!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Вечерва премиера на мјузиклот „Тајно моја“, посветен на Тоше Проески


Скопје, 24 март, 2017 - 20:43 (META) 

Мјузиклот „Тајно моја“ посветен на Тоше Проески вечерва премиерно ќе биде изведен во Македонската опера и балет. Мјузиклот е базиран на голем број музички хитови на Тоше Проески, како „Тајно моја“, „Немаш ни благодарам“, „Игри без граници“, „Полско цвеќе“, „Усни на усни“, „Сонце во твоите руси куси“, „The Hardest Thing“.

Во мјузиклот учествува целиот ансамбл, оркестарот, хорот и балетот при МОБ и детскиот хор „Фалесто“. Дел од актерската екипа се Игор Џамбазов, Весна Петрушевска, Арна Шијак и Дејан Лилиќ. Либретист e текстописецот и драматургот Огнен Неделковски, а автори на новите аранжмани на песните на Тоше се композиторите Кокан Димушевски и Сони Петровски.

Кореограф на мјузиклот е Олга Панго, сценограф Марија Ветероска, а костимограф Марија Пупучевска. Како што е објавено на репертоарот на МОБ, првата реприза е на 26 март, а втората на 28 март.


Завршува Меѓународниот студентски филмски фестивал „Филмоција“ во Охрид


Охрид, 12 март, 2017 - 10:45 (META) 

Во Охрид денеска завршува Меѓународниот студентски филмски фестивал „Филмоција“, во организација на Институтот за филм – Филмска академија.

Во 11 часот ќе биде прикажан анимираниот филм „Тор и легендата за Валхала“, синхронизиран на македонски јазик. Проекцијата за  љубителите на анимирани филмови ја овозможија „Узенгија дистрибуција“ и Агенција за филм на Република Македонија .

Од 12 часот ќе има средба на филмски работници.

Свеченото затворање е во 17 часот, додека од 20 часот македонска премиера ќе има филмот „Триото од Белвил“ на познатиот режисер Силвиан Комет, номиниран за две награди „Оскар“.
Проекцијата ќе биде придружена од музичка изведба во живо на музичарот и композитор Дејан Петровиќ.


Премиерата на новиот македонски филм „Кога денот немаше име“ на Берлинале


Скопје, 25 јануари, 2017 - 16:51 (META) 

Новиот македoнски филм „Кога денот немаше име“ на Теона Стругар-Митевска, премиерата ќе ја има на престижниот филмски фестивал во Берлин, соопшти продуцентската куќа „Сестри и брат Митевски“. „Кога денот немаше име“ ќе биде претставен во програмата „Панорама специјал“ на Берлинале, на 14 февруари, во 19 часот, во киното „Зоо палас“.

Во филмот улогите ги толкуваат актерките Ратка Радмановиќ, Николина Кујача, Ана Костовска и Лабина Митевска и шесттемина натуршници Леон Ристов, Ханис Багашов, Стефан Китановиќ, Игорчо Постолов, Драган Мишевски и Иван Вртев-Шоптрајанов. Сценариото е на Елма Татарагиќ, снимател е Французинката Агнес Годар, сценограф е Вук Митевски, а костимите се на Словенката Моника Лорбер.

Филмот на Теона Стругар-Митевска од Агенцијата за филм на Македонија доби 30 милиони денари (речиси 488.000 евра), како и пари од „Еуримаж“.


Вечерва во Охрид премиера на драмската презентација на поемата „Дениција“


Охрид, 19 јануари, 2017 - 17:10 (META) 

Вечерва, во 20 часот, во Центарот за култура „Григор Прличев“ во Охрид ќе се одржи премиера на драмската презентација на поемата „Дениција“ на великанот на македонската книжевност Петре М. Андреевски.

Драматизацијата е во продукција на Народниот театар од Охрид и Театарот „Иси ет ла“ (Ici et la) од Париз, Франција.

