Влада: Иванов ја злоупотреби функцијата за да ја блокира демократијата


Скопје, 15 јануари, 2019 - 15:03 (META) 

Владата порача дека ја поддржува одлуката Законот за јазиците и Законот за ратификацијата на Преспанскиот договор да бидат објавени во Службен весник со потпис на претседателот на Собранието, Талат Џафери, имајќи го, како што се вели, „предвид прекршувањето на Уставот од страна на претседателот Ѓорге Иванов“.

„Донесувањето на Законот за употреба на јазиците и Законот за ратификација е во целосна надлежност на Собранието на Република Македонија. Иванов беше должен да го потпише указот за прогласување на двата закони, а кога тој одлучува да го крши Уставот, неопходно е да се преземат мерки кои се во согласност со Уставот за да продолжи да функционира парламентарната демократија“, порача Владата.

Во соопштението се вели дека според член 51, став 2 од Уставот, секој е должен да ги почитува Уставот и законите, па и претседателот на државата.

„Претседателот на државата е должен да го потпише указот за прогласување на законите што ги носи Собранието, доколку тие по втор пат се донесат со потребното мнозинство во законодавниот дом, односно Собранието. И двата закона, Законот за употребата на јазиците во Република Македонија и Законот за ратификација на Договорот од Преспа, се усвоени по втор пат со потребното мнозинство во Собранието на Република Македонија. Законот за употреба на јазиците во март оваа година, а Законот за ратификација на Договорот од Преспа на 5 јули, исто така оваа година. Согласно уставните одредби, а поради неизвршување на обврските на претседателот на државата, на претседателот на Собранието на Република Македонија единствено што му преостана е да ја исполни должноста што произлегува од Членот 52 од Уставот, согласно кој  законите што по втор пат се донесени со потребното мнозинство во законодавниот дом треба да бидат објавени во „Службен весник на РМ“, 7 дена по нивото донесување“, се вели во соопштението.

Проблемот го направил Иванов со тоа што ја злоупотребил положбата и се заканувал да го блокира функционирањето на демократијата, обвинува владата.

„Владата смета дека со оваа постапка претседателот на Собранието ј запре тенденцијата една церемонијална постапка на Претседателот на државата да се претвори во преседан кој се закануваше да го блокира функционирањето на системот и тоа со кршење на Уставот“, се вели во владиното соопштение, во кое се порачува дека претседателот на државата, не е законодавно тело.


Претседателот Ѓорге Иванов стана фуснота на објавениот Закон за јазици


Скопје, 15 јануари, 2019 - 10:54 (META) 

По долгогодишната практика на некои држави и меѓународни организации при користење на името Република Македонија да додаваат и фуснота во која се објаснува дека Македонија има спор со Грција, која не го признава нејзиното име, и дека во Обединетите Нации земјава се води како Поранешна Југословенска Република Македонија, сега и претседателот на државата Ѓорге Иванов стана – фуснота.

Имено, по објавата на Законот за јазиците во вчерашниот број на Службен весник на Република Македонија, веднаш подолу е објавен и Указот за прогласување на тој закон, но само со потпис од претседателот на Собранието, Талат Џафери. На местото предвидено за потпис од претседателот на државата, стои само напишано неговото име и „1“ како ознака за фуснота.

Претседателот Иванов одбива да го потпише овој закон, а пак Џафери, кој всушност го испрати за објава текстот на законот, и Заменикот на Генералниот секретар на Собранието, Неџбедин Ибраими, објаснуваат дека претседателот на државата е должен да го потпише законот, бидејќи на 14 март 2018 година и вторпат бил усвоен со мнозинство гласови од пратениците, според член 75, став 3 од Уставот. Интересно е и тоа што е потпишан Заменикот  на Генералниот секретар, наместо Генералниот секретар, Цветанка Иванов.

Вториот дел од фуснотата објаснува дека „поради неизвршување на горенаведените обврски од страна на Претседателот на Републиката“, а поради обврската од член 52 од Уставот, претседателот на Собранието е должен да го достави Законот за јазиците во Службен весник за негово објавување.


