!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ВМРО-ДПМНЕ им се закани на Јеремиќ и на медиумите што ја пренеле изјавата за Мијалков


Скопје, 7 декември, 2017 - 17:07 (META) 

Објавувањето дека е отворена предистражна постапка по допрен глас за интервјуто на Вук Јеремиќ е уште еден доказ дека во Македонија нема правен систем и правда која е еднаква за сите, туку партиско-политички прогон нарачан од Заев и од неговата хунта, се вели во реакцијата на опозициската ВМРО-ДПМНЕ на денешното соопштение на Основното јавно обвинителство за гонење организиран криминал и корупција.

Од партијата велат дека очекуваат што е можно побргу Јавното обвинителство да излезе со информација за оваа предистражна постапка што „политички ја отвора“ и наводите да ги соопшти во јавноста за да може потоа соодветно да се процесуира случајот и против Вук Јеремиќ и против сите медиуми блиски до СДСМ кои, како што наведуваат од партијата, ја злоупотребуваат оваа изјава заради нарушување на честа и на угледот на партиските функционери.

Оттаму наведуваат дека премиерот Зоран Заев пред неколку месеци најави дека функционери од власта се предмет на истрага, но јавноста, велат од партијата, сè уште нема информација кој му ги соопштил тие информации на Заев, а органите на прогон кријат за кои случаи станува збор.

„Странски државјанин излезе со јавно обвинување дека в.д. директорот на Агенцијата за филм, Горјан Тозија, го рекетирал „Јадран филм“, но постапка околу овој случај не беше поведена по јавно допрен глас. По јавно допрен глас не беше поведена ниту постапка за бројните сведочења за изборното насилство и сите закани кои беа упатувани кон гласачите. Не беше поведена постапка кога насилници влегуваа со пиштоли или кога отворено се говореше дека криминалци под команда на СДС делат поткуп низ државата. Не беше јавно соопштено ниту дали се отвора предистражна постапка за криминалот на Заеви со ‘Цареви кули’ или криминалот поврзан со ‘Тритерол’“, стои во соопштението од ВМРО-ДПМНЕ.


Обвинителството отвори истрага за случајот со „Јадран филм“ и серијата „Македонија“


Скопје, 15 ноември, 2017 - 13:35 (META) 

Основното јавно обвинителство за гонење на организиран криминал и корупција денеска соопшти дека отворило предистражна постапка во врска со договорот меѓу Агенцијата за филм и продуцентската куќа „Јадран филм“ за снимањето на серијата „Македонија“.

Од Обвинителството велат дека предистражната постапка е отворена по известување од Управата за финансиска полиција.

„Надлежниот јавен обвинител ги презема сите неопходни дејствија за утврдување на фактите. Издадени се повеќе насоки и наредби за прибирање на материјални докази поврзани со севкупната постапка за снимање на играната серија. Во оваа фаза од постапувањето веќе е доставен дел од бараните докази, а побарано е и нивно дополнување“, стои во соопштеноето од Обвинителството.

Директорот на Агенцијата за филм, Горјан Тозија вчера на брифинг со новинарите во Владата, информираше дека согласно одлуката на Владата и согласно Законот за филмска дејност, Агенцијата повела постапки пред сите надлежни институции „поради очигледните прекршувања на потпишаниот договор од страна на видео-продукцијата „Јадран филм“ за реализација на играна серија „Македонија“, договор кој тежи 4,6 милиони евра“.

– Иако сите рокови од договорот се поминати, до ден денеска Агенцијата за филм нема добиено од продукцијата ниту серија, ниту документи, нема ниту никакви известувања каде се уплатените пари за првата серија во висина од 80 отсто, односно 68 милиони денари се потрошени (1,1 милион евра). Договорот за серијата изнесува 4 милиони и 602 илјади евра. После нашата преписка со продуцентот, престаната е комуникацијата, нема никакви одговори и Владата на Република Македонија донесе одлука да се раскине договорот и да се бара поврат на средствата – изјави Тозија.


Јанева: Затоа што снимал, Панчевски треба да биде предмет на психијатриска опсервација


Скопје, 9 октомври, 2017 - 16:41 (META) 

Апсолутно не е одземен клуч од домот на Панчевски, а тоа што тој снимал нешто во својот стан, тоа веќе треба да биде предмет на друга психијатриска опсервација, изјави денеска специјалната јавна обвинителка, Катица Јанева.

– Многупати во такви ситуации кога нè напаѓале, сме мислеле дека е поважно да ја вршиме нашата работа и да ги оставиме таквите маргинални работи сами по себе да се средат, бидејќи прво и основно е тоа што се знае зошто ние влеговме во неговиот стан, се знае и зошто отидовме и во судот, да видиме дали тој ја злоупотребува својата службена должност и овластување, односно дали оддава државна службена тајна. Тоа е важното прашање. А другото, не е воопшто важно –  вели Јанева, одговарајќи на новинарско прашање дали ќе поведе постапка против Панчевски бидејќи објавил снимка од предистражна постапка.

