Возач на скутер удрил во пливач во Охридско Езеро и избегал


Струга, 9 август, 2018 - 15:37 (META) 

Пливач вчера попладнето бил удрен од воден скутер во Охридско Езеро кај населбата Езерски лозја и бил повреден, а човекот што управувал со скутерот избегал без да му укаже помош.

Како што соопшти СВР Охрид, полицијата во Струга трага по човекот што го управувал скутерот што го повредил 50-годишниот Р.Д. од струшкото село Ливада. Тој пливал на 500 метри од брегот кај населбата Езерски Лозја, а откако скутерот избегал, повредениот од друго лице бил пренесен во болницата во Струга.


Ловец со сачми застрелал соселанец што собирал смрекинки


Берово, 1 јануари, 2018 - 12:49 (META) 

Во инцидент вчера кај малешевското село Будинарци, 63-годишен жител на селото бил застрелан и тешко повреден со сачми во двете нозе. Во него пукал негов соселанец, 36-годишниот И.П., кој мислел дека нишани во дивеч.

Како што извести СВР Штип, ранетиот С.К. првин бил пренесен во Здравствениот дом во Берово, а потоа поради сериозноста на повредите во префрлен во Клиничката болница во Штип.

Инцидентот се случил вчера околу пладне, кога И.П., кој бил на лов во месноста Лесови Ливади, во еден момент се посомневал дека на смрека на околу 60 метри од него има дивеч и испукал патрон. Но на дрвото немало птици, туку неговиот соселанец, кој собирал смрекинки.


Малолетник греел куршум со леткум, детонацијата му го повредила показалецот


Гостивар, 5 ноември, 2017 - 16:01 (META) 

Малолетник во гостиварското село Зубовце вчеравечер добил повреди на показалецот, откако експлодирал куршумот што го загревал со леткум.

Како што соопшти полицијата, вчера, околу 21 часот, во куќата на неговиот дедо во Зубовце, 10-годишниот малолетник, додека бил сам во една од собите, со леткум загревал куршум од гасен пиштол во пределот на капислата, при што куршумотт пукнал и му нанел повреда на показалецот на левата рака.

Повреденото дете е пренесено во Медицински центар – Гостивар и по укажаната лекарска помош е пренесено во Клинички центар во Скопје.


Македонски државјанин повреден во нападот во Барселона, потврди МНР


Барселона, 18 август, 2017 - 9:31 (META) 

Македонски државјанин е повреден во терористичките напади што вчера се случија во Барселона. Како што соопшти утрово Министерството за надворешни работи, македонскиот државјанин се наоѓа во болница во Барселона и е надвор од животна опасност.

„Согласно комуникацијата остварена со надлежните служби, македонската амбасадата во Шпанија дојде до информација дека еден македонски државјанин во моментот се наоѓа во болница во Барселона. Лицето во моментот на извршување на нападот се наоѓало во непосредна близина и се здобило со скршеница на зглобот на ногата. Лицето се наоѓа вон животна опасност и е третиран од страна на шпанските медицински служби“, стои во соопштението од МНР.

Претставник од македонската амбасада, веднаш по добиената информација, заминал во болницата каде се наоѓа повредениот македонски државјанин.

Во нападот, извршен со комби, кое влетало во пешаци во близина на плоштадот „Каталуња“, во центарот на Барселона, загинаа 13 лица, а десетици се повредени.

Неколку часа, по нападот во Барселона, се случил и втор напад, во градот Камбрил, исто така, изведен со возило.

Шпанската полиција соопшти дека убила петмина осомничени терористи во Камбрил, кои носеле појаси со експлозив и се поврзуваат со првиот напад во Барселона.


Експлозија и пожар во стан во Охрид, еден повреден, седум автомобили оштетени


Охрид, 9 август, 2017 - 11:55 (META) 

Едно лице било потешко повредено во експлозија што вчера во 22.24 часот се случила во стан на улицата Сатеска во Охрид, соопшти денеска полицијата.

Како што информираат од СВР Охрид, од експлозијата, која најверојатно била предизвикана од плинска боца, дошло до пожар, кој бргу ја зафатил покуќнината и почнал да се шири низ собите. Сопственикот на станот со тешки повреди бил префрлен на Хируршкото одделение во Општата болница во Охрид.

Од пожарот и експлозијата, покрај штетите на мебелот и на прозорците на станот, оштетени биле и седум возила, паркирани во близина на зградата.


Заев го посети Села во тетовската болница


Тетово, 4 мај, 2017 - 16:09 (META) 

Претседателот на СДСМ, Зоран Заев, попладнево го посети лидерот на Алијансата на Албанците, Зијадин Села, кој по повредите што му беа нанесени во Собранието, сè уште закрепнува во Ургентниот центар при Клиничката болница во Тетово. По посетата, Заев изјави дека на Села му се подобрува состојбата и дека со него разговарал за идните чекори околу придвижувањето на политичките процеси во Македонија.

