!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Елизабета Шелева на местото на Лешоски на чело на Струшките вечери на поезијата


Скопје, 21 август, 2017 - 13:09 (META) 

Министерот за култура Роберт Алаѓозовски, донел одлука за именување на нови членови на Управниот одбор на „Струшките вечери на поезијата“, откако младиот поет Дарко Лешоски, кратко по именувањето на функцијата претседател на Управниот одбор на СВ, реши да се повлече по реакциите во јавноста за неговиот избор.

Како што соопштија денеска од Министерството за култура, нов претседател на Управниот одбор на СВП е Елизабета Шелева, а членови се Лидија Димковска и Димитрие Дурацоски.

Елизабета Шелева е редовен професор на Катедрата за општа и компаративна книжевност, при Филолошкиот факултет „Блаже Конески“ во Скопје. Таа е претседавач на Здружението на независните писатели на Македонија и уредничка на книжевното списание „Наше писмо“. Членка е на македонскиот ПЕН центар. Долгогодишна уредничка на регионалното списание за литература и култура „Сараевске свеске“. Шелева е уредник на Антологијата на македонската современа поезија „ Песна меѓу две лета“ за Струшките вечери на поезијата, во 2009 година. Преведува од англиски, српски и словенечки јазик, а објавила повеќе од 200 прилози и 9 авторски книги.


Отпуштен главниот стратег во Белата Куќа, Стив Бенон


Вашингтон, 18 август, 2017 - 20:53 (META) 

Претседателот на САД Доналд Трамп, на виши владини претставници им соопштил дека донел одлука да го отпушти својот главен стратег, Стив Бенон, кој уште од првите денови на оваа администрацијата важеше за негов најконтроверзен советник, јави „Гласот на Америка“.

Во соопштението од портпаролката на Белата куќа Сара Сандерс, се вели дека шефот на кабинетот на претседателот на САД Џон Кели и Стив Бенон, постигнале согласност дека денеска ќе биде неговиот последен работен ден. Сандерс додаде дека Белата куќа е благодарна за службата на Бенон и му посакува се најдобро.

Бенон, кому му се придава заслуга Трамп да биде избран на функцијата, со месеци имал несогласувања со влијателни фигури во Белата куќа.

Според весникот „Њујорк тајмс“, тој инсистирал дека повлекувањето од функцијата е негова идеја, и ја поднел неговата оставка до претседателот уште пред 11 дена, како подготовка тоа да биде објавено на почетокот на оваа недела. Веста била одложена, заради насилните протести во Шарлотсвил, Вирџинија.


Дарко Лешоски се повлече од раководството на Струшки вечери на поезијата


Струга, 16 август, 2017 - 10:34 (META) 

Дарко Лешоски, младиот поет кој ја разбранува културната и пошироката јавност во изминативе денови откако беше назначен за претседател на Управниот одбор на Струшките вечери на поезијата, објави дека ќе се повлече од функцијата.

Одлуката тој ја соопшти во интервју за „Дојче Веле“.

– Ги слушнав сите мислења и сите ги почитувам. Се повлекувам и се откажувам од претседателствувањето со Управниот одбор на Струшките вечери на поезијата. Се заблагодарувам на укажаната доверба и останувам посветен на мојот примарен ангажман во Сервисот за односи со јавност на Владата. Нека биде ова почеток на една поинаква демократска практика – рече Лешоски.

Неговото назначување минатата седмица беше дочекано на нож во голем дел од јавноста и беше силно критикувано, поради неговата возраст, малото искуство за таква значајна функција, но и поради релативно скромниот творечки опус. Спротивниот табор пак нагласуваше дека неговата неконвенционалност – поезијата почна да ја објавува на Фејсбук, а се гордее дека нема напишано ниту една книжевна критика – ќе биде одлична можност да се извади манифестацијата Струшки вечери на поезијата од наводната зачмаеност.


Претседателот Иванов ја повика Владата да го објави договорот со Бугарија


Скопје, 25 јули, 2017 - 17:17 (META) 

Претседателот на Република Македонија, Ѓорге Иванов, ја повика Владата да го објави и да го образложи текстот на договорот за добрососедство со Бугарија пред неговото потпишување. Како што стои во соопштението од претседателскиот кабинет, отсуството на транспарентност предизвикало негативни коментари и загриженост во јавноста кои треба да се надминат со објавување на текстот на договорот пред неговото потпишување.

