Претседателските избори ќе се одржат на 21 април, Џафери ќе ги распише на 8 февруари


Скопје, 15 јануари, 2019 - 14:43 (META) 

Претседателот на Собранието, Талат Џафери, денеска соопшти дека претседателските избори ќе ги распише на 8 февруари. Првиот круг од изборите ќе се одржи на 21 април, а вториот на 5 мај.

Џафери вели дека првично било планирано првиот круг од изборите да се одржи на 14 април, а вториот на 28 април, но бидејќи се совпаѓа со Велигден, изборите ќе се поместат за една недела подоцна.

Тој додаде дека во тој случај крајниот рок за инаугурација на новиот претседател ќе биде 12 мај, бидејќи на тој датум завршува мандатот на Ѓорге Иванов.

Заедно со претседателските избори ќе се одржат и локални избори во три општини каде сега има в.д. градоначалници.


Што нè очекува во 2019: Прогресивен данок, поврат на ДДВ, УЈП ќе ни ѕирка во сметките …


Скопје, 31 декември, 2018 - 12:24 (META) 

Изминува бурна година во која македонските граѓани беа изложени на невидени политички скандали, неизвесност и економска стагнација. Иако само времето може да покаже дали ќе дојде до позитивни промени во 2019 година има неколку економски и политички моменти кои уште сега може да се предвидат, а кои битно ќе влијаат врз секојдневното живеење.

Извесно е дека од 1 јануари 2019 година ќе има прогресивно оданочување од 18 отсто за примањата на лицата кои имаат месечен личен доход над 90.000 денари. Според новата регулатива, доколку даночната основа на поединечна исплата по некој од основите кој се даночи со прогресивни стапки го надминува прагот од 90.000 денари, за делот над 90.000 ќе се плати данок по повисоката стапка од 18 отсто уште во моментот на исплатата. На пример, доколку се исплаќа надоместок по основ на договор за дело од 100.000 денари, исплатувачот ќе треба да плати вкупен данок од 10.800 денари (10 отсто односно 9.000 денари за делот што е до 90.000 денари и 18 отсто односно 1.800 денари за делот што го надминува прагот од 90.000 денари).

Во најава е дека од 1 јули 2019 година ќе има поврат на ДДВ за граѓаните. Овој проект требаше да започне од 1 февруари, но поради подготовка на системот беше одложен. Се предвидува повратот на 15 отсто ДДВ да биде лимитиран на 30.000 денари месечно.

Можеби една од најпозитивните промени е што идната година ќе стапат на сила измените на Законот за нотаријат и на Законот за извршување со кои се намалуваат тарифите на нотарите и на извршителите од 50 до 90 отсто. Во постапките пред нотарите, граѓаните ќе бидат ослободени од судските такси и од надомест за клаузула за правосилност и извршност, а нотарската награда ќе биде 10 отсто од главниот долг, но не повеќе од 500 денари. Ако долгот е илјада денари, надоместокот за нотар ќе биде 100 денари. Ако долгот е 10 илјади денари, надоместокот наместо 1.000, ќе биде 500 денари. За сметките за вода, смет и одржување на заедничките простории во висина на 6 илјади денари, нема да биде потребно учество на адвокати, како и за сметки за струја и парно до 15 илјади денари.

Наградите на извршителите исто така се намалуваат, со тоа што се става ограничување дека при извршување на платни налози за комунални трошоци, наградата не може да биде повеќе од 20 отсто од висината на главниот долг.

Следната година стапуваат на сила и измените на Законот за банките со кои Управата за јавни приходи ќе може да има увид во податоците и информациите со кои располагаат банките само врз основа на писмено барање кое се поднесува за секое поединечно физичко лице. Измените имаат за цел да и олеснат на Управата за јавни приходи, која од 2019 година ќе започне да изготвува даночна пријава за секој даночен обврзник.
Големи се очекувањата во политиката кои се базирани на тоа дали ќе биде прифатен Преспанскиот договор со кој се предвидува промена на името на државата во Република Северна Македонија, а за кој Собранието треба да одлучува уште на средината на јануари, 2019 година.

