!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Заев не размислува за предвремени избори, туку за реформите и за спорот за името


Скопје, 17 октомври, 2017 - 13:06 (META) 

Не размислувам за предвремени парламентарни избори бидејќи сè уште се во тек локалните, а наш приоритет е тие да завршат комплетно регуларно и веродостојно, како и во првиот круг оти само тогаш Македонија победува, изјави премиерот Зоран Заев на денешната заедничка прес-конференција со претседавачот на Советот на министри на Босна и Херцеговина, Денис Звиздиќ.

Заев рече дека на резултатите од изборите гледа како на поддршка за работа, а не за повторни избори.

– Резултатите од локалните избори ми даваат дополнителна храброст за носење одлуки, вклучувајќи го и решавањето на спорот за името. Македонија има сериозни одлуки пред себе и треба да ги носи на еден транспарентен и инклузивен начин, меѓу другото и одлуките за проблемот што Грција ги има со нашето уставно име – рече Заев.

Во врска со спорот за името, тој потсети дека го повикал посредникот во разговорите, Метју Нимиц, уште во ноември, по изборите, да излезе со нови предлози, идеи и со можни решенија.

– Би ја повикал опозицијата да учествува во ова прашање, но во функција на наоѓање решение, а не на негово одложување, затоа што навистина сакаме Македонија да стане 30. членка на НАТО и затоа што е значајно за одлуките што ЕУ ќе ги носи напролет. Сите знаеме дека мораме да направиме нешто со овој сензитивен проблем наметнат од грчка страна – рече Заев.

Тој, во овој контекст, додаде дека е охрабрен од подобрувањето на односите со Атина во периодот по формирањето на Владата.

– Градењето на пријателството со Грција што го имавме сите овие месеци наназад дополнително мене лично и другите министри во Владата нè охрабрува за решавање на овој проблем, притоа внимавајќи на нашата поставеност во поглед на наоѓањето решение. Сигурен сум дека по изборите ќе има попрецизни и поконкретни стратегии и правци, но сигурен сум и дека ќе се разговара за решавање на овој проблем – подвлече Заев.


ВМРО-ДПМНЕ: Ајде да ги расчистиме дилемите на предвремени парламентарни избори


Скопје, 13 септември, 2017 - 21:40 (META) 

Во врска со анкетата што „Телма“ ја објави во соработка со „М-Проспект“ и со МЦМС, ВМРО-ДПМНЕ сака да ги повика СДСМ и Зоран Заев да се охрабрат и да излезат и на предвремени парламентарни избори, на кои граѓаните ќе кажат што мислат за расипничкото и неодговорно владеење на СДСМ, се вели во реакцијата на опозициската партија.

Од ВМРО-ДПМНЕ велат дека само на тој начин ќе се расчистат дилемите, бидејќи, според партијата, денеска била објавена истата анкета која пред „само еден месец покажала сосема други резултати“.

„Според анкетата од крајот на јули, резултатите од МЦМС покажале дека ВМРО-ДПМНЕ e со стабилна предност пред СДСМ. Имено, на прашањето доколку утре се одржат избори за која партија би гласале, 27,1 отсто од испитаниците се одлучиле за ВМРО-ДПМНЕ, додека за СДСМ биле 22,7 отсто. Народот најдобро ќе каже дали се случило нешто во последните 30 дена за така драстично да се смени мислењето, односно дали Законот за двојазичност, Договорот со Бугарија, укинувањето на планираното зголемување на пензиите или тендерите кои Кочо Анѓушев си ги доделува себеси придонеле за зголемување на рејтингот на Зоран Заев“, стои во соопштението на ВМРО-ДПМНЕ.


Во Британија денеска се одржуваат предвремени парламентарни избори


Лондон, 8 јуни, 2017 - 10:33 (META) 

Во Велика Британија денеска се одржуваат вонредни парламентарни избори, на кои доминантна тема се Брексит и здравството.

Премиерката Тереза Меј ги распиша изборите за да го зајакне легитимитетот во преговорите со Европската Унија за излегувањето на Британија од ЕУ.

Меј и лидерот на опозициската Лабуристичка партија, Џереми Корбин, вчера се вратија на клучните теми на изборите, бидејќи изминатите денови безбедноста беше доминантна тема на кампањата, особено по двата терористички напади.

Главната порака на премиерката на собирот во Лондон беше насочена на Брексит и ветувањето дека излегувањето од ЕУ ќе донесе повеќе работни места и подобра сообраќајна поврзаност.

