Коѕиас по средбата со Дачиќ: Направен е чекор напред во преговорите на Грција и Македонија


Белград, 11 април, 2018 - 14:14 (META) 

Грчкиот министер за надворешни работи Никос Коѕиас по денешната средба со неговиот српски колега Ивица Дачиќ во Белград изјави дека во преговорите на Грција и Македонија за спорот за името е направен чекор напред, како и дека клучот за решавање на проблемот се „реализмот, прагматизмот и сфаќањето дека треба да се направат компромиси“, пренесуваат српските медиуми.

– Треба да направиме компромиси, но не „гнили“ компромиси, туку такви од коишто ќе добијат двете страни. Компромис значи дека обете страни треба да сфатат дека не може да добијат сè, но дека треба да имаат придобивка – рече шефот на грчката дипломатија.

Коѕиас додава оти се надева дека двете страни во преговорите ќе го сфатат тоа и оти ќе има позитивни резултати.

Српскиот министер за надворешни работи, пак, рече дека најделотворно и најкорисно би било тие разговори да се водат директно и да се мисли на заедничкиот интерес во целиот регион. Дачиќ истакна дека Србија има разбирање за ставот на Грција и го повтори својот повеќепати изнсен став дека било грешка тоа што поранешна Сојузна Република Југославија ја признала Македонија под нејзиното уставно име, нагласувајќи дека тоа било „непромислен и погрешен чекор“.

– Однесувањето на Скопје кон Србија и српскиот национален и државен интерес не беше адекватно. Тие признаа еднострани акти – рече тој, мислејќи на признавањето на Косово од страна на Република Македонија.

Според Дачиќ, Србија сака прашањето за името да се реши, но дека не може многу да помогне, освен да понуди двете страни понекогаш да се состануваат во Србија.


Димитров: Нашата платформа се разликува од грчката, нема поместување од минатата средба


Скопје, 20 март, 2018 - 16:43 (META) 

Одговарајќи на новинарски прашања, министерот Никола Димитров не сакаше да коментира за точките на грчката нацрт-платформа за решавање на спорот, а за македонската платформа рече дека се разликува од грчката.

– Грчката нацрт сподогоба е предмет на анализа во овој период, не знам колку ќе биде корисно да коментирам за содржината. Имаме и наша нацрт-спогодба за која не зборувавме оти, учејќи од самиот процес, научивме дека е подобро да сработиме, по потоа да обелодениме. Убедени сме дека елементите од нашата нацрт-спогодба ќе бидат корисни и во рамките на главниот процес, тој што се води со посредништво на медијаторот Метју Нимиц – рече Димитров.

Тој објасни дека најсуштинската работа што се случила од неговото вклучување во преговорите како министер за надворешни работи е средбата што тој и неговиот грчки колега Коѕиас ја имале со посредникот Нимиц во Виена, иако на неа не е постигнат значителен напредок.

– Се обидуваме за неколку месеци да направиме огромни скокови. Еден од главните предизвици е да се изгради доверба, да се убедат двете јавности, а притиснати сме и од европската агенда – рече Димитров.

Во однос на роковите, тој рече дека ни следните преговори со Нимиц во Виена на 30 март не се зацртани како момент на постигнување спогодба.

– Ние в петок ќе го отвориме тој процес, ќе го продолжиме со медијаторот Нимиц. Ова не е строго пропишан процес – рече шефот на македонската дипломатија.


Коѕиас в четврток слетува на „Скопје“


Скопје, 20 март, 2018 - 13:20 (META) 

Грчкиот министер за надворешни работи Никос Коѕиас в четврток ќе пристигне во официјална дводневна посета на Македонија, извести македонското Министерство за надворешни работи.

Посетата на Коѕиас в четврток ќе почне со неговото слетување на меѓународниот аеродром „Скопје“, само повеќе од месец откако со одлука на македонската влада името на овој аеродром беше сменето од „Александар Велики“ во „Скопје“.

На 30 март, петок, тој  со својот македонски колега Никола Димитров ќе бидат во Виена, каде ќе се сретнат со личниот пратеник на Генералниот секретар на ОН и посредник во преговорите за името, Метју Нимиц.


Груби се сретнал со Нимиц во Њујорк, му рекол дека ДУИ сака достоинствено решение


Њујорк, 11 февруари, 2018 - 16:00 (META) 

Пратеникот на ДУИ, Артан Груби, денеска во Њујорк имал работен ручек со посредникот на Обединетите Нации за спорот со името, Метју Нимиц, соопшти кабинетот на собраниската Комисија за европски прашања. На средбата Груби му ги пренел впечатоците од претходните средби во Вашингтон, а разговарале и за процесот за спорот за името.

