!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Одбојкарите освоија сребрен медал и никој не ги пречека


Скопје, 4 јули, 2017 - 11:26 (META) 

Машката одбојкарска репрезентација на Македонија, која вторпат го освои сребрениот медал во Европската лига, вчеравечер се врати дома, но за неа немаше организиран пречек, како за ракометарите, па сами минаа низ Порта Македонија, на плоштадот ја отпеаја македонската химна и потоа заиграа оро.

Како што извести „Екипа“, од „пречекот“ директен пренос од својот мобилен телефон преку „Фејсбук“ правел капитенот Никола Ѓорѓиев.

Во финалето на Ф4-турнирот одбојкарите со 3:1 загубија од Украина, но на земјава ѝ го донесоа второто сребро од ова натпреварување.

 


Камион пропадна во фонтаната на плоштадот Македонија


Скопје, 6 јуни, 2017 - 11:59 (META) 

Додека течат подготовките за пречек на ракометарите на „Вардар“ на плоштадот Македонија, камион пропадна во т.н. сува фонтана. Засега не е познато како се случил овој инцидент, ниту во чија сопственост е камионот.

Таканаречената сува фонтана во употреба беше пуштена пред помалку од две години, а Градот Скопје и тогашната Влада за неа потрошија 2,5 милиони евра.

На плоштадот Македонија во тек се подготовките за пречекот на ракометарите на РК „Вардар“, кои таму треба да пристигнат во 13 часот.

Освојувачите на европската шампионска титула во ракомет веќе слетаа на аеродромот „Александар Велики“.


Скопје утре ќе ги пречека ракометарите на Вардар – новиот европски ракометен шампион


Скопје, 5 јуни, 2017 - 16:51 (META) 

Градот Скопје утре на плоштадот Македонија ќе организира пречек на новите европски ракометни шампиони – ракометарите на Вардар.

Ракометарите на Вардар, како што соопштија денеска од Град Скопје, се очекува да слетаат на аеродромот „Александар Велики“ утре во 11.15 часот, од каде ќе се упатат кон плоштадот Македонија, преку булеварите Александар Македонски, Гоце Делчев, Крсте Мисирков и Кочо Рацин.

Во 13 часот се очекува екипата на Вардар да пристигне на плоштадот Македонија, преку Порта „Македонија“.

По повод освојувањето на европската клупска шампионска титула на РК Вардар, Јавното сообраќајно претпријатие „Скопје“ организира бесплатен автобуски превоз за дочек на ракометарите на аеродромот „Александар Велики“.

На следниот линк се термините и локациите на тргнување на автобусите.


Началникот на СВР Штип не го пречека, но разговараше со заменик-министерот Андонов


Штип, 5 октомври, 2016 - 16:26 (META) 

Новиот началник на Секторот за внатрешни работи Штип, Љупчо Трајковски, не излезе пред влезот да го пречека дополнителниот заменик-министер за внатрешни работи, Оливер Андонов, кој денеска беше во посета на СВР Штип. Андонов, во изјава за новинарите, ова го протолкува како јасен показател за сериозните недоразбирања меѓу него и министерот за внатрешни работи, Оливер Спасовски.

– Вие бевте информирани за сериозните недоразбирања меѓу мене и привремениот министер Оливер Спасовски околу поставувањето кадри во Министерството за внатрешни работи. Колку што можам да видам, началникот од СВР Штип, што Спасовски го постави, не го гледам тука меѓу другите раководители – изјави Андонов.

Според него, ова покажува дека интенцијата на министерот Спасовски околу толкувањето на законите продолжува и дека двајцата треба сериозно да поразговараат за ситуацијата.

– Мислам дека доколку не седнеме и не поразговараме со него сериозно, за да ги расчистиме неговите дилеми во однос на толкувањето на законите, кои ги толкува како што сака, тоа ќе повлијае врз работата на МВР. Единствен правец за излез од оваа состојба е почитување на Законот за внатрешни работи и на Законот за влада координирано, бидејќи се врзани еден за друг – рече Андонов.

Андонов беше во посета на Штип за, како што рече, да се запознае со безбедносната состојба, која ја оцени како добра. Дополнителниот заменик-министер смета дека треба да се засилат мерките и да се спречат поголеми сообраќајни несреќи, како неколкуте што се случија во изминатите неколку дена.

Околу овие прашања, Андонов разговараше со новиот началник на СВР Штип, кој иако не го пречека, сепак го прими дополнителиот заменик-министер во својот кабинет.

Со доаѓањето на функцијата министер за внатрешни работи, Оливер Спасовски направи 11 промени на раководни позиции во МВР, а смени и седум началници во секторите за внатрешни работи.

Дополнителниот заменик-министер Андонов ова го оцени како грубо кршење на законите.