Хан: Пристапните преговори ќе траат подолго од претходно


Виена, 29 август, 2018 - 10:42 (META) 

Европскиот комесар за проширување и соседска политика Јоханес Хан во интервју за австрискиот дневен весник „Тиролер Тагесцајтунг“ порача дека пристапните преговори за зачленување во ЕУ во иднина ќе траат подолго отколку досега.

– Квалитетот пред брзината, посочи Хан – додавајќи оти членството на Унгарија и на Романија „покажалo многу нешта“.

Тој нагласува дека ЕУ извлекла поука од досегашните пристапни процеси.

– Процесите кои ги поттикнуваме на Западен Балкан би требало да добијат многу поголемо ниво на реализација кога станува збор за воспоставување на владеење на правото и борба против корупцијата – вели еврокомесарот Хан.


Во јануари 2019 ќе биде потпишан протоколот за членство во НАТО, соопшти Владата


Скопје, 21 август, 2018 - 15:46 (META) 

Во јануари 2019 ќе биде потпишан протоколот за членство во НАТО со што Македонија ќе почне да учествува во НАТО структурите – но без право на глас, а од втората половина на оваа година започнуваат пристапните преговори со Алијансата, соопштија денеска од Владата.

По потпишувањето на протоколот за членство од Владата информираат дека започнува ратификацијата во сите 29 парламенти на државите членки на НАТО, согласно нивните домашни процедури. Ратификацијата трае околу една година, по што Македонија ќе стане полноправна членка на НАТО.

Во текот на пристапните разговори, Република Македонија ќе треба да потврди дека целосно ги прифаќа одредбите од основачкиот договор на НАТО и сите политички и правни стандарди на Алијансата, и да потврди дека го прифаќа процесот на одбранбено планирање на НАТО и врската со воените структури.

„Република Македонија ќе треба да декларира посветеност и спремност дека ќе се придржува на политичките стандарди на НАТО, на одбранбените и воени прашања, дека ќе одвои доволно средства за имплементација на сите обврски, дека целосно ќе учествува во структурите на Алијансата и други прашања поврзани со безбедноста. Освен тоа, Република Македонија ќе треба да изрази спремност дека ќе пристапи кон сите формални договори кои се дел од корпусот на меѓународни договори, протоколи и правила на НАТО“, велат од Владата.

Освен тоа, една од задачите ќе биде и изработување на програма за продолжување на домашните реформи како реформите за владеење на право, независност на судство, борба против корупција и организиран криминал, реформите во службите за безбедност и разузнавање како и целосна имплементација на Охридскиот рамковен договор и целосна имплементација на договорот со Грција.

Од Владата додаваат дека со тоа ќе се реализира стратешката цел на Македонија да стане членка на НАТО која е гаранција за стабилност, сигурност, неменливост на границите и зачувувањето на територијалните интегритет.


Османи: Преговорите со ЕУ ќе бидат тежок, долготраен и скап процес


Скопје, 1 август, 2018 - 14:33 (META) 

Вицепремиерот за европски прашања Бујар Османи и посебниот советник на претседателот на Владата за евроатлантски интеграции, Бојан Маричиќ денеска на прес-конференција во владата ја презентираа преговарачката структура за пристапување на Македонија во Европската Унија за која рекоа дека е процес кој ќе биде тежок, долготраен, макотрпен, скап и каде што ќе има многу тешки политички одлуки.

Османи рече дека основната функција на процесот на преговори е нашата подготовка за членство и дека трансформацијата треба да резултира со создавање европско општество.

Според моделот кој бил одлучен на вчерашната седница на Влада, ќе има Координативно тело за процесот на пристапување, кое ќе ги утврдува преговарачките позиции на РМ во преговорите. Во него ќе учествуваат примерот, неговите заменици, шефот на дипломатијата, министрите за финансии, економија, правда и информатичко општество.

Османи, како политички преговарач ќе ја предводи државната делегација за пристапни преговори со ЕУ со улога да ги води преговорите и да обезбеди непречено одвивање на процесот по сите поглавја. Заменик на Османи ќе му биде шефот на дипломатијата Никола Димитров, во неа учествува главниот технички преговарач, шефот на мисијата на РМ во ЕУ и секретарот на преговарачката група.

Преговарачка група е третата структура. Таа е задолжена за техничкото ниво на преговорите со ЕК за сите поглавја, а ќе ја предводи главниот технички преговарач, Маричиќ.

Османи појасни дека СЕП ќе биде и Секретаријат на преговарачката група, а ќе биде назначен и секретар на преговарачката група.

-Државните и јавни институции ќе бидат локомотивата на овој процес, а Собранието, судството, опозицијата, граѓанското општество и сите други засегнати страни ќе мораат да бидат вклучени – рече Маричиќ.

