„ДМ“ повлекува бебешки кашички, нема информација дека се увезени во Македонија


Скопје, 10 јануари, 2018 - 10:36 (META) 

Германскиот синџир продавници „Дрогери Маркт“ (ДМ) превентивно повлекува од пазарот кашички од јагода, малина и јаболка со нето-тежина 190 грама, наменети за деца постари од четири месеци, чиј рок на траење е до 5 јули 2019 година.

Како што информира Агенцијата за храна и ветеринарство (АХВ), досега нема нотификација дека овие кашички биле увезени во Македонија.

„ДМ“ вчера соопшти дека при контрола на тегличка е утврдено присуство на остатоци од средство за миење што содржи хлор.


Генералното собрание на ОН гласаше против одлуката на САД за Ерусалим


Њујорк, 21 декември, 2017 - 21:01 (META) 

Генералното собрание на Обединетите нации (ОН) ја усвои резолуцијата со која се бара од САД да ја повлечат одлуката за признавање на Ерусалим за главен град на Израел. Резолуцијата ја поддржаа 128 членки на ОН, меѓу кои и Македонија, девет гласаа „против“, 35 беа „воздржани, а 21 членка воопшто не гласаа.

Портпаролот на палестинскиот претседател Махмуд Абас по гласањето соопшти дека „ова е победа за Палестина“.

– Ќе продолжиме со напорите во ОН и на сите меѓународни форуми за ставање крај на оваа окупација и создавање на наша палестинска држава со престолнина Источен Ерусалим – изјави портпаролот Набил Абу Рудејна, пренесуваат светските агенции.

Израел ја отфрли одлуката на ОН и му се заблагодари на претседателот на САД Доналд Трамп за „недвосмислената позиција во корист на Ерусалим“.

„Израел ја отфрла одлуката на ОН и истовремено е задоволен од фактот што многу земји не гласаа за поддршка на оваа одлука. Израел се заблагодарува на американскиот претседател Доналд Трамп за недвосмислената позиција во корист на Ерусалим и на земјите кои гласаа заедно со Израел и со вистината“, се наведува во реакцијата од канцеларијата на
израелскиот премиер, Бенјамин Нетанјаху.

Пред гласањето американскиот претседател Доналд Трамп им се закани на земјите-членки на ОН кои ќе гласаат за резолуцијата дека ќе им ја укине финансиската помош. Амбасадорката на САД во ОН, Ники Хејли испрати писмо во кое наведе дека Трамп побарал од неа да ги забележи имињата на земјите кои ќе гласаат за резолуцијата.

„Денешното гласање ќе влијае на начинот на кој Американците гледаат на ОН и на земјите кои не ги почитуваат САД и ОН“, порача Хејли.

Инаку, во нацрт-резолуцијата се реафирмираат десетте претходни резолуции на Светот за безбдност на ОН за Ерусалим, кои датираат уште од 1967 година, вклучувајќи го и барањето дека одлуката за конечниот статус на градот мора да биде донесена во директни преговори помеѓу Израел и Палестина.


ДЗС: Излеаната вода од реките се повлекува, водостојот се нормализира


Скопје, 3 декември, 2017 - 14:57 (META) 

Водостојот на реките е во опаѓање, а водата на излеаните места веќе почнува да се повлекува, информираат од Дирекцијата за заштита и спасување (ДЗС).

Од дирекцијата додаваат дека од страна на единиците на локална самоуправа и на јавните комунални претпријатија, преземени се сите активности за нормализација на состојбата со излевањето на водотеците. Според ДЗС, во моментот нема потреба од ангажирање на силите и на средствата на Дирекцијата за заштита и спасување доколку не дојде до влошување на состојбата и на хидрометеоролошките услови.

Управата за хидрометеоролошки работи, исто така, информира дека според податоците од хидролошките станици низ земјата, се забележува намалување на водостојот на реките. Исклучок се поединечни хидролошки станици кои се лоцирани во долните теченија на реките и кај кои е регистрирано извесно зголемување, што е очекувано.

„И овие зголемувања се незначителни, така што се очекува нивно постепено стабилизирање. Во текот на денешниот ден се очекува врнежите да престанат и водостојот на реките низ земјава постепено да почне да се намалува“, велат од УХМР.


