Се утврдува идентитетот на телото најдено во опожарена куќа во Песочан


Охрид, 19 февруари, 2018 - 13:46 (META) 

Надлежен обвинител од Основното јавно обвинителство Охрид го завршил увидот во куќата во селото Песочан, Општина Дебарца, што била опожарена вчеравечер, по што било најдено мртво тело на маж со неутврден идентитет.

На увидот присуствувало и вешто лице од областа на електротехниката, кој ќе треба да изврши вештачење на околностите за настанатиот пожар.

Идентитетот на починaтиот ќе се утврдува преку анализа на ДНК, како и преку обдукција.

Според првичните сознанија станува збор за 82-годишен жител на селото Песочан, општина Дебарца, кој живеел сам во станбениот објект.​


Неподвижна охриѓанка настрадала во пожар во нејзиниот стан


Охрид, 12 февруари, 2018 - 9:46 (META) 

Во пожар што избувнал во нејзиниот стан на улицата Туристичка во Охрид, утрово настрадала 70-годишната М.Д., соопшти СВР Охрид.

Жената живеела сама и била неподвижна. Причините за пожарот, кој избувнал околу 7.15 часот денеска, засега се непознати.

Jавeн обвинител издал наредби за прибирање на траги од станот и ангажирани се вешти лица за вештачење на електричната инсталација во станот. Исто така, издадена е и наредба за вршење обдукција на телото на починатата.​


Жена и 17-годишно момче загинале во пожар во Битола


Битола, 29 јануари, 2018 - 14:23 (META) 

Во семејна куќа во Битола рано утрово избувнал пожар во кој, според првичните информации настрадале жена и 17-годишно момче, соопшти Јавното обвинителството.

Оттаму информираат дека надлежен обвинител од ОЈО Битола врши увид на местото, заедно со екипа од Министерството за внатрешни работи и Противпожарната служба.

„Надлежниот јавен обвинител издаде наредби за фотографирање и обезбедување на местото на настанот, како и за вршење на сите потребни вештачења во насока на откривање на причините за пожарот. Издадена е наредба за обдукција на пронајдените тела и се преземаат други дејствија неопходни за расветлување на случајот“, стои во соопштението.

За помалку од еден недела, ова е втора ваква трагедија. На 25 јануари во пожар во куќа на улицата Гоце Делчев во Тетово животите ги загубија 38-годишна жена и нејзините четири деца.


Целосно изгоре куќа во струмичко Дукатино поради неисправен оџак


Струмица, 28 јануари, 2018 - 12:57 (META) 

Во пожар вчера целосно изгорела куќа во селото Дукатино, Струмичко, сопственост на 34-годишниот З.Р., соопшти полицијата.

Пожарот избувнал вчера ноќ, околу 2.20 часот, а бил изгаснат од територијалната противпожарна бригада.

Во пожарот нема повредени лица.

Увид на местото извршиле екипи од Секторот за внатрешни работи Струмица и од Дирекцијата за заштита и спасување.

Според полицијата, пожарот избувнал поради неисправен оџак поставен помеѓу детската и спалната соба.


Пожар пеплоса куќа во Ново Лисиче, зафатена и соседната


Скопје, 27 јануари, 2018 - 11:58 (META) 

Синоќа околу 22 часот избувнал пожар во двокатна куќа на улицата Михаил Глинка, во скопската населаба Ново Лисиче, сопственост на 59-годишниот Б.Џ., информира полицијата.

Во пожарот нема настрадани и повредени лица.

Куќата целосно изгорела во пожарот, а огнот се проширил и на соседната куќа, сопственост на С.А. (46), при што целосно бил опожарен кровот и дел од инвентарот во приземјето.

Пожарот бил изгаснат десетина минути по полноќ од екипа на скопската противпожарна бригада.

Се преземаат мерки за утврдување на причините за пожарот.


Владата финансиски ќе го помогне семејството Зулбеари


Скопје, 26 јануари, 2018 - 15:24 (META) 

Поттикната од трагичниот настан во тетовската населба Поток, во кој семејството Зулбеари во пожар ги загуби мајката и четирите малолетни деца, што длабоко ја потресе целата македонска јавност, Владата денеска ја свика 51. седница и донесе заклучок за доделување на еднократна парична помош, информираат од таму.

„Покрај паричната помош во висина од 300 илјади денари за семејството Зулбеари, на седницата е договорено владина делегација да го посети семејството и непосредно да го изрази длабокото сочувство за оваа трагедија“, се вели во соопштението на Владата.