Вицепремиерот Османи појасни дека до октомври, СЕП ќе направи мапирање на институциите, на групите на интереси како и конкретните имиња кои ќе дадат придонес на овој процес.

-Ова ќе биде комплексна операција и многу скапа. Се прават пресметки колку ќе чини, министерството за финансии треба да се прилагоди на потребите на овој процес. Владата ќе го финансира овој процес од буџетот бидејќи е една од најважните стратешки цели на државата, а финансиска помош ќе имаме и од ЕУ преку ИПА фондовите бидејќи буџетот не е доволен да ја покрие оваа интензивна агенда – појасни Османи.

Маричиќ вели дека во процесот ќе бидат вклучени повеќе стотици луѓе, а до крајот на процесот таа бројка може да достигне и до илјада луѓе.


Хан: Уверен сум дека преговорите со ЕУ ќе почнат следната година


Брисел, 27 јули, 2018 - 10:21 (META) 

Во разговор за европскиот весник „Политико Европа“, еврокомесарот за проширување, Јоханес Хан, вели дека е „уверен“ дека преговорите со Македонија и Албанија ќе почнат следната година.
Во интервјуто Хан објаснува и дека со двете земји е почната подготвителната работа, што претходи на отворањето на преговорите со ЕУ.

– Ова е многу комплетна работа и се надевам дека ќе можеме да ја завршиме за една година до 14 месеци. Целта е да се добие зелено светло од сите земји членки до средината на следната година – вели Хан потсетувајќи на агендата на Советот на ЕУ во јуни 2019 година да се наврати на почетокот на преговори со Македонија и Албанија, кога земјите членки треба да дадат зелено светло доколку поставените услови се исполнети.

За Македонија тие услови се однесуваат на реформата на безбедносните служби, јавната администрација и борбата против корупцијата, вклучително и високиот криминал.

Еврокомесарот се наврати и на француската блокада на проширувањето, која ги иритираше повеќето земји членки и Европската Комисија.

Францускиот претседател, Емануел Макрон, смета дека не може ЕУ да се проширува пред самата реформски да се продлабочи, аргумент на кој Хан одговара дека процесите можат да одат паралелно. Еврокомесарот потсетува дека граѓаните на Западниот Балкан „имаат право да станат ЕУ граѓани“ и дека ЕУ се „соочува со избор дали ќе извезува стабилност во регионот или ќе увезува нестабилност во ЕУ“.

-Мојата поента е можеби малку поразлична од претседателот Макрон, можеби можеме да го убедиме дека двете работи мора да се прават паралелно – вели Хан за „Политико Европа“.

Едно од предупредувањата на Хан зошто ЕУ треба да се рефокусира на Балканот е што другите големи сили сѐ повеќе се вртат кон Балканот. Иако најчесто во тој контекст се споменува Русија, еврокомесарот потсетува и дека кинеските инвестиции се сѐ поголеми.

Хан алармира дека земјите во регионот би можеле да станат „тројански коњи“ на Пекинг, што еден ден ќе станат членки на ЕУ. Еден од примерите кои ги наведува Хан е изградбата на автопат во Црна Гора, финансиран од Кина.

– Мислам дека треба да бидеме внимателни на стратегискиот концепт на Кина и да реагираме на соодветен начин, мислам дека ова ќе биде еден од големите предизвици на Европа – вели Хан.


МЗШВ очекува целосно повлекување на одлуката на Косово


Скопје, 26 јули, 2018 - 15:09 (META) 

Разговорите кои Владата и надлежните министерства ги водеа со Косово во изминатиот период вродија со плод, Приштина веќе ја повлече зголемената царина за дел од производите, информираат од Министерството за земјоделство, шумарство и водостопанство (МЗШВ).

„Утре, министерот за економија Крешник Бектеши, ќе се сретне со неговите колеги во Косово каде ќе се бара решение и надминување на проблемот. Сите досегашни преговори, ни даваат за право да очекуваме целосно укинување на зголемените царини. Затоа во овој момент, Македонија останува на ставот барем засега да не се воведуваат контрамерки. По утрешниот состанок ќе имаме и многу повеќе детали за наредните чекори. Приоритетна цел на министерството за земјоделство во моментов е утврдување на начин како да ги заштитиме земјоделците“, се вели во соопштението на МЗШВ.


Преговорите течат, Владата се уште не воведува реципрочни мерки кон Косово


Скопје, 23 јули, 2018 - 13:43 (META) 

Во насока на решавање на проблемот со воведените зголемени царини од страна на Косово, министерот за земјоделство, шумарство и водостопанство, Љупчо Николовски е во постојана комуникација со ресорните министри од Косово и од регионот, информираат од МЗШВ.