Во овој несекојдневен театарски потфат на режисерот Константин Плевнеш, кој е воедно автор на оригиналната музика, во улогата на Петре М. Андреевски настапува првенецот на Драмскиот театар, Рубенс Муратовски, во улогата на Дениција, младата актерка Димитрина Мицкоска, а во улогата на божицата Талија, Саша Ефтимова од Македонска опера и балет (МОБ).

Сценографијата е на Валентин Светозарев, костимографијата е на Марија Пупучевска, видеоартистичката подлошка е на Милчо Узунов, додека уметнички советник е Флориан Габер.

Во рамките на претставата користени се и слики на Сергеј Андреевски на тема „Дениција“.


Драмска презентација на поемата „Дениција“ во продукција на Охридскиот театар


Скопје, 4 декември, 2016 - 14:25 (META) 

Во продукција на Народниот театар од Охрид и Театарот „Иси ет ла“ (Ici et la) од Париз, вечерва во 20 часот, во Драмски театар во Скопје, ќе се одржи премиерата на драмската презентација на поемата „Дениција“ на великанот на македонската книжевност Петре М. Андреевски.

Проектот е подготвуван изминативе две години, додека праизведбата на „Дениција“ во Македонија се совпаѓа со 10-годишнината од смртта на академик Петре М. Андреевски (1934-2006).

Проектот е во режија на Константин Плевнеш.

Во улогата на Петре М. Андреевски настапува првенецот на Драмскиот театар Рубенс Муратовски, во улогата на Дениција – младата актерка Димитрина Мицкоска, а во улогата на божицата Талија – Саша Ефтимова од Македонска опера и балет (МОБ).

Сценографијата е на Валентин Светозарев, костимографијата на Марија Пупучевска, а видео-уметничката подлошка на Милчо Узунов.

Во рамките на претставата користени се и пет слики на Сергеј Андреевски на тема „Дениција“.


Утре премиера на „Љубовен маратон“ во штипскиот театар


Штип, 18 јули, 2016 - 16:27 (META) 

Премиерата на комедијата „Љубовен маратон“, претстава за женет маж кој решава да тргне по нови животни возбудувања, изневерувајќи ја својата сопруга, ќе биде изведена утре во рамките на манифестацијата „Штипско културно лето“.

Оваа претстава е е работена по дело на Нил Сајмон, а во режија на Никола Ристов.

За режисерот, ова е вторпат во тетарот во Штип да работи по дело на Сајмон.

– Претставата побудува многу интересни прашања за тоа што сме направиле во животот и како сме донеле некои одлуки – вели режисерот Ристов.

Главниот лик во претставата на Берни Кешман го игра актерот Виктор Арев, додека во улогата на жените со кои тргнува во авантура се три актерки од помладата генерација на штипскиот театар – Марија Минчева, Ангелка Нашкова и Елена Шорова. По премирата на „Љубовен маратон“, во Народниот театар почнуваат подготовките за новата премиера. Дејан Пројковски ќе работи претстава по делото „На дното“ на Максим Горки.


Претстава за предавството во штипскиот театар


Штип, 20 април, 2016 - 20:21 (META) 

Психолошкиот аспект на предавството и вечниот сомнеж на Македонецот за предавникот во себе, е основата на која е правена претставата „Суд“ по текст на Коле Чашуле, што премиерно ќе биде изведена в петок, во Народниот театар во Штип. Новата претстава ја потпиша младиот режисер од Штип, Дамјан Читкушев.

– Станува збор за многу комплексно дело. Една од темите која Чашуле ја наметнува во драмата е предавството и ние ја третираме таа тема од денешен агол и перспектива – вели Читкушев.

Во претставата играат: Пеце Ристевски, Миле Вратеовски, Ефтим Трајчов, Милорад Ангелов, Александар Иваноски, Ангелка Нашкова и Виктор Арев.

Сценографијата е на Стефан Споровски, а костимограф е Мелани Димитровска.

Адаптацијата на текстот е на Габриела Тулиева и Весна Куслеска.

Премиерата на преставата „Суд“ е во петок, 22 април.


„Метаморфози“ – нова премиера на битолскиот театар


Битола, 25 декември, 2015 - 12:18 (META) 

Битолскиот народен театар е подготвен за премиерата на „Метаморфози“, авторска претстава на режисерката Лилија Абаџиева, која ќе се одигра на 28 и на 29 декември.

