Во Преспа потпишана спогодбата со Грција


Ресен, 17 јуни, 2018 - 11:19 (META) 

Шефовите на дипломатиите на Македонија и на Грција, Никола Димитров и Никос Коѕиас во селото Псарадес (Нивици) на грчкиот брег на Преспанското Езеро претпладнево ја потпишаа „Конечната спогодба за решавање на разликите опишани во Резолуциите 817  (1993) и 845 (1993) на Советот за безбедност на Обединетите Нации, за престанување на важноста на Привремената спогодба од 1995 г. и за воспоставување на стратешко партнерство меѓу страните“.

Документот предвидува ново име за Република Македонија, односно „Република Северна Македонија“, кое ќе се употребува ерга омнес, односно во секоја пригода и во земјава и надвор од неа. Oфицијалниот јазик на земјата е македонски, додека државјанството ќе биде „македонско/граѓанин на Република Северна Македонија“. Договорот го потпиша и посредникот на ОН, Метју Нимиц на денот на својот роденден.

Тој во оваа пригода рече дека, неговата посредничка улога завршува и дека останува двете земји да го одработат останатиот дел од договорот. Истакна дека, за решавање на овој децениски спор, кај четворицата политичари од македонска и грчка страна, имало лидерство, храброст и визија.

На церемонијата присуствуваа и шефицата на европската дипломатија Федерика Могерини, еврокомесарот за преговори за проширување Јоханес Хан и потсекретарката за политички прашања на Обединетите нации Розмари Ди Карло.

– Колку убав и величествен историски ден, нека ни е со среќа – рече Заев, кој во првиот дел од својот говор го спомена Аристотел, велејќи „човек што има волја, може и планини да помести“ што, како што нагласи, се случува денеска.

-Нема да можеш да постигнеш ништо без храброст и надежта е буден сон. Овие две мисли говорат дека кога има надеж и храброст можеш да поместиш планини. Со потпишувањето на овој договор навистина поместивме планини. Кога многумина се сомневаа, потврдивме дека е возможно. Ставаме крај на еден спор. Прашањето беше отворено три децении. Затоа јас и Ципрас и министрите за надворешни работи заедно со нашите претставници, тргнавме во потрага по решение и стигнавме до решение – рече Заев, посочувајќи оти од историјата треба да се учи, а не да се повторува нејзината содржина.

Грчкиот премиер, Алексис Ципрас рече дека „ако душата на секој народ е неговата историја, тогаш во нашиот договор се отсликани душите и на двата народи.“

– Напорно и неуморно стигнавме до заемно прифатлив договор, кој целосно ги почитува основните принципи и вредности на двете страни, договор кој денес ни дозволува да им се обратиме на граѓаните на двете земји, да ги погледнеме во очи и да ги повикаме да го прочитаат и да го поддржат без предрасуди – додаде Ципрас.

Тој при честитањето по потпишувањето на договорот, ја симна од врат својата вратоврска и му ја подари на својот грчки колега .

Денешниот настан продолжува со заеднички ручек на македонска територија, во Отешево.


Димитров, Коѕијас и Нимиц ќе го потпишат договорот денеска во Преспа


Скопје, 17 јуни, 2018 - 9:48 (META) 

Премиерот Зоран Заев, ја предводи делегацијата на Владата, на свечената цермонија на потпишувањето на конечниот договор за решавање на македонско-грчкиот спор за името и за стратегиско партнерство, што денеска, ќе се одржи на македонската и на грчката страна на Преспанско Езеро.

Премиерот Заев и македонската делегација, во чиј состав се замениците претседатели на владата, министерката за одбрана, Радмила Шекеринска, вицепремиерот задолжен за европски прашања, Бујар Османи, министерот за внатрешни работи, Оливер Спасовски, како и министерот за надворешни работи, Никола Димитров, денеска ќе пристигнат во Псарадес, на грчката страна, каде што ќе бидат пречекани од премиерот на Република Грција, Алексис Ципрас и од грчката владина делегација, и каде што министрите за надворешни работи на Македонија и на Грција, Никола Димитров и Никос Коѕијас ќе го потпишат договорот, заедно со медијаторот во преговорите, амбасадорот Метју Нимиц.

На делот од заедничкиот настан на свечената церемонија во Република Грција, свои обраќања ќе имаат премиерите Заев и Ципрас.

