Обвинителството истражува 42 случаи на изборни нерегуларности


Скопје, 2 декември, 2016 - 13:35 (META) 

Комисијата за следење на изборни нерегуларности на Јавното обвинителство досега отворила 42 истраги за кривични дела извршени за време на изборниот процес. Како што информираа денеска од Јавното обвинителство, 20 предмети биле оформени по службена должност, односно по допрен глас по информациите објавени во медиумите, порталите и на социјалните мрежи, три кривични пријави се поднесени од физички лица, а 19 случаи биле отворени по пријави од здруженија на граѓани, политички партии и од институции.

„Голем дел од пријавите поднесени од здруженија на граѓани или политички партии, пристигнаа по оформување на предмети по допрен глас за истите настани. Стигнатите кривични пријави беа придружени кон основниот предмет оформен по допрен глас и препратени кај надлежните обвинителства на понатамошно постапување“, велат од Јавното обвинителство.

Сите 42 отворени случаи веднаш биле препратени на „итно постапување“ до надлежните основни јавни обвинителства, кои, како што се наведува во соопштението, преземаат итни мерки за расветлување на настаните и за утврдување на фактите за откривање на евентуална кривична одговорност.

„Се испитуваат подносители на пријавите, сведоци, лица кои можат да помогнат во откривање на настаните, издадени се бројни наредби до Министерството за внатрешни работи за прибирање на потребни факти и податоци во предметите, како и до други институции за прибирање на потребни информации. Постапувањето на основните јавни обвинителства ќе продолжи сè до утврдување на фактичката состојба и до донесување на јавно-обвинителска одлука. Јавното обвинителство на Република Македонија дополнително ќе ја извести јавноста за нив“, стои во соопштението од Јавното обвинителство.

Јавното обвинителство во март годинава формираше комисија за следење на изборни нерегуларности, чија цел е да го заштити изборниот процес од криминални и од други противзаконити активности.

„Јавното обвинителство на Република Македонија ја повикува јавноста, граѓанските организации, други организации, политички партии, домашни и меѓународни институции, сите кои сметаат дека во некоја постапка има индиции за сторено кривично дело поврзано со изборниот процес, да достават поднесок, односно пријава до Комисијата за следење на изборни нерегуларности на електронската адреса izbori@jorm.gov.mk и до сите надлежни основни јавни обвинителства“, апелираат од обвинителството.


ОЈО Скопје ѝ пиша на Јанева: Лажете и работите непрофесионално и неодговорно


Скопје, 25 октомври, 2016 - 13:28 (META) 

Обвинителите од Основното јавно обвинителство Скопје денеска ѝ испратија отворено писмо на специјалната јавна обвинителка, Катица Јанева, со кое, како што велат, сакаат да го изразат своето незадоволство од нејзината работа и од „срамната непрофесионалност“ со која обвинителката ѝнаштетила на јавно-обвинителската професија.

Тие во писмото велат дека Јанева, во последното појавување во јавноста, лажела во врска со начинот на кој биле заведувани предметите од прислушуваните разговори во ОЈО Скопје и дека не било преземено ништо во врска со нив.

„Заведувањето на предметите во деловодните книги во јавното обвинителство со децении е непроменето. Секој деловоден број укажува на начинот на влезот на предметот во обвинителството (настан, од непознат сторител, малолетник и слично). Но, кон сите предмети се постапува во согласност со законот. Предметите се работат и им се дава друг деловоден број, во согласност со првичните сознанија и индиции до кои е дојдено и во согласност со насочувањето за понатамошно постапување. И Вие имате предмети кои се заведени под РО број. Посочивте дека во предметите ништо не било сработено. Тоа е лага. Јавното обвинителство, во согласност со законот, Ви предаде 35 оформени предмети кои беа работени од страна на 23 различни јавни обвинители. Дел од нив беа јавните обвинители што сега работат кај Вас. Во секој од предметите беа преземени дејства, издадени наредби, сослушани сведоци, оштетени, осомничени, прибавени податоци и документација. Дел од предметите дури беа и пред правна одлука. И ние ги работевме и сето тоа го презедовме, иако кај нас не беа доставени снимките кои Вие, еве, веќе една година, ги имате, а сработивте само неколку“, стои во отвореното писмо од ОЈО Скопје до Јанева.