„Иванов нагласува дека секогаш треба да се имаат предвид националните и државните интереси на Република Македонија и дека кој било меѓудржавен договор не смеe да бидe на штета на македонските национални интереси“, стои во соопштението.

Македонскиот претседател вчера имаше средба со министерот за надворешни работи, Никола Димитров, на која беше информиран за последната нацрт-верзија на договорот за пријателство и за добрососедство со Република Бугарија.


Илир Мета положи заклетва како нов претседател на Албанија


Тирана, 24 јули, 2017 - 19:56 (META) 

Новиот претседател на Албанија, Илир Мета, формално стапи на должност положувајќи заклетва за време на вонредното заседавање на парламентот.

Мета денеска свечено вети дека ќе го почитува Уставот и законите на земјата, дека ќе ги почитува правата и слободите на граѓаните, дека ќе ја брани независноста на Албанија и дека ќе служи на општ интерес и просперитет на албанскиот народ.

Поранешниот претседател на парламентот и лидер на Социјалистичкото движење за интеграција, беше избран за фукнцијата претседател на државата од страна на парламентот во април годинава.

Претседателот во Албанија има претежно церемонијална улога и може да има два петгодишни мандати.


Трамп е најлошо рангиран претседател на САД во последните 70 години


Вашингтон, 16 јули, 2017 - 19:26 (META) 

Граѓаните на САД за американскиот претседател Доналд Трамп сметаат дека во последните 70 години е најлошиот претседател на државата во првите половина година од мандатот, јави „Еј-би-си њуз“, повикувајќи се на анкетата што ја спроведе заедно со весникот „Вашингтон пост“.

Во анкетата се најдоа прашања за компетентноста на Трамп на светската сцена, неговата ефективност, републиканскиот план за здравствена заштита и за улогата на Русија во американските претседателски избори во 2016 година.

Триесет и шест отсто од анкетираните се изјасниле дека ја поддржуваат работата на Трамп, што е за десет отсто помалку од процентите што ги доби во првите 100 дена во Белата куќа.

Најблизок на Трамп по слабиот рејтинг по половина година на власт беше претседателот Џералд Форд со 39 отсто поддршка во февруари 1975 година.


Третото ракување на Трамп и на Макрон – „најчеличното“ досега


Париз, 15 јули, 2017 - 18:05 (META) 

На нивната прва средба, на 25 мај годинава на самитот на НАТО во Брисел, претседателите на САД и на Франција, Доналд Трамп и Емануел Макрон, имаа „двобој“ со две невообичаено долги ракувања.

Во првото, Трамп грубо ја повлече раката на Макрон кон него. Второто, пак, беше цврст стисок од кој побелуваат зглобовите. Ни едниот ни другиот не сакаа да ја отпуштат раката прв.

Но кулминацијата се случи во Париз вчера, кога нивното ракување при заминувањето на Трамп од прославата на Националниот ден на Франција потраја речиси половина минута. Двајцата претседатели ги мафтаа рацете, ги вртеа, цело време држејќи ја дланката на другиот.

И откако Макрон првично „победи“ со тоа што ја постави својата дланка горе, Трамп возврати со познатото „влечење“, кога на кратко го исфрли од рамнотежа својот француски колега. Веднаш потоа, не пуштајќи ја неговата рака, ги изненади сите кога ја гушна и ја бакна првата дама на Франција.


Претседателот на Бразил осомничен за примање мито


Бразилија, 21 јуни, 2017 - 13:25 (META) 

Федералната полиција на Бразил вчера соопшти дека нејзините инспектори дошле до докази дека претседателот на земјата, Михел Темер, примал мито за да помага на бизниси, што отвора нова можност да биде симнат од функцијата. Тоа ќе биде третиот по ред бразилски претседател вмешан во финансиски скандал.

Истрага против Темер е почната по сведочење на богатиот месарски магнат, Жоесли Батиста, кој постигнал спогодба со истрагата, што ги поврзува претседателот и негов советник со земање мито, а Темер и со давање поткуп на поранешниот претседател на конгресот, Едуардо Кунха, за да премолчи некои работи. Кунха е сега в затвор.

Бразилскиот претседател негираше дека сторил какви било престапи и нагласи дека нема да си даде оставка.

Доколку главниот обвинител на Бразил ги прифати препораките од бразилската федерална полиција, конгресот ќе треба да одлучи дали Темер треба да падне под истрага на Врховниот суд, кој е единственото тело што може да врши истраги за претседателот.


