Сеад Кочан доби шест години затвор за „Труст“, Авировиќ три години


Скопје, 20 јули, 2018 - 12:51 (META) 

Шест години затвор доби бизнисменот Сеад Кочан, а три години затворска казна доби Василије Аврировиќ, одлучи судијката Лидија Трајковска-Зимбовска во случајот „Труст“ на СЈО, во кој тие беа обвинети дека формирале конзорциум и со лажни документи добиле тендер за ископ на јаловина во РЕК Битола.

Третообвинениот во предметот Сафет Ватиќ е ослободен од обвинението, како и неговата фирма ВАТО ДООЕЛ.

За Кочан има и забрана да биде управител на правно лице или одговорно лице во правно лице во траење од три години. Авировиќ доби забрана да биде застапник на правно лице за потпишување тендери.

Обвинетите Сеад Кочан, Василије Авировиќ и Сафет Ватиќ пред Судот се изјаснија дека не чувствуваат вина за делото за кое се товарат.

Фирмите „Трансмет“, „Силекс“ и „Вато“ ДООЕЛ кои според обвинението, здружени во конзорциум, доставиле фалсификувани документи за сопственост на механизација и за кадровска екипираност со цел да добијат тендер на ЕЛЕМ за ископ на јаглен во Суводол за 17 милиони евра.


Завршува судењето за „Труст“, Кочан, Авировиќ и Ватиќ ќе ги слушнат пресудите


Скопје, 20 јули, 2018 - 9:26 (META) 

Судијката Лидија Трајковска-Зимбовска, која е претседател на судечкиот совет за предметот на СЈО „Труст“, денеска треба да ја објави пресудата за обвинетите во овој случај.

Обвинетите Сеад Кочан, Василије Авировиќ и Сафет Ватиќ пред Судот се изјаснија дека не чувствуваат вина за делото за кое се товарат.

Кочан во завршните зборови рече дека не се чувствува виновен, бидејќи немал никаква умисла да прекрши кој било закон.

– Покрај сувото гори и суровото – рече Кочан и додаде дека единствена цел му била да биде конкурентен на пазарот и да обезбеди работа за неговите вработени и нивните семејства.

СЈО побара тројцата обвинети да бидат осудени, а фирмите „Трансмет“ ДОО Скопје и „Силекс неметали СТ“ преку конфискација да вратат парите во државниот буџет.

Освен барањето за конфискација на имотот, СЈО одлучи третообвинетиот во овој случај Сафет Васиќ да го гони за помагање и го повлече обвинението за неговата фирма „Вато“ ДОО Студеничани.

Во „Труст“ првообвинет е бизнисменот Сеад Кочан и уште двајца, Василие Авировиќ и Сафет Ватиќ, а со обвинението опфатени се и фирмите „Трансмет“, „Силекс“ и „Вато“ ДООЕЛ кои според обвинението, здружени во конзорциум, доставиле фалсификувани документи за сопственост на механизација и за кадровска екипираност со цел да добијат тендер на ЕЛЕМ за ископ на јаглен во Суводол за 17 милиони евра.


Четворица добија четири месеци затвор за пресметката кај седиштето на ДУИ


Скопје, 6 јули, 2018 - 16:35 (META) 

Сабит Реџепи, Ридван Дервиши, Халил Камбери и албанскиот државјанин Љуљзим Битра денеска беа осудени на четири месеци затвор како виновни за учество во тепачката на 5 април годинава кога во вооружен судир на две групи кумановци, членови на ДУИ во Мала Речица едно лице загина а повеќе беа потешко или полесно повредени.

Според денешната пресуда на осудените казната им се намалува за времето поминато во притвор додека албанскиот државјанин Љуљзим Битра, кој се уште е во притвор, по издржувањето на казната се протерува од Македонија со забрана за влез во траење од пет години.

За нивниот бранител адвокатот Миралем Асани постапката за неговите клиенти била спроведена согласно законот, објективно и професионално, но сепак тој има забелешки на висината на изречената пресуда.

– Овие четворица сега осудени се и оштетени во настанот и по нивното признавање на вината за учество во тепачка во која се нашле случајно очекував дека ќе добијат условна осуда. Тие се нашле на погрешно место во погрешно време, односно тие дошле да земат двајца нивни пријатели и да одат на вечера по што биле нападнати од другата група што ги чекала подготвена. Во консултација со моите клиенти ќе решиме дали ќе поднесеме жалба на пресудата – рече адвокатот Асани.

Четворицата осудени на вчерашното рочиште за овој вооружен инцидент со смртни последици ја признаа вината за учество во тепачка по што нивната постапка беше третирана како одвоен случај и се одвиваше по скратена постапка.

