Во сообраќајна несреќа во Турција загинаа 17 мигранти


Анкара, 30 март, 2018 - 10:09 (META) 

Најмалку 17 лица загинаа, а 36 се повредени во сообраќајна несреќа на минибус во источна Турција, соопшти турската полиција.

Турските медиуми јавуваат дека минибусот превезувал илегални мигранти од Пакистан, Авганистан и Иран.

Во минибусот, кој бил регистриран за 14 патници, имало повеќе од 50 мигранти. Полицијата ги истражува причините за несреќета.


Двајцата повредени војници се во стабилна состојба


Скопје, 22 март, 2018 - 14:16 (META) 

Двајцата повредени војници се со прострелни рани и повреди на левата натколеница, информираше денеска министерот за здравство Венко Филипче, по нивната посета на Клиниката за трауматологија, ортопедски болести, анестезија, реанимација и интензивно лекување и ургентен центар.

– Едниот војник е на 28, а другиот е на 37-годишна возраст. И кај двајцата ќе се направи интервенција во текот на попладневните часови – изјави Филипче

Двајцата професионални војници на АРМ се повредија утринава во касарната „Кузман Јосифовски-Питу“ во Тетово.

Според првичните информации, при чистење на митралез испукан е еден куршум при што М.Ј. и В.Ш. добиле со прострелни рани.


Четири девојки се повредени во сообраќајна несреќа на патот Штип – Струмица


Штип, 6 јануари, 2018 - 13:05 (META) 

Утрово околу 03.50 часот на магистралниот пат Штип – Струмица се случила сообраќајна несреќа во која, автомобил „БМВ“ со штипски регистарски ознаки, управувано од Д.З. (21) од Штип, излетало од патот и удрило во две дрва кои се скршиле и паднале, при што бил оштетен автомобил „пежо 206“.

По несреќата, возачот и сопатничките М.Д. (19), М.П. (19), Т.Н. (18) и З.П. (19), сите од Штип, биле пренесени во болницата во Штип, каде што им била укажана лекарска помош. Поради сериозноста на повредите М.Д. била пренесена во Комплексот клиники „Мајка Тереза“ во Скопје.

Возачот Д.З. е задржан на испитување во болницата во Штип. Увид на местото на настанот, по овластување на Јавен обвинител, извршила екипа од СВР Штип.


Момчето во кое беше пукано во Чаир, им подлегнало на повредите


Скопје, 20 декември, 2017 - 20:00 (META) 

Момчето во кое беше пукано во Чаир им подлегнало на повредите, информираше директорот на Клиниката за трауматологија, ортопедски болести, анестезија, реанимација, интензивно лекување и Ургентен центар (ТОАРИЛУЦ), Илир Хасани. Тој додаде дека лекарите вршеле 45-минутна реанимација на Б.И (24), но безуспешно.

Дежурен јавен обвинител од Основното јавно обвинителство Скопје заедно со увидна екипа на Министерството за внатрешни работи, врши увид на местото на настанот каде денеска околу 18 часот, Б.И беше застрелан.

„Првичните сознанија се дека пукањето следело по вербална расправија помеѓу сега починатиот и сторителот, по што сторителот посегнал по огнено оружје и го застрелал 24-годишното момче. Од здобиените повреди кај жртвата настапила смрт. Сторителот се дал во бегство. По наредба на јавен обвинител се подигаат траги од лице место кои ќе бидат предмет на обработка. Издадена е и наредба за обдукција на починатото лице“, се вели во соопштението на Јавно обвинителство.

Двајца работници повредени при градежни работи на автопатот Кичево – Охрид


Кичево, 23 октомври, 2017 - 12:18 (META) 

Двајца градежни работници се повредени при изведување градежни работи кај местото Лавчани на делница на автопатот Кичево – Охрид.

Како што соопшти МВР, работниците М.А. (53) од Дебар и В.Љ. (57) од селото Могорче, Дебарско, биле удрени од црево што било под дејство на компримиран воздух. Повредените биле пренесени во Медицински центар Кичево каде што им била укажана лекарска помош. Кај М.А. биле констатирани тешки телесни повреди на главата, по што бил препратен во Ургентен центар Скопје, а кај В.Љ. биле констатирани телесни повреди и по укажаната лекарска бил пуштен на домашно лекување.