Во писмото обвинителите од ОЈО Скопје ја обвинуваат Јанева дека не ги почитува правните стандарди и не го почитува јавно-обвинителскиот кодекс.

„Ве прашуваме, кој правен стандард е незаконското лишување од слобода на лице, за кое Вие јавно признавте дека било незаконско, на само час и половина? Малку незаконско дејствување, час и половина (во врска со апсењето на Едмонд Темелко, осомничен во „Титаник“, н.з.). Кажете ни, кој временски период на незаконско дејствување не се смета за незаконски? Ве прашуваме, според кои стандарди и закони, Вие давате наредба на Ваш истражител да следи и да снима лице осомничено во Ваш предмет? Дали имавте за тоа судска наредба за посебна истражна мерка? Дали Вие и Вашите „повисоки стандарди“, всушност, во правниот промет вметнуваат и правна несигурност. Би сакале да знаеме, бидејќи за нас е незамисливо да се следи и да се снима објект (сопственост на поранешниот директор на Управата за безбедност и контраразузнавање Сашо Мијалков, н.з.) или лице кое е осомничено од страна на кој било без постоење на изричита судска наредба.
Уште повеќе, дали со усна наредба од Ваша страна беше испратен и приватниот детектив, кој, исто така, вршеше следење и снимање на осомничено лице во Ваш предмет? Цените ли дека сè што од Ваша страна е направено од крајно непознавање на законите и на постапката, треба од денес да биде „повисок стандард“ по кој сите ние ќе работиме, па ќе можеме директно да испраќаме истражители за следење, снимање, заедно со приватни детективи, кај ќе стигнеме. Жално е што Вие сакате да го намалите угледот на работењето на јавното обвинителство за Вие да се истакнете како професионалец“, стои во писмото.

На крајот од писмото, обвинителите велат дека нивна и обврска на Јанева е да гонат криминал според законите и правните професионални стандарди.

„За тоа имавте можност, кога требаше, а не направивте записник од предавање на снимките. Кога требаше, а не поднесовте отчет за финансиското работење на институцијата со која раководите. Кога не смеевте, но сепак дозволивте непотизам. Кога имавте обврска, но ја заборавивте, па нарушивте права на презумија на невиност на прес-конференциите. Почитувана г-ѓа Јанева, на крајот Ве потсетуваме. Ваша обврска, како и наша обврска е да гониме криминал. Да го познаваме правото, оти во раце ни се човечки судбини. Да работиме според законите и правните професионални стандарди. А не да создаваме клима на непочитување на законите и на институциите, да водиме јавни обвинителски политички кампањи, јавно да осудуваме лица и да пресудуваме без судски процес. Ние сите сме дел од правосудниот систем, кој, меѓу другото, не спие. Само не чувствува потреба јавно да се експонира. Да ве потсетиме! Honeste vivere, alterum non laedere, suum quique tribuere !!! (Чесно живеј, не повредувај други, секому дај му што му припаѓа)“, нагласуваат обвинителите на Основното јавно обвинителство Скопје во отвореното писмо до специјалната јавна обвинителка.


Се зголеми количеството на монетарно злато во државните девизни резерви


Скопје, 21 октомври, 2016 - 14:45 (META) 

Народната банка го зголеми количеството на монетарно злато во девизните резерви на Македонија преку постапка на претопување на пригодни ковани пари и на одземени златни предмети во монетарно злато.

На тој начин, Народна банка стекна нови шест прачки монетарно злато со пазарна вредност од околу 2,6 милиони евра, кое во целост ги задоволува стандардите за квалитет утврдени на пазарот на благородни метали во Лондон.

