Ципрас: На чекор сме до договор, не чека тешка работа


Софија, 17 мај, 2018 - 16:36 (META) 

Синоќа, во малку поопуштена атмосфера, по вечерата и речиси до утринските часови имавме многу суштински разговори и постигнавме суштински напредок. Требаше само да преспиеме и денеска да го потврдиме тоа што сме го договарале. Не чека тешка работа. Сè уште не сме во позиција да зборуваме за договор, но ќе се сретнеме пак на почетокот на следниот месец и ќе се обидеме да постигнеме договор пред Самитот на 28 јуни – рече на прес-конференцијата во Софија грчкиот премиер Алексис Ципрас, по разговорите со неговиот макeдонски колега Зоран Заев.

Ципрас изјави дека имал три тет-а-тет средби: со францускиот претседател Емануел Макрон, со германската канцеларка Ангела Меркел и со Заев.

На прашањето, дали е оптимист дека ќе има конечен договор пред Самитот во јуни, Ципрас вели дека на чекор се до договор, но дека преговорите не се лесни, но и дека договорот, ако се постигне, ќе го издржи тестот на времето и ќе ги почитува чувствата на двата народа.

Ципрас потврди дека во оваа ситуација „клучна е позицијата на опозицијата и во двете земји“ и дека грчкиот став останува дека се неопходни „промени нa Уставот на соседот“.

– Нашата позиција е иста, бараме решенија за сите клучни точки без да ги поминеме црвените линии. Не е лесно прашањето, но има варијанти. Нема да ви дадам поединости. Грчката страна го нема притисокот на времето, но сепак, до крајот на јуни и нам ни треба разврска. Ако е позитивна  – добро, ако не, одиме понатаму. Остануваме добри соседи – рече Ципрас.

Тој потврди дека во следните денови, особено во Македонија, ќе има процес на информирање за постигнатото, како и дека Преспа, заради симболиката, е една од варијантите каде би се потпишал евентуалниот договор.

Сепак, за Грција една од големите вести од Самитот е исходот од средбите на Ципрас со Маркел и Макрон. Грчкиот премиер е оптимист дека тие ќе помогнат во решавање на проблемот со долгот на земјата.


АВМУ бара на новинарите да им се овозможи непречено вршење на работата


Скопје, 2 февруари, 2018 - 20:43 (META) 

Агенцијата за аудио и аудиовизуелни медиумски услуги укажува на неопходноста новинарите да можат непречено да си ја вршат својата работа, особено кога станува збор за прашања од посебен јавен интерес како реакција на вчерашната ситуација кога новинар на „ТВ 21“ бил попречен да постави прашање на прес-конференција во Министерството за надворешни работи.

„Улогата на медиумите и отвореноста на институциите кон нив е од клучно значење во современите демократски општества бидејќи само на тој начин се овозможува отворање и учество во пошироки јавни дебати, слободно создавање на јавното мислење и формирање критички ставови“, велат од АВМУ.


ВМРО-ДПМНЕ го осуди обидот за замолкнување на медиумите


Скопје, 2 февруари, 2018 - 17:04 (META) 

ВМРО-ДПМНЕ преку соопштение „најостро го осуди однесувањето на МНР“ и „обидот за замолкнување на медиумите професионално да си ја вршат својата новинарска работа“ во врска со вчерашниот настан кога службеник од МНР се обидел да го спречи новинарот на „ТВ 21“ да постави прашање на прес-конференцијата со Метју Нимиц.

„Упатените закани за одземање на акредитација се несфатливи и недозволиви за една државна институција. Денешното извинување не е доволно. Одговорност мора да има, а ваквите постапки соодветно да се санкционираат за да не се повторуваат во иднина. Новинарите мораат да бидат ослободени од секакви закани и притисоци кои ќе влијаат врз нивната работа. Темите кои се од прашање од интерес на јавноста не смеат да бидат вака грубо замолчувани од страна на власта“, велат од опозициската партија.

Од ВМРО-ДПМНЕ апелираат во иднина да им биде дозволено на новинарите непречено да си ја извршуваат својата работа, а институциите да се стават во заштита на слободата на изразувањето.


МНР се извини за „несоодветниот однос“ кон новинарот на „ТВ 21“


Скопје, 2 февруари, 2018 - 15:01 (META) 

На прес-конференциите во МНР, особено кога има меѓународни претставници каде нивната агенда го ограничува времето на настанот, објективно немаме можност да обезбедиме простор сите прашања да се постават на лице место, велат од Министерството за надворешни работи за вчерашниот настан кога службеник од МНР се обидел да го спречи новинарот на „ТВ 21“ да постави прашање на прес-конференцијата со Метју Нимиц.