Според агендата на настанот, официјалната средба на двете делегации потоа ќе продолжи на македонската страна на Преспа, во Отешево, каде што двете делегации ќе имаат билатерален разговор и свечен ручек.

За време на целата церемонија, и во Грција и во Македонија, ќе присутсвуваат потсекретарката за политички прашања на Обединетите нации, Розмари Ди Карло, Високата претставничка за надворешни работи и безбедносна политика на Европската унија и Заменик-претседателка на Европската комисија, Федерика Могерини, и Комесарот за европска соседска политика и преговори за проширување на Европската унија, Јоханес Хан.


Договорот со Грција ќе се потпишува утре, денеска се гласа доверба на владата на Ципрас


Скопје, 16 јуни, 2018 - 12:27 (META) 

Во текот на утрешниот ден, недела, 17 јуни, во регионот на Преспа, на територија на Грција во засега непознат термин, ќе се одржи церемонијата на која, како што соопшти македонската влада, министерот за надворешни работи на Република Македонија, Никола Димитров и министерот за надворешни работи на  Грција, Никос Коѕиас ќе го потпишат договорот за  решавање на македонско – грчкиот спор за името. По потпишувањето на документот, кој го носи името „Конечна спогодба за решавање на разликите опишани во Резолуциите 817  (1993) и 845 (1993) на Советот за безбедност на Обединетите Нации, за престанување на важноста на Привремената спогодба од 1995 г. и за воспоставување на стратешко партнерство меѓу страните“,  на македонска територија ќе се одржи средба и ручек на претставниците на двете влади.

На утрешниот настан на кој ќе се потпише Спогодбата ќе присуствуваат премиерите на двете земји, Зоран Заев и Алексис Ципрас.

Владата го усвои овој договор на попладневната седница во четвртокот, а потоа ја симна тајноста и го објави на својот веб сајт.

Во грчкиот парламент, пак, денеска  пред 10 часот по локално време почна третиот дел по поднесеното барање од Нова демократија за гласање недоверба на Владата.  Главната тема на 16-часовната дискусија на пратениците вчера беше Конечната спогодба  со Македонија. Притоа пратеникот на ултра-десничарската партија „Златна зора“ Констанинос Барбарусис ја повика армијата да изврши воен удари поради „предавничката“ политика на владата на Ципрас.
Партијата „Златна зора“ ги осуди коментарите на нивниот пратеник и го исклучи од партијата. Исто така, на Златна зора и е забрането да учествува во продолжението на собраниската дебата.

Денеска покрај дискусијата, се очекува да се обратат лидерите на политичките партии и грчкиот премиер, а седницата ќе заврши со гласање недоверба.  Како што јави МИА, според досега изнесените ставови, не се очекуваат изненадувања. Пратениците на СИРИЗА и Независни Грци ќе гласаат против предлогот на Нова демократија, а Владата ќе добие доверба да продолжи да ја води Грција.

Грчките медиуми сензационално објавуваат дека во  текот на денешната расправа министерот за надворешни работи, Никос Коѕијас ќе презентира документи од грчкото МНР за преговорите со Македонија за името во минатото.
Договорот што ќе се потпише утре предвидува големи промени:

