Гордана Силјановска-Давкова: Противничката на Договорот од Преспа како можен кандидат за претседател


Скопје, 6 февруари, 2019 - 11:28 (META) 

Деновиве доста се дискутира околу можноста Правниот факултет при УКИМ одново да даде кандидат за станар во претседателската вила на Водно, откако актуелниот Ѓорѓе Иванов почнува да си ги пакува своите лични предмети, заради завршување на претседателскиот мандат. Имено, се говори за тоа дека не само локацијата од каде се бира нов носител на највисоката функција во државата е истоветна на онаа од пролетта 2009 година, кога со потписи на своите колеги Иванов стана кандидат на ВМРО ДПМНЕ, туку дека сега ќе се јави своевиден „копирајт“ во методот на кандидирање. Се собираат потписи на колегите на потенцијалната кандидатка – професорката по уставно право  на правниот факултет „Јустинијан Први“, Гордана Силјановска-Давкова. Таа е наводно изненадена и трогната од кандидатурата и ветува дека ќе размисли.

Иако, конкурсот на партијата ВМРО ДПМНЕ е практично затворен на 1 февруари, а гласањето за кандидатите ќе биде тајно во средината на месецов во Струга, јасно е дека Силјановска – Давкова предолго е на браникот на политиките на оваа партија за да не биде фаворит, се разбира, ако се кандидира. И овојпат, при можната кандидатура, како кај Иванов, би се одело на тоа дека потенцијалната кандидатка не е поврзана со политиката (!), па оттаму треба во гласачката јавност да се создаде слика дека се јавува како квалификувана личност која нема партиско минато.

Ова последното секако не е точно, бидејќи Силјановска-Давкова во време на стартот на транзицијата кај нас, беше член на првата политичка Влада на РМ, направена веднаш по кусиот опстанок на т.н. експертска влада на Кљусев. Во оваа политичка Влада влегоа и некогашните членови на Младинската напредна партија (некогашниот Сојуз на социјалистичката младина), која се спои со Сојузот на реформски сили на Македонија на Стојан Андов, а потоа станаа Либерална Партија (1990). Како и да е Силјановска-Давкова доби министерство без ресор (1992 – 1884), но беше член и на телото кое работеше на Уставот на РМ (Уставна комисија на Собранието од 1991 г.).

Во она време, а и сега се мислеше дека Владата на Црвенковски ја прави шефот на државата – Глигоров и дека истата е „скопска“, односно дека министри станаа главно деца на негови политички пријатели (Крсте Црвенковски, Владо Малески …), во чиј круг може да се стави и снаата на покојниот социјалистички функционер Павле Давков.

Професорката е родена во Охрид во мај 1955 година. Основно и средно образование завршила во Скопје, на Правен се запишала во 1973 година, а истиот го има завршено во 1978 година. Нејзината прва работна функција е асистент на професорот Владимир Митков , по предметот Меѓународни политички системи.

Докторирала во 1993 година на Универзитетот во Љубљана. Основач е и на првиот Совет на европско движење во Македонија. Во периодот од 2012 до 2016 година  беше и член на Веницијанската комисија за малцински прашања. Денес е редовен професор на Правниот факултет во Скопје, на Институтот за правни и политички науки. Во официјалната биографија стои дека е автор на над 200 научни трудови од областа на уставното право, како и член на бројни домашни и меѓународни институти и правни асоцијации.

Нејзиниот политички став стана погласен во многу прилики на почетокот на милениумот, а особено во миговите кога беше против новата територијална поделба на Македонија (2004). Во основа текстовите што покажуваат наклонетост кон нејзината евентуална кандидатура главно ја третираат како еден од лидерите на професорскиот пленум. Таа беше дел и од протестот на професорите пред Собранието, каде одржа одличен говор зошто предложеното законско решение е погрешно, ја критикуваше затвореноста на министерството за образование кое не ги консултираше експертите, а не се согласуваше ниту со недостигот на концепт како да се развива факултетското образование.