„Вработените во службата за односи со јавност се задолжени за водење на прес-конференциите, што понекогаш подразбира адекватно одредување приоритет на редоследот на прашањата согласно праксата на МНР. Жалиме доколку тоа понекогаш предизвикува непријатности за домашните редакции, а особено се извинуваме што за време на последната прес-конференција, некој од вработените во службата за односи со јавност постапил несоодветно и предизвикал новинар да се чувствува непријатно при вршењето на своите задачи. Тоа не е наша намера, напротив, сакаме новинарите да го чувствуваат МНР како институција – партнер, која ги обезбедува најсоодветните услови за нивна работа. Во конкретниот случај, новинарот од редакцијата постави прашање на кое што му беше одговорено, при тоа, земајќи збор на новинар од странски медиум кој што веќе поставуваше прашање, што во секој случај не е оправдување за нашата грешка“, велат од Министерството.

Во соопштението се вели дека од МНР се обратиле до главниот и одговорен уредник на редакцијата за да се извинат за ситуацијата.

Од таму додаваат дека ја разгледуваат можноста да го ревидираат системот на давање збор на прес-конфренции, за како што велат, поефикасно искористување на времето поставено за прашања.

„Во комуникација сме со редакциите како и со релевантните новинарски здруженија, со кои работиме на тоа да овозможиме уште подобра работна атмосфера. Тоа е процес во кој сите предлози се добредојдени и бараат професионализам и посветеност од сите засегнати страни“, додаваат од МНР.


СЕММ ги осуди заканите на службеник на МНР кон новинар на „ТВ 21“


Скопје, 2 февруари, 2018 - 11:22 (META) 

Советот за етика во медиумите на Макединија (СЕММ) го осуди однесувањето на претставник на Министерството за надворешни работи, кој на вчерашната прес-конфернеција на медијаторот, Метју Нимиц се обидел да го спречи новинарот на „ТВ 21“, Фуркан Салиу да постави прашање, како и заканите за одземање на неговата акредитација.

„За СЕММ е целосно неприфатливо на каков и да е начин да се спречува професионалната работа на новинарите, која треба да биде ослободена од какви било закани и притисоци. Советот за етика го повикува МНР да ги преземе неопходните мерки за да го расчисти случајот и да спречи повторување на ваквите инциденти. Упатувањето какви било закани кон новинарите од страна на институциите не смее да биде метод со кој ќе се спречува известувањето за теми и прашања од интерес на јавноста“, стои во соопштението.

Од СЕММ потсетуваат на членот 10 од Европската конвенција за човекови права, според кој новинарите мора да биде ослободени од какви било закани и притисоци, а државата е одговорна за преземање на сите активни мерки со цел да се создаде и одржува поволна клима за слобода на изразување.


СЈО најави прес-конференција за денеска во 13 часот


Скопје, 19 декември, 2017 - 9:50 (META) 

Специјалното јавно обвинителство за денеска во 13 часот најави прес-конференција во просториите на обвинителството.

Во најавата, од СЈО не соопштуваат кој е поводот и што ќе биде тема на прес-конференцијата.

Последната прес-конференција СЈО ја одржа на 29 јуни, оваа година, кога специјалната јавна обвинителка информираше за подигањето на 17 обвиненија за 18 случаи, против 94 физички и седум правни лица.


Заев и Хан денеска ќе имаат работен ручек и заедничка прес-конференција


Скопје, 19 ноември, 2017 - 13:29 (META) 

Премиерот Зоран Заев денеска ќе има работен ручек со еврокомесарот за проширување и за добрососедска политика, Јоханес Хан.

Заев и Хан ќе се сретнат во Клубот на пратеници и по работната средба ќе одржат заедничка прес-конференција во 14.30 часот.

Хан е во дводневна посета на Македонија, на средба со политичките лидери и со претставници на граѓанското општество. Засега нема информации дали еврокомесарот ќе се сретне со претседателот Ѓорге Иванов.

Главна тема на средбите ќе биде спроведувањето на реформските приоритети и имплементацијата на планот „3-6-9“.

Тој посетата ја најави минатата недела, по средбата со вицепремиерот за европски прашања, Бујар Османи, и со шефот на македонската дипломатија, Никола Димитров, во Брисел.

„Со нетрпение ја очекувам мојата посета на Скопје следната недела, со политички состаноци и средби со граѓанското општество“, напиша Хан на „Твитер“.

По средбата со Хан, Заев ќе замине на дводневна работна посета во Србија, каде што ќе има средби со српската премиерка Ана Брнабиќ и со српскиот претседател Александар Вучиќ.


ВМРО-ДПМНЕ реагира за унапредување полицајци во Гевгелија и за автопатот Демир Капија – Смоквица


Скопје, 12 октомври, 2017 - 16:39 (META) 

ВМРО-ДПМНЕ денеска на две прес-конференции го обвини владејачкиот СДСМ дека е во паника и за партиски интереси деградира и унапредува полицајци, како и дека намерно не го пуштил во употреба автопатот Демир Капија – Смоквица, иако бил готов.