  • Двете страни ја потврдуваат постоечката граница меѓу нив како трајна меѓународна граница и ја потврдуваат својата желба за заемно пријателство, добрососедство и партнерство, како и решеноста да не преземаат и да не поддржуваат какви било непријателски чекори кон другата земја.
  • Официјалното име на Република Македонија ќе биде „Република Северна Македонија“, и тоа ќе се употребува ерга омнес. Скратеното име ќе биде „Северна Македонија“.
  • Државјанството ќе биде „македонско/граѓанин на Република Северна Македонија“.
  • Официјалниот јазик ќе биде „македонски јазик“, како што е признаено на Третата Конференција на ОН за стандардизација на географските имиња, одржана во Атина во 1977 година, но како јазик од групата на јужнословенските јазици и воопшто неповрзан со античката елинска цивилизација и култура.
  • Кодот за земјата на регистарските таблички на возилата на Втората страна ќе биде НМ или НМК. За сите други намени, кодот на земјата останува да биде МК и МКД, како што е официјално определено од Меѓународната организација на стандардизација (ИСО).
  • Придавката во однос на државата, нејзините службени органи и други јавни институции ќе биде „на Република Северна Македонија“ или „ на Северна Македонија“. Приватните лица и тела кои не се поврзани со државата и јавните институции и органи и не добиваат финансиска поддршка од државата за активности надвор од државата, можат да ги користат придавките изведени од зборот „Македонија“, но со јасна напомена дека тие придавки воопшто не се однесуваат на древна Македонија и на она што Грција го подразбира како македонски дел од своето историско наследство.
  • Македонија ќе го смени Уставот за да го промени името во Република Северна Македонија и да ги внесе погоре наведените промени.
  • Спогодбата подразбира македонското Собрание набргу да ја ратификува Спогодбата и за тоа да ја извести Грција, а потоа, според текстот, во Македонија може, но не мора, да се организира референдум.
  • Уставните промени преку амандмани мора да се направат до крајот на годинава. Откако тоа ќе се случи, Спогодбата треба да биде ратификувана и од грчкиот парламент.
  • Грција, откако ќе биде известена дека Македонија ја  ратификувала спогобата, ќе го извести Претседателот на Советот на Европската Унија дека дава поддршка за почеток на преговори за членство на Македонија, но под името Република Северна Македонија.
  • Истовремено, ќе го извести Генералниот секретар на НАТО дека дава поддршка НАТО да ѝ упати покана за пристапување на земјава под новото име, но конечната поддршка ќе зависи од исходот на референдумот, ако се организира, и од уставните измени, а ако референдумот го потврди новото име и амандманите на Уставот се додадени, Грција ќе го  ратификува Протоколот за пристапување на нашата држава под новото име во НАТО, а таа ратификација во грчкиот парламент ќе се направи паралелно со ратификацијата на Спогодбата што ќе се потпишува утре.

Договорoт за името, ако се постигне, ќе се потпише во Преспа


Софија, 17 мај, 2018 - 9:39 (META) 

Двајцата премиери, Зоран Заев и Алексис Ципрас, денес ќе имаат тет-а-тет средба во Софија.

И во двете земји постои воздржан оптимизам, па и владитe со последните изјави само ја нагласуваат важноста и неизвесноста на резултатот од средбата, но и најавуваат дека има уште време и простор за конечен договор.

Според грчките медиуми, тој договор, без разлика кога ќе се постигне, наводно веќе е договорено заеднички да се потпише во Преспа.

Ципрас вели дека е оптимист и не ги крие големите очекувања од средбата со неговиот македонски колега, иако рече дека „последните чекори се секогаш најтешки“.

Заев, пак, уште повоздржано изјави дека „ова е добар момент да потврдиме што сè е до сега постигнато“.

Ако може да се концентираат двете оценки околу шансите за договор, тогаш излегува дека во Атина сметаат дека „чашата е до половина полна“, а во Скопје дека „чашата е до половина празна“.


Македонец уапсен за нелегален риболов во голема Преспа


Атина, 13 февруари, 2017 - 14:40 (META) 

Грчката полиција уапси еден Македонец и четворица Албанци за нелегален риболов во Преспанското езеро од грчка страна.

Петтемина се на возраст од 32-38 години и биле уапсени од граничната полиција во Лерин. Полицијата ги запленила двата нивни моторни чамци во кои имало 100 килограми риба и опрема за риболов.

Уапсените ќе бидат изведени пред обвинител во Лерин. Според полицијата, уапсените нелегално ја преминале грчко-албанската граница преку езерото. Нелегалниот риболов во Преспанското езеро според информациите во Грција се случува многу често.


Промоција на Охрид и на Преспа како биосферна туристичка дестинација


Лима, 18 март, 2016 - 11:41 (META) 

На последниот работен ден од Светскиот конгрес на биосферни резервати во Лима, учесниците ги одобрија декларацијата и акцискиот план од Лима, за периодот 2016-2025 година.

– Придобивката од новиот акционен план од Лима е можноста за користење искуства, но и за финансиска поддршка за изготвување на управувачки план за Охрид – Преспа и за негова промоција како биосферна туристичка дестинација што е тренд. Од тој пристап корист ќе имаат сите локални заедници. Се надевам дека конечно ќе ги фатиме светските еколошки, економски и социјални процеси за развој на вакви подрачја – вели Дејан Пановски од Министерството за животна средина и просторно планирање, кој беше учесник и претставник на Република Македонија на светскиот собир.

