!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

СЈО врши претреси во домовите на Канческа – Милевска и на Божиновски


Скопје, 15 декември, 2017 - 10:37 (META) 

Специјалното јавно обвинителство утрово врши претреси во домовите на на поранешната министерка за култура и актуелна пратеничка, Елизабета Канческа – Милеска и на поранешниот генерален секретар на Владата, Кирил Божиновски, јавува „Телевизија 24“ повикувајќи се на свои извори.

Од СЈО не ја потврдуваат информацијата.

Засега не е познато дали претресите се вршат во рамките на нова предистражна постапка и за што станува збор.

Инаку, Канческа-Милевска е обвинета и и се суди во случајот „Тендери“, додека Божиновски е обвинет во случајот „Титаник“, за изборни нерегуланости.


Шестмина уапсени и запленети 500.000 таблети дрога во лабораторијата во Тетово


Скопје, 1 декември, 2017 - 13:51 (META) 

Шест лица досега се уапсени во акцијата на Основното јавно обвинителство за гонење организиран криминал и корупција и на Министерството за внатрешни работи, во која е откриена најголемата лабораторија за нелегално производство на синтетички дроги на Балканот, изјави денеска министерот за внатрешни работи, Оливер Спасовски.

Уапсените се државјани на Македонија и на Србија, а крајната дестинација каде одела дрогата била Турција.

Полициски екипи по наредба на Обвинителството вчера извршиле претреси на две локации во Тетово и на пет во Скопје и било запленето големо количество синтетичка дрога, чија вредност, како што рече Спасовски, надминува 2,5 милиони евра.

– Откриени се досега најголеми количества синтетичка дрога на Балканот. Доколку првичните проценки излезат точни, веројатно ќе биде една од поголемите заплени на синтетички дроги во меѓународни рамки. Во лабораторијата откриена во куќа во Тетово, според привичните сознанија, откриени се повеќе од 125 килограми синтетичка дрога или според некои првични процени, станува збор за минимум 500.000 таблети синтетичка дрога, чијашто вредност надминува 2,5 милиони евра – рече Спасовски, кој додаде дека се очекува бројките да бидат поголеми бидејќи активностите од акцијата се сè уште во тек.

Како што нагласи Спасовски, станува збор за меѓуародна истрага во која покрај македонското МВР и Обвинителството, вклучени биле и Јавното обвинителство за организиран криминал и Министерството за внатрешни работи на Србија, како и американската Агенција за борба против наркотици – ДЕА.

– Со оваа акција испраќаме порака дека сме подготвени да се справиме со секаков вид криминал – рече Спасовски.


Уапсени уште пет лица за обидот за убиство на Зијадин Села на 27 април


Скопје, 17 октомври, 2017 - 9:53 (META) 

Пет лица се уапсени по наредба на јавното обвинителство во врска со обидот за убиство на пратеникот и лидер на Алијанса за Албанците, Зијадин Села, за време на насилствата во Собранието од 27 април оваа година.

Како што информираат од Обвинителството, донесена е наредба за проширување на истрагата за случајот против уште пет лица, кои се уапсени синоќа, при претресот во нивните домови.

„Во врска со постапката што се води во Основното јавно обвинителство Скопје за настаните во Собранието на Република Македонија од 27 април и нападот врз Зијадин Села, надлежен јавен обвинител донесе наредба за проширување на истрага за уште пет лица за обид за убиство во соизвршителство, од член 123, во врска со член 19 и во врска со член 22 од Кривичниот законик. Петте лица, по барање на надлежен јавен обвинител, се лишени од слобода при вршење претрес во нивните домови“, стои во соопштението од Јавното обвинителство.

Оттаму информираат дека во текот на денешниот ден Обвинителството ќе презема дејства и кон „други лица“.

Претходно за обидот за убиство на Села беа уапсени две лица – татко и син, кои во моментов се во притвор.


Акција на турската полиција за апсење на 70 војници поради поврзаност со Ѓулен


Анкара, 10 октомври, 2017 - 12:00 (META) 

Турската полиција денеска почнала акција за апсење на 70 војници обвинети за поврзаност со имамот Фетулах Ѓулен, кој живее во САД, а кого властите во Анката го обвинуваат дека го организирал минатогодишниот обид за воен удар, јавуваат турските агенции.

Акции против приврзаници на Ѓулен во Турција се спроведуваат речиси секој ден, веќе 15 месеци, а само минатата седмица беа приведени околу 800 лица.

Ѓулен досега ги демантираше сите обвинување дека стои зад обидот за воен удар, кој се случи во јули минатата година.

Цел на денешната полициска акција, која, според агенциите, се спроведува во градот Конија, во централниор дел на Анадолија, и во уште седум провинции, се и двајца полковници, седум капетани и 36 поручници.

Шеесет и двајца од осомничените се припадници на турското воздухопловство, а некои од нив се и пилоти. Полицијата врши претреси во нивните домови и на работните места.