Заев изјави дека тој лично очекува претседателот Иванов да му го додели мандатот за составување нова влада во рок од десет дена.

– Писмото за доделување на мандатот до претседателот Иванов веќе е стигнато. Најверојатно наредната седмица, заедно со лидерите на политичките партии кои се дел од новото парламентарно мнозинство, ќе одиме кај Иванов и очекувам дека тој ќе го додели мандатот, а за возврат, како што бараше тој, ќе му ја гарантираме уставноста, правната држава, унитарноста. Тоа се работите што го загрижуваа Иванов, а беа поврзани со платформата на Албанците, иако за мене оваа загриженост беше неразумна – рече Заев.

Лидерот на СДСМ не прецизираше кога Собранието ќе продолжи да заседава и рече дека новиот спикер, Талат Џафери, најпрвин треба да увиди дали највисокиот законодавен дом ги исполнува условите за одржување седници.

– Собранието ќе почне да заседава откако новиот спикер, Талат Џафери, ќе изврши скенирање на функционалноста на Собранието, кое мора што поскоро да почне со работа, каде ќе се избира новата влада и каде ќе треба да се одложат и да се закажат локалните избори – изјави Заев.

На медиумите не им беше дозволено да присуствуваат на средбата во тетовската болница.


Воз удрил во автомобил близу Гостивар, возачот повреден


Гостивар, 18 април, 2017 - 14:44 (META) 

Во железничка несреќа на патниот премин преку пругата меѓу стојалиштето Тумчевиште и железничката станица во Гостивар, воз вчера удрил во автомобил, при што возачот е повреден, соопшти СВР Тетово.

Возот кој сообраќал од Скопје кон Кичево удрил во „сеат леон“ со тетовски таблички, по што возачот со тешки телесни повреди е однесен во медицинскиот центар во Гостивар. Увид извршила екипа од полициската станица во Гостивар, а железничкиот сообраќај бил во прекин од 18.20 до 21.20 часот.


Еден повреден во експлозија во Русија


Ростов, 6 април, 2017 - 12:05 (META) 

Во експлозија во близина на училиште во рускиот јужен град Ростов, едно лице е повредено, соопштија денеска локалните власти.

Според последните информации, повреден е бездомник, а не работник на обезбедување, како што првично беше јавено.

– Бездомникот го пронашол пакетот на улица околу 6.30 часот по локално време и одлучил да ја провери неговата содржина. Експлозијата се случила кога сакал да вклучи батериската ламба во која бил сместен експлозивот. Раката му е целосно разнесена – изјави еден од претставниците

„РИА Новости“ наведува дека прстите му се целосно разнесени, а добил и повреди на стомакот.

Училиштето ја откажа наставата, а областа е евакуирана.


Почина маж повреден во терористичкиот напад во Лондон


Лондон, 24 март, 2017 - 10:01 (META) 

Како последица на ранување во терористичкиот напад во Лондон, синоќа почина 75-годишен маж. Со тоа бројот на загинатите се зголеми на пет лица, а 40 се повредени.

Полицијата вчера го соопшти идентитетот на напаѓачот. Станува збор за 52-годишниот Халид Масуд од Кент, роден во Велика Британија, кој претходно им бил познат на разузнавачките агенции. По претресите во Бримингем, каде наводно живеел и изнајмил автомобил, полицијата уапсила осум лица, а одговорноста за нападот ја презеде таканаречената Исламска држава.

Во центарот на Лондон синоќа се собраа повеќе илјади лица за да им оддадат почит на жртвите на нападот. Додека од целиот свет пристигаат осуди за нападот и пораки за поддршка, нивото на опасност останува сериозно, изјави премиерката Тереза Меј.

Британската полиција со години подготвувала планови за одбрана од терористички напади, како што беше нападот во Лондон, но повеќепати повтори дека ќе биде тешко да се спречи напад на „волк самотник“ со едноставно оружје, како што е автомобил и нож.


Претепан снимател на „Анадолија“ во Белград


Белград, 5 јануари, 2017 - 15:39 (META) 

Снимател на турската новинска агенција „Анадолија“, Нихад Ибрахимкадич, рано утринава беше повреден при напад во близина на железничката станица во Белград. Снимателот е префрлен на одделението за интензивна нега во Воено-медицинската академија.

Како што наведе агенцијата „Анадолија“, непознатите напаѓачи го нападнале Ибрахимкадич од зад грб, а за време на нападот не зборувале ништо и не зеле никакви вредни предмети.

Ибрахимкадич добил тешки телесни повреди.

Снимателот е нападнат по неговото враќање од Босна и Херцеговина, каде што бил на новогодишно отсуство. Агенцијата „Анадолија“ го осуди нападот на нејзиниот вработен и ги повика сите надлежни служби во Србија што побргу да го расчистат случајот.