Од таму додаваат дека Владата прави се, за да не дојде во ситуација да воведува контрамерки како одговор на постапката на Косово и очекува, Владата на Косово да ја повлече донесената мерка со што ќе се надмине спорот.

„В среда ќе има и заедничка средба на сите ресорни министри од регионот на која како претставник од Македонија ќе биде министерот Николовски. На средбата ќе се бара заеднички модел како да се надмине овој проблем со Косово. Исто така, доколку не се надмине проблемот во среда, Николовски и министерот за економија Крешник Бектеши, ќе се сретнат и со косовските ресорни министри и ќе се бара начин за надминување на ситуацијата. Целта е Укинување на одлуката и овозможување на брз проток на стоки и услуги како и трговска размена помеѓу двете земји“, се вели во соопштението.

Минатата недела Министерството за земјоделство,шумарство и водостопанство и Министерството за економија, испратија допис до ЦЕФТА, Европската унија и до Владата на Косово, со кое се бара повлекување на одлуката на Косово за зголемување на царините за увозното овошје и зеленчук.

Доколку и покрај сите напори и средби кои престојат Косово не ја повлече одлуката, Владата ќе преземе мерки за заштита на домашното производство.


ВМРО-ДПМНЕ: Неточно е дека преговараме за амнестија


Скопје, 20 јули, 2018 - 14:21 (META) 

Апсолутно е неточно дека ВМРО-ДПМНЕ бара и преговара некаква амнестија. Ваквите неточни брифирања од СДСМ се само обид да се дефокусира вниманието на јавноста од актуелните случувања поврзани со штетниот договор со Грција кој ВМРО-ДПМНЕ не го прифаќа, порача најголемата опозициска партија.

„СДСМ треба да престане да ја дезинформира јавноста и да дефокусира од заложништвото во кое ја втурна прифаќајќи го штетниот договор со Грција. И во однос на некои надежи и пишувања дека се договарало некаква возратна амнестија во стилот СДСМ сега, па потоа ВМРО-ДПМНЕ кога ќе дојде на власт ќе овозможи друга амнестија, би порачале дека најдобар демант за ова ќе биде времето кое ќе покаже дека одговорност ќе има за сите оние пречекорувања на Уставот и законите кои сега се случуваат“, се вели во соопштението.


Хан утре во Македонија, ќе го започне скринингот за почеток на разговорите со ЕУ


Скопје, 16 јули, 2018 - 12:22 (META) 

Комесарот за соседска политика и проширување на Европската комисија Јоханес Хан утре ќе престојува во Македонија, со што почнува скрининг процесот на земјата за отпочнување преговори за членство во Унијата.

Според агендата, Хан изутрина ќе има средба со премиерот Зоран Заев, а потоа и со претседателот на Собранието, Талат Џафери и со лидерот на опозициската партија ВМРО-ДПМНЕ Христијан Мицкоски.

Еврокомесарот Хан ќе има обраќање пред членовите на Националниот совет за евроинтеграции во Собранието. По завршување на средбите во Скопје, утре попладне ќе замине за Тирана.

Премиерот Зоран Заев во петокот на средбата со претставници на граѓанските организации изјави дека со доаѓањето на Хан во Скопје почнува скрининг процесот.

– Целта е на владина сесија да ги отвориме процесите, а тоа значи дека час поскоро треба да ја подготвиме државата и со преговарачката рамка и со преговарачките тимови за процесот за кој е многу важно колку време ќе потрошиме – рече Заев.


Шекеринска: Задутре добиваме покана за НАТО, да не ја пропуштиме шансата


Скопје, 9 јули, 2018 - 14:08 (META) 

Сосема извесно е дека Македонија на 11 јули на самитот на НАТО ќе добие покана за пристапни преговори, кои се очекува да траат релативно кратко – три до шест месеци – во процедура идентична како за последните земји што станаа членки на НАТО, односно Црна Гора, Албанија и Хрватска, а  потоа да се потпише Протоколот за пристапување, по што ќе почне негова ратификација во сите земји членки, и од тој момент де факто ќе бидеме веќе во НАТО, оти ќе учествуваме во голем дел од постапките на НАТО. Останува само да се заврши процедурата во земјава, со референдумот и уставните промени, за да се отстранат последните пречки. Несериозно би било опозицијата, која долго време наназад нагласува дека ЕУ и НАТО се стратешките определби на Македонија, сега поради ситни политички поени да го блокира тој пат, порачаа министерката за одбрана Радмила Шекеринска и националниот координатор за НАТО, Стево Пендаровски, на денешниот брифинг со новинарите.

Нагласувајќи дека станува збор за минијатурен процес на пристапување и дека огромен дел од работите се веќе завршени, и Пендаровски и Шекеринска рекоа дека процесот на пристапување ќе биде идентичен како за Црна Гора, Албанија и Хрватска, и дека главното треба да се случи во земјава, односно да се одржи референдум и да се смени Уставот.