Повеќе од 50.000 лица во притвор го чекаат судењето против нив поради повразност со Ѓулен, а 150.000 лица се отпуштени или суспендирани од работните места во јавниот и во приватниот сектор.

Обидот за воен удар во Турција се случи на 15 јули минатата година, а во судирите загинаа 250 лица.


Јанева не може да потврди дали материјалите земени од Панчевски водат до Иванов


Скопје, 6 октомври, 2017 - 13:03 (META) 

Специјалното јавно обвинителство почнало со анализа на материјалите одземени при вчерашните претреси во канцелариите и во домовите на судијата Владимир Панчевски и на двајца информатичари вработени во судот, изјави денеска специјалната јавна обвинителка, Катица Јанева.

Специјалната обвинителка рече дека запленетите материјали се предадени на вештачење во Министерството за внатрешни работи, но не открива повеќе детали за вчерашниот претрес во Основниот суд Скопје 1, бидејќи, како што додаде, податоците сè уште се анализираат.

– Вчера вечерта се состанаа нашите екипи и полицијата во врска со претресите. Синоќа и денеска се составуваат записници и сè што е земено ќе биде доставено до Обвинителството. Мислам дека тоа што го баравме и најдовме во домовите го зедовме. Дали е сè што е потребно, не можам да кажам – рече Јанева, која денеска присуствуваше на дебатата „Двојба во корист на обвинетиот – виновен надвор од разумно сомневање“, во организација на Здружението за кривично право и криминологија на Македонија и на Мисијата на ОБСЕ во Скопје.

Одговарајќи на новинарско прашање дали земените податоци од поранешниот претседател на Кривичниот суд во Скопје, Владимир Панчевски, упатуваат на тоа дека од судот биле изнесувани информации за претседателот на државата, Ѓорге Иванов, пред неговата одлука за аболиција лани во април, Јанева изјави дека не може да коментира, бидејќи податоците уште се анализираат.

– Не можам ништо да потврдам бидејќи во овој момент податоците што се одземени уште се анализираат. Откако ќе заврши анализата, ќе бидете известени. Ги видов написите на социјалните мрежи, тоа воопшто не можам да го потврдам, тоа се само шпекулации и претпоставки – рече Јанева.

СЈО, како што вчера соопшти Јанева, по судска наредба изврши личен претрес кај Владимир Панчевски и со друга наредба од судот ги одзеде сите податоци од компјутерскиот систем за распоредување предмети во Основниот суд Скопје 1.

Специјалното јавно обвинителство води предистражна постапка и го сомничи Панчевски дека местел кои судии да ги добиваат предметите на СЈО, а покрај тоа, постојат и сомнежи дека тој оддавал службени тајни на лица надвор од судот.


Претреси во неколку куќи во Брисел, уапсени четири лица


Брисел, 22 јуни, 2017 - 12:03 (META) 

Во рамките на истрагата за спречениот бомбашки напад на централната станица во Брисел, извршени се претреси на куќи во главниот град на Белгија, при што приведени се четири лица.

Како што се наведува во соопштението на обвинителството, претресите во четири куќи се случиле доцна синоќа во различни населби, вклучувајќи ја и Моленбек. Судија во текот на денот би требало да одлучи дали притворот на приведените ќе им биде продолжен.

Белгиската полиција за борба против тероризмот ги истражува мотивите на осомничениот бомбаш самоубиец што го убија војниците кои ја чуваат железничката станица во Брисел, откако тој предизвикал експлозија во која никој не е повреден.

Истражните органи го идентификувале осомничениот, но уште не го објавиле неговото име.

Белгиската престолнина во која се наоѓаат седиштата на НАТО и на ЕУ е во состојба на зголемена безбедност откако ќелијата на Исламска држава со седиште во Брисел го организираше нападот во кој 130 лица беа убиени во Париз во ноември 2015 година.

Во Брисел, четири месеци подоцна, во март 2016 година, бомбаш самоубиец усмрти 32 лица.


Уапсени 12 лица под сомневање за поврзаност со терористичкиот напад во Лондон


Лондон, 4 јуни, 2017 - 18:59 (META) 

Бритаската полиција уапсила 12 лица поради сомнежи за повразност со синоќешниот терористички напад во кој загинаа седум лица, а 48 се повредени, пренесува „Би-би-си“.

Апсењата биле извршени во предградието Баркинг, во источен Лондон, а уследиле по претресот на стан, сопственост на еден од тројцата напаѓачи.

Терористичкиот напад се случи синоќа, околу 22 часот, кога бело комби прегази пешаци на Лондонскиот мост, по што тројца напаѓачи излегле надвор и со ножеви изболе неколку луѓе во близина на Бороу маркет.

Тројцата напаѓачи, кои носеле лажни појаси за експлозив, се убиени во интервенцијата на полицијата. Тие биле застрелани од осуммина полицајци кои испукале 50 куршуми. Во интевенцијата, како што соопшти лондонската полиција, бил погоден и случаен минувач, кој се нашол на местото. Тој бил веднаш хоспитализиран и останува во болница, но е надвор од животна опасност.