Јанева вели дека претресот во станот на поранешниот претседател на Кривичниот суд во Скопје, за цело време бил сниман и од криминалистичката полиција на МВР и уште еднаш нагласи дека не е одземен клучот од станот на Панчевски.

– Апсолутно не е одземен клучот. Можеби ви изгледа на камерата како да го одзема, но тоа не е така и тоа мислам дека во еден момент ќе биде објаснето – изјави Јанева.

Во врска со „еуфоријата што се навлече во јавноста во врска со претресот“, таа вели дека СЈО сакало колку што може да биде професионално и тајно во тој дел на предистражната постапка, а самото наметнување од страната на Панчевски за нивната работа, според Јанева, е резултат на неговата загриженост и незадоволство од тоа што СЈО професионално си ја врши работата.

Јанева изјави дека е извршен попис на сите предмети што се одземени од кај Панчевски и дека ќе се почне со нивна анализа од страна на стручни лица.


Љупчо Палевски беше на распит во СЈО, изјави дека станува збор за предистражна постапка


Скопје, 16 август, 2017 - 21:49 (META) 

Скопскиот бизнисмен Љупчо Палевски – Палчо беше на распит во Специјалното јавно обвинителство. Палевски, заедно со неговиот адвокат вечерва ги напуштија просториите на СЈО, по што кратко изјави дека станува збор за предистражна постапка.

Палевски вчера беше приведен на барање на Специјалното јавно обвинителство.

Засега официјално не е познато за што се товари Палевски. Се шпекулира дека Палевски е приведен поради тоа што на „Јутјуб“ објавил прислушувани приватни разговори на јавни личности, меѓу кои новинари и бизнисмени.

Уредникот на телевизија „Сител“, Драган Павловиќ – Латас во СЈО пријави вакви злоупотреби, а на профилот Палевски се појавија и снимки од бизнисменот Јордан Камчев.


Шест години по убиството на Нешковски, обидот за прикривање уште актуелен


Скопје, 6 јуни, 2017 - 12:50 (META) 

Денеска е шестгодишнината од протестите против полициската бруталност што избувнаа по убиството на Мартин Нешковски вечерта на 5 јуни 2011 година, за време на прославата на изборната победа на ВМРО-ДПМНЕ.

Специјалното јавно обвинителство на почетокот на минатата година го презеде во своја надлежност случајот за убиството на Нешковски, кој, како што информираат оттаму, сè уште е во предистражна постапка.

Инаку, полицаецот Игор Спасов, кој беше осуден на 14 години затвор за убиството на Нешковски, е првиот кој беше на распит во Специјалното јавно обвинителство во февруари минатата година.

Овој случај стана предмет на работа на СЈО бидејќи убиството на Мартин Нешковски беше дел од прислушуваните разговори што лидерот на СДСМ, сега премиер, Зоран Заев, ги објави во текот на 2015 година.

Од „29. бомба“ што Заев ја објави на 5 мај пред две години, се појавија индиции и сомневања дека тогашното раководство на Министерството за внатрешни работи и вработени во МВР, меѓу кои и Дејан Митровски-Урко, поранешниот личен телохранител на тогашниот премиер Никола Груевски, се обиделе да го сокријат убиството на Нешковски од јавноста.

– Еве уште една вистина дека ни загубен живот нема никаква цена за власта (на ВМРО-ДПМНЕ) и како некој сакаше да ја скрие вистината за Мартин Нешковски – рече Заев при објавувањето на „бомбата“, по што илјадници граѓани излегоа на протест пред Владата и дојдоа во судир со полицијата, која подоцна, до доцна вечерта приведуваше демонстранти по уличките во центарот на Скопје, а упадна и во Градската библиотека „Браќа Миладиновци“.

Денеска е шестгодишнина и од апсењето на лидерот на Обединети за Македонија, Љубе Бошкоски, во акцијата „Кампања“, уште еден случај за кој СЈО отвори истрага под името „Тортура“. Во овој случај осомничени се седум лица, припадници на полициската едница „Алфа“, меѓу кои и командантот на единицата, Ивица Анчевски-Пуки. Тие се товарат за мачење и друго сурово, нечовечко или понижувачко постапување и казнување. Според СЈО, нечовечкото апсење тие го сториле за да му удоволат на поранешниот директор на УБК, Сашо Мијалков.