Корбин на митингот во Глазгов предупреди дека националниот здравствен систем не може да издржи уште пет години недоволно финансирање, недостиг од работници и приватизација.

Според последните анкети, предноста на британската Конзервативна партија над лабуристите, е значително мала, односно во последниот месец варира меѓу еден и 12 отсто, пренесува „Би-би-си“.

Покрај конзервативците и лабуристите, на место во парламентот се надеваат и Зелената партија, Либералните демократи, Шкотската национална партија и Партијата за независна Велика Британија.


Меј и Корбин одговараа на прашања за Брексит, но без меѓусебно соочување


Лондон, 30 мај, 2017 - 9:53 (META) 

Британската премиерка Тереза Меј изјави дека Брексит може да биде „приказна за успех“ и дека референдумот ја решил дебатата меѓу приврзаниците за останување во ЕУ и тие што се за излез од неа.

Меј синоќа изјави дека ги распишала предвремените избори затоа што опозициските партии се „обиделе да го осуетат процесот“ на излегување на Британија од Европската Унија.

Лидерот на опозициската Лабуристичката партија, Џереми Корбин, рече дека лабуристите „морале да ја прифатат реалноста на референдумот“.

Меј говорела за своите реформи на социјална заштита и за имиграција, додека Корбин одговарал на прашања за своето политичко минато, за надворешно-политичките ставови, но и за ставот кон монархијата.

Меј и Корбин одговарале на прашања на публиката во емисијата „Битка за број 10“, но не беа истовремено во студиото бидејќи премиерката одби соочување.


Харадинај во коалиција со Весели и со Лимај


Приштина, 17 мај, 2017 - 11:01 (META) 

Демократската партија на Косово, Алијанса за иднината на Косово и Иницијативата за Косово потпишаа предизборен коалициски договор за заеднички настап на предвремените парламентарни избори, потврди Мирадија Мавриќ од Централната изборна комисија на Косово.

Во коалицијата има уште 10 помали партии.

Овие партии ги водат Кадри Весели, Рамуш Харадинај и Фатмир Лимај, а договорот го потпишаа неколку минути пред полноќ, кога истече рокот за поднесување на предизборните коалиции.

Од партијата на Харадинај, која досега беше во опозиција, претходно соопштија дека имаат црвени линии кога станува збор за коалицирање со досегашните владејачки партии.

Синоќа, предизборен договор потпишаа и Демократскиот сојуз на Косово на досегашниот премиер Иса Мустафа и Алијансата за ново Косово на Бесет Пацоли. Нешто претходно кон коалицијата се приклучи и актуелната градоначалничка на Ѓаковица, Мимоза Куари Лиља и независниот пратеник Илир Деда.


Затуроска: Одложувањето на СДСМ да се соочи со народот го зголемува револтот кај граѓаните


Скопје, 16 мај, 2017 - 16:25 (META) 

ВМРО-ДПМНЕ преку пратеничката Лилјана Затуроска денеска повторно го повика парламентарното мнозинство веднаш да обезбеди услови за продолжувањето на мандатот на локалната власт и да не ги одлагаат локалните избори. Тоа, според Затуроска, е неопходно за да се излезе во пресрет на интересите на граѓаните и потребите на општините, да продолжат нормално да функционираат како сервис на народот, кој може да ги решава секојдневните комунални и инфраструктурни барања.

Таа му порача на СДСМ дека „секое одложување да се соочи со народот само дополнително ја продлабочува политичката криза во државата и го зголемува револтот на граѓаните кон нивните незаконски, неуставни и, пред сè, антидржавни чекори кои ги преземаат во континуитет“ и го повтори повикот на нејзината партија заедно со локалните да се организираат и предвремени парламентарни избори.

– ВМРО-ДПМНЕ останува на ставот дека народот заслужува да биде прашан што мисли за постизборната измама преточена во тиранската платформа. Доколку парламентарното мнозинство се охрабри, во истиот термин со локалните избори би можеле да се одржат и нови парламентарни избори, на кои граѓаните не само што ќе ја изберат својата локална власт, туку ќе имаат можност да го кажат својот став и за последните политички случувања и за постизборните измами што СДС им ги приреди – рече Затуроска.


