Ципрас: Преговараме врз основа на имињата предложени од Нимиц


Атина, 23 мај, 2018 - 16:28 (META) 

Ние јасно изјавивме дека преговараме врз основа на четирите имиња предложени од ОН, конкретно пакетот предлози од медијаторот Метју Нимиц, рече грчкиот премиер Алексис Ципрас во Парламентот, одговарајќи на критиките упатени од лидерот на опозициската Нова демократија, Киријакос Мицотакис, во врска со името „Република Илинденска Македонија“.

Грчкиот премиер на Мицотакис му возвратил дека владата јасно и навремено излегла со став, а лично тој се стремел кон што е можно побрзо информирање.

– Од Софија, пред да се вратам, во моите изјави на прес конференцијата реков дека, и покрај напредокот, уште имаме пат да поминеме за да имаме договор, но и дека приоритет за нас, за грчката страна, е обезбедување на ерга омнес и уставна ревизија и, како што видовте, за ова прашање имавме важен напредок. Господинот Заев е првиот премиер од соседот што јавно ја прифати оваа перспектива за сложено име, ерга омнес со уставна ревизија. Ова го немате до сега видено во период кога вашата партија се наоѓаше во влади што преговараа, како што и немаме досега видено да се врши толку голем притисок врз извршната опозиција на соседната земја – рече грчкиот премиер и додаде дека нема дополнително да говори за суштината на преговорите, бидејќи утре ќе се одржи нова средба на министрите за надворешни работи на двете земји со медијаторот Нимиц.

Претходно, претседателот на Нова демократија, побара од грчкиот премиер јасно да каже дали го отфрлил предлогот за „Република Илинденска Македонија“ или „сѐ уште тајно се разговара за тоа“.


Коѕиас: САД многу се интересираат за решение околу спорот со името


Вашингтон, 23 мај, 2018 - 11:52 (META) 

Американската администрација не врши притисок, туку се интересира за решение кон кое водат преговорите за името и кои се потешките точки, вели шефот на грчката дипломатија, Никос Коѕиас на брифинг со грчките дописници во САД.

Министерот за надворешни работи на Грција, вчера се сретна со советникот за национална безбедност на американскиот претседател, Џон Болтон, а состанокот траел двојно повеќе од предвиденото. И Болтон и Помпео, како што рече Коѕиас, ги слушнале грчките позиции, како за регионот, Блискиот исток, така и за односите на Грција со Турција и разговорите за името, за кои разговарал со помошниот државен секретар Вес Мичел.

-Во скопското прашање немаме никаков притисок, ниту некој има намера да не притиска. Никогаш нема да дозволиме да нѐ притискаат. Но, многу се интересираат за решение и се обидуваат да разберат каде се наоѓаат преговорите и кои се тешките точки – рече Коѕиас и додаде дека искуството покажало дека кога се преземаат иницијативи, тогаш никој не може да се меша.

Министерот за надворешни работи на Грција, потенцираше дека во однос на Скопје е во континуирана консултација и соработка со грчкиот премиер со кој имаат совпаѓање на ставовите.

Како што јави дописничката на МИА од Атина, во пресрет на новата рунда разговори во Њујорк утре и задутре, шефот на грчката дипломатија рече дека паралелно со главните преговори, ќе одржат состанок техничките групи, а ги спомена и двата текста, едниот од грчка страна, другиот од медијаторот, кои ги содржат точките за кои што се водат преговорите.

-Да знаете дека имаме напишано голем текст, Грција го направи. Овој текст, заедно со правниот текст направен од Нимиц ги презедовме и ги интегриравме во еден текст, во кој вториот дел се однесува на идната соработка на Грција и ПЈРМ, односно перспективата во прашањата за образованието, истражувањата итн. Првиот дел се однесува на прашања што се поврзуваат со името, пред сѐ со прашањата за иредентизмот, со кои треба да завршиме, како и поглавјето за признавање на сите меѓународни правни реалности, границите, неповредливоста на границите, дека од ниедна страна не може да се води пропаганда или да се дава простор за пропаганда од едната против другата страна – рече Коѕиас од САД, во брифингот за грчките новинари.


