!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Една полицајка е тешко ранета, а неколкумина се повредени при престрелка во Минхен


Минхен, 13 јуни, 2017 - 10:25 (META) 

На железничка станица во Минхен се случила вооружена пресметка, а светските медиуми јавуваат дека една полицајка е ранета.

Германската полиција на „Твитер“ објави дека неколку лица се ранети, а полицајката била тешко повредена. Едно лице било уапсено.

Медиумите пишуваат дека напаѓачот пукал на полицајката при проверка на документи во воз.

Железничката станица е затворена, а патниците се евакуирани.


Еден полицаец е убиен, а друг ранет во престрелка во центарот на Париз


Париз, 20 април, 2017 - 22:23 (META) 

Еден полицаец е убиен, а друг е ранет во вооружен напад што вечерва се случил во центарот на Париз, соопштила француската полиција, пренесува „Би-би-си“.

Според информациите на дел од француските медиуми, напаѓачот кој отворил оган кон полицајците бил застрелан и убиен. Престрелката се случила на авенијата Шанзелизе, која е целосно блокирана и каде во тек е операција на француските безбедносни сили.

В недела во Франција се одржува првиот круг од претседателските избори, а џихадизмот е главната тема на изборите по нападите што беа извршени од Исламска држава.

Причините за нападот засега се непознати, а како што пренесува „Би-би-си“, засега нема индиции ниту дека станува збор за терористички напад.


Криминално-политичка престрелка и бркотница по Партизанска


Скопје, 15 ноември, 2016 - 10:58 (META) 

Четириесет и шестгодишен скопјанец ноќеска, пред полноќ, е ранет во престрелка на булеварот Партизански одреди. Според првичните информации, станува збор за Даниел Т., кој веднаш по инцидентот е пренесен на Клиниката за анестезиологија, реанимација и интензивно лекување (КАРИЛ), каде бил опериран.

На пукањето му претходела бркотница со автомобили, која започнала од бензинската на „Макпетрол“ на булеварот Илинден и продолжила на булеварот Партизански одреди.

Даниел Т. кој, според неофицијални информации, бил ранет со неколку куршуми во престрелката, изгубил контрола и се превртел со своето возило „голф 5“ на булеварот Партизански одреди. Тој бил извлечен од возилото и веднаш префрлен во болница, а напаѓачот е во бегство.

Од МВР засега нема официјални информации за инцидентот. Во јавноста се појавија шпекулации дека станува збор за пресметка меѓу криминални банди, но и наводи кои не ја исклучуваат можноста дека синоќешниот инцидент има и политичка заднина.

„Дојче веле“ на македонски јазик пишува оти постојат сомнежи за поврзаност на синоќешниот инцидент со друг настан од 17 април годинава, односно со тепачка во угостителски објект во Трговскиот центар „Буњаковец“, во која учествувале три идентификувани и неколку непознати лица од кои едно, со остар предмет, било прободено во главата. Според неофицијални информации, повредениот Г.К. (41) е главниот телохранител на поранешниот директор на Управата за безбедност и контраразузнавање (УБК), Сашо Мијалков, а во тепачката наводно бил инволвиран некој од браќата Даниел и Дејан Т., познати како „близнаците од Ѓорче“ (општината Ѓорче Петров н.з.).

Инаку, „Дневник“ на 5 август годинава на насловната страница објави текст „Криминално-политичкото подземје не мирува“ во кој, меѓу другото, се вели:

„Скопјанецот Даниел Трајковски, брат близнак на Дејан Трајковски кој е во бегство поради осомниченост за убиство во обид, од профилот со име Перла Трајковска, упати сериозни закани и најави за рекет од 50 милиони евра до бизнисменот и сопственик на МПМ, Орце Камчев, како и до екс директорот на УБК, Сашо Мијалков.
„Еден метак кошта два евра, а за тоа немаш одбрана со кум ти… Така да на крај ќе биде 2 евра работата на Камчев у глава и две евра за Мијалков у глава, четири евра ќе кошта услугата, без работна рака… Гратис работна рака… Или ќе платиш 50 милиони евра или таксиметарот ти чука… Орце Камчев запамти во Дебар од кај што потекнуваме нема место за два лава. Даниел близнак! Да живее Зоран Заев идниот премиер на Македонија! Со вас претседателе до смрт!“, наведува Трајковски во пораката, во која на почетокот, покрај Камчев и Мијалков, го
споменува и Никола Груевски“.


Организацијата „Црна моќ“ ја презеде одговорноста за нападот во Далас


Далас, 8 јули, 2016 - 18:18 (META) 

Одговорноста за нападот врз полицијата во Далас ја презеде политичката организација „Црна моќ“, која на својот профил на „Твитер“ напиша дека ќе следуваат уште убиства на полицајци.

– Нашите снајперисти убија петмина полицајци. Во наредните денови ќе има уште убиства. Набавете пушки и придружете им се на нашите снајперисти во борбата против полициската репресија – пишува на профилот на „Твитер“ на таа организација.

 

Едночасовната престрелка во Далас денеска заврши со апсење на тројца од четворицата осомничени напаѓачи, додека последниот беше убиен од полицијата.

Неговото тело е идентификувано и станува збор за Мајкл Хавиер Џонсон (25), кој немал криминално досие, но бил војник во американската војска во Авганистан една година.

Пукањето почна за време на протестот против полициската бруталност кон црнечката заедница, откако најмалку двајца снајперисти отвориле оган врз полицијата.