Радијата ја повлекуваат кампањата „пре-еманципирани жени“ по реакцијата на ААВМУ


Скопје, 2 ноември, 2017 - 19:56 (META) 

„Сити радио“, „Клуб ФМ“ и „Метрополис радио-мрежа“ ја повлекуваат кампањата наречена „пре-еманципирани жени“, која неколку дена беше емитувана на овие три радио-станици.

Повлекувањето на аудиопораките од кампањата следува откако Агенцијата за аудио и аудиовизуелни медиумски услуги (ААВМУ) констатираше дека преку нив се шири мизогинија и сексизам.

Од радио-станиците велат дека воопшто немале намера да го навредат интегритетот на жената, ниту пак некого да дискриминираат.

„Напротив, целта на овој, за нашата публика нов, медиумски наратив, беше сите кои претеруваат, со посебен акцент на оние кои газат сè пред себе (за кои впрочем е и наменета кампањата), да се потсетат што е етичко, што сакаат, колку можат и колку треба. Овие медиуми имаат огромна публика која ја разбира, ја поддржува и се забавува со нестандардната реторика на овие џинглови, но, почитувајќи ја и останатата публика, која јасно се спротивстави на кампањата, медиумите одлучија да одговорат со извинување до сите кои се почувствувале посочени и навредени. За таа цел, овие три радија ја повлекуваат кампањата од етер“, стои во известувањето на трите радио-страници објавено на „Фејсбук“.


Кој и под кои услови во Македонија може да нареди прислушување на дипломати


Скопје, 23 август, 2017 - 9:34 (META) 

Прислушувањето на странски дипломати, во чии редови без исклучок има и разузнавачи, според Законот за следење на комуникации се врши на барање на министрите за внатрешни работи и за одбрана, а го одобрува судија на Врховен суд.

Во Законот за следење на комуникациите условите и постапката за прислушување е уредена во две глави. Едната се однесува на сторители на кривични дела, а другата (Глава 3) на услови и постапка за следење на комуникациите за заради заштита на интересите на безбедноста и на одбраната на земјата, под која, наверојатно може да се стават евентуалните „законски“ следења на комуникациите на странските претставници.

Во тој случај, според членот 29 од Законот, судот може да нареди следење на комуникациите кога постојат основи на сомневање дека се подготвува извршување на кривично дело против државата, против вооружените сили или против човечноста и меѓународното право.

„Освен во случаите од ставот 1 на овој член, судот може да нареди следење на комуникациите и кога се подготвува, поттикнува, организира или учествува во вооружен напад против Република Македонија или во онеспособување на нејзиниот безбедносен систем да ги врши своите функции, кога на друг начин не можат да се обезбедат податоци за таквата активност или нивното обезбедување би било сврзано со поголеми тешкотии за да се спречи извршувањето на кривичното дело, вооружениот напад или онеспособувањето на безбедносниот систем“, стои во членот 29.

Барањето за донесување наредба за прислушување може да поднесе:

  • Министерот за внатрешни работи
  • Министерот за одбрана

или

  • Лице овластено од нив.

Барањето се доставува до:

  • Државниот јавен обвинител
  • Тој потоа го поднесува до судија на Врховниот суд кој дава наредба за прислушување
  • Судијата може да дозволи следење на комуникациите не подолго од шест месеци.

Сето ова се однесува на домашното законодавство, а однесувањето на дипломатите и на органите во земјата во која службуваат е уредено и со Виенската конвенција која го штити нивното дејствување на „туѓа“ територија.

По повлекувањето на целокупниот персонал од амбасадата на Србија во Македонија на итни консултации во Белград, српските власти соопштија дека тоа е направено бидејќи имало докази за „многу офанзивни разузнавачки активности против органите и институциите на Србија во Македонија“. Српските медиуми објавија дека српските дипломати во Македонија биле следени, прислушувани и застрашувани од македонските служби.

На ваквите тврдења, министерот за надворешни работи, Никола Димитров на прес-конференција изјави дека Владата ниту имала намера, ниту пак дала наредби да се вршат разузнавачки активности против и на штета на некоја од соседните држави, вклучувајќи ја и Србија и дека чекаат официјални информации од Белград за ваквите тврдења.


Трајанов: Македонија треба да се воздржи од реципрочни мерки кон Србија


Скопје, 22 август, 2017 - 13:44 (META) 

Повлекувањето на персоналот од амбасадата на Србија во Македонија е сценарио за дестабилизација на Балканот од пошироки размери, каде се испреплетуваат геостратешките интереси на повеќе центри на моќ, сметаат од Демократскиот сојуз.