Најдобро е името да произлезе од предлозите на Нимиц, вели Ѕанакопулос


Атина, 21 мај, 2018 - 14:44 (META) 

Грчката страна инсистира на тоа дека најдобро решение е избор на едно име од оние што ги достави медијаторот Нимиц во неговите предлози, вели портпаролот на грчката Влада и министер без ресор Димитрос Ѕанакопулос, во интервју за грчкото радио „Реал фм“.

Ѕанакопулос го поздравил прифаќањето на ерга омнес, споменувајќи го како позитивна разврска и позитивен чекор од средбата на двајцата премиери.

-Што се однесува на името, не сме стигнати до таму. Секако постојат предлози што биле ставени на маса, но, сепак, грчката страна инсистира на тоа дека најдобро решение е избор на едно име од оние што ги достави медијаторот Нимиц во неговите предлози. Но, не сме стигнати до таму, треба да поминеме уште пат за да можеме да говориме за конечен договор, вели Ѕанакопулос во интервјуто и додава дека секако дека се разговара и „за предлозите на нашите соседи, но, сепак, преговорите функционираат во една конкретна рамка и добро е да се држиме до таа“.

– Ние го поздравуваме прифаќањето ерга омнес од соседите, одговорно ги продолжуваме преговорите, нешто што не гледам дека го дели и го прави опозицијата и говорам за опозицијата речиси во целост, додаде портпаролот на грчката Влада и министер без ресор, упатувајќи критики до Нова демократија дека нема расположение да функционира конструктивно.


Мицотакис: Илинденска Македонија е олицетворение на иредентизмот


Атина, 21 мај, 2018 - 10:17 (META) 

Илинден и илинденското востание се идентификуваат со македонскиот иредентизам, смета лидерот на грчката опозициска Нова демократија Киријакос Мицотакис при посетата на грчкиот остров Крф и додаде дека неговата партија никогаш нема да го прифати ова име.

– Во изминатите денови слушнавме и јас лично бев избрифиран, дека се разговара за име на Скопје, за името „Илинденска Македонија“. Значи, да разјасниме одредени прашања за оние кои се чини дека не ја познаваат добро нашата историја. Илинденското востание и името на Илинден се идентификуваат со македонскиот иредентизам. Тоа е име што беше идентификувано со националистичко востание, кое тогаш, како централен слоган, го имаше Македонија на Македонците и формирање на една голема Македонија, со главен град Солун. Со други зборови, истото име за кое разговараше и веројатно уште разговара Ципрас, е олицетворение на иредентизмот – рече Мицотакис и додаде дека му се чини дека „секогаш кога Ципрас преговара ноќе и сам, е опасен за националните интереси.

Претседателот на грчката конзервативна партија одново ги спомена позициите на Нова демократија за ерга омнес име и уставна ревизија како предуслов за било кое решение и го повтори ставот дека тие нема да го прифатат конкретното име.

– Навистина се надевам, иако господинот Ципрас уште не не известил, дека ова име веќе го отфрли како неприфатливо, бидејќи ја навредува историјата на нашата земја и кое под никакви околности не може да биде прифатено 0 додаде лидерот на Нова демократија.


Ѕанакопулос: Многу имиња се најдоа на маса, немаме стигнато до конкретно решение


Атина, 18 мај, 2018 - 16:56 (META) 

Министерот без ресор на Грција и портпарол на Владата, Димитрис Ѕанакопулос во интервју за грчкото радио „Алфа 989“ одби да ги коментира натписите во медиумите дека Илинденска Македонија е предлогот од македонска страна.

Ѕанакопулос, вели дека многу имиња се нашле на маса, но дека двете страни се уште не стигнале до конкретно име.

– Многу имиња се најдоа на преговарачката маса. Во овој момент, не можам да кажам нешто повеќе. Сѐ ова се однесува на суштинската содржина на преговорите, кои треба сите да ги почитуваме дека не може да бидат предмет на јавна дискусија. Повторно ви велам, многу имиња се најдоа на маса. Во овој момент, немаме стигнато до нешто – вели Ѕанакопулос во интервјуто.