Заев: Посакувам консензуален кандидат за претседател, прифатлив за мнозинството граѓани


Скопје, 4 јануари, 2019 - 14:35 (META) 

До сега не сме разговарале за името на консенсузалниот претседател, да заврши процесот во парламентот поврзан со уставните измени и потоа ќе отвориме дебата, одговори премиерот Зоран Заев на новинарско прашање за тоа дали со ДУИ разговарале за можните имиња кои се вртат во јавноста на кандидат за претседател како Бујар Османи, Никола Димитров, Радмила Шекеринска.

„Сакам консензуален кандидат за претседател зад кој ќе застанеме сите. ДУИ не е единствениот коалиционен партнер, ги има повеќе. Верувам дека ќе изнајдеме сила да избереме кандидат, кој ќе биде прифатливо решение за мнозинството граѓани“, одговори Заев.

Тој потврди дека денеска во 16 часот ќе оставри средба со Билал Касами од БЕСА со кого ќе разговараат за поддршка за уставните измени.

„Сугестиите на двете албански опозициски партии делуваа позитивно. Нивните сугестии се вградени во амандманите, сакам да слушнам што ги загрижува“, рече накратко Заев.


ЗНМ го потврди Младен Чадиковски за претседател, Фиљана Кока избрана за заменик


Скопје, 18 декември, 2018 - 11:16 (META) 

Управниот одбор на Здружението на новинари на Македонија на својата конститутивна седница одржана вчера, со автентично толкување на Статутот на организацијата, го прогласи Младен Чадиковски за легитимно избран претседател, со мнозинство гласови од редовните членови присутни во моментот на гласањето.

„На конститутивната седница присуствуваа сите членови на Управниот одбор и сите одлуки беа донесени едногласно. Одлуката за потврдување на легитимноста на изборот на претседател на ЗНМ се донесе со консензус на сите членови на Управниот одбор, додека претседателот Младен Чадиковски се иззема од гласањето. На седницата беше предложена и едногласно избрана Фиљана Кока за заменик-претседател на Здружението на новинарите на Македонија“, се вели во соопштението на ЗНМ.

Управниот одбор констатирал дека за време на одржувањето на Собранието не бил пристигнат ниту еден приговор за процесот на гласање од страна на присутните членови, ниту од страна на членовите на Верификационата и Изборната комисија. Сите засегнати страни кои што имаат било каков сомнеж во однос на изборната процедура, како што велат од ЗНМ, можат да ги употребат достапните правни лекови.

„Управниот одбор повикува на консолидација на членовите со цел да се одржи достоинството и единството како клучни принципи за заштита на интересите на сите членови на ЗНМ. Управниот одбор констатираше дека за сите различни мислења е потребен зајакнат и институционализиран форум за дебата, со оглед на фактот дека и двајцата кандидати за претседател своите програми ги темелеа на поголема вклученост на членството во работата на Здружението преку предложени секции. УО предлага да се разговара со сите засегнати групи во еснафот и формирање секции кои ќе ги претставуваат интересите на тие специфични групи“, се додава во соопштението.

Изборното собрание на ЗНМ се одржа во саботата, а во трката за претседател беа Чадиковски и Столе Наумов.


Aхмети: На претседателските избори ќе бараме консензуален претседател


Скопје, 8 ноември, 2018 - 12:28 (META) 

Лидерот на ДУИ, Али Ахмети, на гостување во емисијата „Клан дебат“ на телевизијата „Клан Македонија“, кажа дека на следните претседателски избори кои треба да се одржат ќе побараат консензуален претседател.

На прашање дали на претседателските избори ДУИ повторно ќе игра на картата на консензуален претседател Ахмети изјави дека тој е нивен став кој го објавиле и ќе го бранат.

– Секако ова е еден од ставовите кои сме ги објавиле и ќе го браниме со фанатизам и ќе го промовираме на сите простори тука во Македонија. Ние сакаме консензуален претседател, да седнеме, да разговараме, да се усогласиме – рече Ахмети.