Силјановска гостуваше во десетина емисии во кои цврсто застана против новиот Закон за употреба на јазиците со кој дефакто се воведува двојазичност во Македонија на повеќе нивоа, вклучувајќи ги сите институции. Таа е еден од фронтмените на отпорот кон овој акт, заедно со професор Билјана Ванковска и академик Катица Ќулафкова.

Секако, Силјановска-Давкова се противеше на инсинуациите дека е „албанофоб“ и во своите настапи користеше исклучително правни аргументи, особено за постапката во која беше донесен Законот со европско знаменце.

За неа Преспанскиот договор е неприфатлив и „покажува дека Македонија е земја во распаѓање која се ставила во подредена улога на Грција со дозвола да ѝ се мешаат дрско во внатрешните прашања“.

Повеќе за профилот на Гордана Силјановска-Давкова може да прочитате во Вистиномер.


Нема договор, само желба за заеднички претседателски кандидат на Села и Касами


Скопје, 1 февруари, 2019 - 13:27 (META) 

Алијансата за Албанците (АА)на Зијадин Села и крилото на Беса предводено од Биљал Касами не разговарале можноста на претседателските избори да настапат со свој кандидат, иако во двете партии има желба за такво нешто, јавува „Порталб“.

– За ова прашање не е разговарано со движењето Беса.  Факт е дека има заедничка желба тоа да се случи, но нема договор. Денеска Централниот совет ќе одржи состанок и ќе донесе одлука за тоа  – за „Порталб“ изјави Флакрон Беџети, портпарол на АА.

Пратеникот на Беса, Фадил Зендели ги отфрла пишувањата во медиумите дека е постигнат договор на двете партии за заеднички претседателски кандидат на албанската опозиција, но вели оти идејата постои и дека веќе се разговара.

– Се дискутира да се оди со заеднички кандидат на претседателските избори. Има намера да се оди со кандидат, има идеја и желба, но нема договор. Денеска ќе одржиме консултации со помал круг на партиското водство и ќе донесеме став за ова  прашање – вели Зендели за „Порталб“.

Претходно во некои медиуми се појавија написи дека двете партии веќе се договориле да учествуваат со заеднички кандидат на на претседателските избори.

Инаку, ДУИ се откажа од идејата за консензуален кандидат на владејачкото мнозинство и реши да настапи со свој кандидат, но се уште не соопштила кој ќе биде тоа. СДСМ својот кандидат ќе го избере на конгрес на 3 март, додека ВМРО-ДПМНЕ се очекува да го соопшти својот кандидат деновиве.

Партијата распиша јавен конкурс на кој секој граѓанин можеше да се номинира за претседателски кандидат што ќе ја добие поддршката на ВМРО-ДПМНЕ. Единствените што досега соопштија дека влегуваат во таа трка се пратеникот Владимир Ѓорчев и Филип Петровски, еден од главните имиња на движењето „Бојкотирам“, а професорката Гордана Силјановска – Давкова од Правниот факултет во Скопје доби поддршка од триесетина професори за нејзина кандидатура како натпартиска личност.


Алијанса за Албанците: Одлуката на ДУИ да излезе со свој кандидат е за поздравување


Скопје, 31 јануари, 2019 - 10:20 (META) 

Алијанса за Албанците (АА) денеска ја поздрави вчерашната одлука на Централното претседателство на Демократската унија за интеграција (ДУИ) да излезе со свој кандидат на претседателските избори.

АА порача дека „ДУИ го прифати предизвикот на Зијадин Села за претседателските избори“ но ја поттикна владејачката партија да го прифати и предизвикот за парламентарни избори“.

„Посакуваме кандидатот за претседател од редовите на ДУИ да биде Албанец! Не би сакале да веруваме дека оваа нивна одлука дојде како последица на затворената врата и презир кон ДУИ во однос на нивната лажна идеја за консензуален кандидат, денес со СДСМ, вчера со ВМРО-ДПМНЕ“, вели АА.