Режисерката Абаџиева, која неколкупати поставила свои претстави на сцената на БНТ, овојпат мотивите ги црпи од делата на Платон, на Антон Павлович Чехов, „Дневникот на заводникот“ на Серен Киркегор и од поезијата на Бодлер, Рембо и на Кортасар.

Таа претставата ја темели на неколку моменти, тргнувајќи од мислата дека тешко е да се достигне смислата на нашето постоење.

– Се занимаваме со невозможното, да се избориме со желбите на срцето. Тоа понекогаш го плаќаме и по цена на душата. Овде нè водеше мислата на Спиноза за неможноста на човекот да се справи со сопствената страст, која ја викаме ропство – рече Абаџиева на денешната прес-конференција во Битола.

Сценографијата и костимите за оваа претстава ги изработи Васил Абаџиев, додека музичкото обликување е повторно на режисерката Абаџиева.

Во претставата играат актерите Марјан Ѓорѓиевски, Катерина Аневска, Васко Мавровски, Мартин Мирчевски, Викторија Степановска-Јанкуловска, Никола Пројчевски, Кристина Христова-Николова, Иван Јерчиќ, Филип Мирчевски и Сандра Грибовска.

А.Б.


Дел од публиката ја напушти фестивалската премиера „Антоние и Клеопатра“


Охрид, 25 јули, 2015 - 11:40 (META) 

Синоќа, на фестивалот „Охридско лето“, на отворената сцена Долни Сарај, публиката  ја проследи фестивалската премиера на Шекспировата трагедија „Антоние и Клеопатра“, со Битолскиот театар.

Режијата и адаптацијата на претставата ја направи гостинот од САД, режисерот Џон Блондел, звучно име на светската театарска сцена, докторант по театарска уметност на калифорнискиот универзитет во Санта Барабара.

Тој кажа дека е воодушевен од сцената Долни Сарај, од амбиентот и од визурите.

– Сепак, успешно се вклопи под отвореното охридско небо – рече Блондел.

Чувствата и впечатоците на публиката за претставата се поделени. Публиката беше поставена во четири реда. Малку од посетителите можеа да видат и да слушнат нешто од претставата. Од оваа причина помалку упорните демонстративно ја напуштаа претставата.

Вечерва, од 21 часот, во црквата „Света Софија“ концерт ќе одржи врвниот хрватски пијанист Иво Погорелиќ.


„Свињарот“ на Андерсен, нова премиера на Охридскиот театар


Охрид, 12 февруари, 2015 - 15:48 (META) 

Претставата „Свињарот“ од Ханс Христијан Андерсен, е новата премиера на Охридскиот театар која се игра во хуманитарни цели, а средствата собрани од билетите ќе бидат уплатени на жиро-сметката за жителите од поплавените подрачја во земјата.

Режијата е на Ѓорѓи Ризески, а играат Филип Кипровски, Билјана Билаловиќ, Сашо Ристовски и Елизабета Стефановска. Премиерата е закажана за сабота, 14 февруари, со почеток во 12 часот, на матичната сцена во Центарот за култура „Григор Прличев“. Билетите за претставата се продаваат по цена од 100 денари.

– Љубовта е најсилното нешто во светот. Претстава е за искрената поради љубов која, ако се потцени, наместо најубави, се случуваат најлоши работи во животот. Направена е драматизација од самиот режисер на многу добро познатата бајка „Свињарот“ од Ханс Кристијан Андерсен. Претставата е за деца и за младинци. Темите што ги опфаќа ова дело се сериозни, всушност, тоа се проблеми со кои се соочуваат возрасните луѓе во денешниот свет. Станува збор за едукативна претстава, која ќе им даде до знаење на децата како не треба во животот да се постапува, а, од друга страна, ќе има даде позитивна слика за убавината, љубовта, добрината, всушност, за најважните работи во животот кои водат до среќа кај секој човек – вели режисерот Ѓорѓи Ризески.