Ахмети исто така кажа дека веќе има и имиња за кандидати консензуален претседател, но се уште е рано да се збори за тоа.

– Секако дека може да зборуваме и со имиња, но се уште е рано за тоа – рече Ахмети.


Меркел се повлекува од партиското претседателство


Берлин, 29 октомври, 2018 - 11:43 (META) 

Германската канцеларка, Ангела Меркел им пренела на првите луѓе во нејзината Христијанско-демократска унија (ЦДУ) дека нема повторно да се кандидира за претседател на партијата на изборната конференција што ќе се одржи в декември, јавија светските агенции, повикувајќи се на некои германски емдиуми.

„Блумберг“ јави дека веднаш по објавувањето на веста во Берлин, бил забележан пад на еврото на берзата.

„Билд“ пишува дека Меркел знае да ги чита знаците, па проценила дека е време некој друг да ја води „локомотивата Европа“.

На вчерашните регионалните избори во земјата, во покраината Хесен, конзервативната Христијанска демократска унија (ЦДУ), со која сега раководи Меркел, и Социјалдемократската партија на левиот центар доживеаја значителен пораз, додека Партијата на зелените и екстремно десничарската Алтернатива за Германија бележат подобри резултати.

Во последните месеци, ЦДУ и СПД ја губат поддршката на национално ниво, а коалицијата речиси дојде до колапс. Изборите во Хесен се само две недели по оние во Баварија, каде партијата на Меркел претрпи огромни загуби.

Меркел раководеше со ЦДУ од 2000 година.


Путин ќе ја посети Србија во јануари


Белград, 12 октомври, 2018 - 16:42 (META) 

Претседателот на Русија, Владимир Путин изразил желба да ја посети Србија во јануари, му пренел рускиот амбасадор во Белград, Александар Чепурин на српскиот претседател Александар Вучиќ, јавува дописничката на „Мета“ од Белград.

Како што соопштиле од кабинетот на српскиот претседател, било договорено, подготовките за доаѓање на Путин во Белград да почнат веднаш, „за посетата да го потврди традиционалното пријателство на двете земји и братството на двата народа“.

Вучиќ на почетокот на октомври разговарал со Путин во Москва, кој, според пишувањата на руските медиуми не добил одобрување за признавање на Косово, што, како што наведуваат медиумите, подразбира одвојување на северот на Косово.

Од друга страна, претседателот на надворешно-политичкиот одбор на Горниот дом на рускиот парламент, Константин Косачов кој престојувал во Белград, изјавил дека Русија ќе го поддржи секое решение за Косово кое го поддржува српскиот народ, а кој е во согласност со Уставот и Резолуцијата 1244 на Советот за безбедност на ОН.


На поранешниот јужнокорејски претседател му се закануваат 20 години затвор


Сеул, 6 септември, 2018 - 16:38 (META) 

Обвинителството на Јужна Кореја побара затворска казна од 20 години за поранешниот претседател Ли Мјунг-бак, во рамките на неговото судење за корупција, јавија светските агенции.

Ли, кој беше претседател на Јужна Кореја од 2008 до 2013 година, со тоа стана вториот поранешен претседател  на земјата што за неполн месец влезе во фокусот на светската јавност поради неговите проблеми со законот.

Минатиот месец апелациски суд во Јужна Кореја ја зголеми затворската казна на поранешната претседателка Парк Геун-хје на 25 години. Парк беше вмешана во огромен корупциски скандал минатата година, поради што беше симната од власта.

Ли беше обвинет за корупција и неговото судење почна во мај годинава според обвинението од 16 точки, во кои е вклучена и примање 11 милијарди вони (9,8 милиони долари). Денеска во завршните зборови, обвинителството побара и 20 години затвор и одземање 11,1 милијарди вони, како и парична казна од 15 милијарди вони (13,3 милиони долари).