Влатко Ѓорчев со претседателски амбиции и политички стаж без криминален багаж


Скопје, 31 јануари, 2019 - 10:16 (META) 

Пратеникот на ВМРО-ДПМНЕ, Влатко  Ѓорчев, е првиот кој се охрабри јавно да ги соопшти своите амбиции да влезе во битката за шеф на државата. Тој уште пред една недела (23.01.2019), објави дека се пријавил на конкурсот на ВМРО-ДПМНЕ за претседателски кандидат, кој трае до денеска, пишува „Вистиномер“.

Ѓорчев е дипломиран политиколог, кој во август минатата година наполни 40 години и со тоа формално го исполни уставниот услов за да може да се кандидира за претседател на државата. Оженет е со Сузана Питри, Американка од Охајо и имаат четири деца: Марта (8), Филип (6), Никола (5) и Катерина (2).

Иако е млад, има долг политички стаж повеќе од 20 години. Член на ВМРО-ДПМНЕ е уште од 1996 година. Пошироката јавност првпат слушна за Ѓорчев на почетокот на 1997 година за време на студентско-средношколските протести против употребата на албанскиот јазик на Педагошката академија во Скопје. Некаде во тој период започнува и неговиот пробив во политиката, најпрво низ структурите на својата матична партија ВМРО-ДПМНЕ, а потоа и како партиски портпарол (2001 -2004).

Лојален на сите лидери на ВМРО-ДПМНЕ

Ѓорчев веќе 13 години е пратеник во Собранието на Република Македонија, учесник е во пет собраниски состави. За првпат е избран за пратеник на изборите во 2006 година, а потоа следат уште четири мандати  во 2008, 2011, 2014 и 2016 година. На сите избори од 2006 година наваму е носител на кандидатска листа во третата или во шестата изборна единица и има заслуги за изборните победи на ВМРО-ДПМНЕ.

Сепак, освен пратеничкиот мандат, немаше други функции во текот на едондецениското владеење на ВМРО-ДПМНЕ и не беше дел од ниту една влада предводена од Никола Груевски.

Сиве овие години Ѓорчев е ревносен бранител на политиките на ВМРО-ДПМНЕ. Неговите ставови секогаш биле во линија на генералната партиска политика независно кој стоел на партиското кормило. Тој со иста препознатлива жестина ги застапуваше партиските ставови како портпарол во времето на Љубчо Георгиевски, како пратеник во Собранието за време на 11-годишното владеење на Груевски, а остана лојален и на новото раководство предводено од Христијан Мицкоски, а краток период беше в.д. координатор на пратеничката група.

Голема „километража“, но без криминален багаж

Влатко Ѓорчев има голема километража во политиката и, иако може да се спори со неговите ставови, реториката, па и театралноста со која знае да ги обои настапите, тој, сепак, е еден од ретките експонирани кадри на ВМРО-ДПМНЕ кој на грбот нема криминален багаж, а, исто така, не можат да му се залепат етикети дека е антиевропски настроен.

Сепак, јавноста му забележува што никогаш не се одважи да се дистанцира или, пак,  огради од штетните политики на својот поранешен лидер Никола Груевски.

Но исто така, треба да се каже и дека Ѓорчев одигра исклучително позитивна улога за време на крвавиот собраниски инцидент од 27 април 2017 година, кога несебично и со жив штит ги бранеше нападнатите колеги пратеници и помогна во нивното спасување и извлекување од Собранието. За неговата постапка во Парламентот доби јавна благодарност од пратениците од СДСМ и од ДУИ. Социјалдемократот Хари Локвенец на едно од рочиштата од судењето поврзано со овој настан сведочеше дека „Ѓорчев се однесувал кон нив како кон сопствените деца, обидувајќи се да ги заштити од сите опасности“.

Повеќе за биографијата на Влатко Ѓорчев може да прочитате во Вистиномер.


