!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Комби влета во ресторан во Лос Анџелес, девет лица се повредени


Лос Анџелес, 31 јули, 2017 - 10:29 (META) 

Девет лица се повредени во Лос Анџелес откако комби се судрило со камионет и влетало во ресторан, јавуваат локалните медиуми.

По несреќата на булеварот Пико, во болница се пренесени осум лица, соопшти противпожарната служба на Лос Анџелес на „Твитер“ и додаде дека деветтото повредено лице е пожарникар, кому не му било потребно хоспитализирање.

Американските медиуми наведуваат дека несреќата ги имала карактеристиките на нападите на исламските екстремисти кои претходно беа изведени во Европа и во Израел.

– Станува збор за сообраќајна незгода, ништо намерно – соопшти поручникот Џим Луис пред полицијата во Лос Анџелес.


Се урна зграда во Истанбул, едно лице загина, петмина се повредени


Истанбул, 13 јануари, 2017 - 16:01 (META) 

Во истанбулската населба Зејтинбурн се урна зграда, а како што пренесува турската телевизија „Ен-ти-ви“, едно лице загина, а петмина се повредени.

Зградата која се урнала се наоѓа во европскиот дел на Истанбул, а во моментот на уривање немало луѓе бидејќи во тек е процес на санирање.

Настраданите биле случајни минувачи.

На местото има спасувачки екипи и итна помош, јавуваат медиумите.


Исламска држава најверојатно стои зад нападот во Истанбул


Истанбул, 29 јуни, 2016 - 8:31 (META) 

Триесет и шест загинати и 147 повредени е последниот биланс од синоќешниот терористички напад на истанбулскиот аеродром „Ататурк“.

Според првичните анализи, нападот кој беше извршен синоќа околу 22 часот, најверојатно е дело на припадниците на Исламска држава, соопшти турскиот премиер Бинали Јилдирим.

Тој рече дека досега никој ја нема преземено одговорноста за нападот, но оти сите докази укажуваат дека е дело на ИД. Меѓу загинатите има и странци, но засега не се откриваат повеќе детали.
Како што соопштија турските власти, напаѓачите, кои со такси пристигнале на аеродромот, прво отвориле оган врз патниците и обезбедувањето на влезот од меѓународниот терминал на аеродромот, а потоа го детонирале експлозивот што го носеле на себе.

Турскиот претседател Реџеп Таип Ердоган ја повика меѓународната заедница во „заедничка борба“ против тероризмот. Западните сојузници на Турција, вклучувајќи ги и САД, најостро го осудија нападот.

Ова е најсмртоносниот напад на Истанбул од почетокот на годинава. Во последните шест месеци градот беше трипати погоден од терористички напади, од кои два беа дело на ИД, а еден на курдска милитантна организација.


26 загинати и 136 повредени во нападите во Брисел – ИД ја презеде одговорноста


Брисел, 22 март, 2016 - 13:30 (META) 

Вкупната потврдена бројка на загинати во нападите на аеродромот и на метро-станиците во Брисел се искачи на 26, a повредени се 136 лица. Одговорноста за нападот ја презеде Исламска држава.

ИД своето соопштение го објави преку својата новинска агенција „Амак“, јавуваат египетските медиуми. Либанската милитантна група Хезболах соопшти дека Европа се наоѓа во вкрстениот оган на „одредени режими“, исто како што тоа се случува во Сирија и на Блискиот Исток.

Бриселскиот метро-оператор СТИБ-МИВБ на „Твитер“ потврди дека 15 лица биле убиени, а 55 повредни во експлозијата што се случи на метро-станицата Малбек.

Белгиската министерка за здравство, Махје де Блок, потврди дека има 11 лица загинати во нападот на аеродромот „Завантем“ и 81 повреден. Бриселскиот аеродром ќе биде затворен до утре во 6 часот наутро.

Федералниот обвинител Фредерик ван Лео изјави дека еден бомбаш самоубиец активирал експлозив на аеродромот во одделот за патници во делот за полетување. Втората експлозија на аеродромот е најверојатно од автомобил бомба, но тоа сè уште не е потврдено.

Станицата Малбек се наоѓа во близина на зградата на Европската комисија и на Европскиот совет. Европската комисија јави дека минува на портокалово ниво на тревога, што значи дека пристап во институциите на ЕУ имаат само вработени лица.

Белгиските власти прогласија највисоко четврто ниво на сигурност во целата земја по експлозиите на аеродромот и на метро-станиците. Знамињата во Брисел се спуштени на половина копје, во знак на жалост за жртвите.

Поради моменталната безбедносна ситуација во Брисел, властите го затворија целиот јавен превоз.

Безбедносните мерки се заострени во цела Белгија, Франција, Лондон и во Њујорк.

Од македонската амбасада во Брисел за „Мета“ велат дека во градот постојано се слушаат сирени на полициски возила и на возила за итна помош.

Во Белгија живее бројна македонска заедница, но од амбасадата велат дека засега немаат информации за повредени или загинати Македонци во експлозиите.

Минатата недела во Брисел беше уапсен и еден од главните осомничени за терористичките напади во Париз, Салах Абдеслам.


Тешко повреден 60-годишен битолчанец во сообраќајката крај Битола


Битол, 30 ноември, 2014 - 12:42 (META) 

Тешко е повреден шеесетгодишен битолчанец во синоќешната сообраќајка на патот Битола – Прилеп.

Сообраќајката се случила во саботата, околу 19.45 часот, на раскрсницита кај селото Кукуречани, кога се судриле „бе-ем-ве“ во тетовски регистраски таблички, управувано од жител на Демир Хисар, и „опел корса“ со битолски таблички.

Повредениот Т.Б. го управувал „опелот“ и при судирот добил фрактура на ногата и набиеници по телото, а повредена е и неговата сопруга М.Б. (55), информираат од СВР Битола.

А.Б.