!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Дваесет и четири лица загинаа во пожар во училиште во Малезија


Скопје, 14 септември, 2017 - 10:18 (META) 

Најмалку 24 лица, од кои повеќето тинејџери, загинаа утринава во пожар што изби во спалните соби на исламско училиште во предградие на малезискиот главен град Куала Лумпур, соопштија властите.

– Пожарникарите бргу стигнале на местото по повикот за помош во 5.41 часот по локално време и им бил потребен еден час да го изгаснат пожарот, кој почнал да се шири и на другиот кат од двокатницата – рече шефот на полиција, Амар Синг.
Тој соопшти дека се пронајдени најмалку 24 изгорени тела, од кои 22 се деца на возраст од 13 до 17 години, и двајца наставници.

Синг соопшти дека 14 ученици и четири наставници се спасени и дека шест од нив се хоспитализирани во критична состојба.

Полицијата поведе истрага која треба да ја утврди причината за несреќата.


Во Битола опожарени три автомобили, во Пехчево кат од куќа и покрив


Битола, 12 септември, 2017 - 13:20 (META) 

Во голем пожар што се случил во Битола вчера, еден автомобил изгорел целосно, а два се опожарени, додека во Пехчево избувнал пожар во семејна куќа, кој го зафатил и покривот на соседната куќа, информира МВР.

Пожарот во Битола избувнал во 13.50 часот, кога помеѓу згради на улицата Васко Карангелески, од засега непознати причини, се запалиле сува трева и ѓубриште.

Огнот поради силниот ветер бргу се проширил кон гаражи, при што зафатил шест гаражи. Притоа во една од нив целосно изгореле автомобил „бе-ем-ве“, повеќе кубици огревни дрва и рачен алат, а опожарени биле автомобил „застава 128“ и еден мопед, како и еден „варбург“. Пожарот бил изгаснат од Територијалната противпожарна единица – Битола. Увид извршила екипа од СВР Битола.

Во Пехчево во куќа на улицата Пиринска, пак, во 16.40 часот вчера избувнал пожар на вториот кат на куќата на Н.М. (53), нанесувајќи огромни штети. Огнот го зафатил и покривот соседната куќа.

Пожарот бил изгаснат од Територијалната противпожарна единица – Берово и Територијалната противпожарна едница – Пехчево.


На дело фатен пироман кој потпалил шума во Кривопаланечко


Крива Паланка, 9 септември, 2017 - 14:02 (META) 

Полицијата вчера уапсила 29-годишен жител на кривопаланечкото село Габар, кого пожарникарите го пријавиле дека намерно предизвикувал пожар.

Како што соопшти полицијата, вчера во Габар, околу 14.30 часот, бил уапсен Ж.С. Него пожарникари од Територијалната противпожарна единица Крива Паланка, кои гаснеле пожар во тој предел, го виделе како потпалува оган, па пријавиле во Полициска станица Крива Паланка.

Против пријавениот, по целосно расчистување и документирање на случајот, ќе биде поднесена соодветна кривична пријава, известува МВР.


Дождот го изгасна големиот пожар во Хрватска кај Омиш, предизвикувачот е приведен


Омиш, 8 септември, 2017 - 13:50 (META) 

Дождот кој заврна утринава, помогна да биде речиси изгаснат големиот пожар кај градот Омиш во Хрватска, кој бил подметнат, јавуваат хрватските медиуми. Екипите од пожарникари, војници и локално население уште се борат со поединечни жаришта, односно внимаваат да не почне ново разгорување.

Припадници на хрватската армија беа испратени како помош на пожарникарите во гаснење на големиот пожар во близина на Омиш, а вклучени беа и четири канадери и еден хеликоптер.

Пожарот беснееше и вчеравечер и ноќеска, а на а терен се наоѓаа 143 пожарникари со 44 возила од сплитското, шибенското, задарското и дубровничкото подрачје.

Како виновен за предизвикување на пожарот претпладнево бил приведен 29-годишен маж, соопшти хрватската полиција.


Скопјанец загинал во пожар, кочанец се удавил во канал за наводнување


Скопје, 8 септември, 2017 - 12:22 (META) 

Две жртви на несреќи регистрирала полицијата во изминатото деноноќие, од кои едната се случила во Скопје, а втората во Кочани.

Вчера, во 16.50 часот, во атарот на селото Грдовци, С.Ј.(42) од Кочани го пронашол својот татко  Д.Ј. (70) удавен во канал за наводнување. Смртта била констатирана од лекар од итна медицинска помош, а притоа не биле забележани видливи траги на насилство. Увид извршиле јавен обвинител и увидна екипа од Полициска станица Кочани,  по што по одобрение на обвинителот, телото на починатиот било предадено на семејството за погреб.

Денеска, околу 3 часот, во стан на булеварот Јане Сандански во Скопје, од засега непознати причини избувнал пожар. При интервенцијата на пожарникарите, во станот бил пронајден починат Н.Н. (23). Смртта била констатирана од лекар од итна медицинска помош, а по наредба на јавен обвинител, телото на починатиот било предадено на обдукција.


