!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Владата го усвои дополнетиот предлог-буџет за 2018 година


Скопје, 12 декември, 2017 - 20:13 (META) 

На денешната седница Владата го усвои дополнетиот предлог на Буџетот за 2018 година со прифатените амандмани од комисиската расправа во Собранието на Република Македонија, соопштија од владината прес-служба.

Министерот за финансии, Драган Тевдовски, ја информирал Владата дека во дополнетиот предлог-буџет за 2018 се зголемуваат на финансиски средства за гасификација во висина од 120 милиони денари, блок дотации за градинки, основни и средни училишта, културни установи на регионално ниво со зголемување од 200 милиони денари, во Фондот за здравство од 100 милиони денари и во Инспекторатот за животна средина од 10 милиони денари.

Буџетот за 2018 година веднаш по усвојувањето е проследен до Собранието на усвојување.

Владата на седницата усвоила информација со која се изедначуваат условите за инвестирање на домашните и странските инвеститори. Условите подеднакво ќе важат за сите инвеститори во ТИРЗ-зоните и надвор од нив.

Во согласност со начелото на владата за транспарентно и отчетно трошење на државните средства на денешната седница е донесена одлука со која се задолжуваат министрите, замениците на министри, државните секретари и генералниот секретар да достават информации за службените трошоци направени во рамките на предвидениот буџет во првите шест месеци од преземањето на функциите.

Владата исто така го задолжила Секторот за односи со јавност да изработи софтверско решение за прикажување и визуализација на службените трошоци и истото да го постави на официјалниот сајт.

На седницата е донесена одлука Бирото за јавни набавки веднаш да го надгради Електронскиот систем за јавни набавки.


Заврши амандманската расправа, буџетот за 2018 се враќа во Влада, па оди во Собрание


Скопје, 7 декември, 2017 - 16:50 (META) 

Комисијата за финансирање и буџет денеска ја заврши амандманската расправа по предлог-буџетот за 2018 година. Денеска беше третото продолжение на 12. седница која почна на 27 ноември, а комисиската расправа за предлог-буџетот неколкупати беше закажувана, но и откажувана, за да заврши на осмиот од законски предвидените 10 дена.

Од вкупно 279 амандмани, кои ги поднесоа пратениците на ВМРО-ДПМНЕ и на Беса, усвоени се само шест, од кои четири се на пратениците на ВМРО-ДПМНЕ, кои не учествуваа во комисиската расправа.

Комисијата ги прифати амандманите што се однесуваат на субвенции за печки на пелети, ТИР-зоната во Куманово, изградба на колекторски систем во Неготино, решавање на проблемот со депонијата во Струга, изградба на детски парк во Нерези, Општина Карпош.

Пратеникот на СДСМ, Хари Локвенец, на денешната расправа на комисијата, амандманите на ВМРО-ДПМНЕ ги оцени како апсурдни, бидејќи како што кажа, од 211 колку што поднеле, во 200 бараат пари за изградба на зградата на Македонска филхармонија.

По комисиската расправа за предлог-буџетот за 2018 година, тој се враќа на разгледување во Владата, која треба да се произнесе за прифатените амандмани, а потоа, за предлог-буџетот пратениците ќе дебатираат на пленарна седница.


Како „копи-пејст“, „препишани“ и „излишни“, не поминаа 95 амандмани за буџетот


Скопје, 7 декември, 2017 - 15:03 (META) 

„Не се прифаќа“. „За побараното со овој амандман веќе се предвидени пари во буџетот за 2018 година“. „Општините треба да аплицираат во соодветното министерство и ќе добијат пари од буџетот“. Така денеска гласеше постојано одговорот што го даваше Ширет Елези, заменик-министер за финансии, како претставник на Владата, на сите прашања од претседавачот на седницата на собраниската Комисија за финансирање и буџет, Васко Ковачевски, како се изјаснува Владата за одреден амандман.

До попладневната пауза беа разгледани 95 амандани за буџетот за 2018 година, а од нив, освен трите што Беса ги повлече, сите беа отфрлени со само еден глас „за“ или без гласови за поддршка. Пратениците од ВМРО-ДПМНЕ и денеска не учествуваа во работата на комисијата. За разлика од нив, на седницата беа пратениците од Беса, кои ги образлагаа своите предлози.

Пратениците Жаклина Лазаревска, Диме Велковски, Ивана Туфегџиќ, Горан Милевски прашува како е можно најголемиот дел од амандманите да бидат буквално истите, со истата побарана сума и со истото образложение, „а да се смени само „старски дом“ со „училиште“ или да се смени името на местото.

– Од една ставка ги барат сите пари од Филхармонија. И што ќе се случеше ако министерството ги прифатеше барањата? Кога ги пишувале амандманите брзале, не виделе дека во сите бараат по 20 милиони од Филхармонија. Па, помножете со бројот на амандмани и ќе видите дека така Македонска филхармонија не само што ќе остане без пари, туку ќе ѝ се создаде и долг од 7 милијарди денари. Овие амандмани немаат врска со реалноста. Седнале во еден ден, само градовите ги смениле, сè друго е исто – рече Милевски.

