Роберт Алаѓозовски ќе биде национален координатор за култура во кабинетот на Заев


Скопје, 4 јуни, 2018 - 12:27 (META) 

Доскорешниот министер за култура Роберт Алаѓозовски се сели во кабинетот на премиерот Зоран Заев. Тој е назначен на висока државна функција односно национален координатор за развој на културата и меѓуресорска соработка.

Портпаролот на Владата, Миле Бошњаковски, вели дека се работи за функција предвидена со закон и кусо одговори дека за секој национален координатор потребно е именување од Влада.

Алаѓозовски, кој беше опфатен со реконструкцијата на Владата, денеска му ја предаде функцијата на Асаф Адеми од Беса.


Мицкоски се пожалил на Меј дека државата е во влошена економска состојба


Скопје, 18 мај, 2018 - 9:37 (META) 

Претседателот на ВМРО-ДПМНЕ, Христијан Мицкоски, на вчерашната средба со британската премиерка Тереза Меј, која беше во кратка посета на Македонија, разговарал за актуелната политичка и општествена ситуација во земјава и можностите за соработка со Обединетото Кралство.

„Претседателот на ВМРО-ДПМНЕ Мицкоски истакна дека државата е со влошена економска состојба, а граѓаните живеат се потешко. Тој стакна дека Владата демонстрира недостиг на демократски капацитет, но и нетранспарентност во однос на најчувствителното прашање, спорот со името. Мицкоски истакна дека ВМРО-ДПМНЕ е за отворени и поинтензивни односи со Велика Британија базирани на пријателство и меѓусебно разбирање“ соопшти најголемата опозициска партија.


Британската премиерка Тереза Меј денеска во Скопје


Скопје, 17 мај, 2018 - 10:28 (META) 

Премиерката на Обединетото Кралство, Тереза Меј, попладнево е во официјална посета на Македонија, заедно со владина делегација.

Таа првин ќе биде пречекана во Владата, по што ќе се одржи прес-конференција на гостинката и премиерот Зоран Заев, а потоа во 17 часот претседателот на Собранието, Талат Џафери ќе приреди свечен прием во Кристалната сала на Собранието.


Владите на Груевски трошеле најмалку 1,73 милиони евра годишно за советници


Скопје, 15 мај, 2018 - 13:07 (META) 

Владата по вчерашните обвинувања од ВМРО-ДПМНЕ за годишни трошоци од најмалку половина милион евра за советници на премиерот Зоран Заев, излезе со пресметки, обинувајќи дека во текот на мандатите на Никола Груевски како премиер од 2010 до 2015 година, годишно се трошеле најмалку 1,73 милиони евра на негови советници.

Владата објави список на 91 советник и надворешен соработник на Груевски, појаснувајќи дека во списокот не се објавени податоците за периодот од 2006 до 2010 година, кои допрва ќе се обработуваат.

„Само за една година Владата на Никола Груевски за надворешни соработници и советници има потрошено 71,6 милиони денари пари на граѓаните на Република Македонија, меѓу кои биле ангажирани и надворешни соработници со плата од 7.000,00 евра месечно. Дополнително, недостасуваат податоци од авторски агенции преку кои биле ангажирани надворешни соработници, што значи дека оваа бројка од 91 советници и надворешни соработници, не е финална“, стои во соопштението од Владата.

Оттаму појаснуваат дека покрај индивидуалните договори за советување, поранешниот премиер Никола Груевски има договори за консултантски услуги од меѓународни агенции за застапување, правни консултации, градење на бренд, за менаџирање на углед и слично во 2015 и 2016 година. Станува збор за четири договори во вкупна вредност од 569.000 евра или 34,99 милиони денари.


Словенечкиот премиер Миро Церар поднесе оставка


Љубљана, 15 март, 2018 - 12:59 (META) 

Словенечкиот премиер, Миро Церар објави дека поднел оставка пред парламентот. Церар соопшти дека се повлекува по одлуката на Врховниот суд да се поништи резултатот од септемврискиот референдум, со кој, беше одобрен железничкиот проект вреден една милијарда евра, најголемиот инвестициски проект на неговата влада.

Референдумот го поддржа владиниот план за изградба на пруга во должина од 27 километри од пристаништето Копер до границата со Италија.

Оставката на Церар се случува само три месеци пред парламентарните избори најавени за јуни. Засега е нејасно дали оставката на Церар ќе го забрза распишувањето на изборите.

Владината коалиција која ја презеде власта во септември 2014 година, ги вклучува партијата на Церар, како и Социјалдемократите и партијата на пензионерите Десус.


Заев – Јилдирим: Турција ја поддржува Македонија во НАТО интеграциите


Анкара, 12 февруари, 2018 - 11:44 (META) 

На средбата со својот турски колега Бинали Јилдирим во Анкара, македонскиот премиер Зоран Заев побарал да продолжи поддршката од Турција за членството на Македонија во НАТО, а турскиот премиер порачал дека неговата земја и понатаму ја поддржува Македонија во оваа стратешка цел, соопшти Службата за односи со јавноста при македонската влада.

На средбата, на која од македонската страна присуствувале и министерот без ресор Аднан Ќахил, пратениците во Собранието на Република Македонија, Енес Ибраими и Јусуф Хасан и државниот секретар во МНР, Виктор Димовски, Заев изразил сочувство за жртвите во борбата против тероризмот со цел заштита на територијалниот суверенитет и интегритет на Турција.

