користење на официјалната интернет-страница на судот за лични постапувања и ставови за одреден судија;
  • Панчевски преку страницата на Кривичниот суд информираше дека дал исказ во Обвинителството за организиран криминал и корупција по пријавата до Џолев и дека веднаш потоа му поднел на колегата контрапријава за лажно пријавување на кривично дело;
  • Претседателката на највисокиот суд во земјава, Врховниот суд, Лидија Недлекова, во интервју за емисијата 360 степени“ на „Алсат М“ меѓу другото искоментира дека во судскиот систем во земјава има сериозни проблеми, а нејзиниот колега Владимир Панчевски не заслужува нов мандат како претседател на Кривичниот суд, со оглед на тоа како досега ја извршувал функцијата;
  • Кривичниот суд соопшти дека референтот за човечки ресурси првин ѝ се заканувал по животот, а потоа и физички ја нападнал портпаролката на судот, поради што интервениралa полиција и се правел записник. Референтот вчера тврдеше дека не ја нападнал колешката и го обвини Панчевски дека им се заканува на вработени кои реагирале на воспоставената норма за работа и незаконското распоредување на службениците;
  • Во меѓувреме, Панчевски изјави дека „секој судија во Основниот суд Скопје 1 е дуќанче, секој судија е чешмичка. Чешмичките им се затворија, па затоа се бесни“.

Министерството за правда, иако еден од најважните ресори во Владата, изминативе години го водеа министри кои не се покажаа многу на оваа функција, а некои од се најдоа вплеткани и во скандали.

Валдет Џафери министерската фотелја ја презеде од Аднан Јашари (исто така кадар на ДУИ), кој иако беше поактивен, речиси двегодишното министерување го заврши без позначајни резултати.

Неговиот претходник пак Блерим Беџети, не само што не помогна во унапредувањето на правосудниот систем, во јуни 2013 година се најде на тапет на јавноста, откако пратеникот на ДПА во Собранието, Беким Фазлиу рече дека за време на полициска акција во ноќниот клуб „Шери“ во Градскиот парк, кај Беџети бил најден пиштол и дрога.

Тогашниот министер за правда ги демантираше ваквите тврдења, но случајот остана нерасчистен и без епилог.


Суд ли е ова или панаѓур, дуќанче, чешмичка?


Скопје, 16 ноември, 2016 - 11:21 (META) 

Најважниот суд во земјава – Основниот суд Скопје 1, во кој, меѓу другите, се водат и најзначајните постапки за организиран криминал, изминативе десетина дена се претвори во „панаѓур“.

Кривичниот суд деновиве е местото каде вработени делат правда со туркања и со тупаници, судии се пресметуваат со кривични пријави и со контрапријави, се поднесуваат претставки до Судскиот совет за злоупотреби на официјалната интернет-страница. А како капак на сето ова, претседателот на судот, Владимир Панчевски, вели дека „секој судија во Кривичниот суд е дуќанче и чешмичка“ што секнале.

„Кои се тие судии, зошто се кријат? Стојат зад пресуди, а ваму се кријат со скратен потпис. Знаете што, секој судија во Основниот суд Скопје 1 е дуќанче, секој судија е чешмичка. Чешмичките им се затворија, па затоа се бесни. Токму овие 15 судии, кои ме обвинуваат дека сум ја злоупотребувал официјалната веб-страница на судот, го натерале судскиот доставувач да го однесе известувањето до Судскиот совет. Ете кој злоупотребува за лични цели“, вели Панчевски за „Сакам да кажам“.

Ова е коментарот на Панчевски на вчерашното писмо кое 13 негови колеги го испратија со Судскиот совет, од кој бараат да го санкционира претседателот на Кривичниот суд затоа што ја злоупотребува официјалната интернет – страница на судот за лични постапувања и ставови за одреден судија.

„Судијата Владимир Панчевски, како претседател на судот, информира за свои лични постапувања и ставови за одреден судија, при тоа крајно не почитувајќи го неговиот интегритет како судија. За ова тој ја користи официјалната веб-страница на судот. Се оградуваме од наведеното, имајќи ја предвид судската етика и морал, а воедно и почитувањето на тајноста и на заштитата на интегритетот за каква било поведена постапка кон судија… Со оглед дека односите меѓу колегите се крајно нарушени, засегнати сме сите ние со наведеното известување, бидејќи може тоа да биде кој било од нас, кој во моментов не се согласува со сегашниот претседател. Во таа насока се обраќаме до вас, како надлежен орган, во согласност со вашите законски овластувања, да преземете соодветни мерки кон претседателот на судот…“, се вели во писмото на судиите до Судскиот совет, чиј претседател, пак, Зоран Караџовски, вели дека писмото ќе го третираат како анонимно бидејќи судиите се потпишале со скратени потписи, а не со цело име и презиме.