Независната пратеничка Ивана Туфегџиќ, пак, амандманите од ВМРО-ДПМНЕ ги оквалификува како „чист популизам“, само за да се каже дека се поднесени амандмани, а тие се или непотребни или технички неуредни.


Само пофални зборови за буџетот за 2018 година од пратениците на СДСМ


Скопје, 5 декември, 2017 - 15:04 (META) 

На првото продолжение на 12. седница на Комисијата за финансирање и буџет, која се одвива без присуство на опозицијата, пратениците на СДСМ го оценија како реформски предлог-буџетот за 2018 година. Според нив, тој ќе обезбеди поголем економски пораст и повисок животен стандард на граѓаните. Тие сметаат дека за разлика од претходните буџети, овој не е популистички.

Пратеничката на СДСМ, Кети Смилевска, рече дека не се исклучува можноста за задолжување со еврообврзница и нагласи дека важно е за што ќе се трошат парите од задолжувањето. За зголемувањето на акцизата на нафтата и на нафтените деривати рече дека иако ќе се одрази на транспортните услуги, сепак не очекува зголемување на цените.

Заменик-министерката за финансии, Ширет Елези, се осврна на зголемување на наплатата на даноците по сите основи и оттука, според неа, предлог-буџетот за 2018 година е направен според реални показатели.

– Оваа година имаме поповолни движња во наплатата на даноци, последните месеци имаме побрз и повисок поврат на данокот на додадена вредност (ДДВ). Од септември до ноември повратокот на ДДВ кон стопанството изнесува 5,9 милијарди денари, што е за 26 проценти повисок износ во однос на истиот период лани – рече Елези.

Според Благојче Трпески од СДСМ, со овој предлог-буџет се кратат непродуктивните трошоци, како ставката стоки и услуги, во рамките на која, во минатото се правеле најголем дел од злоупотребите.

– Се кратат 10 милиони евра за непродуктивни трошоци, скапи ручеци, службени патувања… – рече Трпески.

Комисиската расправа за буџетот ќе продолжи во 15.30 часот.


Комисиската расправа за предлог-буџетот за 2018 година закажана за утре


Скопје, 4 декември, 2017 - 16:41 (META) 

Првото продолжение на 12. седницата на Комисијата за финансирање и буџет, на која треба да се расправа за предлог-буџетот за 2018 година, треба да се одржи утре.

Оваа седница почна на 27 ноември и иако беа закажани неколку продолженија, не се одржа ниту едно.

Еден од членовите на Комисијата за финансирање и буџет е и пратеникот од ВМРО-ДПМНЕ, Крсто Мукоски, кој во вторникот беше уапсен заедно со уште дваесетина лица поради основано сомневање за сторено кривично дело терористичко загрозување на уставниот поредок и на безбедноста, од член 313 од Кривичниот законик.

ВМРО-ДПМНЕ и Беса имаат поднесено 270 амандмани за предлог-законот за буџетот.


Сугарески: Во предлог-буџетот има повеќе пари за инфраструктурата и за гасификацијата


Скопје, 4 декември, 2017 - 14:12 (META) 

Министерот за транспорт и врски, Горан Сугарески, рече дека предлог-буџетот за 2018 година на Министерството за транспорт и врски изнесува 92,3 милиони евра, пари кои се предвидени за капитални проекти.

При презентацијата на предлог-буџетот, Сугарески додаде дека овие пари ќе бидат наменети за инвестиции во делот на гасификацијата, железничката и за комуналната инфраструктура. За гасификација се предвидени 36 милиони евра.

– Во патната инфраструктура продолжува изградбата на автопатиштата. Планирано е во март следната година да биде пуштен автопатот Демир Капија – Смоквица, до крајот на септември да биде изграден автопатот Миладиновци – Штип и дополнително да се направи анекс на договор за изградба на автопатот Кичево- Охрид, за што преговорите се во завршна фаза – рече Сугарески.

На крајот на следната година или на почетокот на 2019 година, треба да почне изградбата на автопатот Скопје-Блаце. Изградбата на патот Дебар – Тирана ќе биде и една од темите на најавената заедничка седница на владите на Македонија и на Албанија, покрај железничката линија Кичево – Лин, за која е завршена проектната документација.

Во текот на 2018 година ќе почне и реконструкција на 26 патишта во земјата.


Николовски: Со предлог-буџетот за 2018 година ќе го зголемиме земјоделското производство


Скопје, 2 декември, 2017 - 16:09 (META) 

Министерот за земјоделство, шумарство и водостопанство, Љупчо Николовски, денеска го презентираше предлог-буџетот за 2018 година за ова министерство, кој изнесува 165 милиони евра.