И турската и македонската страна изразиле определеност за унапредување на економската соработка меѓу двете земји и за зголемување на трговската размена.

Договорено е активирање на Мешовитиот комитет меѓу двете држави кој што ефикасно ќе ги решава сите потреби за подобра соработка на секое ниво. Премиерот Заев соопшти дека од страна на Република Македонија, комитетот ќе го води министерот без ресор, Аднан Ќахил.

– За нашата држава важни се сите инвестиции, а Турција е 6-та во Македонија по бројност на инвестиции. Подготвени сме да создадеме услови за уште повеќе инвестиции бидејќи има заинтересирани инвеститори. Ние очекуваме напредок во ЕУ и НАТО интеграциите оваа година, а тоа очекуваме да влијае на зголемување на инвестициите, а со тоа подобар квалитет на живот на граѓаните – рекол Заев.


Имало 30 закани преку социјалните мрежи кон функционери, шест кон Заев


Скопје, 9 февруари, 2018 - 15:15 (META) 

Министерството за внатрешни работи соопшти денеска дека неговиот Сектор за компјутерски криминал и дигитална форензика во изминатиот период документирал и процесуирал 30 случаи во кои преку социјалните мрежи на носители на државни функции им била загрозена сигурноста или биле злоупотребени нивните лични податоци.

За сите случаи биле испратени известувања до Основното јавно обвинителство Скопје за да се прецизира дали станува збор за кривични дела што се гонат по службена должност.

Во тие случаи се и шест закани кон премиерот Зоран Заев, и е откриено едно лице што се заканувало. Тоа е сторено во соработка со Фејсбук и со канцеларијата на Интерпол и еден интернет провајдер во Швајцарија. Од МВР велат дека против осомничениот ќе биде поднесена кривична пријава.

Министерството уверува дека за сите пријави постапува исто како во новообјавените случаи.


Рама: Без нас албанскиот немаше да биде официјален јазик во Македонија


Тирана, 14 јануари, 2018 - 21:58 (META) 

Премиерот на Албанија, Еди Рама усвојувањето на Законот за употреба на јазиците во Република Македонија го оцени како голем настан, кој што пред неколку години не можел ни да се замисли. За време на конференцијата на Младинскиот форум на неговата Социјалистичка партија, тој изјави дека за изгласувањето на овој закон заслужна е неговата Влада, која имала сериозен пристап кон односите со Македонија, јави ТВ 21.

-Пред неколку дена, во македонското Собрание помина законот кој не можеше ни да се замисли пред некое време. Јас ви велам дека сите вие треба да бидете горди, треба да бидат горди сите тие што гласаа, ја поддржаа и веруваа во оваа партија, бидејќи без неа денеска немаше да постои официјален албански јазик во Македонија – изјави Рама, изразувајќи надеж дека Албанија нема да биде сама во европското семејството, туку заедно со другите земји од Балканот, како што рече, каде што најмногу живеат Албанци.


Заев: Влегуваме во година на клучни одлуки за државата


Скопје, 29 декември, 2017 - 19:06 (META) 

Премиерот Зоран Заев денеска на средба со коалициските партнери, зборувајќи за принципите на коалицијата, порачал дека следната година е време на клучни одлуки за државата, се дознава од соопштението од Службата за информирање на владата. Притоа побарал поддршка од партнерите во владиниот сојуз.

– Создадовме околности кои целосно го променија демократскиот амбиент во земјата, за што пристигнаа признанија и од народот со исходот на локалните избори, како и од меѓународната заедница, особено од нашите стратешки партнери во ЕУ, НАТО, и од САД, и овие промени навестуваат дека влегуваме во година на клучни одлуки за државата. Во таа смисла е многу значајно взаемното охрабрување и поддршка на сите партнери во коалицијата во сите области, и посебно во остварувањето на концептот едно општество за сите – истакнал Заев.

Тој истакнал дека во следната година, ќе се засилат и реформите и ќе се спроведуваат мерки за Планот за економски раст.


Борисов: Да се обединиме и да помогнеме во решавање на проблемот за името


Белград, 9 декември, 2017 - 15:39 (META) 

Прашањето за името меѓу Македонија и Грција мораме да го решиме. Мора да се обединиме и да ѝ помогнеме на Европската комисија да му помогне на Брисел да донесе правилни одлуки, а не да поставува некакви ултиматуми, истакна бугарскиот премиер Бојко Борисов денеска во Белград, по средбата со српскиот претседател Александар Вучиќ и со премиерите на Грција, Алексис Ципрас, и на Романија, Михај Тудосе.

Борисов посочил дека четирите застапени земји на денешната среддба се неразделно парче на Европа и дека треба се покаже на дело дека се научени лекциите.

– Балканот многу векови наназад генерирал само војни. Сега е клучен момент, многу од големите играчи во светот се заинтересирани за Балканот, а ние сакаме обединет Балкан, модерна инфраструктура, дигитална инфраструктура. Лидерите на Западен Балкан сознаваат дека доцнат со остварувањето на обврските и треба да се ангажираат. Продолжуваме, испраќаме кон нашите пријатели во Европа порака дека имаат еден мудар, сигурен Балкан, кој не генерира проблеми, туку ги почитува сите правила – рече Борисов.