Увид на местото на настанот извршила екипа од надворешната канцеларија за криминалистички работи Кичево. Се преземаат мерки за целосно расчистување на случајот.


Момче починало откако статива му паднала врз главата


Скопје, 14 октомври, 2017 - 13:09 (META) 

Во Градската општа болница „8 Септември“, вчера починало 19-годишно момче Б.С од село Ропалце, Кумановско, информираат од МВР.

Момчето во 14.30 часот било донесено со тешка повреда на главата откако на стадионот во село Сарај во Скопје, се фатил со рацете за стативата од голот, по што стативата се скршила, Б.С. паднал, а врз неговата глава паднала стативата.

МВР презема мерки и активности за расчистување на случајот.


Градоначалникот на Боговиње, Хазби Идризи, им подлегна на повредите од огнено оружје


Тетово, 6 мај, 2017 - 11:55 (META) 

Градоначалникот на Општина Боговиње, Хазби Идризи, им подлегнал на повредите откако утрово бил застрелан со огнено оружје, потврдуваат од Клиничкиот центар во Тетово за „Мета“.

Неофицијално, убиството го извршил вработен во Општината, кој, наводно, добил отказ од работа. По убиството, А.Ќ. се обидел да се самоубие, пукајќи си во слепоочница. Тој со возило на итната медицинска помош бил пренесен во Клиничкиот центар во Скопје на КАРИЛ.

Полицијата работи на расветлување на случајот и се очекуваат и подетални информации.


Албански државјанин тешко повреден во Порој


Тетово, 14 април, 2017 - 16:55 (META) 

Триесет и едногодишниот Д.Ц., албански државјанин, вчера во тетовското село Порој бил тешко повреден од страна на Е.М., исто така државјанин на Република Албанија, соопшти МВР.

Случајот во СВР Тетово вчера во 9.30 часот го пријавиле од тетовскиот медицински центар, каде бил донесен Д.Ц., кој, наведуваат, додека бил во контактибилна состојба, кажал дека бил удрен од страна на Е.М. од Република Албанија. Повредениот поради сериозноста на повредите, од тетовската болница како итен случај е пренесен во Ургентен центар Скопје.

„Полициски службеници од СВР Тетово излегле на местото на настанот во село Порој, Тетовско, каде во помошна просторија на плацот сопственост на А. К. биле пронајдени доказни материјали кои ќе бидат доставени за вештачење. На местото на настанот затекнати биле лицата В.Н. (39) и А.К.(42), двајцата од село Порој, кои го забележале повредениот и го пренеле во медицинскиот центар Тетово. Со нив бил извршен разговор во СВР Тетово, а за тоа време А.К. добил СМС-порака од непознато лице од Албанија (брат на повредниот), кој како можен сторител го посочил Е.М. од Албанија, за кого е распишан централен распис“, стои во билтенот.

СВР Тетово презема мерки за расчистување на случајот.


Со нож нападнати двајца тетовци


Тетово, 20 март, 2017 - 12:39 (META) 

Двајца тетовци на возраст од 26 и од 30 години, ноќеска биле нападнати со нож, при што добиле повреди по вратот, грбот и на екстремитетите. Двајцата повредени, со возило на итна медицинска помош, биле пренесени во тетовската клиничка болница. Помладиот од нив, поради сериозноста на повредите, префрлен е во Клиничкиот центар во Скопје.

Осомничени за нападот се 34-годишен жител на Тетово и неговиот две години помлад брат. Двајцата се приведени и задржани во полициската станица во Тетово. Напаѓачите и повредените претходно физички се пресметале, а инцидентот се случил на улиците Браќа Миладинови и Благоја Тоска во Тетово.

Извршен е комплетен увид, пронајдени и подигнати се траги за вештачење, како и еден нож на расклопување.Се преземаат мерки и активности за целосно расчистување на случајот, по што ќе следува соодветен поднесок.


Девет деца се повредени во сообраќајна несреќа во Романија


Букурешт, 20 март, 2017 - 11:09 (META) 

Mинибус што превезувал ученици во југозападниот дел на Романија излетал од патот, при што најмалку девет деца се повредени, јавуваат романските медиуми.

Повредените деца биле пренесени во болница и сè уште нема информации за нивната здравствена состојба. Во моментот на несреќата во минибусот се наоѓале 18 деца.

Возачот во полиција изјавил дека поради премореност изгубил контрола над возилото и излетал од патот.