– Со предлог-буџетот за секторот земјоделство ќе обезбедиме целосна, навремена и неселективна исплата на субвенциите за земјоделството, поголемо производство на домашни квалитетни и безбедни земјоделско-прехранбени производи, ќе го вратиме доистоинството на македонскиот земјоделец затоа што само така ќе го направиме македонскиот аграр модерен, конкурентен и по европски стандарди – рече Николовски.

Најголем е предлог-буџетот за Агенцијата за финансиска поддршка во земјоделството и руралниот развој, кој изнесува 8,6 милијарди денари.

– Од оваа сума, 8,4 милијарди денари се предвидени за директна финансиска поддршка во земјоделството и за рурален развој. Со планираната директна финансиска поддршка од 6,6 милијарди денари, ќе го унапредиме и зголемиме земјоделското производство и ќе овозможиме навремена и неселективна исплата на субвенциите, тогаш кога на земјоделците им се најпотребни – додаде Николовски.


Расправата за буџетот попладнево само за проблемите на Албанците


Скопје, 27 ноември, 2017 - 17:03 (META) 

Во попладневното продолжение на општата расправа за предлог-буџетот за 2018 година се зборуваше за проблемите на подрачјата населени со Албанци, за проблемите на албанската култура и на високото образование на албански јазик. Во дискусија полна со реплики, Неџбедин Каремани од Беса и Реџаиљ Исмаили од ДУИ изнесуваа бројки и наведуваа реализирани и нереализирани проекти.

Каремани рече дека буџетот, како што е предложен од Министерството за финансии, прави дискриминација на Албанците оти не предвидува пари или дава многу малку за автопатот кон Приштина, за Државниот универзитет во Тетово, за инфраструктурата во општините населени со Албанци. Забележа и дека кога станува збор за туризмот, се планираат пари за Берово, Маврово, Дојран, Охрид, а нема пари за Попова Шапка и нови плажи во Струга.

Според Каремани, новиот буџет прави грешка и со тоа што предвидува повеќе приходи од зголемување на акцизата за нафтата, наместо да се намали прагот на фирмите според кој ќе станат обврзници на ДДВ.

Исмаили реагираше со бројки, велејќи дека станува збор за правилна распределба во рамки на можностите на државата. На забелешките дека нема пари за локални проекти, тој рече дека е така оти општините не подготвиле проекти. Ја пофали Владата дека првпат предвидува можност ако некоја општина нема готов проект, да аплицира повторно, а потоа преку министерствата ќе може да се пренаменат пари.

– Не еден, туку и повеќе ребаланси ќе се направат ако треба – рече Исмаили.


Тевдовски: Акцизата на нафтата нема сериозно да ја зголеми инфлацијата


Скопје, 2 ноември, 2017 - 12:20 (META) 

Министерот за финансии, Драган Тевдовски, рече дека не очекува сериозно зголемување на инфлацијата иако во предлог-буџетот за 2018 се предвидува зголемување на акцизата за нафта и за нафтени деривати.

– Во индекост на цените на мало, сите енргенти вкупно учествуваат со 10 проценти, а ние зголемуваме само мало делче од тие 10 проценти, односно нафтата и нафтените деривати во согласност со препораките на Европската Унија – рече Тевдовски.

Во предлог-буџетот за 2018 година се предвидува стапка на инфлација од 1,7 отсто, главно под влијание на светските цени.

Во презентацијата на предлог-буџетот за 2018 година, Тевдовски најави дека се планира зголемување на акцизата на нафтата за 3 денари, односно на 3,54 денари со ДДВ.

– Зголемувањето на акцизата за нафтата за 3 денари ќе има повеќекратни ефекти. Повисоки буџетски приходи за финансирање на нови расходи, усогласување со европските стандарди и со регулативите на ЕУ, како и заштита на животната средина, односно намалување на загадувањето. Препораката на ЕУ е акцизата за нафтата да изнесува 0,33 евроценти, а во Македонија е 0,20 евроценти. Во моментов цената на еден литар нафта во Македонија изнесува 0,8 евра, а со зголемувањето би изнесувала 0,86 евра, при што повторно малопродажната цена на дизел-горивото ќе остане најниска во регионот – рече Тевдовски.


Утре почнува дебатата за предлог-буџетот за 2018 година, со покани и на затворена сесија


Скопје, 1 ноември, 2017 - 15:40 (META) 

Министерство за финансии утре ќе организира дебата на затворена сесија за предлог-буџетот за 2018 година, на која ќе учествуваат само поканети претставници на граѓански организации, синдикати и на стопански комори.

Од Министерство за финансии, за „Мета“ велат дека ќе бидат поканети оние организации што се занимаваат со теми од областа на финансиите.

– Сакаме да бидеме поттик за другите министерства, да покажеме дека треба да организираат дебати и да бидат отворени кон предлози од организации што ја третираат нивната проблематика. Ние сме Министерство за финансии и покануваме организации кои се занимаваат со оваа проблематика – велат од министерството.