Според најавите од НАТО, доколку договорот биде прифатен, Македонија може да стане 30. членка на алијансата уште на почетокот на следната година. Преговорите за членство се веќе почнати и се очекува да завршат во јануари 2019.

Амбициозни се плановите на Владата и во однос на зачленувањето во Европската Унија. Се очекува наредната 2019-та да биде годината кога Македонија ќе ги почне преговорите за членство во ЕУ. Ваквите очекувања се темелат на финализацијата на обврските од Преспанскиот договор, на реализацијата на зацртаното од Планот 18 и пред сè на изјавата на еврокомесарот Јоханес Хан за временската рамка за пристапување кон Унијата.

Нишката неизвесност што се уште постои во однос на Преспанскиот договор, не важи за претседателските избори. Имено, во април 2019 година се закажани избори по кои на местото на Ѓорѓе Иванов ќе седне ново лице.

Изненадување може да биде само реализацијата на „срамежливите најави“ за можен избор на претседател во Собранието доколку не се постигне цензус на претседателските избори, што дефинитивно би била уште една новина по која ќе остане запаметена 2019 година.


Тодоров: Или победа на претседателските избори или Мицкоски пакувај куферите


Скопје, 28 декември, 2018 - 15:17 (META) 

Не ја бива вака дечки. Менувајте ја тактиката радикално, борете се од внатре и обидете се да влијаете врз курсот на партијата, зашто очигледно ја носат во погрешен правец. Не носат во пораз на претседателските избори, вели поранешниот министер Никола Тодоров кој пред извесно време беше исклучен од ВМРО-ДПМНЕ.

Тодоров во пост на „Фејсбук“ вели дека членството и поддржувачите очекуваат победа на ВМРО-ДПМНЕ на претседателските избори и дека фокусот треба да биде на тоа, а не на, како што вели, опсесијата на Мицкоски по секоја цена да стане премиер.

– Таа опсесија во комбинација со неговата невидена суета ја влечат и него и партијата надолу. Мицкоски премиер нема да стане ако ВМРО ги загуби претседателските избори. Тогаш ќе си оди. Ќе мора, ќе биде неизбежно, бидејќи членството ќе сфати дека е водено од лидер кој не може и не знае да испорача победа. Ќе биде фрустрирано од фактот што уште повеќе ќе се зацврсти СДСМ на власт. Поразот е пораз, особено на претседателски избори, но фактот што со тоа ќе му помогне на Заев и СДСМ да ги добијат и следните парламентарни избори ме иритира и е крајно неприфатливо за најголемиот број членови – вели Тодоров.

Тој потенцира „да не се мисли на парламентарни избори, да не се мисли на фотељите, ни на претседателската во ВМРО, ниту на премиерската туку на победата претседателските избори и партијата да почне сериозно да се менува, демократизира и реформира за да прерасне во Европска, модерна, центар-десна политичка партија“.

Во спротивно, му порача на Мицкоски да си ги пакува куферите.

-Како сакаме да победиме ако повторно сме скарани со целиот свет, повторно се делат луѓето на предавници и патриоти и повторно живееме во историјата? Поделени и раскарани, дополнително го делиме и онака поделеното македонско национално ткиво. Кај младите сме тапа, у Скопје не проаѓаме – смета Тодоров.


Џафери нема да се кандидира на претседателските избори


Скопје, 25 декември, 2018 - 12:49 (META) 

Претседателот на Собранието Талат Џафери на брифинг со новинарите рече дека нема да се кандидира на претстојните претседателски избори и ќе остане претседател во Собранието.

Што се однесува до идејата Собранието да бира шеф на државата, Џафери рече дека за тоа треба да се одлучни сите парламентарни групи, а доколку има консензус ќе треба да се изгласа измена на Уставот со која законски би се уредил неговиот избор.

Џафери верува дека прашањето за уставните измени кои произлегуваат од Договорот од Преспа ќе затворено до средината на јануари, а тоа ќе отвори можност законот за ратификација на договорот, заедно со оној за употребата на јазиците да биде испратен во службен весник без потпис на претседателот Ѓорге Иванов.