– Оваа постапка се реализира во согласност со одлуката на Владата за претворање на пригодните ковани пари во монетарно злато и во согласност со измените и со дополнувањата на Законот за управување со конфискуван имот, имотна корист и одземени предмети во кривична и во прекршочна постапка, според кои на Народната банка ѝ беа отстапени дефинитивно одземени златни предмети од Агенцијата за управување со одземен имот – се вели во соопштението на Народна банка.

Пригодните ковани пари и одземените златни предмети беа испратени на постапка на претопување во швајцарска топилница, по што функционално се претворија во монетарно злато и се вклучија во девизните резерви на државата.

На тој начин, се зголеми количеството на монетарно злато во девизните резерви на Македонија за 2.288 унци, односно од 218.875 унци се искачи на 221.163 унци злато.


Штип: Гореше покрив на магацин на „Македонски железници“


Штип, 18 октомври, 2016 - 12:49 (META) 

Покрив на стар магацин на „Македонски железници“, полн со стари предмети, синоќа изгоре во Штип.

Пожарот е ставен под контрола, а претпладнево пожарникари го контролираа и ги дозгаснуваа деловите што сè уште чадат.

Според командиот на Противпожарната единица од Штип, Благој Ренџов, материјалната штета ќе ја утврдуваат надлежните органи. На увид излезе и екипа вештаци од СВР Штип.


Утре почнува августовскиот испитен рок за државна матура


Скопје, 14 август, 2016 - 10:33 (META) 

Матурантите кои во јунската сесија не ја положиле државната матура ќе полагаат од утре до 18 август. Како што соопшти Државниот испитен центар, во августовскиот испитен рок се пријавиле 1.802 ученици.

Утре ќе се полага задолжителниот предмет мајчин јазик (македонски, албански или турски) и литература. Македонски јазик и литература ќе полагаат 128 кандидати, албански јазик и литература 266, а 21 ученик е пријавен за турски јазик и литература.

Во вторник, 16 август, ќе се полага предметот математика за кој се пријавени 88 кандидати, а на 17 август ќе се полага странски јазик. Англиски јазик ќе полагаат 1.294 кандидати, француски јазик и германски јазик по четворица кандидати и еден кандидат за руски јазик.

На 18 август е закажано полагањето по предметите: физика, хемија, биологија, бизнис, историја, филозофија и естетика.

ДИЦ соопшти дека бизнис ќе полагаат 199 кандидати, историја 218, биологија 82, филозофија 143, хемија 4, физика 7 и естетика 14.

Испитите по сите предмети ќе почнуваат во 10 часот и ќе се реализираат на 11 локации во Република Македонија. Испитниот материјал истиот ден кога се реализира испитот ќе биде однесен во училиштата и ќе биде вратен во ДИЦ.


ДУИ ќе поддржи формирање на специјално судско одделение за случаите на СЈО


Скопје, 27 јуни, 2016 - 11:10 (META) 

Иницијативата за формирање специјално судско одделение за предметите што ги работи Специјалното јавно обвинителство доби поддршка од Демократската унија за интеграција (ДУИ). Портпаролот на ДУИ, Бујар Османи, во изјава за „Алсат М“ рече дека неговата партија во основа нема ништо против такво решение.

„Ова е сериозна тема, која не може да биде прашање на медиумски разговори. Ако има таква волја, тоа треба да помине институционално, првин преку разговори на релевантните партии потписнички на Договорот од Пржино. Ако во тие преговори се отвори таа иницијатива, ДУИ принципиелно е за формирање канцеларија или посебен оддел што ќе се занимава со случаите на СЈО“, вели Османи.

Идејата за специјално одделение во Кривичниот суд првично ја промовираа повеќе припадници на академската заедница. Кога судот почна едно по едно да ги одбива барањата за притвор на Катица Јанева, идејата доби и поширока поддршка во јавноста и стана и едно од барањата на „Шарената револуција“.


Екстерно тестирање: Многу стрес, дискутабилна објективност


Скопје, 9 јуни, 2016 - 11:02 (META) 

Утре (10 јуни) завршува екстерното тестирање за учебната 2015-2016 година, кое почна на 7 јуни.