Овој случај СЈО го презеде од Основното јавно обвинителство Скопје. Останува неизвесно дали случајот „Тортура“ ќе се најде пред суд, откако вчера истече рокот од 18 месеци, во кој СЈО требаше да поднесе обвиненија за случаите што ги презеде од основните јавни обвинителства.

Инаку, Бошковски за случајот „Кампања“, односно за нелегално финансирање изборна кампања, беше осуден на пет години затвор. Тој ја отслужи казната и излезе од затвор на средината од минатата година.


СЈО подготвено да го работи и „Сопот“, има сознанија за сторителите


Скопје, 22 мај, 2017 - 14:05 (META) 

Службени лица на МВР што постапувале во истрагата за случајот „Сопот“ примениле тортура врз сведокот Рамадан Бајрами, утврдило Специјалното јавно обвинителство истражувајќи ги наводите од јавно објавениот разговор и сепак води предистражна постапка за овој случај од пред 14 години. Специјалната обвинителка Фатиме Фетаи, зборувајќи за овој случај на денешната прес-конференција нагласи дека покрај застареноста на случајот со тортурата, доказите и фактите што произлегле од истрагата на СЈО имаат директни импликации врз постапката што се води во Основниот суд – Скопје 1.

– Дојдовме до сознание дека исказот на сведокот за „Сопот“, Рамадан Бајрами, за што повторно се води постапка, е изнуден и е производ на употребена сила и закани по личниот интегритет на сведокот од страна на службени лица на МВР, кои ги примениле при испитувањето. Службените лица од МВР сториле кривично дело тортура. Таквите факти ги потврдија и сведокот и дел од службените лица испитани во предистражната постапка. Вештакот оцени дека како последица на тортурата кај сведокот се предизвикани привремени последици врз неговото психичко здравје. Поради тоа што се привремени, а не трајни, кривичното дело тортура останува во својот основен облик останува и според законот е застарено во 2008 година. Но и  покрај застареноста на гонењето, овие докази и фактите што произлегоа од истрагата имаат директни импликации врз постапката што се води во Основниот суд – Скопје 1 – рече Фетаи.

– Доколку предметот биде даден во наша надлежност, ќе ги доставиме нашите сознанија до судот и ќе доставиме обвинителен акт, а ако не ни ги достави, ќе подготвиме извештај за сите овие докази и факти. Во тек е и предистражна постапка за откривање на сторителите – рече Фетаи.

Подоцна, одговарајќи на новинарско прашање, нејзината колешка Ленче Ристоска, кажа дека имаа одредени сознанија за можни сторители за овој случај, но бидејќи постапката е уште во предистражна фаза, јавноста ќе биде известена дури кога ќе се соберат доволно докази.

„Сопот“ е судски случај во кој селани од кумановското село Сопот беа обвинети за тероризам, односно поставување мина на пат на која нагази џип на НАТО со полски војници и наши државјани. Загинаа двајца војници и еден македонски граѓанин. За ова дело беа осудени 11 лица на затворски казни.

Според тврдењето на главниот сведок тогаш, изјавата со која ги посочува селаните од Сопот како извршители на делото била дадена под полициска присила и тортура. Рамадан Бајрами и тогаш сведочеше дека обвинетите се невини.

Судењето потоа беше вратено на почеток и сега случајот е пак во Основен суд Скопје 1.


ЛДП: Зврлевски потврди дека е последното упориште на режимот на Груевски


Скопје, 21 февруари, 2017 - 12:44 (META) 

Првиот човек на Јавното обвинителство на Македонија, Марко Зврлевски, уште еднаш потврди дека е последното упориште на режимот на Никола Груевски, велат од Либерално-демократската партија, во врска со вчерашното соопштение на Јавното обвинителство дека е отворена истрага против поранешни високи функционери на МВР и други правни и физички лица од Скопје, Куманово и од Струмица, поради изборни нерегуларности.

„Јавниот обвинител, по којзнае кој пат, длабоко заглавен во политиките на ВМРО-ДПМНЕ, се реши парцијално и еднодимензионално да води истраги за криминал, корупција и за изборни измами и тоа само во градовите Скопје, Струмица и Куманово. По овој чин, јасно е дека Зврлевски повторно бара криминал таму каде што го нема, наместо да ги гони оние за кои цела јавност знае дека местеле и лажирале избори“, се вели во реакцијата на ЛДП.

Од партијата обвинуваат дека со овој потег Зврлевски ја потврдува реалната слика на „контролираното судство и обвинителство во Македонија од страна на власта во заминување“ и „свесно или не“ истовремено ја потврдува „потребата од постоењето и продолжувањето на мандатот на Специјалното јавно обвинителство“.

