Мичел до Мицкоски: Дајте им простор на пратениците да одлучат како ќе гласаат за уставните промени


Вашингтон, 16 октомври, 2018 - 17:45 (META) 

Помошник-државниот секретар на САД за европски и евроазиски прашања, Вес Мичел, во писмо испратено денеска до претседателот на ВМРО-ДПМНЕ, Христијан Мицкоски, побара првиот човек на најголемата опозициска партија да се заложи и јавно и приватно да им се отвори простор на пратениците на ВМРО-ДПМНЕ за уставните измени во Собранието да се изјаснуваат по своја волја.

Седницата за уставните измени почна вчера.

Во писмото што го објави амбасадата на САД во Скопје, Мичел, обраќајќи се на лидерот на ВМРО-ДПМНЕ со „Драг Христијан“, го потсетува Мицкоски на кажаното во разговорите, односно дека САД цврсто веруваат дека Преспанскиот договор е историска шанса за Македонија за посветла иднина и придонес за регионалната безбедност, стабилност и просперитет.

„И покрај тврдењата дека  можел да се постигне некаков “подобар договор”, ние не веруваме дека тоа е можно.  Овој договор бараше компромис и од двете страни.  Тоа е прилика што веројатно нема да се повтори со години, ако не и со децении“, вели Мичел во писмото.

Понатаму се нагласува разочарувањето на американската страна од ставот на раководството на ВМРО-ДПМНЕ и во однос на референдумот и за процедурата во Собранието за уставните измени.

„Нема да Ве изненади што ние сме разочарани од позициите на челниците на ВМРО-ДПМНЕ како во однос на референдумот, така и во врска со чекорите во Собранието за промена на Уставот. Уште од осамостојувањето на Македонија, граѓаните од сите заедници и партии, вклучувајќи ја и Вашата, силно го поддржуваат пристапувањето на земјата кон НАТО и кон ЕУ. Сега Собранието е на ред да го преземе следниот, одлучувачки чекор“, пишува Мичел.

Тој бара од Мицкоски и личен ангажман за да им се овозможи на пратениците на ВМРО-ДПМНЕ да гласаат според својата совест.

„Ве поттикнуваме да создадете простор, во јавноста и приватно, за пратениците од вашата коалиција да одлучат како ќе гласаат за уставните промени, ослободени од закани од насилство, одмазда, или друг облик на принуда“, вели Мичел во писмото до Мицкоски.


Дел од пратениците на ВМРО ДПМНЕ се повлекоа од дискусија во Собранието


Скопје, 16 октомври, 2018 - 16:58 (META) 

Дел од пратениците на ВМРО ДПМНЕ се откажаа од своите дискусии на собраниската седница за пристапување кон уставни измени кои произлегуваат од Договорот со Грција.

Според информациите на медиумите, ова се случило откако не му беше дозволено на говорница да се обрати претседателот на партијата Христијан Мицкоски.

Џафери, повикувајќи се на Деловникот кажа  дека не може лице кое не е пратеник да се обрати од собраниската говорница.

Во попладневниот дел од седницата, пратениците на ВМРО ДПМНЕ не ни реплицираа на говорите на пратениците од СДСМ. Вкупно останати за дискусија се уште 32 пратеници.


Милошоски: СЈО врши притисок врз пратениците за да гласаат за уставните измени


Скопје, 16 октомври, 2018 - 12:30 (META) 

Пратеникот на ВМРО-ДПМНЕ, Антонијо Милошоски, по распитот во Специјалното јавно обвинителство (СЈО) за случајот „Моќник“ денеска обвини дека тој распит и распитите на 15 негови колеги – пратеници од ВМРО-ДПМНЕ се притисок за тие да гласаат за уставните измени.

– По неуспешниот референдум, околу 15 мои колеги пратеници, меѓу кои и јас, се повикани од страна на Специјалното јавно обвинителство за разни предмети. Со тоа се покажува дека Обвинителството има своја политичка намена, односно сите овие случаи и постапки и распити имаат за цел да принудат дел од пратениците да гласаат против волјата на народот, односно за измена на Уставот на Република Македонија. Предметите не би ги коментирал во подробности, но би кажал дека истите се неосновани и самиот тајминг на покренување на предметите после пропаднатиот референдум навестува дека СЈО има селективна правда и е политичка институција што сака да изврши притисок врз поголем дел на пратениците од опозицијата да гласаат за уставните измени- изјави Милошоски.

Тој рече дека нема да потклекне под притисоците и ќе гласа според тоа како се определил народот на референдумот, односно „против“.

Инаку, Милошоски е првообвинет во случајот на СЈО против вкупно 13 лица, меѓу кои се и неговиот татко и тогашниот градоначалник на општина Македонски Брод, како и поранешниот прв лустратор Томе Аџиев.