Британскиот парламент ќе гласа за предвремени избори


Лондон, 19 април, 2017 - 12:09 (META) 

Британските пратеници денеска ќе гласаат за одржување предвремени избори на 8 јуни, на барање на конзервативната премиерка Тереза Меј, која како причина ја наведе потребата да добие силна поддршка за преговорите за Брексит.

Расправата во парламентот треба да почне околу 13.30 часот по локално време и не се очекува да трае повеќе од 90 минути, а гласањето е предвидено за околу 16 часот.

Меј, која вчера ги изненади сите со барањето за предвремени избори, треба да добие поддршка од две третини од пратениците на Долниот дом на Парламентот во Вестминстер за да може да ги повика Британците на избори три години порано.


ОБСЕ/ОДИХР: Постизборниот период беше тензичен и со остра реторика


Скопје, 28 февруари, 2017 - 17:48 (META) 

Мисијата на ОБСЕ/ОДИХР денеска попладне го објави конечниот извештај за предвремените парламентарни избори, одржани на 11 декември минатата година во Македонија, во кој се наведува дека е потребно и понатаму да се работи на унапредување на правната рамка, но и да се преземат законски мерки за заканите кон амбасадорите.

„Иако партиите генерално, имаа можност за слободно претставување на кампањите, се препорачува властите и политичките партии да преземат конкретни чекори за да не се врши притисок врз вработените од јавната администрација, политичките активисти и другите кои ги посетуваат таквите настани или, пак, на самото гласање. Наводите за притисок треба темелно да бидат истражени“, порачуваат од ОБСЕ/ОДИХР.

Во извештајот се наведени забелешки за работата на ДИК и за нејзината внатрешна организација, проблемите со гласачките списоци, пробивањето на законските рокови. Од мисијата препорачуваат дека потребно е повторно да се разгледа Изборниот законик, да се зголеми транспарентноста и ефикасноста на ДИК, да се врши редовна контрола на избирачките списоци, брзо да се интервенира во случаите кога лицата не се наоѓаат на избирачкиот список и да се работи на подобрување на независноста на медиумите.

Од ОБСЕ/ОДИХР во извештајот истакнуваат дека постизборниот период бил обележан со тензии и со остра реторика, особено од страна на ВМРО-ДПМНЕ. Се наведува дека сè уште не е познато дали се преземени законски мерки за заканите кон амбасадорите, по прогласот на ВМРО-ДПМНЕ што го прочита лидерот Никола Груевски на протестот пред Државната изборна комисија (ДИК) на 17 декември лани.

„Постизборниот период беше одбележан со тензична атмосфера и со остра реторика, главно од ВМРО-ДПМНЕ. Откако Беса и СДСМ доставија приговори за нерегуларности на неколку избирачки места, ВМРО-ДПМНЕ повика на протести пред седиштето на Државната изборна комисија (ДИК). На 17 декември, лидерот на ВМРО-ДПМНЕ пред насобраните луѓе го претстави партискиот проглас и ја обвини ДИК и неколку амбасадори за мешање во изборите. Следниот ден, се појавија некролози на сегашни и на поранешни претставници на меѓународната дипломатска заедница во Скопје. Мисијата на ОБСЕ/ОДИХР не е запознаена дали биле преземани какви било законски мерки против овие дејства“, се вели во извештајот на ОБСЕ/ОДИХР.


И ЦК на ВМРО-ДПМНЕ му даде поддршка на Груевски за разговори за формирање влада


Скопје, 12 јануари, 2017 - 17:57 (META) 

Централниот комитет на ВМРО-ДПМНЕ на денешната седница ги прифатил вчерашните заклучоци на извршниот комитет и му дал целосна поддршка на претседателот на партијата и мандатар, Никола Груевски, за претстојните разговори за формирање на идната влада.

Со седницата, стои во соопштението на ВМРО-ДПМНЕ, раководел Груевски, а на неа се дискутирало за актуелната состојба во земјава и за резултатите од предвремените парламентарни избори на 11 декември.

– Освоените 455.000 гласови од страна на ВМРО-ДПМНЕ и Коалицијата за подобра Македонија, во услови кога опозицијата дејствуваше заедно со невладините организации под контрола на Сорос и повеќепати коруптивно купуваше гласови, покажуваат дека мнозинството граѓани сè уште ја поддржува политиката која нуди развој и просперитет. Ваквата поддршка значи обврска за почитување на волјата на народот кој ги порази деструкцијата и кризите што изминати години ги промовираа СДСМ и Сорос. Централниот комитет на партијата смета дека подобрувањето на стандардите на живеење на граѓаните мора да биде приоритет во наредниот период, а за да се оствари таа цел неопходна е политичка стабилност преку формирање влада што ќе биде целосно посветена на реформите и на проектите од програмата „Реално“ – стои во соопштението на ВМРО-ДПМНЕ.


