!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Шесто продолжение на комисиската расправа за ребалансот на буџетот


Скопје, 24 јули, 2017 - 10:24 (META) 

Комисијата за финансирање и за буџет денеска ќе ја продолжи расправата за ребалансот на буџетот за 2017 година, на шестото продолжение на седницата кое треба да почне во 11 часот.

Досега не се поминати ниту десет од 840 предложени амандмани со колку што почна расправата за ребалансот.

И пред почетокот на оваа седница, од ВМРО-ДПМНЕ остануваат на ставот дека со ребалансот власта предвидува задолжување за 150 милиони евра повеќе од планираното.

Во однос на задолжувањето, од СДСМ, пак, сметаат дека долгот што власта на ВМРО-ДПМНЕ им го оставила на граѓаните е намален за 55 милиони евра.


Продолжува комисиската расправа за ребалансот на буџетот


Скопје, 18 јули, 2017 - 9:56 (META) 

Расправата за ребалансот на буџетот ќе продолжи денеска на седница на Комисијата за финансирање и буџет во 11 часот. Министерот за финансии, Драган Тевдовски, во своето образложение пред Комисијата вчера истакна дека основнa цел на ребалансот e да ги намали непродуктивните трошоци и да обезбеди простор за реализација на политиките на новата влада.

Според него, кратењето на непродуктивните трошења на власта обезбеди можност за буџетирање на нови мерки кои значат поддршка за граѓаните или домашните фирми.

Во однос на ребалансот на буџетот, од ВМРО-ДПМНЕ сметаат со него се зголемува задолжувањето на државата.

„Во ставката домашно задолжување, владата на СДС планира наместо 17,8 милијарди денари, да се задолжи за 20,7 милијарди денари. Тоа се нови 48,3 милиони евра долг кон домашните доверители. Во ставката задолжување кон странство, владата на СДС планира наместо 12,3 милијарди денари, да ги задолжи граѓаните со 18,4 милијарди денари“, се вели во утринското соопштение на ВМРО-ДПМНЕ.

Од СДСМ, пак, сметаат дека со ребалансот на буџетот се пренасочуваат парите кон граѓаните.

Вчера, расправата за ребалансот почна со 840 поднесени амандмани, а најголем дел од нив беа поднесени од ВМРО-ДПМНЕ. Расправата во матичната комисија законски треба да трае десет работни дена.


Собранието ја изгласа завршната сметка за буџетот за 2016 година


Скопје, 15 јули, 2017 - 19:47 (META) 

Собранието попладнево со 92 гласа „за“, без воздржани и против, ја донесe завршната сметка на буџетот за 2016 година.

Во текот на маратонската осма седница, пратениците од власта често ги немаше во салата, а пратениците од ВМРО-ДПМНЕ и од коалицијата разменуваа реплики главно со своите сопартијци.

Пратениците од ВМРО-ДПМНЕ велеа дека во времето на владата предводена од нивната партија се трошело домаќински, се зголемиле платите, пензиите и социјалната помош, а редовно биле исплатувани и субвенциите. Порачаа дека не смее да запре реализацијата на значајни инфраструктурни проекти, како што се автопатиштата и регионалните патишта, а реагираа и на намален буџет за образованието.

На денешната пленарна седница беше донесена одлука за разрешување на генералниот секретар на Собранието, Жарко Денковски. За нов генерален секретар на Собранието на Република Македонија е назначена Цветанка Иванова, правник и поранешен пратеник од СДСМ.

Претседателот на парламентот, Талат Џафери, попладнево ја прекина осмата седница, чие продолжение, како што рече, дополнително ќе биде закажано.

Собранието в понеделник треба да ја почне деветтата седница, на која ќе се расправа за ребалансот на буџетот за 2017 година.


Собранието заседаваше до 3.30 часот, продолжува денеска


Скопје, 15 јули, 2017 - 10:00 (META) 

Маратонската осма седница на Собранието на Република Македонија која траеше до 3.30 часот утрово, ќе продолжи денеска во 13 часот, откако претседателот на Собранието, Талат Џафери, синоќа прогласи постојано заседание на парламентот. Попладнето и вечерта минаа без пратениците од владејачкото мнозинство, пратениците од ВМРО-ДПМНЕ и коалицијата си реплицираа едни на други, што, според Џафери е „некоректно и ја забавува работата“. Пратениците ја продолжија истата практика и ноќта, откако седницата продолжи во 1 часот, по два и полчасовна пауза.

