Амбасадата на САД до вработените: Избегнувајте ги местата каде може да има протести за референдумот


Скопје, 27 септември, 2018 - 11:16 (META) 

Амбасадата на САД во Македонија ги предупредува своите вработени да го избегнуваат делот околу Собрание и градскиот плоштад за време на референдумот.

Од таму како критични датуми и точки ги посочуваат Собранието на 27 септември (денеска) од 19 часот како и Собранието и централниот градски плоштад на 30 септември на денот на референдумот од 19 часот.

„Различни групи имаат намера да протестираат против претстојниот национален референдум за договорот од Преспа за името меѓу Македонија и Грција, кој ќе се одржи во недела, на 30 септември. Спонтани, ненајавени демонстрации може да се случат и во Скопје и во други делови од земјата во текот на овој период. Му советуваме на персоналот на американската влада да се избегнат секакви места каде може да има демонстрации“, стои во соопштението од амбасадата на САД во Македонија.

Од амбасадата препорачуваат вработените да ги избегнуваат деловите каде што се одржуваат протести, да се информираат од локалните медиуми за новости, да избегнуваат гужви и демонстрации, да не се истакнуваат, да ги известуваат пријателите и семејствата за нивната безбедност и да бидат внимателни на нивните опкружувања.


Протест пред Собранието: Ве сакаме сограѓани од малцинствата, но мора да се знае домаќинот


Скопје, 27 јануари, 2018 - 15:36 (META) 

Граѓански здруженија и движења денеска одржаа протест пред Собранието против, како што истакнаа, „антиуставниот и дискриминаторски закон за двојазичност“ и против „антимакедонските политики што ги спроведува власта“.

„Ние ве сакаме наши сограѓани од малцинставата, но треба да знаеме кој е домаќинот“, беше истакнато на протестот, на кој присутните носеа знамиња со сонцето од Вергина и се пуштаа македонски народни песни.

Ана Бубинкова – Мијаковска, претседателка на здружението на граѓани „Преродба“, изјави дека денешниот собир е „предупредувачки протест против забрзаното реализирање на антимакедонски политики во соработка со други големи центри на моќ“, каде македонскиот народ е ставен на страна.

– Од денешниот протест сакаме да испратиме порака дека македонскиот народ никогаш нема да се помири со оваа состојба и во тек е потпишување на петиција со која бараме, пред се, да престанат сите овие преговарања на штета на македонскиот народ и македонската држава и сите досегашни такви нелегитимни одлуки, закони, акти, договори и се што се носи од актуелната нелегитимна власт, не ги признаваме и ги прогласуваме за невалидни – рече Бобинкова – Мијаковска.

Таа најави дека протестите ќе продолжат и во следниот период и на нив, како што рече, ќе биде даден збор на самиот народ, за да си ги искаже своите ставови и мислења во однос на актуеланите случувања.

Како што порача Бобинкова – Мијаковска, сите здруженија на граѓани ќе стапат во коалиционо единство со народот, во „чии раце е судбината“ и дека тој ќе ја извојува својата „праведна битка за зачувување на вековниот идентитет, историја, култура, име и држава“.


Меркел го осуди порастот на антисемитизмот во Германија


Берлин, 27 јануари, 2018 - 14:26 (META) 

Германската канцеларка, Ангела Меркле денеска, по повод одбележувањето на Маѓународниот ден на сеќавање на жртвите на Холокаустот, го осуди „оживувањето“ на антисемитизмот во Германија и ја оцени како срамна неопходноста еврејските објекти и понатаму да ги штити полицијата.

– Повеќе од кога и да било е потребно да се сеќаваме на милионите жртви на Холокаустот, бидејќи антисемитизмот, расизмот и омразата кон другите се поактуелни денесе отколку што тоа беше случај во минатото…Срамно е ниту еден еврејски објект да не може да постои без полициска заштита, без обзир дали станува збор за училиште, детски парк или синагога – рече Меркел, јавуваат светските агенции.

Германската канцеларка повторно ја истакна нејзината заложба за формирање на функцијата полициски комесар против антисемитизам во наредбата влада.

Германските власти се загрижени поради порастот на антисемитизмот во круговите на екстремната десница, но и кај дел од муслиманските мигранти кои шират омраза кон Евреите.


Иранските власти се заканија со „железна тупаница“ доколку протестите продолжат


Техеран, 31 декември, 2017 - 12:29 (META) 

Револуционерната гарда на Иран ги предупреди демонстрантите, кои изминатите три дена протестираат поради лошиот животен стандард во земјата, дека ќе се соочат со „железна тупаница“ доколку немирите продолжат, пренесува „Би-би-си“.

Командирот на Револуционерната гарда изјавил дека протестите се претвориле во политички собори, а демонстрантите палат и уништуваат јавен имот.