Продолжува седницата за уставните измени денеска во 11 часот


Скопје, 16 октомври, 2018 - 9:10 (META) 

Пленарната седница на Собранието на Македонија за уставните измени, која почна вчера, ќе продолжи денеска во 11 часот. Пријавени за збор се 66 пратеници.

Во текот на вчерашната расправа немаше никакво поместување на ставовите и на власта и на опозицијата, со исклучок на пратеникот од владејачкото мнозинство, Ферид Мухиќ. Тој иако претходно рече дека нема да ги поддржи уставните измени, сега најави дека откако добро размислил ќе гласа за Договорот бидејќи не го загрозува идентитетот.

– Иако овој Договор е без преседан, бидејќи Македонија е единствена држава принудена да преговара за своето име, овој Договор води кон живот, а не кон смрт. Со ова ја менуваме капата, но не и главата која ќе остане иста. Идентитетот не може да биде загрозен – рече Мухиќ.

Премиерот Зоран Заев ги повика пратениците што се двоумат да погледнат во иднината и секој пратеник да гласа според својата волја за сигурност, стабилност и економски просперитет на земјата. Исто така, Заев повика и на помирување за настаните за случувањата на 27 април во Собранието минатата година, што во јавноста веднаш беше протолкувано како ветување за амнестија за обвинетите за овие насилства.

Според собранискиот Деловник расправата може да трае најмногу до 10 работни дена односно до 26 октомври и потоа мора да се прејде на гласање.


Заев повика на помирување и на простување


Скопје, 15 октомври, 2018 - 12:10 (META) 

Многу се поделивме пред се политички, се замразивме, се закрвавивме ќе се испоубиeвме пред очите на сите на 27 април, еве прилика да си простиме и да се помириме, рече премиерот Зоран Заев денеска во Собранието, при образложување на владиниот предлог за уставни измени.

„Ајде десната страна да подаде рака на левата и левата да и подаде на десната, испраќам порака на помирување. Знам дека ова има цена, но политичарите доаѓаат и си одат, а иднината на земјата е најважна. Нема иднина за нашата земја ако не си простиме. Ги повикувам пратениците да мислат и да погледнат во иднината. Дали сакаат европска Македонија или изолација, сиромаштија и несигурност“, рече Заев на пленарната седница која е во тек.


Пратениците на ВМРО-ДПМНЕ на координација со партиското раководство


Скопје, 12 октомври, 2018 - 14:07 (META) 

Пратениците на ВМРО-ДПМНЕ денеска пред почетокот на продолжението на седницата на Комисијата за уставни прашања одржуваат координација со партиското раководство. Координацијата се одржува во седиштето на ВМРО-ДПМНЕ.

Почетокот на продолжението на Комисијата за уставни прашања на која треба да продолжи претресот за Предлогот за пристапување кон уставни измени согласно Договорот со Грција е закажан во 14 часот.

Претресот по оваа точка на дневниот ред почна во средата. Предлогот за уставни измени го образложи премиерот Зоран Заев. Во дебатата по претресот учествуваа пратеници од сите пратенички групи, вклучувајќи ги и пратениците од ВМРО-ДПМНЕ кои гласаа против дневниот ред.

ВМРО-ДПМНЕ вечерва ќе одржи седница на Извршниот комитет, на која лидерот на партијата Христијан Мицкоски вели дека ќе се заокружат подготовките за предвремени парламентарни избори.


Втор ден комисиската расправа за уставните измени


Скопје, 12 октомври, 2018 - 9:36 (META) 

Собраниската Комисија за уставни прашања денеска треба ќе ја одржи втората седница на која се расправа за уставните измени кои произлегуваат од Договорот од Грција.

Расправата почна завчера, но ставовите на власта и опозицијата не се променија. Власта смета дека ова е неповторлива шанса за напредок на Македонија и членство во ЕУ и НАТО, а опозицијата тврди дека процесот е неуставен.

Премиерот Зоран Заев вчера повторно апелираше да се надминат партиските и политичките предрасуди и да се внимава на иднината на државата.

– Очекувам да се изнајде храброст, да се надминат партиските и политичките предрасуди, спреги и да се внимава на иднината на државата, зашто оваа шанса е неповторлива. Одлуката што ја носиме е со огромна одговорност и важност за иднината на граѓаните. Верувам дека сите ние, пред се и над се, ќе мислиме на нашата држава, на децата и на генерациите кои доаѓаат по нас – истакна премиерот.

Раправата по предлогот за пристапување кон измена на Уставот во Комисијата, согласно член 196 од Деловникот, може да трае најмногу десет работни дена. Членовите на Комисијата за уставни прашања и пратениците во текот на претресот може да зборуваат повеќе пати во траење од вкупно 20 минути, а координаторите на пратеничките групи вкупно 30 минути. Претставникот на предлагачот во претресот, пак, може да говори повеќе пати, но не повеќе од 30 минути вкупно.