– СДС ги губи изборите и во Гевгелија. Затоа Спасовски е во паника и носи решенија спротивни на закон за да ги задоволи партиските послушници. Со издавање „писмени наредби“ со важност од 30 дена во екот на предизборната кампања, на само четири дена дена до изборите, се унапредени и разрешени полициски службеници по неколку скалила од системот на кариера. Ова е беззаконие и за ваквите предизборни партиски комбинаторики ќе следи одговорност – рече Милан Стефаноски на прес-конференцијата во седиштето на ВМРО-ДПМНЕ.

На друга прес-конференција Крсте Јовановски, пак, ја обвини Владата на СДСМ дека беспотребно ќе потрошела 850.000 евра преку нов анекс-договор за надзор, иако, како што рече тој, автопатот веќе бил готов.

– Значи, готов автопат, намерно го одолжуваат пуштањето во употреба поради изборите, а граѓаните тоа ќе го платат со 850.000 евра. Скандалозен анекс кој не се однесува на градежни работи, туку на надзор. Со ова, почитувани граѓани, се врши директна злоупотреба на вашите пари и се отвора сомнеж за тежок криминал кој СДС, Заев и Сугаревски свесно сакаат да го направат – обвини пратеникот Јовановски.


АВМУ: ТВ „Нова“ и „Алфа“ се пристрасни, а другите медиуми пласираат псевдовести


Скопје, 12 септември, 2017 - 11:04 (META) 

Радиодифузерите продолжуваат да ја следат веќе востановената уредувачка политика при известувањетo, при што особено се истакнува непочитувањето на професионалното начело за еднаков третман на различните гледишта, се вели во извештајот од надзорот на изборното медиумско известување за периодот од 27 август до 5 септември 2017 година, што го спроведува Агенцијата за аудио и аудиовизуелни медиумски услуги (АВМУ).

Агенцијата ги издвојува ТВ „Алфа“ и ТВ „Нова“ поради начинот на известување, односно непочитување на професионалното начело за еднаков третман на различните гледишта. Притоа се одбележани и уште три други прекршувања сторени од телевизијата „Нова“.

„Во емисијата „Отворено студио“, со наслов „За или против геј бракови“, емитувана на 10 август 2017 година, телевизијата постапи спротивно на начелата за еднаквост на правата и слободите на луѓето по сите основи и за објективно и непристрасно прикажување на настаните“, се вели во извештајот.

За оваа емисија вчера реагираше и Советот за етика на медиумите, велејќи дека мислења биле камфулирани како факти и било предизвикано засилување на стереотипите.

Втората работа што е одбележана од АВМУ во врска со ТВ „Нова“ е  прилогот „Обвинителен акт против гинекологот кој презентирал лажна бременост на пациентка“, емитуван на 31 август 2017 година, кој според оценката на регулаторот не го почитувал и начелото на презумција на невиност.

За телевизијата „Алфа“ се вели дека има голем обем на информации во вестите за едно политичка опција, што укажува на непочитување на професионалното начесно за еднаков третман на различните гледишта во дневно-информативните емисии. Кај ТВ „Нова“, пак, регулаторот таков пристап забележал во целокупната програма.

„Телевизијата донесе уредничка одлука директно да ги пренесува прес-конференците на претседателот на ВМРО-ДПМНЕ, Никола Груевски, на 3 и 5 септември. Ваков третман не добиваат прес-конференциите на ниту еден друг субјект“, се вели во извештајот на АВМУ.

Во однос на следењето на сите медиуми, АВМУ забележала создавање, како што се вели, „псевдовести“ и „псевдонастани“.

„Исто така, продолжува практиката при известувањето за комуникацијата на релација власт – опозиција, при која неретко се јавуваат „псевдонастани“, кои потоа се преточуваат во „псевдовести“, некои од телевизиите и радијата да држат дистанца од ваквата матрица, а некои од нив – да ја пресликуваат“, велат од АВМУ.

 

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Шилегов: ВМРО-ДПМНЕ да престане да ги штити Зврлевски и криминалот


Скопје, 11 август, 2017 - 16:03 (META) 

„ВМРО-ДПМНЕ треба да престане да ги штити Марко Зврлевски и криминалот во оваа земја. За жал, пратениците на оваа партија се инструментализирани и преку обид да направат целосна блокада на Собранието, дејствуваат всушност единствено во заштита на криминалот на нивното партиско раководство“, порача на прес-конференција во Собранието на Република Македонија пратеникот на СДСМ, Петре Шилегов.

– Ние сме свесни дека раководството на ВМРО-ДПМНЕ е исклучително нервозно поради судските процеси што ги чекаат. Но, нивната нервоза нема да ја спречи правдата и нема да спречи конечно во Македонија сите да бидат еднакви пред законот и еднакво да одговараат за своите постапки. Доколку навистина веруваат дека нивното толкување на членот 8а од Изборниот законик е такво какво што е и дека разрешувањето на Марко Зврлевски би било незаконито, тоа е причина повеќе да се повлечат бесмислените дебати, реторики, реплики и контрареплики на самите себе, за ако е навистина незаконито тоа разрешување, да може Марко Зврлевски понатаму да си поведе постапка за таква незаконитост – порача Шилегов.