На дневен ред е спроведувањето на буџетот за 2016 година. Опозициската ВМРО-ДПМНЕ вели дека се работело домаќински, иако Македонија била во голема политичка криза. За пратениците на СДСМ завршната сметка на буџетот покажува многу нерационални трошења.

Министерот за финансии, Драган Тевдовски, во образложението наведе дека економскиот пораст на Македонија во 2016 г. изнесувал 2,4 проценти, забележувајќи оти тоа е најниска стапка на економски пораст во регионот.

Собранието на краткото продолжение на деветтата седница вчера попладнето одлучи ребалансот на буџетот, односно предлог-законот за дополнување на Законот за извршување на буџетот за 2017 година да се донесе по скратена постапка. Таа седница продолжува в понеделник.


Собраниската комисија за европски прашања ќе расправа за планот „3-6-9“ на Владата


Скопје, 14 јули, 2017 - 10:29 (META) 

Премиерот Зоран Заев и вицепремиерот за европски прашања, Бујар Османи, денеска ќе го претстават планот „3-6-9“ пред Комисијата за европски прашања на Собранието на Република Македонија.

Седницата на Комисијата е закажана за 12.30 часот и на неа со свои ставови околу владиниот план за реформите неопходни за напредок на земјата кон евроатлантските интеграции, ќе се произнесат и политичките партии во парламентот.

На седницата, покрај премиерот Заев и вицепремиерот, свои обраќања ќе имаат претседателот на Собранието, Талат Џафери, и претседателот на собраниската комисија за европски прашања, Артан Груби.

Свои излагања, се додава во најавата за седницата, ќе имаат координаторот на пратеничката група на СДСМ, Томилсав Тунтев, координаторот на една до десетте пратенички групи на ВМРО-ДПМНЕ, Илија Димовски, Зекирија Ибраими од Беса и претставник на невладиниот сектор.


Разрешувањето на Зврлевски е политички линч, вели опозицијата


Скопје, 12 јули, 2017 - 14:25 (META) 

Како политички линч и обид за партизација на институцијата Јавно обвинителство на Република Македонија го оценија пратениците на ВМРО-ДПМНЕ предлогот на Владата да се разреши Марко Зврлевски од функцијата јавен обвинител.

Откако по кратката пауза за координација кога Зврлевски требаше да им се обрати на пратениците седницата продолжи, Зврлевски рече дека ќе сака првин да ги чуе репликите на пратениците на образложението на предлогот за разрешување што го даде заменик-министерот за правда, Оливер Ристовски.

Веднаш потоа уследија низа реплики на неколкумина пратеници на ВМРО-ДПМНЕ, кои предлогот за разрешување го прогласија за политичка пресметка.

– Неговата најголема вина и нестручност е што стручно го фатил градоначалникот на Струмица како бара поткуп – рече Антонио Милошоски.

Неговиот партиски колега, Зоран Илиоски, во сличен стил му се обрати на Ристовски, велејќи му дека ако сака да се спроведува правда, да почне првин со случајот „Поткуп“.

Лилјана Кузмановска, исто така од ВМРО-ДПМНЕ, побара од предлагачот, заменик-министерот Ристовски, точно да наведе членови од закон според кои се предлага разрешување на Зврлевски.

Нејзината колешка Ане Лашкоска рече дека Ристовски се обратил со политички говор во неговиот прв настап пред пратениците и дека предлогот е брзање на Владата да ја партизира институцијата Јавно обвинителство.

Владанка Авировиќ разрешувањето го нарече политички линч и на јавниот обвинител и на сите јавни обвинители.

Џафери во меѓувреме прогласи редовна пауза за ручек.


Почнаа седницата и блокадите за разрешувањето на Марко Зврлевски во Собранието


Скопје, 12 јули, 2017 - 11:45 (META) 

Во Собранието на Република Македонија пред малку почна шестата седница, па прекина набргу, откако еден од координаторите на пратеничките групи на ВМРО-ДПМНЕ побара пауза.

Во своето четврто продолжение, на оваа седница денеска се дискутира за предлогот на Владата за разрешување на јавниот обвинител на Република Македонија, Марко Зврлевски. Во собраниската сала беше и Зврлевски.

Откако ги прочита имињата на пратениците што најавиле дека нема да присуствуваат, претседателот на Собранието, Талат Џафери, му даде збор на заменик- министерот за правда, Оливер Ристовски, кој во име на предлагачот, односно Владата, го образложи барањето за разрешување.