Владата на денешната седница донела и неколку кадровски решенија. За вршител на должноста, директор на Државниот комунален инспекторат беше именувана Елизабета Јованчева. За директор на Културниот центар во Истанбул, Владата го именуваше Рамадан Рамадани, досегашен вршител на должноста во истата институција.


41 лице загина во пожар во јужнокорејска болница


Сеул, 26 јануари, 2018 - 9:43 (META) 

Во пожарот кој избувна рано утринава во болница во јужнокорејскиот град Мирјанг загина 41 лица, а уште осумдесетина се повредени.

Светските медиуми пренесуваат дека постојат сомневања дека пожарот избувнал на првиот кат од болницата, во просториите за итни случаи. Пожарникарите евакуирале околу 200 лица кои се наоѓале во главната зграда на болницата.

Мирјанг се наоѓа околу 270 километри југоисточно од јужнокорејската престолнина Сеул. Јужнокорејскиот премиер Ли Нак-јеонг наложил да се употреби сета можна опрема за гаснење на пожарот и пребарување на болницата за да се спасат што повеќе човечки животи.

Шефот на пожарникарите Чои Ман-Ву вели дека засега не е познато што го предизвикало пожарот, а ситуацијата да биде полоша, во болницата немало инсталирани противпожарни прскалки.

Пожарот во Мирјанг доаѓа само еден месец откако огнена стихија однесе 29 животи во осумкатница во центарот на градот Јачеон.


Обвинител врши увид во куќата во Тетово, каде загинаа мајка и нејзините деца


Тетово, 25 јануари, 2018 - 10:55 (META) 

Надлежниот обвинител од Основното јавно обвинителство – Тетово врши увид во двокатната куќа на улица Гоце Делчев во Тетово, каде што ноќеска избувнал пожар при што, според првичните информации, настрадале жена и четири деца.

„Надлежниот обвинител во моментов е на местото на настанот и во соработка со увидната екипа од Полициската станица – Тетово и Противпожарната служба врши увид. Обвинителот повика тим за форензика од Скопје и екипа на ЕВН кои треба да помогнат во утврдување на околностите и причините за пожарот. Издадена е наредба за обдукција на пронајдените тела и се преземаат други дејствија неопходни за расветлување на случајот“, информираат од Обвинителство.


Мајка и четири деца загинаа во пожар во Тетово


Тетово, 25 јануари, 2018 - 10:49 (META) 

Во пожар во куќа на улицата Гоце Делчев во Тетово утрово животите ги загубиле 38-годишна жена и нејзините четири малолетни деца, дознава „Мета“.

Според неофицијални информации од МВР, бројката на загинати не може да се прецизира сè додека не заврши увидот. Куќата била постара и има огромно количество материјал, кој треба да се дорасчисти за да се види дали нема и други загинати или поведени.

Увид вршат јавен обвинител и увидна екипа од СВР Тетово.

Според неофицијални информации од соседите, жената и нејзините деца спиеле на горниот кат од куќата кога избувнал пожарот и не можеле да избегаат. Децата биле на возраст помежу 4 и 13 години.


Oсуммина загинати во пожар во зграда во Португалија


Лисабон, 14 јануари, 2018 - 10:35 (META) 

Во пожар што вчеравечер зафатил еден кат од зградата на Граѓанскиот дом во Вила Нова да Раиња, приградска населба на Тондела, околу 250 километри северно од Лисабон, загинаа најмалку осум лица, а најмалку 35 се повредени, објавија локалните власти.

Пожарот избувнал откако експлодирал котел за парно греење, а во тој момент во Граѓанскиот дом имало околу 60 луѓе, кои учествувале на аматерски турнир во картање или гледале фудбал на телевизија. Огнот веднаш по експлозијата го зафатил покривот и почнал бргу да се шири, предизвикувајќи паника.

Според градоначалникот на Тондела, Жосе Антонио Жесус, во зградата многу бргу се насобрал јаглероден моноксид. Според еден весник, стаклената волна во покривот веројатно го засилила ширењето на пожарот.  Во објектот имало многу чад, па луѓето биле дезориентирани, а некои од нив паѓале едни врз други при обидот да избегаат по скалите.

Пожарот бил изгаснат за еден час, а во интервенцијта учествувале повеќе од 170 пожарникари и три хеликоптери со кои повредените биле транспортирани во блиската болница.