 

 


Заврши престрелката во Далас: Тројца уапсени, шест убиени и шест повредени


Далас, 8 јули, 2016 - 11:37 (META) 

Едночасовната престрелка во Далас заврши со апсење на тројца од четворицата осомничени напаѓачи, додека последниот се самоубил, јавуваат американските медиуми.

Пукањето почна за време на протестот против полициската бруталност кон црнечката заедница, откако најмалку двајца снајперисти отвориле оган врз полицијата. Протестот доаѓа два дена откако полицијата уби двајца Афроамериканци во американските сојузни држави Минесота и Луизијана.

Според последните информации, пет полицајци загинаа, а шест се повредени во престрелката.

Локалните медиуми јавуваат дека еден од осомничените, кој за забарикадирал во паркинг-гаража, пред да се самоубие, преговарал со полицијата и открил дека во центарот на градот поставил бомба. Тој пред да се самоубие открил дека планирал да повреди и да убие што е можно повеќе полицајци.

Полицијата соопшти дека специјалните единици безбедно успеале да отстранат сомнителен пакет, за кој се претпоставува дека е бомба.

Еден од уапсените доброволно се предал, откако полицијата објави негова слика и побара од јавноста да помогне при неговото идентификување.

Претседателот на САД, Барак Обама, ги осуди нападите и истакна дека полициските убиства покажуваат дека Америка нужно мора да се соочи со појавата на расни предрасуди во полициските редови.


Престрелка во Египет – убиени двајца полицајци и тројца припадници на ИД


Каиро, 9 мај, 2016 - 11:18 (META) 

Во престрелка во северниот дел на Синајскиот Полуостров убиени се двајца египетски полицајци и тројца припадници на Исламска држава, соопштија египетските власти.

Престрелката се случила синоќа, кога група терористи отвориле оган врз контролен пункт на египетските сили за безбедност.

Египет е честа мета на напади откако во јули 2013 година армијата го собори од власт претседателот Мохамед Морси, лидер на исламското движење Муслиманско братство.


Пет лица се убиени во престрелка во училиште во Канада


Ла Лок, 23 јануари, 2016 - 10:32 (META) 

Најмалку пет лица се убиени во престрелка во училиште во канадскиот град Ла Лок во провинцијата Саскечуан, а еден осомничен е уапсен, соопшти канадскиот премиер Џастин Тридо. Двајца од ранетите се наоѓаат во критична состојба, јавува „Ројтерс“.

– Ова очигледно е кошмар на секој родител – изјави премиерот Тридо.

Според локалните медиуми, директорот на училиштето ја известил полицијата дека има пукотници.

– Луѓето врескаа, додека во заднина се слушаше пукање. Слушнав неколку истрели пред да успеам да избегам од училиштето – изјавил десетгодишен ученик.

„Би-Би-Си“ јавува дека ова училиште го посетуваат околу 900 деца, на возраст до 12 години.


Обвинителството отвори истрага за престрелката на патот Струга – Долна Белица


Струга, 16 декември, 2015 - 15:10 (META) 

Основното јавно обвинителство Струга донело наредба за спроведување истрага против пет лица осомничени за престрелката што се случи вечерта на 13 декември, на локалниот пат Струга – Долна Белица, во која едно лице беше убиено, а две беа ранети, соопшти денеска Јавното обвинителство.

„Лицата се товарат за убиство од член 123 и за недозволено изработување, држење и тргување со оружје или распрскувачки материи од член 396 од Кривичниот законик. Надлежниот јавен обвинител до судијата на претходна постапка при Основниот суд во Струга достави предлог за определување мерка притвор за осомничените, од кои едно лице е на болничко лекување, едно е недостапно за органите на прогонот и три лица се непознати сторители“, стои во соопштението на Обвинителството.

Од Министерството за внатрешни работи (МВР) претходно соопштија дека полициската станица во Струга поднела кривична пријава против Б.Б. (45) и Е.Б. (30), двајцата од селото Велешта, и против три непознати лица.


Јавното обвинителство почна истрага за престрелката во Дреновац


Тетово, 2 ноември, 2015 - 19:26 (META) 

По добиената кривична пријава за вооружениот инцидент во тетовската населба Дреновец, надлежниот јавен обвинител од Основното јавно обвинителство – Тетово донесе наредба за спроведување истражна постапка против четири лица.

„Во кривично-правниот настан што се случил во саботата околу полноќ, учествувале шест лица поделени во две групи, кои со пиштоли и со ножеви се обиделе да ги расчистат меѓусебните недоразбирања. Осомничени се четири македонски државјани, Љ.И., К.В., М.М. и Р.О., кои се товарат дека сториле самостојни кривични дела убиство. Во исто време, двајца од осомничените, К.В и М.М., се товарат и за недозволено изработување, држење и тргување со оружје или распрскувачки материи од член 396, став 1 од Кривичниот законик“, се вели во соопштението од јавното обвинителство.

Надлежниот јавен обвинител до судијата на претходна постапка доставил предлог за определување мерка притвор за сите осомничени лица. Во моментот Љ.И. е на лекување во Клиничката болница во Скопје, а М.М. е недостапен на органите на прогонот.


Три лица се ранети во вооружена престрелка во Тетово


Тетово, 1 ноември, 2015 - 13:36 (META) 
Три лица се ранети во вооружена престрелка во Тетово, соопшти полицијата.
Во престрелката и во тепачката учествувале петмина, од кои тројца добиле тешки телесни повреди и се пренесени во тетовската клиничка болница, додека другите двајца поминале со полесни повреди и се примени во скопскиот ургентен центар.
Тепачката се случила доцна синоќа.
Полициска екипа од СВР – Тетово работи на расчистување на случајот.