Во однос на тоа дали е можно до средината на јуни да се постигне решение, грчкиот министер и владин портпарол вели дека не сака да дава предвидувања за исходот на преговорите.

– Она што е сигурно е дека постои политичка волја. Сепак, како што кажа и премиерот, имаме уште пат да изодиме за да стигнеме до заемено прифатлив договор. Така функционираат преговорите. Не можеш да го предвидиш успешниот исход. Секако, можеш да работиш во оваа насока. И ова, Ве уверувам дека го прави грчката влада, со чувство на одговорност за решавање на едно прашање што ја измачува нашата земја, но и поширокиот регион, над 30 години – додава Ѕанакопулос.


Грчката влада демантира: Само сложено име за сите употреби ги отвора вратите на ЕУ и НАТО


Атина, 14 мај, 2018 - 15:46 (META) 

Промената на уставното име на Македонија е услов за поддршката на Грција за интеграцијата на соседот во ЕУ и НАТО, нагласуваат владини извори, кои ги пренесува грчката државна телевизија ЕРТ, како реакција на информациите кои ги пласираше десничарскиот весник „Естиа“.

Според грчката влада, тврдењата на весникот дека “НАТО како ПЈРМ и со цврст меѓународен договор“ не ја отсликуваат реалноста.

Поточно, истите извори, истакнуваат дека “актуелната влада преговара со власта во ПЈРМ само за зачувување на националните интереси и за тоа постави два јасни услова за нивна заштита – сложено име и име за сите употреби”.

Се нагласува дека „промената на уставното име на нашиот сосед е предуслов за нашата поддршка за интеграцијата во ЕУ и во НАТО, па поред тоа, она што го наведува „Естиа“ не е точно, нагласуваат извори од владата во Атина.


Грчката дијаспора бара Коѕиас да ги прекине преговорите за името


Атина, 8 мај, 2018 - 10:12 (META) 

Неколку организации од грчката дијаспора му испратија писмо на шефот на дипломатијата, Никос Коѕиас, во кое го обвинуваат дека ги понижува Грците ширум светот и со кое бараат прекин на преговорите за името.

Во писмото се вели дека „е очигледно оти преговорите се во ќорсокак и дека нема ниту една причина за нивно продолжување“. Тие го обвинуваат Коѕиас дека веќе направил „неисториски отстапки“ со тоа што се согласил во името да стои и терминот Македонија.

Pismo

– Во овој момент треба да се прекинат преговорите и да престанете да го понижувате достоинството на Грците ширум светот со вашето инсистирање да им дадете името на Македонија на Словените во Скопје – се вели во писмото.

На 11 и 12 мај ќе има нова средба меѓу министрите за надворешни работи Никола Димитров и Никос Коѕиас во Сунион крај Атина на која ќе присуствува и медијаторот Метју Нимиц.

Како што се најавува од Скопје и од Атина, и ако не се случи ништо непланирано, на 17 мај во Софија ќе се одржи состанок од четири очи помеѓу македонскиот премиер Зоран Заев и грчкиот премиер Алексис Ципрас во рамките на Самитот ЕУ – Западен Балкан.


Заев: Има креативен напредок за името, но тоа се само идеи на маса


Дојран, 5 мај, 2018 - 19:30 (META) 

Премиерот Зоран Заев во Дојран, коментирајќи ја вчерашната средба меѓу шефовите на дипломатиите на Македонија и Грција, Никола Димитров и Никос Коѕиас во Солун, оцени дека е направен напредок во однос на наоѓање решение за проблемот со името.

– Направен е напредок во делот на креативноста на изнаоѓањето на решенијата за она коешто за нас е важно да може да помине, сочувувајќи го достоинството и идентитетот, но и за грчката страна, исто така, можност да помине достоинството и идентитетот. Секако, тоа се само идеи на маса за коишто продолжуваме да размислуваме, рече Заев.