„Ставовите на двајцата премиери вродуваат оптимизам дека решението е поблиску од било кога. Според Груби и ДУИ, конечното решение кое што ќе се постигне мора да биде достоинствено и взаемно прифатливо. Компромисот мора да овозможи безодложна и итна интеграција на Македонија во НАТО и ЕУ што ќе резултира со оддржлив мир и стабилноство нашата земја и регионот, но заедно со системските реформи представува предуслов за економски развој и општествена благосостојба. ДУИ целосно ги поддржува напорите на господинот Нимиц и на преговарачите во спорот со нашиот јужен сосед“, се вели во соопштението.


Заев: Подготвени сме за географска одредница, а аеродромот – Меѓународен аеродром „Скопје“


Скопје, 6 февруари, 2018 - 18:16 (META) 

На денешната седница, Владата на Република Македонија донесе одлука автопатот Е-75 да го именува „Пријателство“, а скопскиот аеродром, да се нарече „Меѓународен аеродром Скопје“, соопшти премиерот Зоран Заев на прес-конференцијата со евроамбасадорот Самуел Жбогар во Владата.

– Ние сме подготвени за географска одредница. Но, одлучивме секоја идеја што ќе доведе до можност за договор да биде разгледана, односно за тоа дали симболите ќе бидат МК, МКД… Другото секако би било процесот на преговори да продолжи под покровителство на ОН со преговарачот Метју Нимиц, но ќе настојуваме за средби на секое ниво, и се што може да помогне кон изнаоѓање решение, мора да го искористиме.  Дискутираме и меѓусебно, меѓу институциите и меѓу политичките партии за решавање на овој проблем – рече Заев.

Тој вели дека има консултации и со опозицијата за решавање на спорот со Грција, што, како што рече, нема да дојде лесно, но притоа мора да се води грижа и за јужниот сосед.

– Јас сум оптимист, но нема да биде лесно. Не очекувавме да биде лесно, но посветени сме. Јас верувам дека ако водиме грижа за јужниот сосед, и тие водат грижа за нас, и може да се дојде до решение, притоа почитувајќи го идентитетот – рече Заев и потенцираше дека со премиерот Ципрас станале лични пријатели и се надева дека тоа ќе прерасне во пријателство на народите на двете земји.

Евроамбасадорот Самуел Жбогар, порача оти  Европската комисија гледа напредок во Македонија во изминатите неколку месеци и се подготвува да даде препорака за почеток на преговори за пристапување кон ЕУ.

– За ЕУ добрососедските односи се вредност и во Стратегијата за регионот тоа во повеќе точки е кажано. Во стратегијата се вели дека пред некоја земја да се приклучи, мора да ги реши односите со соседите и границите. Ние ги охрабруваме потезите на оваа влада. Првин беше договорот со Бугарија, а сега се работи на отворените прашања со Грција, Во минатите месеци се создаде подобра атмосфера и прва средба меѓу двајцата премиери. Ние гледаме со интерес и се надеваме дека двете земји ќе најдат решение што ќе го отвори патот кон ЕУ, но и ќе ги смени односите во овој дел од светот – рече евроамбасадорот.

Според Заев, Стратегијата е заеднички успех на сите политички партии и на сите граѓани.

– За граѓаните на Република Македонија ова е потврда за нашите напори и реформски процеси што ги започнавме. Ова е заеднички успех на сите заедници, политички партии, сите граѓани. Ова е истовремено поттик за удвојување на напорите во сите клучни области опфатени во стратегијата. Уште еднаш ги повикувам и пратениците во Собранието и претседателот и опозицијата и сите институции на системот активно да се вложиме во реформите. Ова е вистинска причина да продолжиме по патот по кој тргнавме како држава – рече Заев.


Мицкоски на Нимиц му кажал дека некои случувања во Грција одмагаат во процесот


Скопје, 1 февруари, 2018 - 17:12 (META) 

Претседателот на ВМРО-ДПМНЕ, Христијан Мицкоски на денешната средба на посредникот во преговорите за името меѓу Македонија и Грција, Метју Нимиц, му го презентирал ставот на партијата дека разговорите треба да продолжат да се водат во рамката утврдена од Обединетите нации, почитувајќи ги документите и принципите на Советот за безбедност, Времената спогодба и пресудата од Меѓународниот суд на правдата, соопшти ВМРО-ДПМНЕ.

Истовремено бил повторен и познатиот став на партијата дека решението за име треба да ги запазува државните и националните интереси и да не го загрозува националниот идентитет на Македонците.