Шест лица загинаа во пожар во Мумбај


Мумбај, 7 септември, 2017 - 14:56 (META) 

Шест лица загинаа во пожар што зафати зграда во Мумбај, соопштија денеска локалните власти.

Пожарот избувнал по експлозија на довод на гас во недовршена зграда, во која живееле работниците со нивните семејства.

Во пожарот се повредени 18 луѓе, од кои 12 се во критична состојба.

Полицијата во Мумбај ја истражува несреќата која се случила само една недела откако во градот се урна зграда во која загинаа 33 лица.


Вонредна состојба во Лос Анџелес поради големиот пожар


Лос Анџелес, 4 септември, 2017 - 10:08 (META) 

Поради големиот пожар кој го зафати поголемиот дел на Лос Анџелес, гувернерот на Калифорнија прогласи вонредна состојба.

Околу илјада пожарникари, со стотина противпожарни возила, како и девет специјализирани хеликоптери се вклучени во гаснењето на пожарот, кој досега уништи неколку станбени згради, куќи, а се приближува и до реонот на Бурбенк.

Досега на реонот на Бурбенк се евакуирани повеќе од 300 куќи, а во другиот дел од градот уште 180 поради пожарот што во саботата избувна на падините на планината Вердуго и за кратко време се рашири на повеќе од 2.000 хектари шума.


Пожар на Родос, главниот град остана без струја


Родос, 1 септември, 2017 - 20:29 (META) 

Повеќе од 20 пожарникари и доброволци го гаснат пожарот кој избувнал три километри од градот Родос, на истоимениот грчки остров.

Поради пожарот, главниот град останал без струја.

Нема информации за повредени лица, а причините за настанување на пожарот сè уште се истражуваат.


Локализирани пожарите во Зајас и во Македонски Брод


Скопје, 1 септември, 2017 - 13:15 (META) 

Дирекцијата за заштита и спасување соопшти дека пожарите во општина Зајас и во Македонски Брод се локализирани.

Локализиран е пожарот меѓу селата Зајас и Горно Строгомиште, каде што беа опожарени два хектара борова шума. Во гаснењето ангажирани биле 40 лица од Дирекција за заштита и спасување, Територијалната противпожарна бригада, АРМ, „Македонски шуми“ и доброволци.

Локализиран е и пожарот кај местото наречено Баба во атарот на селото Слатина во Македонски Брод, каде што беше опожарена површина со сува трева и нискостеблеста шума. На терен се ангажирани пет лица од „Македонски шуми“. Локализиран е и пожарот кај местото наречено Видуш во атарот на селото Девич и Локвица.

„Дирекцијата за заштита и спасување е во состојба на зголемена будност. Вработените во подрачните одделенија ја следат состојбата на целата територија на земјата и се подготвени во секој момент, доколку има потреба, да ангажираат тимови за брз одговор за гаснење пожари на отворен простор на територијата на Република Македонија“, се наведува во соопштението.


Три пожари активни во Маврово, повторно гори и кај манастирот Трескавец


Маврово, 28 август, 2017 - 17:01 (META) 

Три шумски пожари се активни во националниот парк „Маврово“.Најголем и со фронт на ширење од над седум километри е пожарот во реонот на Аџина Река на Шар Планина, а пожар има и во близина на караулата „Победа“ и месноста Стрезимир.

Во овој пожар досега се изгореле околу 300 хектари високо планински пасишта и стебла на смрека, ела и молика. Во гаснење на пожарите ангажирани се речиси сите вработени во паркот, но ветрот го отежнува локализирањето.

Вчера, на територијата на паркот беа регистрирани два шумски пожари, во близина на селото Скудриње и Рибница. Овие пожари се локализирани.

Пожар има и во близина на манастирот Трескавец кој е локализиран и манастирот е безбеден за верниците кој го посетуваат за време на празникот. Заради крајно непристапниот терен, но, и заради силината на огнот, синоќа, како и утринава интервенирале и неколку хеликоптери и канадери од АРМ, па пожарите се ставени под контрола.

Надлежните апелираат за максимално внимание, бидејќи, како што посочуваат, се поизвесно е дека пожарите намерно се предизвикуваат.

– Пожарот кај Дабница кој беше намерно запален го ставивме под контрола, но повторно беше запален и зеде огромен замав, па денеска попладне опожари и неколку викендички, овошни и лозови насади во населбата Заград. Во овој момент имаме три активни пожари, во пределот на Трескавец од западната страна, кај Горно село, каде се соочуваме со непристапен терен за гаснење, во Гостиражни, Небрегово и во делот на Сивец. Помош побаравме од ТППЕ – Битола кои ни пристигнаа со неколку пожарникари и возила. Одговорно тврдам дека овие пожари се намерно подметнати, бидејќи се видени лица како палат и бегаат – вели командирот на ТППЕ Прилеп, Станко Колески.