Во инцидентот на 5 април две групи кумановци, едната таканаречена група на Реџепи, а другата на Мисими, најпрвин започнале расправа околу изборот на претседател и членови во телата на ДУИ за град Куманово во партиското седиште на партијата во тетовска Мала Речица. Потоа тие излегле надвор и расправијата преминала во вооружена престрелка во која се користеле безбол палки, секира, нож, палици но и огнено оружје при што Наим Реџепи беше убиен а повеќе лица беа потешко и полесно повредени.


Над 80 години затвор за седуммината обвинети за обид за убиство на Села


Скопје, 5 јули, 2018 - 11:59 (META) 

На седумтемина обвинети за обид за убиството на пратеникот Зијадин Села на 27 април минатата година, при крвавите насилства во Собранието, во Основен суд Скопје 1 денеска им беа изречени затворски казни од 10,5  години до 13,5 години затвор, односно вкупно 81,5 години затвор.

Сите беа обвинети за убиство.

Обвинетиот Кире Георгиевски е осуден на 13 години, а истата казна ја  доби и Александар Јаневски – Тошта. Половина година повеќе, односно 13,5 години доби Никола Војминовски. По десет години и шест месеци добија Андреј Мицов, Николче Димитриевски, Оливер Ошавковски и Коста Делов.

Според кривичното дело за кое се гонеа, на обвинетите им се закануваа затворски казни од 5 до 15 години.

Нивните двокати побараа ослободителни пресуди за сите, со образложение дека за ниту еден од нив не постојат докази дека се обиделе да го убијат Села.


На 5 јули пресуда за обвинетите за обид за убиство на Села


Скопје, 2 јули, 2018 - 16:25 (META) 

На 5 јули во Кривичниот суд Скопје судечкиот совет ќе ја донесе пресудата за седуммината обвинети за обид за убиство на пратеникот Зијадин Села при упадот во Собранието на 27 април 2017 година.

Во завршните зборови на одбраната во попладневниот дел од рочиштето, адвокатите побараа ослободителни пресуди за сите, со образложение дека за ниту еден од нив не постојат докази дека се обиделе да го убијат Села.

Адвокатката на Андреј Мицов, Маја Дојчиновска рече дека ОЈО не може да докаже дека лицето со фантомка кое носело зелена маица е токму Мицов, бидејќи не е пронајдено ништо од облеката на лицето со фантомка при претресот во домот на Андреј Мицов.

Одбраната на Никола Војминовски смета дека тој не е виновен и оти со доказите се утврдува дека не дејствувал со ништо за да го предизвика обвинението, односно утврдено е дека обвинетиот немал никаков контакт со Села и не можел да посегне по неговиот живот. Адвокатот на Војминовски рече дека, според изјавите на сведоците, се докажува дека Никола, како и многу други граѓани тој ден биле во Собранието и оти нема доказ дека тој ќе посегне по животот на Села.

Обвинетиот Коста Делов пред Судот рече дека се кае што тој ден бил во Собранието и се изјасни дека не е виновен за делото за кое се товари. Пред Судот посочи дека тој не е убиец.

Ослободителна пресуда во завршните зборови побара и адвокатот Бојан Маневски, кој рече дека неговиот клиент Александар Јаневски – Тошта не само што немал намера да го убие Села, туку тој му помогнал да остане жив. Според Маневски, не е точна констатацијата на обвинителот дека тоа што мислеле обвинетите дека Села е мртов и тоа го спасило од смрт, туку точно е тоа дека Села бил спасен од Тошта.

На последното рочиште во врска со овој случај на Стојан Павлевски му беше изречени казна затвор од три години, а на Цејо Георгиевски една година и два месеци. Во казната на обвинетите им се пресметува и времето поминато во притвор. Павлевски и Георгиевски треба да ги намират сите трошоци.


Апелација ги замени условните казни со затворски за тепачите од Собранието


Скопје, 2 јули, 2018 - 15:12 (META) 

Скопскиот Апелациски суд ги преиначил во затворски првите девет условни казни за насилство во Собранието на 27 април 2017 година, јави Алсат М.

Девет обвинети лани во мај признаа дека учествувале во толпа која сторила насилство, а Кривичниот суд на сите истиот месец им пресуди условни казни.

По жалбите на Обвинителството, Апелација условните ги преиначи во ефективни затворски казни и сите девет лица, ќе треба да одат во затвор. Меѓу осудените највисока казна доби Димче Христовски викан Жабата кој беше осуден на една година и шест месеци условен затвор.

Решенијата за преиначување на казните треба да бидат препратени во Основен суд Скопје 1 денеска.


Син на екссудијка призна вина за крвавиот четврток – осуден на една година затвор


Скопје, 18 јуни, 2018 - 12:23 (META) 

Нови двајца обвинети за настаните од крвавиот четврток минатата недела признале вина, информираат од кривичниот суд. На судско рочиште вина признале обвинетите Васко Цунгаревски и Димитар Попоски за кривичното дело насилство.