– Македонија е пред нов почеток. Она што го пропуштивме во 2008 година, сега можеме да го реализираме со 10 години задоцнување, што знаеме дека не чинеше многу на внатрешен план. Но, сега е ново време кога државата не е повеќе киднапирана и кога е прекинат периодот на стагнација, имаме шанса да упатиме нова порака за стабилност, а и да имаме економски придобивки. А притоа, видовме дека нема никакво противење од Грција – порача министерката за одбрана.

На новинарско прашање дали е можно Франција и Холандија да го попречат процесот како во случајот за поканата за преговори со ЕУ, и Шекеринска и Пендаровски, повикувајќи се на средби со министри и амбасадори во НАТО, појаснија дека таква опасност воопшто не постои.

Според Пендаровски, при неговите реферирања во Брисел, тој од амбасадорите на двете земји добил уверување дека не постои никакво противење.

– И на премиерот Заев на средбата со Макрон во Софија, и мене на последната средба со министерката за одбрана на Холандија, ни беше јасно кажано дека тие земји немаат никакво противење и чекаат што побргу да влеземе во НАТО – рече Шекеринска.

Појаснувајќи дека во процесот на пристапните преговори можно е да не се завршат сите теми, но за тоа може да се разговара и по стапувањето во членство, како што е случајот на Црна Гора, Пендаровски појасни дека по поканата на 11 да почнат преговорите, ќе уследи кратка процедура по што ќе почне вистинската работа.

– Откако НАТО на 11 ќе ја повика Македонија да ги почне пристапните преговори, алијансата ќе направи План за пристапување, по што Генералниот секретар на НАТО, Јенс Столтенберг ќе издаде формална покана, на која македонската влада ќе одговори со писмо за намери, по што ќе уследат политичките и техничките сесии на преговори и од наша страна ќе се изготви тромесечна Програма за членство, и ако се помине добро се потпишува Протоколот за пристапување и нашата земја фактички станува членка на НАТО. Потоа треба да се ратификува од сите 29 земји членки, по што Македонија ќе стане формално полноправна членка. Но дотогаш ќе може да учествуваме во сите постапки и да дискутираме, но не ќе може да гласаме – објасни Пендаровски.

Формирањето на нова Државна изборна комисија, која ќе треба да го организира референдумот за Договорот со Грција и уставните измени, работи за кои се очекува противење од ВМРО-ДПМНЕ, за Шекеринска се моменти кога опозицијата треба да покаже политичка зрелост.

– Свесни сме дека постојат можности за одлагање, и ние би сакале да ги избегнеме таквите ситуации, оти тоа е стратешки штено за Македонија. Ако ние губиме време, светот не стои мирно. Партиите што пред сите избори кажувале дека има политичка одлука за НАТО, се надеваме сега нема да заборават што кажале. Сега имаме шанса, кога постои поддршка во парламентот на Грција да се реши прашањето, оти по изборите кај нив не знаеме што ќе се случи, а тоа го знаат и во НАТО, така што на сите ни се брза. маедонија е мала земја, нема голем сила, и мора да даде впечаток дека ќе се држи на зборот – рече Шекеринска.


Туск: Отворен е патот кон ЕУ, останете посветени на реформите


Брисел, 28 јуни, 2018 - 15:20 (META) 

Ова е добра недела за вашата земја и за Западен Балкан, министрите за надворешни работи на ЕУ го отворија патот за отпочнување преговори за членство за Македонија и Албанија во јуни 2019 година и за неколку часа очекувам шефовите на влади да ја потврдат одлуката, изјави денеска на прес-конференција претседателот на Советот на ЕУ Доналд Туск со премиерот Зоран Заев.

Тој рече дека напредокот немало да биде успешен без силниот ангажман на македонската Влада, посочувајќи го постигнатиот Договор за добрососедство со Бугарија и Договорот со Грција за решавање на спорот со името, кои, според него, претставуваат пример за другите во регионот како да се решаваат проблемите.

– За време на мојата посета на Скопје ја видов јасно изразената политичка волја да одите напред во евроатлантските интеграции, и оти ќе останете на тој пат да одржите чекор во реформите во клучните области – рече Туск.

Премиерот Заев истакна дека денеска во Брисел во срцето на Европа е потврдена големата вест Република Македонија да добие датум за преговори во јуни 2019.

– Нашата земја го заслужи тоа. Лидерите на ЕУ рекоа да, земјата го заслужува тоа. ЕУ прифати дека Македонија од заробена држава за само една година направи пресврт. За само една година Република Македонија е земја позитивни промени, на инклузивност, политички дијалог, за политичка волја за решавање на проблемите со соседите – рече Заев на прес-конференцијата.