Ако се договорат, ни Уставот не ги спречува партиите да ги поместат локалните избори


Скопје, 11 јануари, 2017 - 15:17 (META) 

Според измените во Изборниот законик од јануари 2014 година, локалните избори во Македонија, наместо во втората половина на март, се одржуваат во првата половина на мај, но и оваа календарска одредница може да претрпи измени бидејќи прашањата околу локалните избори не се целосно уредени со Уставот туку со закон, кој го носи Собранието.

„Изборите за членови на совет и за градоначалник се одржуваат секоја четврта година истовремено во сите општини, во првата половина во месец мај“, стои во член 16, став 1 од Изборниот законик.

Поради тесните резултати од изборите на 11 декември лани, кои не овозможуваат формирање на стабилно парламентарно мнозинство и го доведуваат во прашање составот на идната влада, сè поизвесно е дека годинава ќе има нови предвремени парламентарни избори.

Ако тоа биде случај, тогаш можни се три сценарија:

  • Парламентатните избори да бидат заедно со локалните, кои, според членот 16, став 1 од Изборниот законик, треба да се одржат во мај;
  • Одржување на предвремени парламентарни избори рано напролет или по локалните, летоска или наесен;
  • Одржување и на локалните и на предвремените парламентарни избори заедно, на датум кој ќе го договорат партиите, а кој не мора да биде во првата половина на мај.

За спроведување на кое било од овие сценарија, изборите треба да ги распише претседателот на Собранието, кој и две недели по конституирањето на новиот пратенички состав, не е избран.

Ако партиите се договорат за последното сценарио, Уставот не ги спречува да ги направат неопходните измени во Изборниот законик и да направат поместување на локалните избори.

„Локалната самоуправа се уредува со закон кој се донесува со двотретинско мнозинство гласови од вкупниот број пратеници, при што мора да има мнозинство гласови од вкупниот број пратеници кои припаѓаат на заедниците кои не се мнозинство во Република Македонија. Законите за локално финансирање, локални избори, општинските граници и за градот Скопје, се донесуваат со мнозинство гласови од присутните пратеници, при што мора да има мнозинство гласови од присутните пратеници кои припаѓаат на заедниците кои не се мнозинство во Република Македонија“, се вели во амандманот 16 од Уставот.

Не е исклучена и можноста ваквите измени да бидат донесени и да важат само за конкретниот случај и да се однесуваат само на овие избори.

Ваков преседан беше направен пред локалните избори во 2013 година, кога на неколку недели пред изборите беа направени измени во Изборниот законик заради продолжување на роковите за регистрација на кандидати.

Имено, по насилното исфрлање на членови на опозицијата и на медиумите од Собранието во текот на расправата за буџетот на 24 декември 2012 година, СДСМ почна со бојкот на парламентот, а на 2 јануари 2013 година партијата објави дека ќе ги бојкотира и локалните избори ако не им бидат исполнети неколку барања.

Изборите беа распишани на 11 јануари, бојкотот на СДСМ на локалните избори заврши на 1 март кога Европската Унија посредуваше за постигнување договор меѓу лидерите на ВМРО-ДПМНЕ и на СДСМ, Никола Груевски и Бранко Црвенковски, а следниот ден Собранието на итна седница го продолжи рокот за регистрација на кандидати за учество на изборите до 8 март за да им овозможи на опозициските кандидати да се регистрираат.

Универзитетскиот професор Јове Кекеновски за „Мета“ вели дека нема потреба од поместување на локалните избори и дека заедно со нив во мај треба да се одржат и нови предвремени парламентарни избори затоа што тоа го налага актуелната ситуација.

„Во една ваква ситуација логично е локалните избори и новите предвремени избори за пратеници да се одржат заедно и на еден трошок. Локалните избори не би требало да се одложуваат. Проблеми околу спроведувањето на двата избори не би требало да има, освен можеби што покомплоцирано ќе биде печатењето на гласачките ливчиња. Доколку и локалните и предвреените парламентарни избори се одржат заедно, тоа ќе придонесе за поголема излезност на гласачите, а крајниот исход ќе го зголеми легитимитетот на победникот“, смета Кекеновски.