Според полицијата, вкупно 36 лица, повредени во терористичкиот напад, се наоѓаат во болница, од кои 21 лице се во критична состојба.


Германија: Поведена истрага против 20 лица осомничени дека шпионирале за Турција


Берлин, 6 април, 2017 - 19:14 (META) 

Дваесет лица се под истрага во Германија поради сомнеж дека шпионирале луѓе за кои верувале дека се приврзаници на муслиманскиот свештеник Фетулах Ѓулен, јавуваат светските агенции, повикувајќи се на соопштение на германското министерство за внатрешни работи.

Инаку, властите во Анкара сметаат дека Ѓулен и неговите приврзаници стојат зад неуспешниот обид за воен удар во земјата, во јули минатата година. Ѓулен, кој живее во егзил во САД, ги отфрла ваквите обвинувања.

Германските власти, како што пренесуваат агенциите, во февруари оваа година извршиле претреси во куќи на четворица имами, поврзани со турско-исламските културни организации во Германија, осомничени дека ги шпионирале противниците на турската влада.

Германското министерство за внатрешни работи навело дека Турција континуирано испраќала сè поголем број имами во овие центри.


Јанева: СЈО не гони обични криминалци, туку криминална група во врвот на власта


Скопје, 15 февруари, 2017 - 14:48 (META) 

Судот треба да сфати дека СЈО не гони обичен криминал, туку ја гони криминалната група која се наоѓа во врвот на власта и затоа судот мора совесно, чесно и професионално да си ја извршува својата должност кога станува збор за случаите на Специјалното јавно обвинителство. Ова денеска го изјави специјалната јавна обвинителка Катица Јанева, која беше гостин на презентацијата на истражувањето „Неосновано притворени – правни и буџетски последици, што се одржа во ЕУ-Инфоцентарот во Скопје.

– Ние ги образложуваме сите предлози за притвор, но како што знае јавноста, од одреден број на судии тие се одбиваат на ист начин иако ние ја следиме судската и европската практика, за тоа како треба да се бара притвор и други мерки за обезбедување на осомничени. Не сме задоволни од постапувањето на судот по нашите предмети. Кога ги поднесуваме барањата за претрес или притвор секој пат одредено лице, одреден судија одлучува по нашите барања – рече Јанева.

Специјалната јавна обвинителка нагласи дека на овој начин судијата „може да ја злоупотреби својата службена должност и овластување кога станува збор за висока корупција од страна на високи функционери од власта што ја истражува СЈО“.

– Ние како Специјално јавно обвнителство не гониме обичен криминал, туку ја гониме криминалната група која се наоѓа во врвот на власта на Република Мкаедонија и тоа мора да се сфати од страна на судот кој претставува трета власт, која треба совесно, чесно и професионално да си ја извршува својата службена должност во врска со случаите на СЈО, што за жал не е така – рече Јанева.


За да одлучи за претресите на СЈО, наместо 12 часа, на судот му биле потребни 5 до 10 дена!


Скопје, 8 февруари, 2017 - 13:04 (META) 

Кривичниот суд во Скопје одлуките по барањата за претреси на Специјалното јавно обвинителство (СЈО), во зависност од случај до случај, ги носел во рок од 5 до 10 дена, наместо за 12 часа, односно за 24 часа, како што налага Законот за кривична постапка, потврдуваат за „Мета“ од СЈО.

„По барањето за издавање наредба за претрес, судијата на претходната постапка одлучува веднаш, а најдоцна во рок од 12 часа од приемот на барањето“, стои во членот 188 од Законот за кривична постапка.

Доколку судијата на претходна постапка го одбие барањето, тогаш Кривичниот совет на судот треба да донесе одлука во рок од 24 часа.

СЈО минатитот месец до судот поднел четири барања за претреси. Три од барањата биле за претреси кај поранешни и кај актуелни функционери, но од страна на судот биле одбиени сите. Единственото барање што судот го прифатил, односно издал наредба за претрес, се однесувало на лице кое не е функционер, а е осомничено во случајот „Титаник“.

Наредбата за претрес била издадена на 25 јануари, по што СЈО извршило претрес на една локација во Скопје, на кој присуствувал и адвокатот Петар Василевски, од адвокатската канцеларија на Никола Додевски, кој е бранител на најголем дел од лицата осомничени во случаите што ги отвори СЈО.

– Одлуки по повод нашите барања беа донесени по истекот на законските рокови, со што постапката се одолжува и се оневозможува итност во постапувањето – беше наведено во соопштенето на СЈО од 31 јануари годинава.

Кривичниот суд минатата недела ги отфрли обвинувањата на СЈО дека продолжува со опструкциите на нивната работа и одбива да издаде наредби за претрес што се однесуваат на сегашни и на поранешни високи функционери.

Оттаму наведоа дека обвинителите на СЈО не ги испочитувале процедурите на судот и наместо преку приемното одделение, барањата за претреси ги поднеле директно кај дежурниот судија на претходна постапка.