Судијата со кого Панчевски лично се пресметува преку интернет-страницата на Кривичнито суд, е Иван Џолев, кој пред десетина дена му поднесе кривична пријава на претседателот на судот со која го товари за примање награда за противзаконско влијание. Панчевски во петокот, пак, извести дека во Обвинителството за организиран криминал и корупција дал исказ во врска со пријавата, но и дека веднаш потоа му поднел контрапријава на Џолев за лажно пријавување кривично дело.

Инаку, двајцата, според неофицијални информации, поднеле кандидатури за нов претседател на Основниот суд Скопје 1, кој треба да биде избран по изборите на 11 декември.

Панаѓурската атмосфера вчера ја дополни и веста дека во судот имало тепачка меѓу двајца вработени, доаѓала полиција, се правел записник и се поднесувале кривични пријави.

„Во просториите на Кривичниот суд пријавен е настан, при кој еден вработен – раководител на одделот за човечки ресурси Г.С. со физички напад ја загрозил сигурноста на еден од портпаролите П.К. во присуство на судија од одделот за претходна постапка С.Ј., така што вработениот Г.С. најпрвин вербално ѝ се заканил на П.К., загрозувајќи ѝ ја сигурноста со упатени закани по животот и телото, по што со примена на физичка сила ја турнал од столчето и ја напуштил просторијата. Нападнатата веднаш телефонски го пријавила настанот во МВР, при што интервенирала полицијата и случајот е документиран и преземен од инспекторите за насилен криминал при МВР, а против напаѓачот од страна на нападнатата поднесена е кривична пријава по член 144, став 3 – загрозување на сигурноста, која понатаму треба да се процесуира од надлежните органи. Во врска со настанот, и од страна на судската управа ќе бидат преземени соодветни мерки“, известија од судот.


Весковски: ВМРО-ДПМНЕ и ГРОМ на Бадник незаконски носеа урбанистички планови за Карпош


Скопје, 9 јануари, 2016 - 14:16 (META) 

Советничката група на СДСМ во Општина Карпош поднела две иницијативи за покренување постапки пред надлежните органи, поради, како што велат, незаконското и неделовничко носење на два урбанистички планови, кои советниците на ВМРО-ДПМНЕ и на ГРОМ ги усвоиле на 6 јануари, на празникот Бадник.

– На седницата на Советот на општина Карпош, одржана на големиот христијански празник Бадник, скришно, на нетранспарентен начин, советниците на ВМРО-ДПМНЕ и на ГРОМ ги усвоија деталните урбанистички планови за Тафталиџе 1 и за Карпош 3. Ваквата насилна, недемократска одлука на ВМРО-ДПМНЕ и на ГРОМ, односно на Никола Груевски и на Стевчо Јакимовски е спротивна на интересите и на барањата на граѓаните на Карпош. Граѓаните со право реагираат и не се согласуваат со „дил-оринтед“ одлуките на Груевски и на Јакимовски, за што беа подесени и стотици анкетни листови токму за овие детални урбанистички планови. Граѓаните на Карпош бараат зеленило наместо урбана џунгла од згради – изјави денеска на прес-конференција претседателот на општинската организација на СДСМ во Карпош, Душко Весковски.

Тој соопшти дека советниците на СДСМ демонстративно ја напуштиле седницата „на која што без претходна најава, нетранспарентно и кукавички“ биле вметнати двете точки за усвојување на овие детални урбанистички планови.

– До Државниот инспекторат за локална самоуправа поднесoвме претставка поради прекршувањето на повеќе законски и подзаконски акти на Општината. Дополнително, ќе ги поддржиме и сите иницијативи на граѓаните со кои на демократски начин се изразува незадоволството од ваквиот начин на внесување урбанистички хаос и уништување на квалитетот на животот на граѓаните во општина Карпош – рече Весковски.