Османи – Хан: Македонија ќе успее да ја оствари Агендата 2025 на ЕК


Брисел, 12 ноември, 2018 - 16:41 (META) 

Македонија успешно ќе се приклучи на стратегијата на Комисијата за проширување со земјите од Западниот Балкан и ќе успее да ја оствари Агендата 2025, му порачал вицепремиерот Бујар Османи на еврокомесарот за проширување и соседска политика Јоханес Хан на нивната денешна средба во Брисел, соопшти Секретаријатот за европски прашања.

– Планот 18 е веќе усвоен на Влада и неговата имплементација, сега за сега, се одвива непречено. Очекувам навреме да бидат адресирани сите клучни области и да се создадат услови за конфирмација на одлуката за почеток на преговорите. Собранието го даде првото зелено светло за уставните измени согласно договорот од Преспа, со што, не само што се отвори патот за имплементација на обврските од Договорот, туку се создадоа услови и за забрзување на реформскиот процес на земјата согласно заклучоците на Европскиот совет од јуни – рекол Османи на средбата.

Тој нагласил дека односите меѓу Македонија и Грција се унапредуваат со забрзано темпо, потсетувајќи на обновата на авионските летови меѓу Атина и Скопје, по пауза од 10 години.

Османи го информирал Хан и за напредокот во подготовката на преговарачката структура за почеток на преговорите, нагласувајќи дека Владата работи на тоа да го вклучи во процесот и граѓанскиот сектор и академската заедница.


Трговска војна помеѓу Србија и Косово во пресрет на новата рунда дијалог во Брисел


Белград, 7 ноември, 2018 - 16:08 (META) 

Одлуката на владата на Косово да го зголеми данокот на увоз на роба од Србија и Босна и Херцеговина за 10 отсто, предизвика критики од Белград кој побара итна реакција на меѓународната заедница, во очи на новата рунда дијалог со Приштина која е закажана утре во Брисел.

Оданочувањето на увозот од Србија и БиХ, Владата на Косово го образложи како заштита на домашниот пазар, но повеќе косовски политичари рекоа дека таа мерка е „најдобриот одговор на деструктивното однесување на Србија“. Претходно косовските медиуми пишуваа дека Косово го освојува роба „Made in Serbia“, како и дека до крајот на годината увозот од Србија ќе изнесува 400 милиони евра.

Мерката ќе се применува на увозот на млеко и млечни производи, вода, бисквити, градежен материјал и сокови со потекло од Србија и БиХ, но дека нема да се однесува на производите на меѓународните брендови кои се произведуваат во Србија и БиХ како на пример „кока-кола“.

ЕУ побара од Приштина итно разјаснување на новите мерки, со напомена дека станува збор за јасно кршење на ЦЕФТА (Централно европскиот договор за слободна трговија).

Шефот на српската дипломатија, Ивица Дачиќ, оцени дека одлуката на властите во Приштина е еден вид на притисок врз ЕУ на Косово да му одобри либерализација на визниот режим. Дачиќ рече дека претседателот на Србија. Александар Вучиќ, за одлуката на приштинските власти ќе разговара со европските функционери за време на самитот на Европската народна партија во Хелсинки. Се очекува тоа да биде тема и на состанокот на Вучиќ и косовскиот претседател Хашим Тачи, кој за утре во Брисел го закажа високата претставничка на ЕУ, Федерика Могерини.


Солун или Тесалоники: Комисијата ќе користи меѓународни конвенции за топонимите


Скопје, 31 октомври, 2018 - 10:16 (META) 

Во однос на именувањето на населените места – топонимите (Тесалоники или Солун, Монастири или Битола…), ќе се користат меѓународините конвенции, кои за нас се доста поволни, вели за МИА Виктор Габер, кој го предводи македонскиот тим во заедничката интердисциплинарна комисија на Македонија и Грција, која, меѓу другото, според Договорот од Преспа, треба да дискутира и за учебниците и за топонимите.

Габер најавува дека првиот состанок на македонските експерти со грчките колеги треба да се одржи до крајот на неделава.

Меѓу проблематичните места во учебниците по историја, за кои ќе мора да се разговара, Габер го посочува и периодот на Втората светска војна и една деценија потоа.


Преговорите со НАТО за Македонија се речиси рутински – се подготвуваме веќе 19 години


Скопје, 19 октомври, 2018 - 11:07 (META) 

Пристапните разговори за членство во НАТО, кои вчера почнаа во Брисел, за Македонија се речиси рутински, едногласни се и домашните и претставниците на Алијансата, особено затоа што земјата веќе 19 гoдини и формално се подготвува за членство.