Почина Љубиша Георгиевски


Скопје, 6 декември, 2018 - 10:38 (META) 

Утрово на 81 година почина Љубиша Георгиевски, театарски и филмски режисер, драмски писател, теоретичар на театарот и професор по театарска режија и актерска игра.

Веста за смртта на Георгиевски на социјалните мрежи ја објави актерот Роберт Вељановски.

Љубиша Георгиевски е роден во Битола на 30 мај 1937 година.

Тој беше и кандидат за претседател на државата во 1994 година, а беше и претседател на Собранието од 2006 до 2008 година.

Во периодот 2000 – 2004 година беше македонски амбасадор во Бугарија, а во периодот од 2009 до 2013 година ја извршуваше и функцијата амбасадор на Македонија во Србија


Ахмети: Денко Малески е прифатлив кандидат за иден консензуален претседател


Скопје, 28 ноември, 2018 - 16:01 (META) 

Претседателот на ДУИ, Али Ахмети, одговарајќи на новинарско прашање денеска го откри својот фаворит за иден претседател на државата, јави телевизијата 21.

Според Ахмети, најдобар кандидат засега е Денко Малески.

– Досега не сме зборувале за имиња, но мислам дека Денко Малески е угледен професор, професор што ги исполнува сите стандарди. Но сепак останува за ова да разговараме со сите политички субјекти – рече Ахмети.


Николиќ сè уште чека договор, Вучиќ и натаму молчи


Белград, 16 февруари, 2017 - 21:00 (META) 

Претседателот на Србија Томислав Николиќ, по синоќешната неофицијална најава дека има намера повторно да се кандидира за шеф на државата, денеска изјави дека и понатаму чека договор со премиерот на земјата, Александар Вучиќ, кого врвот на неговата партија – Српската напредна странка (СНС) го предложи за претседателски кандидат. Вучиќ сè уште не излегол со став околу ова прашање.

– Јас и понатаму чекам договор со Александар Вучиќ. Пред тоа нема да носам никаква одлука и во своите изјави никого нема да го ставам пред свршен чин – вели Николиќ за српскиот дневен весник „Курир“.

Српските медиуми пишуваат дека по синоќешната најава на Николиќ дека има намера да се кандидира за претседател на земјата, комуникацијата меѓу него и Вучиќ „целосно пукнала“ и дека српскиот премиер нема намера ниту да го бара Николиќ, ниту да одговара на неговите повици.

Николиќ изминатите месеци не криеше дека сака уште еден претседателски мандат. Српските медиуми денеска пренесуваат дека тој од Вучиќ наводно го барал челното место во СНС и во владата, во замена за поддршка на неговата (на Вучиќ) кандидатура за претседател. Вучиќ, како што наведуваат медиумите, не го прифатил предлогот и свикал седница на претседателството на СНС, на кое едногласно било предложено тој да биде кандидат на партијата за претседател на Србија.

Главниот одбор на СНС утре треба да ја донесе конечната одлука за кандидатурата на Александар Вучиќ на претстојните претседателски избори во Србија.


Сто јавни личности побараа од српскиот омбудсман да се кандидира за претседател на државата


Белград, 25 ноември, 2016 - 16:53 (META) 

Стотина јавни личности во Србија, меѓу кои угледни книжевници, новинари, глумци и професори, денеска упатија апел до народниот правобранител, Саша Јанковиќ, да се кандидира за претседател на Србија како непартиски кандидат и ги повикаа демократски ориентираните граѓани и партии да ја поддржат оваа иницијатива.

Тие оценуваат дека Србија веќе неколку години се соочува со длабока и тешка криза, дека институциите се разорени или под притисок, како и дека сиромаштијата е реалност за мнозинството граѓани и додаваат дека граѓаните имаат можност да почнат да ги менуваат работите на претседателските избори кои треба да се одржат следната година.

