!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Гори шума во близина на воените магацини на полигонот Пенуш


Штип, 30 март, 2017 - 17:43 (META) 

Стотина војници на Армијата на Република Македонија (АРМ) и пожарникари од штипската противпожарна единица се обидуваат да го изгаснат пожарот, што денеска околу пладне зафатил околу 50 хектари нискостеблеста шума во близина на воениот полигон Пенуш.

Пожарот е меѓу селата Софилари и Драгоево, а непристапниот терен и силниот ветер го отежнуваат гаснењето на огнот.

Дополнителен проблем е што пожарот се доближува до воените магацини во Пенуш. Жителите стравуваат дека пожарот може да се прошири на планината Серта, на која секоја година пожари уништуваат неколку десетици хектари млада шума.

Пред три години, во ова подрачје во пожар изгореа 500 хектари шума, а интервенцијата на надлежните за ставање на огнената стихија под контрола траеше три дена.


Опожарен камион во Драчево


Драчево, 28 март, 2017 - 15:05 (META) 

Засега непознат сторител, вчера, час и половина по полноќ, опожарил незаклучен камион во скопската населба Драчево.

Како што соопшти СВР Скопје, камионот „застава 8310“ со скопски регистарски ознаки бил паркиран на улицата Малешевска. Околу 1.30 часот вчера, непознатиот сторител ја отворил незаклучената врата, истурил запалива течност и го предизвикал пожарот.

Биле повикани скопските пожарникари, кои го изгаснале пожарот, а полицијата извршила увид и вели дека се трага по сторителот.


Дојранчанец загинал во пожар


Стар Дојран, 27 март, 2017 - 14:43 (META) 

Во пожар што вчера наутро избувнал во неговата куќа на улицата „Јане Сандански“ во Стар Дојран, животот го загубил 50-годишниот С.Д., соопшти полицијата.

Пожарот бил пријавен утрото. Пожарникарите интервенирале и по некое време го изгаснале пожарот, но и го пронашле мртвото тело на сопственикот на куќата.

Лекар од брза помош ја констатирал смртта и на телото забележал изгореници. Смртта, според сегашните сознанија настанала од задушување, а изгорениците на телото се создале подоцна. По увидот извршен од СВР Струмица, со согласност од јавен обвинител, телото на настраданиот било предадено на семејството за погреб.


Молотов коктел фрлен во угостителски објект во Тетово


Тетово, 20 март, 2017 - 13:59 (META) 

Утрово, околу 4.30 часот, две непознати лица го искршиле изложното стакло и фрлиле молотов коктел во угостителски објект во Тетово, информираат од МВР.

Случајот бил пријавен од очевидец, а екипа на тетовската противпожарна бригада го изгаснала пожарот, во кој биле оштетени неколку маси и столови во објектот, лоциран на крстосницата од улиците ЈНА и Јане Сандански.

Полициските екипи кои извршиле увид, во близина на местото пронашле уште едно шише со течност, чекан и тесла.

Од полицијата велат дека преземаат мерки за пронаоѓање на сторителите и за целосно расчистување на случајот.


Непознат маж пронајден мртов во опожарена барака


Кочани, 9 март, 2017 - 13:49 (META) 

Непознат маж бил пронајден мртов во барака во Кочани, која синоќа била зафатена од пожар, информираат од МВР. Според полициските информации, пожарот избувнал околу 23.40 часот, во лимена барака на улицата Охрдиска во Кочани, во која привремено престојувал 62-годишниот В.С., жител на градот.

При гаснењето на пожарот од страна на Територијалната противпожарна единица Кочани, во бараката било пронајдено починато непознато машко лице.

Како што информираат од МВР, увид на местото ќе се врши денеска.


Во пожар во Гватемала загинаа 19 малолетници, згрижени во дом за деца – жртви на насилство


Гватемала, 8 март, 2017 - 18:44 (META) 

Најмалку 19 малолетници загинаа во пожар во Гватемала во дом за деца кои се жртви на насилство, соопштија властите.

Домот се наоѓа во општината Сан Хозе Пинула, кој е оддалечен 25 километри југозападно од главниот град на Гватемала.

Во овој центар престојувале деца на возраст до 18 години. Засега нема информации за причините за пожарот.


Пожар оштети три автомобили во Скопје


Скопје, 28 февруари, 2017 - 15:17 (META) 

Три автомобили биле зафатени од пожар вчеравечер во Скопје. Пожарот избил во еден од нив, а потоа биле зафатени и соседните автомобили, информира СВР Скопје.

Пожарот во Противпожарната бригада бил пријавен вчера, околу 20 часот, при што било кажано дека огнот зафатил три автомобили на булеварот Крсте Мисирков. Кога скопјанец го стартувал моторот на „фолксваген пасат“, од предниот дел избил оган, по што автомобилот целосно изгорел, а биле зафатени и „мерцедес“ и „сузуки свифт“ кои биле паркирани до „пасатот“.

Пожарникарите потоа го изгаснале огнот.


Десет лица загинаа во пожар во хотел на југоистокот на Кина


Нанчанг, 25 февруари, 2017 - 12:33 (META) 

Голем пожар зафати хотел кој се наоѓа во градот Нанчанг, во југоисточниот дел на Кина, и притоа загинаа 10 лица, јавуваат кинеските медиуми. Едно лице било повредено откако скокнало од прозорец од втори кат.

Спасувачката акција завршила, а пожарот најверојатно го причиниле машините за сечење градежен материјал.

Истрагата е во тек, а притворени биле седум лица.

 


Голем пожар во фабрика за рециклажа во Сиднеј


Сиднеј, 23 февруари, 2017 - 11:10 (META) 

Во фабрика за рециклажа во предградие на Сиднеј избил голем пожар, во чие гаснење учествувале повеќе од 100 пожарникари, но нема повредени.

Пожарот избил околу 9.30 часот по локално време, во фабрика која се наоѓа на околу 15 километри западно од центарот на Сиднеј, по што облак од густ чад го прекрил небото над најголемиот австралиски град.

Портпаролката на противпожарната служба на Нов Јужен Велс рече дека по неколку часа пожарот бил локализиран и дека околните објекти се евакуирани.

На драматичните снимки од местото на пожарот се гледа како се урива покривот на фабриката за рециклажа.

Засега не се соопштува причината за пожарот.


Пожар на пазар во близина на Москва


Москва, 19 февруари, 2017 - 17:20 (META) 

Голем облак од црн дим се извија над пазар во рускиот град Митишчи во близина на Москва.
Пожарот избил на површина од 4.000 квадратни километри.

Руските медиуми не пренесуваат повеќе детали освен дека пожарникарските екипи се на терен и се обидуваат да се изборат со огнената стихија.

Здесь #ад #пожар #мытищи яуза91 рынок

A post shared by Anton Marinin  (@_avmarinin) on