Цунгаровски, кој е син на екссудијката од Основниот суд Скопје 2, Зорица Цунгаровска, учествувал во насилството во Собранието и според обвинението на Основното јавно обвинителство од Скопје, тој му се заканувал на премиерот Зоран Заев. Судијката Оља Ристова го осуди на казна затвор од година и 3 месеци и го упати Поповски на задолжително психијатриско лекување, бидејќи со вештачење било утврдено дека обвинетиот е со битно намалена пресметливост.

За Цунгаревски остануваат мерките за претпазливост: забрана за напуштање на живеалиштето, одземање на пасошот и забрана за издавање на нов.

Вториот обвинет доби алтернативна мерка – условна казна затвор од 2 години, ако во следните 5 години не стори ново кривично дело. Попоски му се заканувал на пратеникот на ДУИ, Артан Груби. Пресудата не е правосилна, па осудените имаат право на жалба до Апелациониот суд.

За крвавиот четврток, беа досудени 9 условни казни, а двајца обвинети за насилство признаа вина и добија затворски казни.


Апелација му ја укина затворската казна на бегалецот Грујевски за „Тврдина 2“


Скопје, 30 мај, 2018 - 16:43 (META) 

Апелацискиот суд во Скопје ја укина пресудата за поранешниот  началник на Петтата управа во УБК, Горан Грујевски, во предметот на СЈО „Тврдина 2“. Со пресудата, Грујевски кој сега е бегалец во Солун, беше осуден на година и пол затвор за уништување списи и документи за незаконското прислушување.

Тоа значи дека за овој предмет, судењето за Грујевски треба да почне од почеток. Oва е одлуката на тричлениот кривичен совет со кој претседаваше судијката Цветанка Периќ по жалбата на адвокатите на Грујевски. Јавната седница се одржа годинава кон крајот на март.

Причината за укинувањето на пресудата за случајот „Тврдина 2“, која ја донесе судијката Лидија Петровска, позната од „бомбите“, е тоа што не биле исполнети законските услови за на обвинетиот Грујевски да му се суди во отсуство.

Грујевски, инаку е обвинет и во случајот за масовното прислушување „Тврдина – Таргет“ и во предметот „Трезор“, а против него СЈО ја води истрагата „Странски служби“, за набавка на опремата за прислушување.


Груевски на „Фејсбук“: Главата горе, доаѓаат подобри времиња


Скопје, 23 мај, 2018 - 16:16 (META) 

Поранешниот премиер и поранешен лидер на ВМРО-ДПМНЕ, Никола Груевски по денешната пресуда од две години казна затвор која му ја изрече Кривичниот суд за случајот „Тенк“ на „Фејсбук“ напиша „доаѓаат подобри времиња“.

„Главата горе горди мои Македонци и горди граѓани на Македонија. Ова е твоја земја, ние нема да те изневериме и ќе бидеме рамо до рамо со тебе, во сите предизвици. Ти си нашата сила, ние сме вашата сила. Доаѓаат подобри времиња. Главата горе и не заборавајте, ова е ваша земја, ова е земја на сите вие кои што живеете во неа и ничија друга. Вие одлучувате! Да живее Република Македонија“, напиша Груевски.

Ова е дел од говорот кој Груевски го држеше на митингот во Скопје пред предвремените парламентарни избори во декември 2018 година, а видео од тој митинг денеска Груевски сподели на социјалните мрежи.


Николоски за пресудата за Груевски: Судот го спроведе тоа што Заев го напиша


Скопје, 23 мај, 2018 - 15:49 (META) 

Денеска видовме во живо како функционира политички суд и како се изрекуваат политички пресуди. Го видовме на дело непринципиелниот брак помеѓу власта на Заев и судот. Бенефиците од овој брак сега се во корист на Заев, но многу брзо ќе се свртат на негова штета. Тоа оди правопропорционално со добивањето и губењето власт. Така функционира нереформираното и клиентелистичко судство, рече потпретседателот на ВМРО-ДПМНЕ, Александар Николоски на прес-конференција посветена на денешната пресуда од две години затвор за Никола Груевски за набавката на луксузниот блиндиран „мерцедес“.

Порачувајќи дека судот го спровел тоа што Зоран Заев го напишал, и дека судот го интересира само реализација на политичките нарачки на Зоран Заев и СДСМ за пресметка со сите кои што мислат поинаку, Николоски рече дека станува збор за дело „на кое се смеат сите правници“. Според него, целта била да се дисквалификува Груевски, кој ги зачувувал националните интереси и имал бројни успеси во раководењето со државата.

– Ова е пресуда која има повеќе цели, тие се: Никола Груевски, кој беше симбол за зачувување на националните интереси, економски успеси, привлекување инвеститори, реформи, зголемување на плати, пензии, социјална помош, субвенции, градби и сè друго – да се засени и да биде политички дисквалификуван – рече Николоски.