Од партијата на поранешниот пратеник и министер за внатрешни работи, Павле Трајанов, велат дека со овој непромислен, избрзан и неавтентичен акт на Србија, главната цел е да се блокираат евроатланските процеси на Македонија и да се спречи или забави приемот на земјата во НАТО и почетокот на преговорите за влез во Европската Унија.

„Повеќе од сигурно е дека Србија со поддршка од странство е ‘вовлечена’ во оваа непромислена авантура, која има поткрепа и од политички структури во Македонија. Македонија треба да се воздржи од реципрочни мерки и да се залага за продлабочување на соработката со Република Србија и при тоа, да не отстапува од нашите национални, државни и стратешки интереси за членство во НАТО и во ЕУ“, велат од партијата.

Оттаму додаваат дека наводните офанзивни разузнавачки активности можеби се резултат на добро смислена стратегија со „поддршка и инволвираност на припадници на безбедносни служби во Македонија, кои не се сложуваат со политиката на новата Влада и реформите кои се одвиваат“.


Трамп ја исклучи можноста за повлекување на САД од Авганистан


Вашингтон, 22 август, 2017 - 12:40 (META) 

Претседателот на САД, Доналд Трамп ја исклучи можноста од повлекување на амерканските трупи од Авганистан. Трамп, како што јавуваат светските агенции, ова го рекол во говор во воената база Форт Мајер близу Вашингтон, претставувајќи ја американска стратегија за Авганистан.

Тој не навел бројка на евентуални дополнителни трупи, ниту зборувал за временските рокови, посочувајќи дека неговата стратегија ќе биде заснована на условите на терен.

-Носечки столби на нашата нова стратегија е премин од пристапот кој се засноваше на временски рокови, на оној кој се заснова на условите. Повеќе пати досега кажав дека би било контрапродуктивно за САД однапред да ги објавуваат датумите за почеток или крај на нашите воени опции. Нема да зборуваме за бројот на војници или за плановите за воените активности во иднина. Условите на терен, а не произволните рокови, ќе бидат она на што од сега ќе се заснова нашата стратегија – рекол Трамп.

Тој, исто така го предупредил Пакистан дека „може многу да изгуби“ доколку не престане да им пружа засолниште на талибанците.

-Пакистан ќе има корист ако соработува со нас во Авганистан, но многу ќе изгуби како продолжи да им дава засолниште на терористите. Тоа мора веднаш да се промени – истакнал американскиот претседател.

Трамп пред доаѓање во Белата куќа се залагаше за повлекување од Авганистан.

-Мојот првичен инстинкт беше за повлекување, но кога сте во Овалната соба се носат поинакви одлуки – изјавил Трамп, доцна синоќа.

Во Авганистан во моментот се наоѓаат околу 8.400 американски војници, како поддршка на локалните власти во борбата против бунтовниците по повлекувањето на меѓународните сили кон крајот на 2014 година.


Дачиќ: Порака за Македонија – знаеме што сте договарале


Белград, 22 август, 2017 - 12:23 (META) 

Шефот на српската дипломатија Ивица Дачиќ денеска изјави дека одлуката на Србија да го повлече персоналот од амбасадата во Македонија всушност преставува порака до Скопје дека Србија „знае што се договарале и што се договориле“.

Тоа, како што истакна Дачиќ, не е нешто што им се прави на пријателите, но дека и покрај тоа Србија сака добри односи со сите држави во регионот поради мир и стабилност.

– Србија сака да ја смири новонастанатата ситуација со Македонија која не се базира на претпоставки, туку на недвосмислено утврдени факти кои говорат за засилено офанзивно дејствување кон Србија – изјави Дачиќ во утринската програма на телевизијата „Пинк“.

Српскиот министер за надворешни работи најави дека претседателот на Србија, Александар Вучиќ утре телефонски ќе разговара со македонскиот премиер Зоран Заев, а дека тој ќе се слушне со неговиот колега Никола Димитров, но и дека српската премиерка Ана Брнабиќ ќе има прилика да се сретне со Заев на меѓународен собир овие денови.

Дачиќ истакна дека Србија не преземала и не презема ништо против Македонија сите овие години и дека била многу коректна и конструктивна и не се мешала во внатрешните работи на Македонија дури ни, како што вели, во турбулентните периоди кога имало секојдневни протести.