РТС известува дека пратеници на ВМРО-ДПМНЕ се под притисок, а Заев има мнозинство


Белград, 10 октомври, 2018 - 17:04 (META) 

Во прилог под наслов „Македонија, пратениците на ВМРО-ДПМНЕ под притисок“, Радиотелевизија на Србија (РТС) денеска извести дека пред почетокот на денешната расправа во уставната комисија во македонското Собрание, 11 пратеници на ВМРО-ДПМНЕ се согласиле да ги поддржат уставните измени и така да обезбедат двотретинско мнозинство.

Повикувајќи се на информации на телевизијата „Алсат-М“, РТС потенцираше дека владата на Зоран Заев успеала да обезбеди двотретинска поддршка за уставните измени и да избегне вонредни избори.

Сепак, јавниот радиодифузен сервис на Србија ги пренесе и тврдењата на високите функционери на ВМРО-ДПМНЕ дека тие шпекулации се неточни и дека е „малку веројатно некој од пратениците да гласа спротивно на волјата на граѓаните на Македонија искажана на референдумот“.

Наспроти ваквите тврдења од врвот на најголемата опозициска партија, фактите зборуваат дека на референдумот излегоа 666.344 граѓани, од кои 609.427 граѓани, односно огромно мнозинство од излезените, се определија за прифаќање на на Договорот со Грција, поддржувајќи ја владата. Со други зборови, огромно мнозинство од граѓаните ги поддржаа евроатлантските интеграции. За тоа пишуваше и „Вистиномер“, соочувајќи ги изјавите на претседателот Ѓорге Иванов со реалните бројки.

Повикувајќи се на македонски медиуми, РТС наведува и дека одреден број поранешни функционери на ВМРО-ДПМНЕ се вклучиле во убедување на пратениците на оваа партија да ги поддржат уставните измени.

Претходно, белградска „Политика“, пишуваше дека „новиот претседател на ВМРО-ДПМНЕ, Христијан Мицкоски, во кампањата се однесувал како пантомимичар, за разлика од претседателот Ѓорге Иванов, којшто, „кога остана осамен, не се скри во својата резиденција, туку од говорницата на Генералното Собрание на ОН ги критикуваше САД, ЕУ и НАТО, повикувајќи ги граѓаните да го бојкотираат референдумот“.

Ова е само делумно точно бидејќи Иванов ниту остана осамен, ниту пак, се јави само од говорницата  на ОН. Тој, во неколку наврати се изјаснуваше против референдумот и дека тој нема да излезе да гласа.


Бошњаковски: Владата очекува да се обезбеди двотретинско мнозинство за уставните измени


Скопје, 10 октомври, 2018 - 12:24 (META) 

Портпаролот на Владата, Миле Бошњаковски на денешната прес-конференција поврзана со одлуките од синоќешната 93. владина седница ги повтори очекувањата на Владата за постигнување двотретинско мнозинство за уставните измени, за што денеска, собраниската Комисија за уставни прашања, треба да ја отпочне расправата по предлогот за потребата од уставни измени поднесен од Владата.

Тој најави дека воведно обраќање на Комисијата ќе има премиерот Зоран Заев.

– Сметаме дека оваа историска одлука пред која се наоѓаат пратениците во македонскиот Парламент е од суштинско значење за остварување на стратешките цели на Македонија за членство во НАТО и ЕУ. Сметаме и очекуваме дека мнозинството пратеници во Парламентот ќе ја послушаат волјата на мнозинството граѓани кои на 30 септември гласаа „за“ овие заложби – рече Бошњаковски.


Заев: Дали има мнозинство ќе се види на гласањето, но нема поткуп


Скопје, 9 октомври, 2018 - 12:34 (META) 

Не се нудат пари на пратениците за да гласаат за уставните измени, а најдобрата опција во моментот е Собранието, а не предвремени избори, порача премиерот Зоран Заев пред новинарите денеска.

Тој рече дека дали има двотретинско мнозинство за да се направат уставните измени ќе се види дури во процедурата во парламентот, но изрази оптимизам дека може да се постигне мнозинство. Сепак, Заев негираше дека има уцени и обиди за поткуп на пратениците.

– Може да верувам дека имаме двотретинско мнозинство, а може да верувам и да немаме, но тоа ќе да се види преку дебата во комисиите, на пленарната седница во Собранието и на крај на гласањето.Јас разговарав лично со пратениците и видовме дека има прогресивна маса која е доволно сериозен мотив. Овие денови парламентот се надевам ќе има дебата. Морам да ги отстранам шекулациите за пари и незгодни состојби, ова мора да е благопријатна состојба. Секој пратеник е еднакво важен – рече Заев.

Во одговор на новинарско прашање, тој повтори дека избори ќе има само ако не се постигне договор, бидејќи нема друг начин за обезбедување на двотретинско мнозинство за носење на уставните измени кои произлегуваат од Договор со Грција.