Забранет сообраќајот на некои превои и патни правци, на некои само за камиони


Скопје, 13 февруари, 2018 - 16:16 (META) 

Поради обилните снежни врнежи, прогласена е забрана за движење на тешки товарни возила на планинските превои Пресека, Буково и кон граничниот премин Ќафасан. На Буково сообраќајот е забранет и за автомобили.

Од 15 часот на патниот правец Тетово – Попова Шапка воведена е забрана за сообраќај на камиони и автобуси. Забрана за движење на камиони има и на патот Маврово – Дебар, потоа од Стража кон Колари. Поради магла, видливоста е намалена до 100 метри на превојот Стража и на 30 до 40 метри на превојот Ѓавато.

Патниот правец Крива Паланка – Куманово кај Грамаѓе, повторно е во функција, откако претходно беше блокиран. Исто така, поради отстранување одрони во близина на селото Истибања сообраќајот на патниот правец Кочани- Македонска Каменица е во прекин, а се користи алтернативен пат Кочани-Виница-Драгобрашта-Бигла-Македонска Каменица.


АМСМ: Поради снегот воведена забрана за тешки товарни возила на Стража и на Пресека


Скопје, 5 јануари, 2017 - 17:39 (META) 

Поради врнежите од снег, воведена е забрана за движење на тешки товарни возила на патниот правец Гостивар – Кичево, преку планинскиот премин Стража, како и на патниот правец Маврово – Дебар, a од 15.45 часот е воведена и забрана за тешки товарни возила и на планинскиот превој Пресека, соопштуваат од Автомото-сојузот на Македонија (АМСМ).

Оттаму информираат дека сообраќајот на државните патишта се одвива во зимски услови, по влажни коловози, а во западниот дел од земјата, на места има остатоци од снег, по интервенција на екипите на „Македонија пат“.

Во клисурите и во засеците можна е појава на помали одрони, особено на патните правци Кочани – Македонска Каменица – Делчево, Виница – Берово, Гостивар – Стража, Маврово – Дебар – Струга, Демир Капија – Удово, Катланово – Велес, Крушево – Демир Хисар и Ресен – Буково.

Интензитетот на сообраќај на патните правци надвор од градските средини е умерен, а на граничните премини нема подолги задржувања за влез и за излез од државата (оваа информација се однесува само за македонската страна на премините), велат од АМСМ.


Сите патници извлечени од Пресека


Охрид, 29 декември, 2014 - 11:04 (META) 

Извлечени се сите патници кои во недела вечер со своите возила биле заглавени на планинскиот превој Пресека, на магистралниот пат Охрид – Кичево, информираат од Центарот за управување со кризи.

Од АМСМ велат дека сообраќајот на овој патен правец е сè уште во прекин, а голем број охриѓани со своите возила чекаат во Кичево или патуваат преку Битола.