„Само за потсетување, работата на актуелното Јавно обвинителство и во изминатиот период беше нотирано и во извештаите на Европската Унија и на ОБСЕ. Зврлевски, за жал, не ја научи лекцијата дека важноста на искрената и отворена борба против криминалот и корупцијата е еднаква на важноста на самата држава“, стои во соопштението на партијата.

Оттаму велат дека силно се залагаат за „комплетна и суштинска реформа во целиот правосуден систем, како дел од препораките на извештајот на Прибе, кој го опфаќа и Јавното обвинителство“.


Зврлевски отвори истрага против високи функционери на МВР за изборни измами


Скопје, 20 февруари, 2017 - 10:30 (META) 

Основното јавно обвинителство за гонење организиран криминал и корупција отворило предистражни постапки против поранешни високи функционери на Министерството за внатрешни работи и „други физички и правни лица“ (фирми) од Скопје, Куманово и од Струмица, кои се товарат за кривични дела против изборите.

Лицата, чиј идентитет не се открива, се сомничат за злоупотреба на службените овластувања, а делата за кои се водат истрагите, како што соопштуваат од Јавното обвинителство, биле извршени во 2014 и во 2016 година.

– Постојат основи на сомневање дека лицата вршеле влијание врз начинот на гласањето преку различни форми за време на изборите, со што ги сториле кривичните дела. Во насока на целосно утврдување на фактичката состојба, Основното јавно обвинителство за гонење организиран криминал и корупција презема проверки и прибавува потребни известувања, податоци и докази – стои во соопштението на обвинителството.

Минатата недела Основното јавно обвинителство Скопје соопшти дека отворило постапка против „едно лице – организатор на изборна кампања и други лица“, како и против правно лице, за кривично дело злоупотреба на средства за финансирање изборна кампања. Во соопштението на Јавното обвинителство и тогаш не беше конкретно наведено за кои лица станува збор, но извесно е дека се работи за политичка партија.


ОЈО води постапка против организирана група за трговија со дрога


Скопје, 18 февруари, 2017 - 11:43 (META) 

Основното јавно обвинителство за гонење на организиран криминал и корупција соопшти дека во текот на вчерашниот ден во координација со Министерството за внатрешни работи – Оддел за организиран криминал е спроведена акција за откривање на организирана група што извршува нелегална трговија со дрога при што приведени се три лица.

„Работејќи на континуирано откривање и гонење на организираниот криминал, Основното јавно обвинителство за гонење на организиран криминал и корупција раководи со предистражната постапка за откривање на организирана група што извршува кривични дела на нелегална трговија со дрога. Акцијата е спроведена против криминална група на повеќе локации и во повеќе населени места при што се откриени наркотици и лишени се од слобода повеќе од три лица“, соопштија од ОЈО.

Од Обвинителството информираат дека во тек е целосното документирање на случајот по што јавноста ќе биде информирана за понатамошниот тек на постапката и преземените дејствија.


ВМРО-ДПМНЕ: СЈО да работи законски, а не да се заканува на чесни граѓани


Скопје, 9 февруари, 2017 - 16:35 (META) 

Правото на протест е загарантирано со Уставот на Република Македонија, кој во членот 21 вели дека граѓаните имаат право мирно да се собираат и да изразуваат јавен протест, a заканите од страна на Специјалното јавно обвинителство упатени по одржаниот протест се уште еден чин кој се коси со највисокиот правен акт, се вели во реакцијата на ВМРО-ДПМНЕ на соопштението на СЈО по повод предистражната постапка што ја води и денешниот протест на членови и на симпатизери на партијата во Охрид.

Од ВМРО-ДПМНЕ велат  дека го разбираат и го поддржуваат револтот на „охриѓани против политичката хајка што по нарачка ја спроведува селективното јавно обвинителство“ и дека СЈО е „срам за правосудниот систем“.

„Повикувањето на околу 200 лица само поради тоа што се членови на една политичка партија не е ништо друго туку дискриминација по политичка и по идеолошка основа. СЈО аболира криминалци како Заев и Верушевски, а им се заканува на чесни луѓе чиј единствен грев е нивната политичко-идеолошка определба и тоа што одлучиле да донираат за сопствената партија“, стои во реакцијата на ВМРО-ДПМНЕ.

Оттаму додаваат дека СЈО мора да почне да работи законски, наместо да продолжува со заканите кон граѓаните.

„СЈО мора да истражи кој ја нарушува тајноста на истражната и на предистражната постапка, постојано лиферувајќи информации по порталите под контрола на СДСМ и на Сорос во врска со лицата кои се покануваат на распит. Ваквото непрофесионално и незаконско дејствување на СЈО не е ново. За нелегалните методи по кои работат, изнудите и за заканите веќе се поднесени десетици кривични пријави против одговорните во СЈО“, велат од ВМРО-ДПМНЕ.