Мета ги повика Албанците во Македонија да го поддржат референдумот


Тирана, 29 август, 2018 - 16:32 (META) 

Претседателот на Албанија, Илир Мета во интервју за „Албаниaн Дејли Њуз“, зборувајќи за Македонија истакна дека постигнатиот договор помеѓу Скопје и Атина за името, отвора нова перспектива кон членството на Македонија во НАТО и интеграцијата во ЕУ, како и директно придонесува за мирот, безбедноста и стабилноста во регионот.

– Верувам и истовремено ги повикувам сите Албанци од Македонија да учествуваат на референдумот на 30 септември и да гласат „за“ договорот, за отворање на ново поглавје, не само во интерес на интеграцијата на Македонија, туку и во корист на иднината на земјата – порача албанскиот претседател.


Прославата на Илинден под мотото „Наша Македонија“


Скопје, 31 јули, 2018 - 14:03 (META) 

Прославата на Денот на Републиката – Илинден, ќе се одржи под мотото „Наша Македонија“, соопшти Владата.

„Темата на Денот на Републиката  е ,Наша Македонија – без разлика на вера, етничка припадност, пол и убедувања. Бидејќи од дедо – прадедо си живееме како браќа и сестри на оваа земја! За право, за слобода и за човечки живот’, која е инспирирана од Крушевскиот манифест“, порача Владата.

Претседателот Ѓорге Иванов ќе се обрати на Мечкин Камен, а претседателот на Собранието, Талат Џафери, ќе одбележува во Скопје.

Свеченостите во Скопје започнуваат во 10 часот пред спомениците на АСНОМ и на Никола Карев. Таму свежо цвеќе ќе положат Џафери и  владина делегација составена од министрите за труд и социјална политика, за финансии и за дијаспора, Мила Царовска, Драган Тевдовски и Едмонд Адеми.  Потоа, во 10:30, истата делегација ќе се поклони и ќе положи свежо цвеќе пред споменикот на првиот Претседател на Президиумот на АСНОМ, Методиј Андонов Ченто.
На крајот, односно во 10:45 свое обраќање ќе има претседателот на Собранието.

Одбележувањето во Пелинце ќе почне во 11 часот, кога свежо цвеќе ќе положи владината делегација предводена од премиерот  Заев, а во чиј состав ќе биде вицепремиерот и министер за надворешни работи, Оливер Спасовски, како и министрите за надворешни работи, за правда и за култура, Никола Димитров, Рената Десковска и Асаф Адеми.

Во 11:30 часот е предвидено обраќање на премиерот Зоран Заев. На централното одбележување ќе настапи хорот Вардар, а ансамблот Танец ќе изведе неколку традиционални македонски ора, додека културно уметничко друштво Емин Дураку, ќе изведе сплет од албански песни и ора.

На Мечкин Камен, во Крушево, Денот на Републиката и државните почести по повод годишнината ќе ги одбележи претседателот  Ѓорѓе Иванов.
Во 9:30 часот ќе биде положено свежо цвеќе на гробот на Никола Карев, а во 10 часот на Споменикот на хероите – Слива. Точно напладне, односно во 12 часот, ќе биде положено свежо цвеќе на Мечкин Камен, по што следува обраќање на претседателот  Иванов.

На Мечкин Камен, ќе присуствува и владина Делегација составена од вицепремиерот Кочо Анѓушев, министрите за транспорт и врски, Горан Сугарески, за информатичко општество и администрација, Дамјан Манчевски, за локална самоуправа Сухејл Фазлиу и за здравство, Венко Филипче.

Илинден ќе се слави и во Смилево. Таму се обележуваат 115 години Илинден и 76 години од првата борбена акција на Битолско – Преспанскиот Партизански Одред „Даме Груев“ – Ослободување на Смилево. По тој повод, во 9 часот свежо цвеќе ќе биде положено на три спомен обележја: могила на Даме Груев – обелиск, на споменикот на Смилевските илинденци – обелиск и на спомен плочата на Партизанскиот одред „Даме Груев“.

Во Смилево, Владата ќе ја претставуваат министерот без ресор, Зоран Шапуриќ, заменик – министерот за локална самоуправа Дејан Павлески и националниот координатор за здравство, Гоце Чакаровски.