Хоџа: Долгот на државата кон приватните компании е околу милијарда евра


Скопје, 18 јуни, 2017 - 11:39 (META) 

Новата влада треба да направи ревизија на тоа колку должи државата и кои институции колку должат за да можеме понатаму да размислиме дали ние би влегле во преговори за соработка со некоја од тие институции, вели Неби Хоџа, претседател на Стопанската комора на Северозападна Македонија, во неделното интервју на „Радио Слободна Европа“.

Тој вели дека долгот на владата или на државата кон приватните компании, најверојатно изнесува некаде околу една милијарда евра.

– Долгот на владата или на државата кон приватните компании, се шпекулира дека е некаде околу една милијарда евра, меѓутоа тоа во сите држави е така, секаде државата му должи на приватниот сектор. Најбитниот фактор е тоа тие задолжувања да не бидат подолги од три месеци, затоа што во приватниот сектор секое задолжување е товар за бизнисот. Во однос на тоа, нормално дека новата влада треба да направи ревизија на тоа колку тие долгови изнесуваат, за да можеме ние како бизнис-сектор во иднина да имаме увид кои државни институции колку должат за да можеме понатаму да размислиме дали ние би влегле во преговори за соработка со некоја од тие институции – вели Хоџа.

На прашањето може ли бизнис-секторот да си дозволи зголемување на минималната плата, а просечната плата да се искачи на 500 евра, тој вели дека тоа е не само изводливо, туку и неопходно за да се задржи квалитетниот кадар во земјава.

– Ние како стопанска комора подолго време го промовираме тоа дека митот на евтина работна сила во Македонија мора да се промени, поради тоа што со таква социјална политика ние не можеме да имаме некоја перспектива во однос на сите држави во опкружувањето. Во друг контекст гледајќи ние како стопанственици не можеме со таква евтина работна сила да ги држиме нашите капацитети или нашите човечки ресурси од повисок ранг. Во овој случај сите капацитети кои излегуваат од нашите универзитети, кои мислиме дека ќе бидат прифатливи за нашите компании, размислуваат да избегаат од државата. Со ваква просечната плата, каква што беше во минатото, мислиме дека нема да има некаков успех и ќе бидеме повеќе социјална политика, отколку економска политика – вели претседателот на Стопанската комора на Северозападна Македонија.


Заев побара поддршка од Туск за решавање на блокадата на процесот на пристап кон ЕУ


Брисел, 12 јуни, 2017 - 14:45 (META) 

На средбата со претседателот на Европскиот совет, Доналд Туск, во Брисел, денеска македонскиот премиер Зоран Заев порачал дека новата влада е подготвена да води квалитетен реформски процес, но истовремено ја нагласил важноста на поддршката од Европскиот совет за наоѓање решенија да се спречи билатералните прашања да претставуваат пречка за процесот на пристапување на Македонија кон ЕУ.

На средбата, премиерот бил придружуван од вицепремиерката и министерка за одбрана, Радмила Шекеринска, вицепремиерот за евроинтеграции, Бујар Османи, и од министерот за надворешни работи, Никола Димитров, соопшти Владата.

– Новата Влада е подготвена да предводи силен и квалитетен реформски процес за обновување на препораката за преговори со ЕУ, до крајот на оваа година. Но, од голема важност е и поддршката од Европскиот совет за наоѓање решенија со кои билатерални прашања нема да претставуваат долгорочна блокада на процесот на пристапување во ЕУ – порачал Заев и се заблагодарил на претседателот на Европскиот совет за позитивните сигнали од европските институции за поддршка на евроинтеграциските аспирации на Македонија.

Заев рекол оти се надева дека Европскиот совет во декември ќе прифати почеток на отворање преговори за пристапување на Македонија кон Европската Унија.

– Амбициозни сме бидејќи е изгубено многу време во евроинтегрцискиот процес на Македонија – рекол Заев.

На средбата, според соопштението, била нагласена посветеноста на Владата на Македонија за регионална соработка, што би ги отворило и зацврстило европските перспективи на државите.

„Претседателот на Европскиот совет, Доналд Туск, го поздрави формирањето на новата влада во Македонија и оцени дека тоа е одлична можност за придвижување на евроатлантските аспирации на земјата. Претседателот на Советот, Туск, изрази очекување дека Република Македонија ќе го подобри својот углед преку посветена работа, меѓуетнички и меѓупартиски дијалог и добрососедски односи“, стои во соопштението.