Државниот испитен центар соопшти дека во оваа сесија ќе бидат опфатени 178.648 ученици од основните и од средните училишта, кои ќе бидат тестирани по 1.972 предмети.

Учениците се тестираат по два предмета, а за кои предмети ќе бидат тестирани дознаваат три дена пред полагањето.

Поради уписите во средните училишта (28 и 29 јуни), резултатите од екстерното тестирање најпрво ќе бидат објавени за деветтоодделенците (на 13 јуни), а за сите други ученици резултатите ќе бидат познати на 17 јуни.

Од Министерството за образование и наука тврдат дека екстерното тестирање во сите училишта се одвива во најдобар ред.

Овој проект веќе петта година предизвикува контроверзии во јавноста. Наместо алатка за проверка на објективноста на оценувањето на наставниците, екстерното тестирање за само пет години прерасна во стрес за учениците и за родителите. Ова не би била Македонија, ако во целава игра не се најдат решенија да се изигра понудената реформа. Така, училишните совети на наставниците се закажуваат по 17 јуни, датум кога треба да бидат познати и резултатите и оценките од екстерното тестирање. Потоа многу лесно крајните оценки се заведуваат во дневник, со што и наставниците ја избегнуваат казната. На крајот, оштетени можат да останат само учениците.

Родителите се вознемирени и речиси никој не го поддржува тестирањето.

– Целосно непотребна работа. Учениците низ цела година имаат по десетици тестови за проверка на знаењето. Ова само дополнителни ги растревожува. Порано насмеани ја завршувавме учебната година, а сега со плачење и со нервози – вели родител на ученик во училиштето „11 Октомври“ од Скопје.

Несогласување има и од наставниците, иако тоа го искажуваат полутајно и без поголема помпа, поради страв од реперкусии.

– Ќе објаснам просто: некој ученик цела година не знае ништо, не се потрудил да учи и добива слаби оценки. За екстерно тестирање ќе ги научи напамет дадените прашања, ќе добие петка и нас ќе нè казнат. Каде е овде објективноста? – вели наставник од скопското основно училиште „Блаже Конески“.

Екстерното тестирање беше воведено во учебната 2012-2013 година за да се провери објективноста на наставниците при вреднувањето на успехот на учениците.


Од денеска почнува екстерното тестирање


Скопје, 7 јуни, 2016 - 10:24 (META) 

Од денеска до 11 јуни ќе се спроведе екстерно тестирање за учебната 2015/2016 година во јунската сесија.

Државниот испитен центар соопшти дека во оваа сесија ќе бидат опфатени 178.648 ученици од основните и од средните училишта, кои ќе бидат тестирани по 1.972 предмети.

ДИЦ претходно ја објави базата прашања по сите предмети. Учениците се тестираат по два предмета, а за кои предмети ќе бидат тестирани дознаваат три дена пред полагањето. Така, на учениците што ќе бидат тестирани денеска, предметот за кој ќе бидат тестирани им беше соопштен во петокот попладне.

Поради уписите во средните училишта (28 и 29 јуни), резултатите од екстерното тестирање најпрво ќе бидат објавени за деветтоодделенците (на 13 јуни), а за сите други ученици резултатите ќе бидат познати на 17 јуни.

Екстерното тестирање беше воведено во учебната 2012/2013 година за да се провери објективноста на наставниците при вреднувањето на успехот на учениците.


Совет на обвинители: Јанева не може да биде надлежна за „Маѓар телеком“


Скопје, 15 април, 2016 - 15:16 (META) 

Советот на јавни обвинители ги доставил до Основниот суд Скопје одлуките по барањето на специјалната обвинителка, Катица Јанева, за преземање на предметите „Маѓар телеком“, „Верушевски“, „Шпион“, „Поткуп“ и „Надеж“ во своја надлежност, соопшти денеска Кривичниот суд. Како што информираат оттаму, Советот одлучил дека за предметите не може да ги преземе СЈО и дека за нив се надлежни Основното јавно обвинителство Скопје, односно Основното јавно обвинителство за гонење организиран криминал и корупција.