Мицкоски посочил и дека „одредени чекори во грчкото општество иритираат и поттикнуваат негативни чувства кон Република Македонија и истите не се од помош на целокупниот процес“.


Заев и Нимиц се договорија: Наумовски и Василакис се аут, Димитров и Коѕиас се ин


Скопје, 1 февруари, 2018 - 15:57 (META) 

Во идните разговори за разрешување на спорот за името меѓу Македонија и Грција под покровителство на Обединетите нации (ОН), наместо досегашните преговарачи, на чело на преговарачките тимови ќе бидат министрите за надворешни работи на Македонија и Грција, се согласиле посредникот во преговорите, Метју Нимиц, и премиерот Зоран Заев на нивната денешна средба, извести Владата.

На денешната средба во кабинетот на премиерот, Нимиц ги образложил своите идеи, а Заев ги претставил размислувањата и ставовите на Владата и на државно-политичкиот врв на координативната средба во саботата во Клубот на пратениците. Во разговорот било нагласено и дека во најновата фаза на преговорите е создаден позитивен момент, и дека двете земји покажуваат оти се посветени на натамошно градење на довербата.

На средбата на Заев со Нимиц се разговарало и за средбата на македонскиот премиер со неговиот грчки колега во Давос, на која, соопштува владата „од двете страни беше изразена политичка и добра волја за првите практични чекори како што беше најавеното преименување на автопатот, додека од страна на премиерот на Република Грција беше најавено одблокирањето на втората фаза од Договорот за стабилизација и асоцијација, и можноста и Република Македонија да стане член на Јадранско-јонската иницијатива“.

Премиерот Заев и посредникот Нимиц на средбата се согласиле дека треба да продолжи атмосфера на добра волја и дијалог во процесот, како единствен начин да се стигне до компромис и взаемно прифатливо решение кое ќе го почитува националниот идентитет и дигнитет на двата народи.


Исходот ќе зависи од подготвеноста за компромис на двете страни, вели Владата


Скопје, 18 јануари, 2018 - 11:05 (META) 

Владата на Република Македонија по преговорите во Њујорк со посредништво на Метју Нимиц порача дека посветена на решавање на спорот кој  Република Грција го има со уставното име на Република Македонија.  Во соопштението се вели дека се создаваат услови за напредок, но за да дојде до тоа мора да има подготвеност за компромис на двете страни.

„Активно се создаваат услови за придвижување на процесот напред, а исходот ќе зависи од подготвеноста за компромис на двете страни, имајќи ги предвид разликите. Остава добар впечаток обновената комуникација, која отвора простор за пријателски пристап и градење обострана доверба“, се вели во соопштението.

Владата порача дека по внимателна анализа на рамката што Нимиц ја презентирал пред преговарачите во Њујорк „согласно значењето на прашањето за државните интереси, ќе продолжи процесот за градење на што е можно поширок и поинклузивен став од страна на Република Македонија“.

Инаку, македонскиот преговарач Васко Наумовски вчера за Сител по средбата изјави дека предлозите изнесени од медијаторот Метју Нимиц се „далеку од достоинствено решение“.


За Наумовски предлозите на Нимиц се далеку од достоинствено решение


Њујорк, 17 јануари, 2018 - 22:05 (META) 

Македонскиот преговарач во разговорите за името под покровителство на ОН, Васко Наумовски, по последната рунда разговори во Њујорк изјави дека предлозите изнесени од медијаторот Метју Нимиц се „далеку од достоинствено решение“.

Според него, рамката за разговорите е дадена во Резолуцијата 817 на Советот за безбедност, а тоа е да се надмине разликата околу името.

– Нашата држава има име, тоа е Република Македонија, името што е во основата на нашиот идентитет. Исто така, денес во 2018 година никој не може да го негира постоењето на македонскиот народ и македонскиот јазик. Од страна на медијаторот денеска беа презентирани некои идеи за коишто сметам дека излегуваат од оваа рамка и дека се далеку од едно достоинствено решение, но, сепак, овие предлози ќе бидат презентирани пред државно-политичкиот врв и тој ќе може да заземе став по ова прашање – рече Наумовски во изјава за известувачот на телевизија Сител.

Наспроти оптимизот на медијаторот Нимиц по средбата, Наумовски за себе рече дека не е голем оптимист.

– Оптимизмот е секогаш корисен, но за да се биде голем оптимист треба да има основа за тоа. Имајќи предвид што се слушнавме како изјава од грчките официјални лица, се она што што беше презентирано во рамките на овие разговори, вклучително и ова денес, не ни дава простор да бидеме големи оптимисти – вели Наумовски.