Меѓу потписниците на апелот се и писателот Драган Великиќ, режисерот Горан Марковиќ, глумците Небојша Глоговац, Бранко Цвејиќ, Воја Брајовиќ, Никола Којо, Никола Ѓуричко, Предраг Ејдус и Радослав Миленковиќ, универзитетските професори Илија Вујачиќ, Ратко Божовиќ и Миодраг Зец, правниците Вида Петровиќ-Шкеро и Зоран Ивошевиќ и други јавни личности.

Јанковиќ, кој од позицијата омбудсман често ја критикува власта и кого медиумите подолго време го споменуваат како можен заеднички кандидат на опозицијата на претседателските избори, сè уште не реагирал на овој апел.

Апелот го поддржаа претседателот на опозициската Нова партија, Зоран Живковиќ, кој на „Твитер“ напиша „поддршка“, додека поранешниот претседател на Демократската партија, Бојан Пајтиќ, исто така на „Твитер“ напиша дека апелот „покажува дека има надеж за Србија“.

Како можен претседателски кандидат медиумите го споменуваат и поранешниот шеф на дипломатијата и кандидат на Србија за генерален секретар на Обединетите нации, Вук Јеремиќ.

Исто така, се очекува на изборите да се кандидира и лидерот на Српската радикална партија и поранешен обвинет од Хашкиот трибунал, Воислав Шешељ.

Кандидатот на владејачката Српска напредна партија засега сè уште не е официјално соопштен, но се верува дека тоа ќе биде актуелниот претседател Томислав Николиќ, и покрај тоа што одредени аналитичари веруваат дека на кандидатура во последен момент може да се одлучи и актуелниот премиер, Александар Вучиќ, кој засега ја негира таквата можност.


Обама го нарече Трамп „чукнат“ и „неинформиран“


Виентиан, 8 септември, 2016 - 17:48 (META) 

Барак Обама денеска од Лаос го критикуваше Доналд Трамп и го нарече „чукнат“ и „неинформиран“, откако републиканскиот кандидат за претседател на САД синоќа изјави оти смета дека рускиот претседател, Владимир Путин, е подобар лидер од Обама, јавува „Би-би-си“.

Обама, кој учествува на Азискиот самит во Лаос, изјавил дека секојпат кога Трамп ќе почне да зборува, станува сè појасно дека кандидатот на републиканците е неквалификуван да биде претседател.

„Мислам дека човекот е неквалификуван да биде претседател на САД и секојпат кога ќе прозбори тоа се потврдува. Мислам дека она што е важно за јавноста и за новинарите е да го следат што зборува и да поставуваат прашања за тоа што изгледа контрадикторно, неинформирано или како чисто чукнати идеи“, изјави Обама.

Трамп, кој синоќа во Њујорк заедно со својата ривалка од демократската партија, Хилари Клинтон, одговараше на прашања на воените ветерани, рече дека доколку биде избран за претседател на САД во ноември, „добро ќе се сложува со Путин“.

„Тој (Путин) има рејтинг од 82 отсто. Кога тој ме нарекува брилјантен, јас ќе го прифатам неговиот комплимент“, изјави Трамп, додавајќи дека рускиот претседател има „одлична контрола врз својата земја“.


Трамп и официјално е претседателски кандидат на републиканците


Вашингтон, 20 јули, 2016 - 9:53 (META) 

Доналд Трамп сега и официјално е кандидат на Републиканската партија за претседател на САД, јави „Си-ен-ен“, пренесувајќи ги резултатите од гласањето на републиканската конвенција.

Трамп освои доволен број делегати за номинација и убедливо е во предност во однос на Тед Круз.
Трамп засега има повеќе од 1.720 делегати, со што ја мина долната граница, односно минимум 1.237 делегати за номинација. Вкупниот број на делегати изнесува 2.472, а Круз „заостана“ за нешто повеќе од 480 делегати.

За време на конвенцијата уапсени се тројца демонстранти кои со знамиња го изразиле својот протест против Трамп.
Полицијата во Кливленд претходно спречи судир меѓу демонстрантите во близина на салата каде што се одржуваше републиканската конвенција.