Македонија во 1999 година го почна Акцискиот план за членство (Membership Action Plan), процес кој преку годишни програми на реформи треба да ја подготви земјата за членство, и досега спроведе цели осумнаесет циклуси на подготовки.

Целта на пристапните разговори, според објаснувањето на интернет страницата на НАТО, е поканетата земја формално да ја потврди својата волја и способност да ги преземе политичките, законските и воените обврски од членството во НАТО, како што се поставени во Вашингтонскиот договор, основачкиот акт на Алијансата.

Разговорите се одвиваат во две сесии. Во првата, се разгледуваат политички и воени прашања, и во основа треба да се утврди дека се постигнати основните предуслови за членство. Во втората сесија се разговара за технички прашања, како ресурси, безбедносни и законски прашања, како и придонесот на секоја членка во заедничкиот буџет на НАТО. Овој придонес се одредува пропорционално во однос на големината на економијата на земјата во однос на економиите на другите членки. Во оваа сесија се бара од земјата да преземе мерки за заштита на доверливите (класифицирани) информации од НАТО и да ги подготви своите безбедносни и разузнавачки служби да работат со Канцеларијата за безбедност на Алијансата.

Крајниот производ на овие разговори е земјата да подготви и поднесе календар до кога ќе ги заврши потребните реформи, кои можат да продолжат и откако земјата ќе стане полноправна членка.

– Преговорите ја покриваат безбедноста, одбраната, политичките, правните и финансиските прашања како и целите и роковите кои Скопје треба да ги исполни за време на и по зачленувањето – изјави портпаролката на генералниот секретар на НАТО, Оана Лунгеску.

Делегацијата на Владата на Република Македонија, предводена од вицепремиерката и министерка за одбрана Радмила Шекеринска, заедно со Националниот координатор за НАТО Стево Пендаровски, вчера ја почнаа првата сесија со помошник генералниот секретар на НАТО, амбасадорот Александро Алваргонзалес, и со тимот на НАТО за преговори со Македонија.


Пендаровски: Преговорите со НАТО ќе бидат рутински, подготвени сме за овој момент


Брисел, 18 октомври, 2018 - 15:53 (META) 

По повод стартот на завршната фаза од преговарачкиот процес со НАТО за членство во Алијансата, кој започна денеска во Брисел, националниот координатор за НАТО, Стево Пендаровски рече дека процесот ќе биде рутински, бидејќи во министерствата имаме способни луѓе кои си ја знаат својата работа.

„Имавме две сесии претпладне и две попладне, и така и во текот на утрешниот ден. Поминавме одлично. Сесиите беа брзи и ефективни затоа што Македонија е најдолго кандидат, кој чека 20 години. Тимовите дојдени овде од сите надлежни министерства и државни органи се подготвени многу одамна за ова. Само го чекавме моментот кој се случи во јули кога ја добивме поканата, да се отвори овој формален процес, оваа последна фаза, пред членство во НАТО“, изјави Пендароски.

Денеска, делегацијата на Владата предводена од заменик-претседателката на Владата и министерка за одбрана Радмила Шекеринска, заедно со Пендаровски, ја отворија денешната сесија со помошник-генералниот секретар на НАТО, амбасадорот Александро Алваргонзалес, и со тимот на НАТО за преговори со Република Македонија.


Шекеринска: Собранието има историска можност и одговорност да ја отвори вратата за НАТО


Скопје, 18 октомври, 2018 - 10:24 (META) 

Собранието ја има историската можност и историската одговорност да ја отвори вратата на Македонија за членство во НАТО, вели во интервју за МИА вицепремиерката и министерка за одбрана Радмила Шекеринска која го предводи македонскиот тим кој денеска и утре во Бисел официјално ги почнува пристапните преговори за членство на Македонија во Северноатлантската алијанса.

– Доколку се обезбеди двотретинското мнозинство Македонија ќе покаже и на Европа и на светот и на регионот дека знае што сака и знае како таа цел да се исполни. Доколку надвладеат партиските и личните интереси на неколкумина тоа ќе биде голем минус за Собранието и за нас ќе значи неопходно итно закажување на предвремени избори – истакнува Шекеринска.

За можното пробивање на роковите предвидени со Преспанскиот договорот доколку се оди на избори, вели дека за Македонија е подобро процесот да заврши со успешна собраниска процедура. Но, ако таа процедура е невозможна во овој парламент тогаш редно е мандатот да се врати кај граѓаните. Ако Собранието одлучи да им даде шанса на стратешките интереси на државата, одлично. Ако не, избори се единствена опција, друга не постои, наведува Шекеринска.

