Новаковски: Со притворот на Василевски, притворени се 60.000 лица кои гласале за него


Скопје, 12 јануари, 2018 - 13:49 (META) 

Одбраната на притворениот пратеник од ВМРО-ДПМНЕ, Сашо Василевски на јавната седница во Апелацискиот суд побара укинување на притворот и одредување на друга мерка или предметот да се врати на повторно одлучување во Кривичниот суд.

На седницата не беше присутен пратеникот Василевски кој е во притвор за учество во насилствата во Собранието на 27 април минатата година. Судот испратил наредба Василевски да биде доведен на јавната седница, но од Истражниот затвор во Шуто Оризари стигнало известување дека Василевски не сакал да дојде.

Претставникот на вишото обвинителство, Наталија Тасевска побара притворот на Василевски да биде потврден и рече дека жалбата на Василевски треба да се одбие како неоснована бидејќи се уште постојат околностите поради кои притворот и му бил првично одреден.

Бранителот на Василевски, Александар Новаковски, истакна дека е прекршена постапката за одземање на имунитетот и дека судот мора да ја исправи таа грешка. Тој посочи дека Василевски бил во Бугарија дента кога му било кажано дека ќе биде приведен за тероризам и тој веднаш доброволно се вратил во државата.

Новаковски наведе дека претресот во домот на Василевски бил извршен незаконски и воопшто не се внимавало на пресумпцијата на невиност. Адвокатот рече дека Василевски воопшто нема намера да бега и дека ако тоа го сакал ќе го сторел во изминатите седум месеци. Како гаранција рече тој Василевски е подготвен да ги депонира обичниот и дипломатскиот пасош.

Тој рече дека со Василевски во притвор се ставени 60.000 граѓани кои гласале за него како пратеник, а обвинителката Тасевска ваквото тврдење го оцени како несериозно.


Потпретседателот на Беса, Зекирија Ибрахими, поднесе оставка на функцијата


Скопје, 5 јануари, 2018 - 20:18 (META) 

Потпретседателот на Беса, Зекирија Ибрахими, денеска информираше дека поднесува оставка на функцијата, јави Алсат-М.

Тој исто така вели и дека нема да се кандидира за лидер на Беса на партискиот конгрес кој треба да се одржи во февруари. Оваа негова одлука доаѓа на само еден ден пред утрешниот состанок на Централниот одбор.

Зекирија Ибрахими беше градоначалнички кандидат на Беса за општина Чаир.


Палестинците го отповикаа својот дипломатски претставник во САД


Рамалах, 31 декември, 2017 - 19:52 (META) 

Палестинците денеска соопштија дека го отпoвикале својот дипломатски претставник во Соединетите Американски Држави за „консултации“, неколку недели откако американскиот претседател Доналд Трамп го призна Ерусалим како главен град на Израел, јавува „Би-би-си“.

Палестинскиот претседател Махмуд Абас изјави дека нема да прифати никаков мировен план од САД по одлуката на Трамп, која предизвика протести и судири во појасот Газа.

На 21 декември мнозинство од 128 земји-членки на Обединетите нации ја поддржаа резолуцијата со која се бара САД да ја повлечат одлуката за признавање на Ерусалим за главен град на Израел.


Заврши расправата за законот за јазиците, седницата продолжува утре


Скопје, 14 ноември, 2017 - 16:37 (META) 

По само 13 минути дискусија по паузата за ручек претседателот на Собранието, Талат Џафери ја прекина седницата на Собранието на која се разгледуваше предлог-законот за употреба на јазиците. Тој констатира дека е исцрпена листата на пратениците што се пријавил за збор, па најави дека таа ќе продолжи утре во 12 часот.

Претходно во расправата реплицирајќи му на Драган Данев од ВМРО-ДПМНЕ, новиот пратеник Костадин Ацевски од СДСМ, кој влезе во собраниската фотелја на 8 ноември, „го пофали“ Данев за желбата за јавна расправа и консензус, велејќи дека тоа го немало додека пратениците на ВМРО-ДПМНЕ биле претставници на власта.

