Екипите на „ЕВН Македонија“ ги санираат дефектите во дистрибутивната мрежа


Скопје, 14 февруари, 2018 - 14:32 (META) 

Големо невреме проследено со обилни врнежи од дожд и снег предизвика прекини во снабдувањето со електрична енергија во Југозападниот дел на Македонија. Без струја се дел од населените места во планинските региони околу Охрид, Струга, Гостивар, Кичево, Тетово, Маврово и Реканскиот крај.

„Екипите на ЕВН Македонија во текот на вчерашниот ден ги санираа дефектите во повеќе населени места, освен онаму каде што имаше проблеми со пристапот поради големи наноси од снег и одрони на патот. Од утринава, екипите се постојано на терен и како што ги санираат дефектите, така населените места се пуштаат под напон. ЕВН ги активираше сите расположливи ресурси, човечки и материјални, со цел побрзо справување со дефектите од невремето“, велат од компанијата.

Од таму додаваат дека зимските возила, моторните санки и целата опрема е во служба на екипите за пробивање на најкритичните и непристапни места.

„ЕВН Македонија е во постојана координација со другите енергетски компании кои го сочинуваат енергетскиот систем во земјава, со цел надминување на сите проблеми кои ги предизвика невремето“, се додава во соопштението.


Дел од тетовските населби втор ден немаат вода за пиење


Тетово, 17 ноември, 2016 - 15:10 (META) 

Поради дефект во водоснабдителниот систем, дел од населбите во Тетово веќе втор ден немаат вода. Како што информираат од Јавното комунално претпријатие Тетово, дефектот настанал при изградба на атмосферска канализација. Оттаму посочуваат дека прекините во водоснабдувањето ќе траат уште четири дена.

– Се работи за поголем дефект и додека се острани, апелираме граѓаните кои се соочуваат со недостиг од вода, да обезбедат резерви вода, доволно за наредните четири дена. Поради специфичноста на дефектот, не можам да предвидам во наредните четири дена каде точно и колку време ќе има прекини во водоснабдувањете – изјави раководителот на единицата за водовод и канализација при ЈКП Тетово, Самедин Абедини.

Од Водовод и канализација велат дека моменталната издашност на изворите со кои Тетово се снабдува со вода за пиење изнесуваат 500 литри вода во секунда, доволно да ги задоволи потребите од вода за пиење на градот.


Невремето предизвика проблеми со електричната енергија


Скопје, 26 јули, 2015 - 21:17 (META) 

Дожд, засилен ветер, грмотевици, силно невреме денеска го зафати Скопје.

Невремето што трае повеќе од половина час предизвика чести прекини на електричната енергија, како и поплави.

Сообраќајот во градот се одвива отежнато. На прекини на електричната енергија се жалат жителите на Карпош, Аеродром и на Сопиште.


Прекини на сообраќајот на патот Кичево – Охрид


Скопје, 22 јуни, 2015 - 10:36 (META) 

Од АМСМ известуваат дека поради минирања што ќе се прават близу до патот Кичево – Охрид (А2), односно меѓу планинскиот превој Пресека и село Врбани, денеска на овој патен правец ќе има прекини во сообраќајот.

Прекините ќе бидат од 12 до 14 часот и од 15 до 17 часот. Се очекува прекините да траат од 15 до 20 минути.