– Не постои ништо врз основа на што би можело да се утврди дека Србија презела било што би било против интересите на Македонија – додаде Дачиќ и потсети дека Македонија има проблем и дека не го разрешила прашањето за името на државата.

На пораката на македонската владата дека по прашањето на кандидатурата за Косово за членство во УНЕСКО ќе се води по ставовите на поголемиот број држави членки на ЕУ, Дачиќ вели дека ако Србија има став како ЕУ тогаш би можела да ја поништи претходната одлука и да ја признае Македонија под името со кое таа седи во Брисел – а тоа е БЈРМ.

Дачиќ вели дека и претходно постоеле разузнавачки дејствувања, но дека во последниот период имало наредби тие делувања да се зајакнат. Тој додаде дека не го загрижува тоа што го прислушувале неговиот телефон затоа што тоа што тој го зборува на телефон го кажува и јавно.


Владата останува на својот став и нема да расправа за случајот со Србија на седница


Скопје, 22 август, 2017 - 10:20 (META) 

Владата на денешната седница нема да расправа за дипломатскиот инцидент со Србија, која пред два дена го повлече целокупниот персонал од својата амбасада во Скопје, на консултации во Белград, поради, како што изјавија од српското раковдство „офанзивните разузнавачки активности во Македонија против Србија“.

Од Владата за „Мета“ велат дека случувањата со Србија не се на дневен ред на денешната седница, а нема да има ниту дополнителни реакции на тврдењата на Белград.

– Ставот на Владата е кажан вчера и остануваме на него – велат од Владата.

Владата вчера соопшти дека без да носи избрзани заклучоци во врска со повлекувањето на целокупниот персонал од амбасадата на Србија, ги поздравува најавите на официјален Белград за „заштита на пријателските односи и за враќање на состојбите во вообичаени рамки“.

Инаку, белградски „Блиц“, повикувајќи се на анонимни извори, денеска во своето печатено издание пишува дека српските дипломати во Скопје, без никаков повод биле следени, а биле применувани и методи на застрашување“. Дел од притисокот, пишува српскиот весник, бил со „одобрение на странците“.

Шефот на српската дипломатија, Ивица Дачиќ вчера изјави дека Србија е за пријателски односи со Македонија, но, порача дека Белград би можела да го промени ставот во врска со примената на уставното име на Македонија, доколку официјално Скопје го смени својот воздржан став и го поддржи влезот на Косово во УНЕСКО.


Владатa без избрзани заклучоци ги поздрави најавите на Белград за пријателски односи


Скопје, 21 август, 2017 - 19:50 (META) 

Владата попладнево соопшти дека без да носи избрзани заклучоци во врска со повлекувањето на целокупниот персонал од амбасадата на Србија во земјава на консултации во Белград, ги поздравува најавите на официјален Белград за „заштита на пријателските односи и за враќање на состојбите во вообичаени рамки“

„Република Македонија развива пријателски односи со сите соседни земји. Новата Влада на Република Македонија е цврсто посветена и презема интензивни чекори во насока на решавање наспроти создавање проблеми, унапредувајќи ги добрососедството, соработката и партнерството со Република Србија, како и со другите земји од опкружувањето. Убедени сме дека тоа е единствениот начин регионот одлучно да зачекори напред. Во врска со конкретниот случај, не носејќи избрзани заклучоци, ги поздравуваме најавите од официјален Белград за заштита на пријателските односи и за враќање на состојбите во вообичаени рамки“, стои во соопштението од Владата.

Претседателот на Србија, Александар Вучиќ и шефот на српската дипломатија Ивица Дачиќ денеска изјавија дека персоналот во амбасадата на Србија во Македонија е повлечен на консултации во Белград, откако од страна на српските разузнавачки органи „биле добиени доволно докази за многу офанзивни разузнавачки активности против органите и институциите на Србија“.

– Наша работа е нашите луѓе да бидат подготвени и да се заштити пријателството меѓу Србите и Македонците и да дознаеме како да делуваме во поинакво и ново опкружување кое нам не ни било познато до пред неколку месеци – рече Вучиќ.

Српскиот министер за надворешни работи повторно порача дека Србија би можела да го промени ставот во врска со примената на уставното име на Македонија, доколку официјално Скопје го смени својот воздржан став и го поддржи влезот на Косово во УНЕСКО.