Таа посочува дека се во постојан контакт со земјите партнери и со Грција и смета дека и во случај на избори можно е да се стигне навреме за грчкиот Парламент да го ратификува и Договорот од Преспа и договорот за пристапување на Македонија во НАТО.


Вучиќ: Подготвен сум да ги продолжам разговорите со Косово


Белград, 16 октомври, 2018 - 16:33 (META) 

Српскиот претседател Александар Вучиќ денеска порача дека и понатаму е подготвен да разговара со косовските функционери за решавање на проблемот со Косово, но и дека му се чини оти сега шансите за позитивен исход се помали од претходно.

На прашањето дали неговиот предлог за разграничување значи дека Србија ќе го задржи северот на Косово, а Косово ќе добие три општини од југот на Србија (Медвеѓа, Прешево, Бујановац), Вучиќ рече дека сакал да се утврди границата помеѓу Србите и Албанците, за која сега никој не знае каде е, оти зависи од тоа што мислат Русија и Америка, Кина и Германија, Србите и Албанците.

Вучиќ нагласи дека наспроти се е подготвен да ги продолжи разговорите со косовскиот претседател Хашим Тачи, па и во Париз на 11 ноември, но му е малку чудно што бара Тачи на одбележување на крајот на Првата светска војни, бидејќи на свеченоста учествуваат силите-победнички и учесниците во војната.

Српскиот претседател кажа и дека му пречат поединечни гласови од меѓународната заедница коишто се противат на промената на границите и тврди дека со тоа се отвора Пандорината кутија.

– А тие тоа го направија во 2008 година со Косово или во 2006 година, а пред тоа и во 1990-те години. И на тоа нема одговор – вели Вучиќ.


Избори или не, скринингот ќе тече, но за преговори со ЕУ треба промени во Уставот


Скопје, 9 октомври, 2018 - 15:46 (META) 

Македонија го почна скрининг процесот за пристапување во Европската Унија и тој ќе заврши во јуни 2019 година, но ако пропадне Преспанскиот договор нема да почнат преговорите за членство, објаснува Бојан Маричиќ, специјален советник на премиерот за евроатлантски интеграции и главен технички преговарач во процесот на евроинтеграција на земјава.

Скринингот, или утврдувањето на усогласеноста на македонското законодавство со правото на ЕУ, е технички процес и досега немало случај кога бил прекинат.

– Скрининг процесот е почнат и ќе заврши во јуни, тоа е технички процес, но ако пропадне Преспанскиот договор нема да почнат преговорите – изјави Маричиќ.

Процесот на 27 септември во Брисел го почна вицепремиерот Буар Османи со 40-члена делегација во која беше и министерката за правда Рената Дескоска.

Според Секретаријатот за европски прашања, скринингот е формална и техничка операција што ја врши Европската комисија, со цел да се подготват преговорите за членство и претставува аналитичка презентација на состојбата во земјата кандидат во однос на поглавјата од правото на ЕУ.

Процесот трае околу една година, по Генералниот директорат на ЕУ за проширување подготвува извештај и го презентира пред Советот на ЕУ, кој носи одлука за почнување на преговорите.

Извештајот од скринингот содржи четири дела: објаснување на правото на ЕУ во поглавјето, резултати од скринингот – информации дадени од земјата кандидатка и проценка на Комисијата, заклучоци и препораки на Комисијата, и во последниот дел Комисијата му препорачува на Советот дали да се отворат преговори за поглавјето, и доколку не – кои одредници да се постават.

Европската комисија на 17 април, во извештајот за земјата, препорача Македонија да ги почне преговорите со ЕУ. Советот на ЕУ на 26 јуни донесе условена одлука за почеток на преговори во јуни 2019 година. Но, за почеток на преговорите ЕУ на Македонија и постави четири услови: да ги спроведе итните реформски приоритети, да го спроведе Преспанскиот договор, да добие позитивен извештај од Европската комисија и Советот на ЕУ да донесе формална одлука за почеток на преговорите.


Јасен е јазот меѓу Заев и Иванов, „Катимерини“ објави записници од средбите


Атина, 2 октомври, 2018 - 10:45 (META) 

Записниците кои ги виделе новинари на весникот „Катимерини“ од лидерските средби во Македонија за преговорите со Грција пред договорот за името да биде потпишан во јуни, укажуваат на тоа политичките лидери сметале дека договорот ќе биде полесен за потпишување со лево ориентираната власт во Грција, јавува дописничката на „Мета“ од Атина.

Со двете средби, на 27 јануари и на 19 мај, претседавал претседателот Ѓорге Иванов пишува „Катимерини“. Првиот состанок се одржал помалку од две недели пред да започнат преговорите под покровителство на специјалниот претставник на Обединетите нации, Метју Нимиц, додека вториот бил свикан кога се појави името „Илинденска Македонија“.

