!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Новиот правопис бесплатно достапен за симнување


Скопје, 7 декември, 2017 - 16:17 (META) 

На свеченост по повод патрониот празник на Националната и универзитетска библиотека „Свети Климент Охридски“ во Скопје, денеска беше промовирана новата веб-страница www.pravopis.mk на која која бесплатно може да се чита или да се симне второто издание на најновиот „Правопис на македонскиот јазик“ во ПДФ-формат.

– Сметам дека оваа вест претставува голема радост за сите Македонци не само во нашата земја, затоа што со неа добиваме одличен и практичен инструмент за унапредување на нашите јазични познавања и за подобра употреба на македонскиот јазик, во јавните објави и во јавната комуникација – рече министерот за култура Роберт Алаѓозовски во своето обраќање.

На веб-страницата се поставени и ГИФ-анимации и слики со приказ на најчестите јазични грешки што се прават во комуникацијата.


Заев најави стандардизација на македонскиот јазик и бесплатен пристап до Правописот и Толковникот


Скопје, 15 ноември, 2017 - 14:18 (META) 

Премиерот Зоран Заев на Меѓународната научна конференција „Минатото на јазичниот свет денес и утре“ по повод отворените денови на Институтот за македонски јазик „Крсте Мисирков“, рече дека Владата искрено и силно е посветена да го негува и унапреди македонскиот јазик.

Заев информираше дека во соработка со истакнати македонисти и експерти во областа, Владата веќе усвоила повеќе предлог-мерки што се насочени кон унапредување на состојбата со македонскиот јазик, за чијашто реализација е задолжено Министерството за култура.

Една од мерките е едноставен и слободен пристап, без надомест, до капиталните дела „Правопис на македонскиот јазик“ и „Толковен речник на македонскиот јазик“, а Заев потенцираше дека работата за достапноста на Правописот е во завршна фаза.

Помеѓу предложените мерки е и формирање на одбор за стандардизација на македонскиот јазик, во којшто би членувале експерти од катедрите за македонски јазик, од Институтот за македонски јазик „Крсте Мисирков“, од МАНУ, како и истакнати писатели, новинари, лектори.

Заев рече дека во програмата на владата предвидено е и да се води поголема грижа за правилна употреба на мајчиниот јазик од сите чинители и дејци кои имаат влијание на јавноста (медиуми, телекомуникациски оператори, државни органи и институции) со посебен акцент на правилна употреба на јазикот уште кај најмладата популација во почетниот образовен процес.

– Јазикот е жива материја и најочигледно ќе покажеме дека се грижиме за него, преку начинот како го говориме, како го пишуваме, како го читаме македонскиот литературен јазик. Така даваме пример со каков јазик сакаме да раснат младите генерации – додаде Заев.


Апел до Институтот за македонски јазик: Правописот да биде бесплатен и на интернет


Скопје, 2 март, 2016 - 13:46 (META) 

Фондација за интернет и општество „Метаморфозис“ и Алијансата за отворени образовни ресурси на Македонија упатија апел до Институтот за македонски јазик „Крсте Мисирков“ – Скопје да овозможи бесплатен пристап до „Правопис на македонскиот јазик“ во дигитална форма, како отворен образовен ресурс за сите граѓани.

Во писмото се потсетува дека минатата недела беше промовиран новиот „Правопис на македонскиот јазик“ кој сега е достапен за продажба во печатена верзија и се предлага, со оглед на тоа дека се работи за образовно средство изработено со јавни пари, тоа да биде достапно до целата јавност во дигитална форма, преку интернет, во форма на отворен образовен ресурс.

„Апелираме до Институтот за македонски јазик „Крсте Мисирков“ да овозможи пристап до правописот во дигитална форма бесплатно, како отворен образовен ресурс за сите граѓани на Македонија – кои како даночни обврзници веќе имаат платено за овој труд, а и луѓето од целиот свет кои се заинтересирани за правописот на македонскиот јазик“, стои во писмото .

Проектот „Иницијатива за отворени образовни ресурси“ има цел да влијае на подигнување на свеста и на капацитетот на академската јавност за создавање и за користење на отворени образовни ресурси во Република Македонија. Спроведувач на проектот е Фондацијата „Метаморфозис“.


Новиот „Правопис на македонскиот јазик“ да биде реиздаден со пристапна цена


Штип, 26 февруари, 2016 - 14:25 (META) 

Оправдани се реакциите во јавноста дека цената од 1.500 денари за новиот „Првопис на македонскиот јазик“ е превисока и дека треба да се препечати во помалку луксузно издание со популарна цена. Ова е заклучокот од вчерашната седница на Советот за македонски јазик, кој ќе даде предлог до издавачот, Институтот за македонски јазик и Министерството за култура, за ново поевтино издание, изјави денеска во Штип раководителката на проектот, Елка Јачева-Улчар, на прмоцијата на правописот.

– Правописот треба да си го најде местото во сечиј дом, затоа што нам, како на учители по македонски јазик, главната грижа и цел ни е токму тоа и затоа сметам дека реакциите се оправдани. Во однос на тиражот, тоа беше единствениот начин да се појави нов правопис затоа што на друг начин не можеше поинаку да се изведе. Но, тоа не значи дека ќе се остане на овој тираж и дека потребата што се чувствува и во образовниот процес и меѓу лекторите и преведувачите, стручните лица и, конечно, меѓу граѓаните, зборувачи на македонскиот јазик, секако ќе биде задоволена – изјави професорката Јачева-Улчар.

Според неа, издадените 500 примероци се максималниот тираж што е определен од конкурсот за годишната програма за печатени изданија на Министерството за култура.

Новиот „Правопис на македонскиот јазик“ е првото издание по 1998 година. Содржи правила за правилно пишување и за правоговор. Ова издание содржи дополнување со нови примери за транскирпција од туѓи јазици на македонски јазик и е дополнето со цело ново поглавје со практични примери за тоа како се цитираат библиографски единици, како се пишуваат административни документи, како молба и жалба, како се пишуваат стручни термини, како хемиски елементи и мерни единици.

Првиот правопис на македонскиот јазик е издаден пред 70 години.