– Седницата за уставните измени е свикана за 9 јануари. Очекувањата се до 15 јануари да биде завршена целата постапка и да бидат усвоени амандманите. Ако се раководиме од искуството дебатата не би требало да трае повеќе од пет – шест денови. Но, онака како што е најавено, неприсуството на опозицијата остава можност и таа да заврши и побрзо. Во секој случај тоа прашање ќе биде затворено до средината на јануари. Со тоа се отвора патот двата закони да одат во службен весник – изјави денеска Џафери.

Во врска со одбивањето на Иванов да ги потпише овие два закони, Џафери вели дека тој има обврска тоа да го направи, бидејќи, како што потенцира волјата на Собранието, не може да се попречи и тоа ќе се реализира.

– Тоа ќе се случи кога ќе ги пратам во Службен весник. Мој потпис има. Тоа е одлука – вели собранискиот спикер.

Во врска со иницијативата за закон за пратенички привилегии, Џафери вели дека не може да коментира додека не го види текстот на законот.

– Не може некој да биде пратеник четири години, а потоа да брка по контејнери – вели тој и додава дека во голем број земји во светот, со законско решение бил уреден статусот на пратениците по истекот на мандатот.

Изминатата година, според него поминала според зацртаната агенда, а Собранието си ја завршило работата за која што е надлежно.


Зимбаве гласа на првите избори без Мугабе


Хараре, 30 јули, 2018 - 11:39 (META) 

Во Зимбаве денеска се одржуваат првите избори по ерата на Роберт Мугабе, кој со оваа африканска земја владееше четири децении. Се гласа за претседател, за парламентот и на локални избори.

Мугабе рече дека нема да гласа за Емерсон Мнангагва, кој го замени на лидерското место по неговото уривање од власт. Мнангагва (75) е од владејчката партија Зану ПФ, а неговиот главен противкандидат е лидерот на опозицијата Нелсон Чамиса. Според анкетите, се очекува тесна победа на Мнангагва, иако има 23 кандидати за претседател. Доколку победи Чамиса, тој со 40 години возраст, ќе биде најмладиот избран претседател на оваа држава.

Во текот на четирите децении на власт, Роберт Мугабе владееше речиси деспотски, а земјата проживуваше една од најголемите економски кризи во светот во последните две децении.
Околу 5,3 милиони граѓани имаат право на глас, а со одлука на Уставниот суд, граѓаните што живеат во странство овојпат нема да можат да гласаат.


Рускиот опозициски лидер Алексеј Навални приведен за време на протест во Москва


Москва, 28 јануари, 2018 - 15:18 (META) 

Рускиот опозициски лидер, Алексеј Навални денеска е приведен во Москва за време на протестите на неговите приврзаници кои повикуваат на бојкот на претседателските избори во март, јавуваат светските агенции.

Навални ги повика своите приврзаници да продолжат со протестите и покрај неговото приведување.

„Ме приведоа. Тоа не значи ништо, не излеговте поради мене, туку поради својата безбедност“, напиша Навални на „Твитер“.

Инаку, денеска пријавени се повеќе протести ширум Русија на кои учествуваат од неколку десетици до неколку стотици демонстранти.

Претседателските избори се закажани за 18 март, а според анкетите, рускиот претседател Владимир Путин има поддршка од околу 80 отсто од гласачите.


Милош Земан останува претседател на Чешка


Прага, 27 јануари, 2018 - 18:32 (META) 

Актуелниот претседател на Чешка, Милош Земан победи на претседателските избори во земјата, објавија медиумите. Резултатите по пребројани 94,95 отсто од гласовите покажуваат дека Земан во вториот круг освоил 52,16 отсто, наспроти неговиот противкандидат Јири Драгош со освоени 47,83 отсто од гласовите.

Во првиот круг од претседателките избори, Земан освои 38,6 отсто гласови, а Драхош 26,6 отсто. Анкетите предвидуваа тесна трка во вториот круг.

Претседателските избори во Чешка се сметаа за референдум за 73-годишниот Земан кој се залага за поблиски односи со Русија и Кина, ја поддржува острата политика кон мигрантите, а го поддржа и Доналд Трамп во кампањата во 2016 година.