– Да не беше промената на власта, граѓаните немаше да бидат свесни за вашата желба и потреба за јавна расправа, консензус. Јас мислев дека за вас тоа беа мисловни именки или придавки. Да не поминевте во опозиција, граѓаните исто немаше да бидат свесни колку ги познавате Деловникот на Собранието и неговите одредби – рече Ацевски.

Веднаш откако ја прекина седницата за законот за јазиците, Џафери го почна шестото продолжение на 12-тата седница, на која прва точка е Предлог-закон за дополнување на Законот за исплата на платите, по скратена постапка, поднесен од пратениците на ВМРО-ДПМНЕ, Илија Димовски, Драган Данев и Невенка Стаменковска.


Фетаи сака да биде претседател на Македонија, Јанева градоначалник или пратеник


Скопје, 27 септември, 2017 - 12:47 (META) 

Ако сум жива и здрава, на 50 години сакам да бидам нормален шеф на нормална држава, вели обвинителката од Специјалното јавно обвинителство, Фатиме Фетаи, во емисијата „Трите“ на „А1 он“ за животот и за работата за трите обвинителки Катица Јанева, Ленче Ристоска и Фатиме Фетаи.

– Со ова јас го достигнав врвот на мојата кариера. Сакам на 50 години, бидејќи тогаш сметам дека ќе бидам доволно емотивно стабилна, да бидам, и ќе бидам, ако сум жива и здрава, нормален шеф на нормална држава. И ќе успеам во тоа. Моите блиски мислат дека можам и сега, но за да бидеш татко на државата, не е потребно само да го знаеш законите и да си ја знаеш работата. Мислам дека тоа што мене ми недостига за да бидам на 40 години, кога ќе ги исполнам условите да се биде шеф на држава, е емотивна стабилност. Јас сум тип што бурно реагира. Тоа не е дозволиво за еден шеф на држава, меѓутоа не треба да биде ни како актуелниот – да не отвораш уста 10 години – вели Фетаи.

И специјалната јавна обвинителка, Катица Јанева, во интервјуто изрази политички амбиции, но за градоначалничка или пратеничка фукнција.

– Најпрво се гледам како обвинител, би сакала да продолжам со мојата професија. Имам уште енергија за нови предизвици и се надевам дека уште има што да покажам од моите стручни квалитети. Би сакала да се обидам во политиката, како градоначалник на Гевгелија или пратеник. Се надевам дека дотогаш некои работи и во политичките партии ќе се променат, дека ќе се гледа повеќе на професионалноста. Треба да биде политиката врзана за човекот, а не човекот за политиката – вели Јанева.


Богоев: Скандалозна е пресудата на “сваровски судиите“ за Урко


Скопје, 15 август, 2017 - 16:31 (META) 

Скандалозна е пресудата со која поранешниот телохранител на Никола Груевски, Дејан Митревски – Урко е осуден на условна казна за сообраќајната несреќа во која загина момче, изјави денеска на прес-конференција Стефан Богоев, пратеник и претседател на Социјалдемократската младина на Македонија (СДММ).

Според Богоев, ова е уште еден доказ дека „поданиците на поранешниот режим сè уште се привилeгирани и се над законот“.

– Очигледно е дека „сваровски-судиите сè уште работат во одбрана на криминалот и злоделата на поранешниот режим. Одлуката за условна казна за сторител на тешко дело против безбедноста во сообраќајот, со смртни последици на младо момче докажува дека е потребна итна професионализација и ослободување на судскиот систем. Токму затоа, неопходно е итно спроведување на започнатите реформи во судството за никогаш повеќе да не се повторат вакви скандалозни случаи каде што поединци ќе бидат над законите само затоа што се блиски до една или друга политичка партија – изјави Богоев.


Тодоров се откажа од пратеничкиот мандат, ќе работи како адвокат


Скопје, 29 мај, 2017 - 23:03 (META) 

Министерот за здравство во заминување, Никола Тодоров, денеска соопшти дека се откажува од пратеничка функција, но не и од активностите во матичната партија ВМРО-ДПМНЕ.

„Имајќи предвид дека планирам во иднина повеќе да се посветам на мојата основна професија како адвокат, како и да можам да дадам поголем придонес во партиските активности, дозволете ми да Ве информирам дека одлучив да поднесам оставка на функцијата пратеник во Собранието на Република Македонија“, напиша Тодоров на својата страница на социјалната мрежа „Фејсбук“.