Главната мисија во наредното десетлетие ќе бидат развој и зајакнување на модели за одржлив развој во биосферните резервати, комуникација за искуствата и поддршка на стратегии и планови за развој.

Акциониот план содржи пет теми на активности: промоција на биосферните резервати како сервис за екосистемите и за развојот, соработка и вмрежување на биосферните резервати, партнерство за одржливи фондови за развивање планови, размена на информации и податоци и ефективно управување.


Трговците навалија на преспанското „муцо“ уште не созреано


Битола, 26 август, 2015 - 13:47 (META) 

На еден месец пред преспанската берба на јаболка откупувачите навалија на преспанското јаболко од сортата „муцо“ уште не созреано.

Како ретко кога досега во август се продадени близу 100 тони јаболко и тоа за откупна цена од 18 до 20 денари за килограм. Преспанските овоштари велат дека после седум до осум години проблеми со откупот на јаболката, им се враќа оптимизмот дека годинешниот род ќе биде продаден и тоа за повисоки и пореални откупни цени.

– Преспанските овоштари тријат раце задоволни од годинешниот род и од квалитетот на овошјето. Во лето кога пазарот е полн со сезонско овошје од грозје, лубеници, дињи и сливи, преспанското „муцо“ како ретко кога досега се продава со тони и тоа се уште не созреано. Позитивна работа за нас како овоштари е што имаме и повисока откупна цена и што сме во можност ние да ја диктираме цената. Првите количини се испорачуваат на домашниот пазар по големите маркети и на зелените пазари – вели за „Мета“ Љубе Пампулески, првиот човек на Здружението за овоштари од Преспа „Благој Котларовски“.

Според Пампулески годинава се очекува во Преспа да бидат произведени околу 90 илјади тони трпезно јаболко или вкупно со индустриското јаболко преку 110 илјади тони од ова овошје.

За сега овоштарите велат дека за преспанското јаболко се отвораат пазарите во Русија, а голем интерес за пласман има и во Саудиска Арабија и Катар.

Сепак овоштарите со нетрпение го очекуваат отворањето на откупниот центар за јаболка за кој има најави дека ќе стартува со работа кон крајот на септември. Се надеваат дека со него ќе им се олесни пласманот на јаболката, а ќе ќе се надминат проблемите и со чувањето и складирањето на родот, што за овоштарите се уште е најголемата мака.

А.Б


Овоштарите од Преспа пак извисија со обештетувањето од Владата


Преспа, 26 февруари, 2015 - 11:27 (META) 

И по осум месеци од невремето во Преспа, кога силен град уништи половина од овошните насади, преспанските овоштари немаат земено ниту денар од државата како обештетување за уништениот род. Згора на сè, една третина од годинешниот род , или 20.000 тони јаболка, остана да скапува по магацините поради пребирливоста на странските пазари.

Овоштарите велат дека губат по стотици илјади евра.
– Нè извисија, требаше одамна да кажат по колку ќе нè обештетат, но досега нема ниту абер ниту пари од Владата. Последно ни кажаа дека за нашата мака ќе се одлучува на владина седница во понеделникот и пак ништо. Овоштарите ги бројат само загубите. По магацините останаа непродадени 20.000 тони јаболка. Дополнително, јаболкото калира, скапува и нема надеж за продажба – вели Љубе Пампулевски, претседател на здружението на овоштари од Преспа, „Благој Котларовски“.

Наместо обештетување, овоштарите од Преспа добиле предупредување од владините службеници, оваа година без отстапки да ги осигураат своите овоштарници и од нив да бараат надомест за евентуални штети, а не од државата.

– Од речиси илјада овоштари, до лани, само двесте ги имаа осигурано своите овоштарници. Сега добивме едно предупредување од Владата да ги осигураме сите своите насади бидејќи државата ни субвенционира 60 отсто од осигурувањето – велат овоштарите од Преспа.

Единствениот спас за преспанските јаболка оваа година е косовскиот пазар, но и таму нема континуитет на пласманот, туку се зависи од пресметките на тамошните трговци.

– Сите светски пазари со кои соработувавме бараа прва класа јаболко, а тоа годинава остана малку во Преспа. Единствено трговците од Косово доаѓаат да откупуваат, ама тоа е многу малку, четири-пет шлепери, двапати во недела. Засега тој пазар остана непребирлив, па се мешаат јабока од прва и од втора класа – вели Пампулевски.

А.Б.