Понеделник е неработен ден за сите граѓани


Скопје, 2 април, 2018 - 10:54 (META) 

Министерството за труд и социјална политика, соопштува дека согласно со Законот за празниците, вториот ден на Велигден според православниот календар, 9 април (понеделник) е неработен ден за сите граѓани.

Истовреме, Министерството за труд и социјална политика, на граѓаните од православна вероисповед им го честита големиот христијански празник Велигден.


Честитка на Мицкоски до српската заедница по повод празникот Свети Сава


Скопје, 27 јануари, 2018 - 13:00 (META) 

Претседателот на ВМРО-ДПМНЕ, Христијан Мицкоски од свое лично и од име на партијата упати честитка до српската заедница во Македонија, по повод празникот Свети Сава.

Тој нагласи дека делото и учењето на Свети Сава оставиле силни универзални вредности на балканските христијански народи, кои „нè обединуваат во заложбата за создавање подобра иднина“.

„Ваквите празници се исклучително значајни за нашето заедничко почитување, како и почитувањето и зближувањето меѓу граѓаните. Од тие причини, но и од почит кон српскиот народ, веќе единаесетта година по ред го прославуваме овој празник откако по иницијатива на ВМРО-ДПМНЕ и со поддршка на претставниците на српската заедница, установивме Србите во земјава да добијат свој официјален празник и датум за прослава“, вели Мицкоски во честитката.

Тој изрази уверување дека и во иднина „ќе продолжиме да работиме за напредок во секое поле од интерес на нашите народи и со силна волја ќе градиме подобра и просперитетна Република Македонија“.


Иванов: Празнувањето на Свети Сава е потврда на заложбите за меѓусебно почитување


Скопје, 27 јануари, 2018 - 12:14 (META) 

Претседателот на државата, Ѓорге Иванов упати честитка до припадниците на српската заедница во Македонија, по повод празникот Свети Сава.

Иванов во честитката вели дека преку празнувањето на денешниот ден, 27 јануари – Денот на првиот српски архиепископ, просветител и духовник Свети Сава, „ние ги потврдуваме нашите заложби за меѓусебно зближување и почитување“.

„Српската заедница била и ќе биде неотуѓив дел од Република Македонија. Со својот јазик, култура и традиција, припадниците на српската заедница ја збогатуваат различноста на македонското мултиетничко општество. Со своите индивидуални успеси и ангажмани, пак, припадниците на српската заедница придонесуваат за унапредување на културниот, економскиот и политичкиот живот во земјава. Одговорност на нашата заедничка држава, Република Македонија, е да го почитува и негува единството на оваа различност бидејќи тоа е изворот на нашата сила и тајната на нашето опстојување“, стои во честитката на Иванов.

Тој нагласува дека српската заедница во Македонија, како и македонската заедница во Србија, имаат и незаменлива улога на мост на поврзување меѓу двете соседни пријателски држави.


Православните верници го слават Богојавление – Водици


Скопје, 19 јануари, 2018 - 9:52 (META) 

Православните верници денеска го слават празникот Богојавление – Водици, поврзан со крштевањето на Исус Христос во водите на реката Јордан од страна на Јован Крстител. Празникот, кој уште се нарекува Водици поради големото осветување на водите што го извршува црквата на овој ден, се празнува уште од вториот век од нашата ера.

На овој ден, традиционално во реките се положуваат крстови. Оној што ќе го фати Светиот крст се верува дека ќе го следи среќа и благослов во текот на целата година.

Како и претходните години, најмасовна посетеност на манифестациите по повод Богојавление – Водици се очекува да има во Скопје и во Охрид. Во Скопје за учество на манифестацијата „Водици 2017“ се пријавени повеќе од 150 граѓани.

Централната манифестација ќе се одржи напладне, кога архиепископот охридски и македонски г.г. Стефан ќе го положи крстот во реката Вардар од мостот „Слобода“. Претходно, од 9 часот, поглаварот на Македонската православна црква – Охридска архиепископија ќе богослужи Златоустова литургија во црквата „Рожденство на Пресвета Богородица“.

Во Охрид во сите православни храмови ќе се служат, по што литиите ќе се упатат кон градското пристаниште, каде во 10 часот ќе бидат осветени езерските води и ќе биде фрлен Светиот крст.

По повод празникот, претседателот на државата Ѓорге Иванов упати честитка до поглаварот на Македонската православна црква – Охридска архиепископија, Архиепископот охридски и македонски, г.г. Стефан и до сите православни верници.

„Богојавление е симбол на духовното раѓање и новиот почеток во животот на верникот. Како симбол на новиот почеток, Богојавление треба да нè потсетува да не се навраќаме на старото, туку да се стремиме кон живот исполнет со љубов, понизност, милост и солидарност. Да се престигнуваме со добрина, и да го градиме нашето мултиетничко, мултирелигиско и мултијазично општество во мир, соживот и почитување на различноста“, се вели во честитката на Иванов.


Косово го прогласи Денот на независноста на Албанија за национален празник


Приштина, 23 ноември, 2017 - 20:40 (META) 

Косово го прогласи Денот на независноста на Албанија за свој национален празник.

Во соопштението на косовската влада се наведува дека премиерот Рамуш Харадинај го прогласил 28 ноември за „Ден на Албанците, знак на почитување на културните и историските вредности, духот на семејната и на општествената традиција“.

Ваквиот чекор би можел да ги зголеми тензиите со Србија, кои се затегнати од прогласувањето на независност на Косово во 2008 година.

Официјален Белград ги обвинува Косово и Албанија дека се борат за „Голема Албанија“, но Приштина и Тирана ги отфрлаат ваквите тврдења.