Според наводите што ги пренесува „Би-би-си“, на протестите во градовите Хорамабад, Занјен и Ахваз имало повици за рушење или смрт на иранскиот врховен лидер Ајатолахот Али Хамнеи.

– Ако луѓето излегле на улиците поради високите цени, тогаш не би требало да извикуваат такви пароли и да палат јавен имот и автомобили – изјавил генералот Есмаил Ковсари за новинската агенција ИСНА.

Инаку, моќната Револуционерната гарда е поврзана со врховниот лидер на Иран и нејзината задача е да го чува и заштитува исламскиот систем во земјата.

Предупредување до демонстрантите дека ќе сносат одговорност упати и министерот за внатрешни работи на Иран, Абдолреза Рахмани Фазли, кој порача дека „оние кои што го уништуваат јавниот имот, го нарушуваат редот и ги кршат законите ќе мора да одговараат за своите постапки и да ја платат цената за тоа“

Протестите поради лошиот животен стандард почнаа во четвртокот, оваа недела, во градот Машад, на североистокот на Иран, а потоа се проширија и во другите градови.

Бранот протести вчера стигна и во главниот град на земјата, Техеран, каде студенти и други учесници извикувале антивладини пораки, неколку часа по собирот организиран за поддршка на властите.

Светските медиумите пренесуваат дека на вчерашните протести најмалку две лица загинале во судирите меѓу полицијата и демонстратните во градот Доруд во западен Иран, каде протестите биле проследени со силно насилство.

Некои од демонстрантите се снимени со повреди од огнено оружје, додека други на снимките се гледаат како палат полициски возила. Има извештаи и за напади на владини згради, пренесуваат медиумите. Информациите за протестите во Иран претежно се пренесуваат преку социјалните мрежи и за дел од нив нема официјална потврда.

Ова се најголемите протести во Иран од прореформските демонстрации кои беа одржани во 2009 година.


ФРОДЕМ: Опозицијата се сведе само на негирање


Скопје, 16 јули, 2017 - 15:32 (META) 

Фронт за демократска Македонија (ФРОДЕМ) ги повика добронамерните членови на ВМРО-ДПМНЕ „во наредниот период да се воздржат од вплеткување во манипулативни игри на Груевски и на врхушката за спасување на сопствената криминална кожа“.

„Опсесивниот, секојдневен притисок за вклучување на партиски лица во јавните реакции не е ништо друго туку „димна завеса“ која треба да создаде привид на божемна опозициона активност. А која е, всушност, опозиционата активност: негирање, негирање и негирање. Тоа не е став на опозиција, туку став на очајници кои не сакаат ништо друго освен трескавично, папагалско промовирање на зададени пропагандни пароли. Но, таа импотентност не нè загрижува. Нас реално нè загрижува фактот што зад параванот на партиските соопштенија, на божемната партиска активност, се врши активно попречување на правдата, односно безобѕирно криминално бранење на огромниот организиран криминал кој досега е направен“, се вели во соопштението од ФРОДЕМ.

Од партијата порачуваат дека власта мора да „го демонтира режимот“ или да им овозможи на вонпартиските професионалци да ги вратат нормалноста и редот во државата.


САД со предупредување до своите државјани што патуваат во Европа, поради тероризам


Вашингтон, 2 мај, 2017 - 11:13 (META) 

Стејт департментот на САД издаде предупредување до американските државјани што имаат намера да патуваат во Европа, укажувајќи на континуираната закана од терористички напади.

„Додека локалните влади ги продолжуваат операциите за сузбивање на тероризмот, Стејт департемнтот сепак останува загрижен од можноста за идни терористички напади. Државјаните на САД секогаш треба да имаат на ум дека симпатизери на терористите или саморадикализирани екстремисти можат да изведат напади со мало или без никакво предупредување“, се наведува во соопштението на одделот за конзуларни работи на Стејт департментот на САД.

Во предупредувањето се потсетува на неодамнешните напади во Франција, Русија, Шведска и во Велика Британија, со напомена дека екстремистите се фокусираат на главните туристички локации.


Омбудсманот бара веднаш да престане злоупотребата на деца во протестите


Скопје, 3 март, 2017 - 14:00 (META) 

Народниот правобранител денеска повика веднаш да престане злоупотребата на деца во протестите кои се организираат деновиве. За овие случувања, како што соопштуваат од канцеларијата на Омбудсманот, тие добиле и претставки од родители.

„Народниот правобранител ги предупредува сите инволвирани страни дека секоја злоупотреба на децата подлежи на санкции и укажува дека ќе ги истражи поплаките. Доколку навистина се докаже дека одредени лица, вработени во образовни институции, биле поттикнувачи, за истите ќе бара најстроги казни, затоа што станува збор за деца кои според сите меѓународни и домашни регулативи уживаат посебна заштита“, стои во соопштението на Народниот правобранител.