Според Заев, на крајот на идната седмица пак ќе има средба и ќе се види како ќе се одвиваат работите.

– Целта е веќе кога сме дојдени на крајот и така критиките ги добиваме од граѓаните, да ги добиеме и позитивните поени со можно решение. Јас сум убеден дека поради креативноста, посветеноста на двете страни во преговарачкиот процес можеме конечно да здивнеме со еден проблем помалку којшто секако е еден од крупните во Македонија којшто ќе ги отвори портите на НАТО и ЕУ, притоа важно е секако да не бидеме обесчестени, да не бидеме понижени, како и грчката страна исто така. Убеден сум кога веќе стасавме до овде, двете страни имаат искрена, вистинска намера за решение на проблемот – додаде Заев.


Заев: Очекувам решение за името до крајот на јуни, Уставот ќе се отвора пред влезот во ЕУ


Скопје, 3 мај, 2018 - 9:48 (META) 

Со овие продемократски, прозападни и проевропски манири со коишто се однесуваме и двете страни во разговорите верувам дека ќе смогнеме сили до самиот крај да изнајдеме решение кое биде од корист на двете страни. Верувам дека може Македонија заедно со Грција да постигне решение пред одржувањето на Советот на министри, односно Советот на Европа. А веднаш после него е и Европскиот совет. Тоа е крајот на јуни. Би сакал да постигнеме решение дури и до Самитот на Европската Унија за Западен Балкан. Тоа е 17, 18 мај, но поважно е да постигнеме решение.

Ова во одговор на новинарски прашања го порача премиерот Зоран Заев вчера по потпишувањето на меморандум за разбирање меѓу Владата и Женевскиот центар за демократска контрола на вооружените сили. Тој нагласи дека за власта е многу важно зачувувањето на достоинството и идентитетот.

– Кога веќе направивме сериозни чекори, а има сериозни чекори направено, ве уверувам дека движејќи се кон она што ни е важно, а тоа е да го сочуваме достоинството и идентитетот и на нашата страна и на грчката страна ќе се обидеме да го постигнеме решението коешто секако на Македонија ќе и обезбеди автоматска покана од НАТО и датум за преговори со Европската Унија.

Во однос на промените на Уставот што ги бара Грција како бескомпромисен момент, Заев вели дека промените ќе уследат пред зачленувањето во ЕУ, односно тогаш кога ќе се предаде суверенитетот на Брисел.

– Граѓаните треба да знаает дека Уставот се отвора пред непосредно влегување во полноправно членство во ЕУ. Зошто? Оти тогаш го предаваме нашиот суверенитет. Така што, за такви работи можеме да разговараме, треба да знаат граѓаните, но за останатите делови поврзани со Устав, промени или слично јас не би давал никакви коментари. Зошто? За да му дадам шанса на преговарачкиот процес до крај. Верувам се дека колку и да е безбедно, невлијателно врз преговарачкиот процес, да бидеме внимателни, за да постигнеме решение коешто ќе биде од обостран интерес на граѓаните на двете земји и на двете земји – рече премиерот.


Касами побарал од Заев министерско место за Беса


Скопје, 2 мај, 2018 - 14:32 (META) 

Движењето Беса предводено од Билал Касами во преговорите за влез во Владата на премиерот Зоран Заев побарало да предводи еден од министерските ресори, информираше денеска пратеникот Фадил Зендели

Тој рече дека на средбата што се одржала во понеделникот вечерта Касами и Заев зборувале за влез на ова крило на Беса во Владата. Тие на Заев му посочиле дека се заинтересирани да раководат со едно министерско место со ресор.

Неделава треба да следува нова средба на која, според него, треба да се разговара за ресорите и за евентуалните имиња.

Премиерот Заев за претстојната владина реконструкција вчера на прес-конференција информираше дека привршуваат разговорите со потенцијално новите владини партнери.

– Ако успееме да ги номинираме предлозите, телата на партиите ќе треба да донесат одлуки – подвлече премиерот Заев.