Либералната партија бара 23 Октомври да не биде државен празник


Скопје, 23 октомври, 2017 - 14:34 (META) 

Либералната партија денеска побара празникот 23 Октомври – Денот на македонската револуционерна борба годинава последен пат да се празнува и да му се одземе статусот на државен празник.

„За тоа има многу причини, од кои секоја поединечно може да биде доволна за оваа одлука. Но, најважна е причината што го тераме народот да празнува празник на политичка партија, која нагло ги губи своите приврзаници, а многу од нив остануваат дури и посрамотени од неа“, се вели во соопштението на ЛП.


Македонија го празнува Денот на македонската револуционерна борба


Скопје, 23 октомври, 2017 - 10:11 (META) 

Република Македонија денеска го одбележува 23 Октомври – Денот на македонската револуционерна борба, а по тој повод, делегации на Собранието на Република Македонија и на Владата ќе положат цвеќе пред споменикот на Гоце Делчев во Градскиот парк.

Владата одлучи годинава да не ја додели државна награда „23 Октомври“ бидејќи на комисијата која одлучува за доделувањето на наградата ѝ завршил мандатот во февруари годинава, а претходната влада не назначила нови членови.

На 23 октомври 1893 година, во куќата на Иван Хаџи-Николов во Солун, Христо Татарчев, Даме Груев, Петар Поп-Арсов, Антон Димитров и Христо Ботанџиев го формираа Македонскиот револуционерен комитет од кој подоцна произлезе Внатрешно-македонската револуционерна организација (ВМРО) или Внатрешно македонско-одринска револуционерна организација (ВМОРО). Организацијата се бореше за ослободување на Македонија со сопствени сили, без помош однадвор. Двете организации го означуваат почетокот на македонско револуционерно движење кое преку Илинденското востание и Крушевската република во 1903 година и преку НОВ резултира со создавање самостојна македонска држава.

Денот на македонската револуционерна борба – 23 Октомври е неработен ден за сите граѓани на Република Македонија.


Денот на независноста ќе се одбележува под мотото „Македонија слободна, слободно живее“


Скопје, 3 септември, 2017 - 14:59 (META) 

Денот на независноста, 8 Септември, годинава ќе се одвива под мотото „Македонија слободна, слободно живее“, а централното одбележување ќе се одржи пред и во Владата на Република Македонија на 7 септември, во попладневните и во вечерните часови, соопшти денеска на прес-конференција портпаролот на Владата, Миле Бошњаковски.

– Ги повикуваме сите граѓани на Република Македонија да бидат гости на Владата на Република Македонија. Владата ќе биде отворена за сите – рече Бошњаковски.

Активностите по повод на Денот на независноста ќе се одвиваат на 6, 7 и на 8 септември, а премиерот Зоран Заев обраќање ќе има на централното одбележување.

На 7 септември, министрите Горан Сугарески, Роберт Алаѓозовски и заменик-министерот Дејан Павлески ќе ја посетат реставрираната спомен-куќа на Блаже Конески во село Небрегово.

На 8 Септември, на Денот на независноста, делегација предводена од премиерот Заев на гробиштата во Бутел ќе положи цвеќе на вечните почивалишта на Киро Глигоров и на Борис Трајковски.

Одговарајќи на новинарско прашање за изминувањето на стоте дена од формирањето на владата, кои се совпаѓаат со претстојниот празник, портпаролот Бошњаковски рече дека во следниот период Владата ќе ги соопшти резултатите од досегашната работа.


Претседателот Иванов го честиташе Курбан-бајрам


Скопје, 1 септември, 2017 - 11:04 (META) 

Претседателот Ѓорге Иванов, по повод Курбан-бајрам упати честитка до поглаварот на Исламската верска заедница, реис-ул-улема хаџи Сулејман ефенди Реџепи, и до сите граѓани од исламска вероисповед во Република Македонија.

„Најискрено посакувам празникот да го поминете во добро здравје, радост, среќа и во хармонија, споделувајќи љубов со ближните. Како еден од најголемите празници во исламот, Курбан-бајрам ги нагласува човечките доблести – солидарноста и грижливоста, помагањето и дарувањето. Нека и годинешново празнување помине во духот на споделување и на давање на сите оние кои имаат потреба од материјална поддршка, но и потреба од љубов и од внимание. Би сакал токму на овој голем празник, уште еднаш да го изразам своето уверување дека Исламската верска заедница и сите нејзини верници како нераскинлив дел од македонското општество и понатаму активно ќе придонесуваат за градење почит и разбирање помеѓу различните вери и етникуми во Република Македонија“, вели Иванов во честитката за празникот.


Џафери на муслиманските верници им го честиташе Курбан-бајрам


Скопје, 1 септември, 2017 - 10:05 (META) 

Претседателот на Собранието, Талат Џафери, од свое име и од името на пратениците во Собранието, на Исламската верска заедница и на сите муслимански верници им го честиташе за Курбан-бајрам.

„Празник кој, над сè, симболизира подавање рака на солидарност помеѓу луѓето, рака на добрина на посреќните кон оние помалку среќните, убав збор и човечко однесување, со надеж дека овој благословен ден Курбан-бајрам ќе нè најде сплотени во хармонија, мир и во меѓусебно разбирање и ќе ни даде мудрост да ги надминеме разликите во нашето општество, кое е изградено врз вредностите на етничкиот, верскиот и на културниот диверзитет, за земјата да напредува, а граѓаните и идните генерации да ги уживаат резултатите од нашиот ангажман. Имајте секогаш среќа, мир и добрина во вашите семејства и во вашите срца“, пишува Џафери во честитката.