Од институцијата апелираат до наставниците и до родителите по никоја цена да не дозволуваат инволвирање на учениците во какви било собири и протести и ги повикуваат надлежните институции веднаш да реагираат и да ги спречат ваквите појави.


Силен земјотрес регистриран кај Папуа Нова Гвинеја


Порт Морсби, 22 јануари, 2017 - 13:41 (META) 

Земјотрес со јачина од 7,9 степени според Рихтеровата скала, денеска ја погодил Папуа Нова Гвинеја, соопшти американскиот геолошки институт, јавуваат светските агенции.

Потресот се случил на 40 километри западно градот Пангуна, на островот Бугенвил, во Папуа Нова Гвинеја, на длабочина од 153 километри, соопштил американскиот институт. Оттаму проценуваат дека е можно земјотресот да предизвикал умерена штета на осторовот Бугенвил.

Центарот за тревога од цунами на Пацификот првично издал предупредување дека се можни опасни бранови во некои од крајбрежните делови на Папуа Нова Гвинеја и на соседните Соломонски Острови, но подоцна предупредувањето било повлечено.

Земјотрес со иста јачина ја погоди Папуа Нова Гвинеја кон средината на декември минатата година, но не беше предизвикана никаква штета.

Архипелагот Папуа Нова Гвинеја се наоѓа во јузопадниот дел на Тихиот Океан, и во т.н. пацифички Огнен прстен, територија подложна на силна сеизмичка активност.


Подгответе се за поларна температура и за снег, предупредува Координативното тело за кризи


Скопје, 3 јануари, 2017 - 14:52 (META) 

Граѓаните да бидат подготвени за период на речиси поларни временски услови со снег, замрзнат дожд и со температура која се очекува да се спушти и до минус 22 Целзиусови степени, како и внимателно да ги планираат патувањата и да не тргнуваат на пат без соодветна зимска опрема, предупредуваат од Координативното тело за справување со кризи.

Според директорот на Управата за хидрометеоролошки работи (УХМР), Оливер Ромевски, драстичната промена на временските услови е поради поларен бран од Сибир, кој ќе го зафати целиот Балкански Полуостров.

– Веќе в четврток, со врнежи од снег ќе биде зафатена целата територија на Македонија. На повисоките места тој снег ќе биде и до 50 сантиметри, а на пониските до 25 сантиметри. Ќе дува студен ветер и температурата нагло ќе се спушти под нулата. В петок, сабота и в недела нè очекува дури и дневна температура од минус 10 Целзиусови степени, а ноќната ќе достигне и до минус 22 степени – изјави Ромевски, по денешната седница на Координативното тело за справување со кризи.

Директорот на Јавното претпријатие „Македонија пат“, Гајур Кадриу, вели дека нивни екипи, со специјална опрема, се распоредени на 37 пунктови на целата територија на земјата и ќе дежурираат 24 часа, но посочува дека и покрај преземените мерки во вонредни услови, како што предвидуваат метеоролозите, сообраќајот не може да се одвива како по суви коловози.

– Апелираме сите учесници во сообраќајот да бидат опремени со зимска дополнителна опрема, а особено тешките товарни возила кои без зимска опрема и неподготвени не би требало да тргнуваат на пат бидејќи тие се голема пречка при вакви временски неповолности. Сите учесници во сообраќајот треба да внимаваат и да ги почитуваат собраќајни знаци и правила – изјави Кадриу.


Кина жестоко се противи на американскиот антиракетен штит во Јужна Кореја


Хангџу, 5 септември, 2016 - 11:54 (META) 

Кинескиот претседател Си Џинпинг на својата колешка, претседателката на Јужна Кореја, Парк Геун Хје, ѝ соопштил дека Кина е против распоредувањето на американски противракетен штит во нејзината земја, јавуваат светските агенции.

Си Џинпинг, за време на билатералниот состанок, на маргините на Самитот на Г20, кој се одржува во Хангџоу, Кина, ја предупредил дека неадекватното третирање на ова прашање не е добро за мирот во регионот и може да го интензивира спорот меѓу двете земји.

Кина претходно остро реагираше на одлуката на Сеул за распоредување на антиракетниот систем ТХААД, во воена база на југот на Јужна Кореја.

Вашингтон и Сеул тврдат дека поставувањето на ракетниот штит е за заштита од заканите на Северна Кореја, додека Пекинг предупредува дека штитот ќе ѝ овозможи на војската на САД увид длабоко на североистокот на Кина.

Инаку, Северна Кореја денеска истрелала три балистички ракети во водите на својот североисточен брег, соопштија јужнокорејски официјални претставници, јавува „Би-би-си“.

Проектилите биле истрелани од регионот Хвангџу, соопштила денеска здружената команда на јужнокорејската армија, пренесува агенцијата „Јонхап“.

Засега нема информации за типот на ракетите и за нивниот дострел.