– Јавниот обвинител од јануари 2013 година досега непрофесионално и несовесно ја вршел фунцијата и не го почитува законот. Јавното обвинителство се претвори во инструмент на власта, што е констатирано од ОБСЕ и од сите релевантни меѓународни институции. Марко Зврлевски потфрли во својата улога во името на Никола Груевски и наместо да се грижи за човековите права, преземаше дејства со молчење, односно непреземање дејства – рече, меѓу другото, заменик-министерот за правда.

По неговото кусо обраќање настана џагор, па Џафери побара пратениците да се смират, а потоа почна да прашува кој пратеник за што се јавил – за реплика или за процедурална забелешка. Откако констатираше дека процедурална забелешка има само пратеникот Драган Данев од ВМРО-ДПМНЕ, му даде збор, а Данев побара пауза од еден час и до пратениците да се достави стенограм од обраќањето на Оливер Ристовски.

Џафери потоа прогласи пауза од еден час.


Собранието денеска ќе почне да расправа за разрешувањето на Зврлевски


Скопје, 12 јули, 2017 - 10:00 (META) 

Предлогот на Владата да биде разрешен јавниот обвинител на Република Македонија, Марко Зврлевски, денеска е првата точка на четвртото продолжение на шестата седница на Собранието на Република Македонија.

По претходните продолженија, кои ги одбележаа долги и не многу содржајни расправи од пратениците од ВМРО-ДПМНЕ и од нејзината коалиција, се очекува во 11 часот денеска да почне расправата за владиниот предлог да се разреши Зврлевски.

Ако сè оди според деловникот, прво претставникот на Владата треба да го образложи предлогот, а потоа Зврлевски има право да се произнесе по тој предлог.

Вчера, на третото продолжение на седницата, со 91 глас „за“ и без ниту еден против и воздржан беше усвоена одлуката за давање согласност на општите акти на Народниот правобранител и претседателот на Собранието, Џафери, ја отвори петтата точка од дневниот ред на шестата пленарна седница.


Серијата реплики и прашања од ВМРО-ДПМНЕ ја забави собраниската седница


Скопје, 11 јули, 2017 - 14:40 (META) 

Третото продолжение на шестата седница на Собранието траеше многу кратко и таа е повторно прекината без некаков прогрес во однос на вчерашното, второ, продолжение на седница.

Дискусијата за четвртата точка, расправа за одлуката за давање согласност на општите акти на Народниот правобранител, мина во знакот на долги реплики на пратениците од ВМРО-ДПМНЕ, вкупно осуммина, и одговори од народниот правобранител Иџет Мемети. Во дискусиите пратениците зборуваа за сè и сешто од сферата на работата на правобранителот и беше очигледна намерата што подолго да се зборува за колку што може повеќе да се оддолжи расправата за оваа точка, по која треба на дневниот ред да се најде предлогот на Владата за разрешување на јавниот обвинител на Република Македонија, Марко Зврлевски.

Претседателот на Собранието интервенираше при излагањата на пратениците, посочувајќи да се држат до темата, но со малку ефект – набргу продолжуваа истите обемни излагања.


Продолжи блокадата во Собранието со серија прекини, барања за паузи и за извинувања


Скопје, 6 јули, 2017 - 17:06 (META) 

Шестата собраниска седница, на која како петта точка на дневниот ред треба да се расправа за предлогот на Владата за разрешување на јавниот обвинител Марко Зврлевски, претседателот на Собранието Талат Џафери ја прекина во 16.20 часот, откако пратеникот Димитар Стевананџија, претставувајќи се како координатор на една од десетте пратенички групи, побара пауза од 60 минути, а за тоа време народниот правобранител да им се извинел на пратениците.

Претходно извинување побара Зоран Илиоски, исто така велејќи дека народниот правобранител Иџет Мемети треба да им се извини на пратениците.

Пред да стави крај на денешното продолжение на шестата седница и да го закаже следното за утре во 11 часот, Џафери рече дека тоа што го прават пратениците на ВМРО-ДПМНЕ е очигледно злупотреба на актите и дека граѓаните лесно ќе сфатат што всушност се случува.

– Тоа е злопотреба, но јас немам намера да ве попречам, Деловникот го овозможува тоа, ќе добиете еден час пауза. Ќе потсетам, заради граѓаните, јас и претходно кажав дека намерата со десетте пратенички групи е нон-сенс и дека сакате да блокирате, но граѓаните нека одлучуваат. Ќе добиете пауза, оти сакате да блокирате, ја прекинувам седницата и таа ќе продолжи утре во 11 часот – рече Џафери, одговарајќи му на Стевананџија.