Според политичките аналитичари, Земан досега никогаш не го довел во прашање членството на Чешка во Европската Унија, но, од друга страна, има речено дека би поздравил референдум за излегување од Унијата.

Неговиот противкандидат Јири Драгош, кој е професор по хемија и претседател на Чешката академија на науки во два мандати, сака да го промени трендот на поларизација на чешкото општество. Тој како и Земан ги отфрли квотите на ЕУ за прием на мигранти, но за разлика од актуелниот претседател, смета дека земјата треба да направи разлика помеѓу економски мигранти и оние кои бегаат од војна и насилство.

Претседателот на Чешка има ограничена извршна власт, но, тој го именува премиерот и гувернерот на централната банка, ја претставува земјата во странство и може да има големо влијание на јавното мислење.


Претседателски избори во Египет од 26 до 28 март


Каиро, 8 јануари, 2018 - 17:36 (META) 

Претседателските избори во Египет ќе бидат одржани од 26 до 28 март, а евентуалниот втор круг во април, соопшти египетската изборна комисија.

Претседателот на Египет, Абдел Фатах Ел-Сиси се уште не објави дали ќе се кандидира за втор четиригодишен мандат, но се очекува неговото учество и победа на изборите.

Ако ниту еден кандидат не освои повеќе од 50 отсто од гласовите во март, вториот круг ќе биде одржан од 24 до 26 април.

Египетската дијаспора ќе гласа порано, од 16 до 18 март и ако има потреба од 19 до 21 април.


Поранешниот фудбалер Жорж Веа избран за претседател на Либерија


Монровија, 28 декември, 2017 - 21:35 (META) 

Поранешниот фудбалер Жорж Веа ќе биде новиот претседател на Либерија, откако освои 61,5 отсто од гласовите во вториот круг од претседателските избори во оваа африканска земја, додека неговиот противкандидат, Џозеф Боакаи доби 38,5 отсто од гласовите, соопшти изборната комисија на Либерија по пребројани 98,1 отсто од гласовите, пренесуваат светските медиуми.

Веа во 1995 година беше погласен за најдобар фудбалер на светот и е единствен Африканец кој ја добил „Златната топка“.

Во првиот круг од претседателските избори, кој се одржа на 10 октомври, Веа освои 38,4 отсто од гласовите, а Боакаи 28,8 отсто.

Досегашната претседателка на Либерија, Елен Џонсон Сирлиф, која е добитничка на Нобеловата награда за мир во 2011 година, власта официјално ќе му ја предаде на новиот шеф на државата на 22 јануари следната година.


Путин на претстојните претседателски во Русија избори ќе биде самостоен кандидат


Москва, 14 декември, 2017 - 11:47 (META) 

Претседателот на Русија, Владимир Путин денеска на традиционалната годишна прес-конференција одговара на прашања на повеќе од 1.600 акредитирани новинари, а едно од прашањата беше и зошто се кандидира за претседател.

Путин истакна дека „митот за личната власт во Русија е преувеличен“ затоа што се занемарува фактот дека и Владата врши голема работа. Тој истакна дека на претстојните претседателски избори ќе биде самостоен кандидат, но дека очекува поддршка од партијата и од јавните организации.

Партијата Единствена Русија веќе соопшти дека ќе ја поддржи кандидатурата на Путин.

Тој додаде дека засега нема одредено кој ќе раководи со неговата предизборна кампања, но рече дека има предизборна програма.

– Кога говориме за опозицијата, важно е не само да се вика на плоштадите, туку и нешто да се предложи – рече Путин.

Според Путин, власта треба да се фокусира на зголемување на приходите на граѓаните, на развој на инфраструктурата и образованието. Тој вели дека во моментов актуелната власт нема конкуренција.
– Русија треба да гледа во иднината, политичкиот систем треба да биде цврст, а економијата да се гради врз база на високите технологии – рече Путин.

Прес-конференцијата се уште е во тек, а имајќи предвид дека за неа се акредитирани 1.640 новинари се очекува да трае од три до четири часа.