Од кабинетот на претседателот на Собранието, Талат Џафери, соопштија дека Тодоров веќе ја депонирал својата оставка и дека за ова ќе биде информирана Државната изборна комисија. На неговото место, според пратеничката листа, треба да седне Невенка Стаменковска.

Тодоров важи за еден од најблиските соработници на лидерот на ВМРО-ДПМНЕ, Никола Груевски. Тој е дел од владиниот кабинет уште од 2009 година, како министер за образование, а во 2011 година застана на чело на ресорот здравство.


Нападнат пратеникот на СДСМ, Максим Димитриевски


Куманово, 6 април, 2017 - 10:38 (META) 

Осум лица, од кои, наводно, и неколку вооружени полицајци во цивилна облека, доцна ноќеска физички го нападнале пратеникот на СДСМ, Максим Димитриевски од Куманово, кој добил лесни повреди на раката, објави „Плусинфо“.

Настанот се случил во кафеаната „Палас“ во Куманово, каде што Димитриевски бил на семејна веселба.

Напаѓачите прво вербално го провоцирале пратеникот Димитриевски, а потоа тргнале и физички да се пресметаат со него. Тој некако успеал да се одбрани, по што се замешало и обезбедувањето и во локалот настанала општа тепачка.

– Се обидов да се повлечам, да не возвраќам на провокациите, но морав да се бранам и себеси, а да ја бранам и мојата сопруга, чиј роденден славевме. Напаѓачите не ги познавам. Подоцна полицајците ми рекоа дека вооружените лица биле полицајци во цивил. Беа безобразни и насилни – вели Димитриевски.

На местото на настанот била повикана полиција, бидејќи напаѓачите го чекале пратеникот и пред кафеаната.


„Анима мунди“ го прашува Мухиќ дали бил коорганизатор на борби со кучиња


Скопје, 9 ноември, 2016 - 15:13 (META) 

Здружението за заштита на животните „Анима мунди“, инспирирано од колумната на кандидадот за пратеник предложен од СДСМ, Ферид Мухиќ, со наслов „Борба“, јавно го прашува кој е неговиот став во врска со борбите со кучиња и дали бил поддржувач, учесник, коорганизатор на борби со кучиња.

„Како граѓански кандидат за пратеник на претстојните парламентарни избори, очекуваме јавно да кажете дали во обучувањето, изложувањето на животните во околности каде се касапат и се борат до смрт гледате спортска дисциплина и облик на забава или екстремна форма на злоупотреба на животните, кривично дело и организиран криминал“, го прашуваат Мухиќ од „Анима мунди“.


Мухиќ: Заев ме покани да станам пратеник, побарав само да останам независен


Скопје, 7 ноември, 2016 - 13:54 (META) 

„Да бидам кандидат за пратеник ме покани лидерот на СДСМ, Зоран Заев. Јас само побарав да останам независен, на што тој се согласи и, ете, се најдов на листата“, вели за „Мета“ професорот Ферид Мухиќ, за чие име, откако излезе во јавноста со големи шанси за иден претставник во Собранието, имаше многу реакции по социјалните мрежи и во медиумите.

Тој вели дека реакциите се како зачин на позитивните коментари кои ги добива постојано.

– Постојано добивам пораки со поддршка од Скопје, Тетово, Битола, Дебар, Охрид… Слушнав дека има реакции за мојата кандидатура, но јас никому не му го доведов во прашање интегритетот, така што ни тие не можат да го нарушат мојот интегритет – вели Мухиќ.

На прашањето дали го променил ставот дека абортусот е убиство, вели дека сè уште го мисли тоа.

– Јас можам да кажам дека тие што мислат спротивно, се убијци на деца. Не може така лесно да се промени став. Јас сè уште стојам на тој став – вели Мухиќ.

Вчера СДСМ ги објави листите за пратеници, на кои се најдоа и граѓански активисти и професори. Дел од имињата и денеска се тема на дебата низ медиумите. Од опозициската партија засега се без коментар за овие негативни реакции.