– Во првата одлука на Советот на јавни обвинители (СЈОРМ) е наведено дека Основното јавно обвинителство – Скопје е надлежно да постапува по предметите заведени под КО.бр.45/15, кој се води против обвинетиот З.В.(Зоран Верушевски н.з); КО.бр.55/15 против обвинетиот Г.В. (Горан Верушевски, син на Зоран Верушевски н.з.) и КО.бр.445/10 поврзан со „Маџар телеком“. Во втората одлука на СЈОРМ е наведено дека Основното јавно обвинителство за организиран криминал и корупција е надлежно да постапува за предметите: КО.бр.66/15, поврзан со предметот во јавноста познат како „Поткуп“, КО.бр.91/13 односно предметот познат како „Шпион“ и два постапки кои сè уште не се водат пред овој суд и тоа: РО.бр.193/15 – за предметот во јавноста познат како „Надеж“ и РО.бр.93/10 – поврзан со „Маџар телеком“ – стои во соопштението од судот.

Во образложнието на Советот за одлуката, било наведено дека за преземање на овие предмети не било доволно Јанева само „декларативно да се произнесе дека е надлежна“, туку дека треба недвосмислено да докаже дека овие случаи се поврзани со незаконско следење на комуникациите.

„Во одлуката стои дека јавниот обвинител за да ги преземе предметите треба да наведе на што ја темели својата надлежност во сите предмети што се побарани, односно да наведе од кои разговори тоа произлегува, кога се водени тие разговори, помеѓу кои лица и да даде опис на содржината на разговорот. Советот на јавни обвинители наведува и дека доколку тоа не е така, во спротивно би можело да настапи хаотична состојба, каде што повеќе обвинителства би претендирале дека се надлежни за постапување по ист предмет, а тоа може да доведе до несогледливи штетни последици и по самата институција, а исто така и во постапката за гонење на сторителите на кривичните дела. Вака донесените одлуки ќе бидат припоени кон соодветните кривични предмети на овој суд за понатамошно надлежно постапување на судиите во судот, при што надлежниот судија ќе ја има предвид надлежноста на конкретното обвинителство“, велат од Кривичниот суд.


Аневски не и ги даде предметите што ги бара Јанева


Скопје, 30 март, 2016 - 15:48 (META) 

Советот на јавни обвинители на денешната седница одлучи предметите за „Маѓар телеком“, за пиштолот на Зоран Верушевски и за детска порнографија против синот на Верушевски да се вратат во надлежност на матичните јавни обвинителства Основното јавно обвинителство Скопје и Обвинителството за гонење на организиран криминал и корупција.

Претседателот на Советот на јавни обвинители, Петар Аневски, рече дека на Јанева ѝ било предочено дека таа како јавен обвинител треба да одговара пред Советот за своето законско постапување, но Јанева била категорична дека веќе нема да доаѓа во Советот и побарала да не биде повикувана.

„Таа го омаловажува и го понижува Советот на јавни обвинители и мислам дека во иднина не знам дали и понатаму вреди таа да биде повикувана во Советот. Со седум гласа „за“, донесени се одлуки дека за законито постапување и понатаму ќе бидат надлежни Основното јавно  обвинителство Скопје и Обвинителството за гонење на организиран криминал и корупција. Значи, сите предмети кои се кај нас ќе бидат вратени на постапување на овие јавни обвинителства“, рече Аневски.

По најавите на Специјалното јавно обвинителство дека ќе започнат сопствени истраги за спорните предмети доколку не им бидат предадени, Аневски вели дека никој не го спречува СЈО да формира предмети, да продолжи постапки кои се наоѓаат во Советот, да бара отфрлени кривични пријави и запрени истраги и да ги активира.

„Останува фактот дека таа очигледно не е надлежна да постапува по овие предмети кои ги бара и со тоа ги пречекорува законските овластувања кои ги има“, рече Аневски.