Според записникот од состаноците – мали извадоци беа објавени на 19 мај од страна на германскиот весник „Франкфуртер алгемајне цајтунг “- повеќето елементи од Договорот од Преспа биле веќе договорени, со исклучок на името.

Во записникот, исто така, се открива дека во јануари не се расправало за грчкото барање за уставни промени, додека употребата на името – внатрешна и на меѓународно ниво – било предмет на дискусија.

Во записникот се нагласува дека Грција прво се согласила да го признае македонскиот идентитет, а потоа и македонски јазик. Премиерот Алексис Ципрас, во јануари бил заинтересиран за брзо потпишување на договорот, за да може да оди на избори по летото, со договор за името в раце, заедно со излегувањето од економската криза.

Меѓутоа, до мај, оваа приказна спласнала. Во однос на Нова демократија, записниците од средбата кај Иванов во јануари покажуваат дека нејзиниот одговор на Договорот би можел да биде позитивен. Сепак, ова било променето до мај, кога Заев изјавил дека договорот не може да биде постигнат со владата на Нова демократија. И двете средби покажале јасен јаз меѓу владата на Заев и претседателот Иванов. Состаноците, исто така, покажале дека има загриженост во врска со опасностите од руското мешање со цел да не се постигне договор за името со Грција.

Во меѓувреме, портпаролот на владата, Димитрис Ѕанакопулос, во понеделникот го поздрави високиот процент „да” на гласовите на референдумот во неделата, изразувајќи загриженост за нискиот одѕив.

И покрај забелешките на коалициониот партнер Панос Каменос дека нискиот одѕив значи дека референдумот е „неважечки”, Ѕанакопулос рече дека исходот е „позитивен развој за ратификација и спроведување на Преспанскиот договор”, потпишан помеѓу Атина и Скопје во јуни.

Од Нова демократија вчера рекоа дека резултатот од референдумот докажа дека „национално штетниот Договор од Преспа буквално виси во воздух”. Портпаролката Марија Спираки рече дека Грција „не може да биде заложник на случувањата во нашата соседна земја”.


Македонија денеска го почнува скрининг процесот за членство со ЕУ


Скопје, 27 септември, 2018 - 9:40 (META) 

Во Европската комисија во Брисел се наоѓа 40-члена делегација составена од експерти од надлежните државни институции кои имаат надлежности во дадената област, предводена од главниот политички преговарач вицепремиерот за европски прашања Бујар Османи, а во нејзиниот состав се и министерката за правда Рената Дескоска, главниот технички преговарач Бојан Маричиќ и експерти од Секретаријатот за европски прашања. Скринингот ќе почне со Поглавјето 23 – Правосудство и фундаментални права.

Овој прв објаснувачки состанок ќе трае два дена за време на кои ЕУ ќе ги презентира законски одредби, судски одлуки, или, пак, т.н.р. „најдобри практики“ кои во текот на самите преговори ќе им бидат водилка на земјите преговарачи на патот кон зачленувањето во Унијата.

За два месеца, во текот на ноември, треба да се одржи вториот состанок, посветен на поглавјето 24 наречен „правда, слобода и безбедност“.

Според новата методологија на преговори со ЕУ, воведена по последниот бран проширување, сите нови земји кандидати задолжително започнуваат со овие две поглавја, клучни за консолидирање на владеењето на правото, човековите права и правдата.

Во следните месеци, па сѐ до јуни 2019, кога Советот на ЕУ треба и официјално да го даде зеленото светло за старт на преговори доколку Македонија ги исполни зададените услови, треба да се одржат 31 слични состаноци на денешниот за секое од останатите преговарачки поглавја, од земјоделство до животна средина или, пак, конкурентност.

Сите овие подготвителни состаноци ќе се одржуваат заедно со албанската делегација, поради фактот што двете земји во јуни заедно добија условен датум за старт на преговори. Оваа практика не е вообичаена за ЕУ, која претпочита секоја земја да напредува според сопствените заслуги, но во оваа подготвителна фаза одлучено е двете земји да одат во пакет. Понатаму, во текот на самите преговори за членство, се очекува да се примени принципот на „секој по сопствена заслуга“, брифираат дипломатски извори во Брисел.

Состанокот започнува утринава, во девет часот, и ќе трае до петок попладне. Во петок комесарот Јоханес Хан се очекува да одржи прес-конференција со Бујар Османи и неговиот албански колега, додека на маргините на овој прв скрининг, Рената Дескоска треба да оствари средба со евркомесарката за правда, Вера Јурова.